“LOHIABADA ena Taravatu dekenai idia moale” taudia idia moale momokani. Unai bamona taudia ese “dina bona hanuaboi ibounai lalonai” Dirava ena Hereva idia duahia. (Sal. 1:​1, 2) Oi ese unai moale oi mamia, a? Edena dala ai Dirava ena Hereva amo oi abia moalena oi habadaia diba?

Hereva ta ta oi duahia sibona lasi. Emu lalona ai oi duahia sivaraidia oi itaia be namo. Edia hereva idia hahedinaraia taudia edia gado regena oi kamonai. Baibel ena karoa ginigunadia oi duahia neganai, Iehova ena hereva oi kamonai, tanobada be taunimanima idia noholaia diba gabuna ai ia lao totona ia karaia karadia ta ta ia hahedinaraia. Iena Natuna, Gaukara Tauna Badana, ia hamaoroa taunimanima ginigunadia do idia havaraia neganai, ena hereva oi kamonai. Oiemu lalona ai inai oi itaia: Adamu bona Heva idia gwau-edeede, Dirava ese ia hahemaoro henidia, bona Paradaiso amo ia luludia. (Genese, karoa 1-3) Guba dekena amo gado regena ta ia gwau Iesu Keriso be Dirava ena Natuna, Iena lalokau, taunimanima dainai ena mauri ia henia totona Dirava ese ia siaia, unai oi duahia neganai hoa mamina oi abia. (Mat. 3:​16, 17) Aposetolo Ioane ena hemami oi laloa toho, Iehova be ia dekenai ia gwau: “Harihari be gau ibounai lau karaia matamata inai.” (Apok. 21:⁠5) Momokani, unai dala ai Dirava ena Hereva oi duahia neganai moale bada do oi abia!

Dirava ena lauma amo idia vara toretoredia oi duahia noho, bona do oi diba Iehova be hoa ia havaraia Dirava badana. Do oi ura bada, ita ia lalokau henia bona ia hebogahisi henia Tauna, mai manau ida iena ura ita karaia toho neganai ita ia durua Tauna, bona eda gaukara ibounai lalonai ita kwalimu dalana ia hadibaia Tauna kahirakahira oi lao.​—⁠Ios. 1:8; Sal. 8:1; Isa. 41:⁠10.

Baibel duahiduahi karana oi habadaia neganai, Dirava ena ura oi totona do oi dibaia namonamo bona oiemu moale ia bada ia lao. To oiemu moale be unai sibona lasi. Oiemu duahiduahi amo heduru oi abia dainai aonega dalanai hekwakwanai oi hanaia neganai, oiemu hemami be salamo torea tauna ena hemami bamona, ia gwau: “Lohiabada e, oiemu hadibaia hereva be namo herea momokani. Unai dainai mai egu kudouna ibounai danu, idia dekenai lau kamonai henia noho.” (Sal. 119:129) Do oi moale bada danu, bema Baibel ai oi itaia hakaua herevadia ese oi idia durua, emu lalohadai bona ura gaudia be Dirava ena lalohadai hegeregerena oi haidaua totona.​—⁠Isa. 55:​8, 9.

 Baibel ese dika amo ita ia gimaia bona ita dekenai dala maorona ia hadibaia. Ita duahia neganai, ita mamia Iehova be Tamana ta bona tauanina ena ura dikadia ita badinaia neganai do ita davaria hekwakwanai be ia diba. Ia ura lasi iena kara maoromaoro taravatudia hadikaia karana amo do ia vara dika bada ita davaria. Ia ese ita ia laloa bada bona ia ura mauri namona ita moalelaia. Iena Hereva ita duahia neganai, ita lalo-parara namonamo ia be iseda Dirava bona guba Tamana be hahenamo badana.

Salamo torea tauna ese dina iboudiai Dirava ena Hereva idia duahia taudia ia herevalaia, ia gwau: “Edia gaukara ibounai be ena anina ia vara, bona mai edia kwalimu danu.” (Sal. 1:⁠3) Oibe, ena be ita goevadae lasi, ena be Satani ena tanobada dikana ai ita noho, bona ena be Diabolo ese ita ia hamorua toho, to hanaihanai Dirava ena Hereva lalonai idia noho herevadia ita duahia bona ita badinaia karana amo, Iehova ida iseda hetura karana dekenai mai anina bada gaudia ibounai lalonai do ita kwalimu diba.

Inai tanobada dikana ese ita ia veria toho dainai, dina ta ta ibounai nega sisina lalonai Havaraia Tauna ena lalohadai ita laloa dainai goada ita abia. Edia abidadama dainai dibura dekenai idia noho taudia haida ese niuspepa herevadia amo siri haida idia abia sibona. Idia utudia oho, idia lalodiatao, bona idia lalohadailaidia. Iehova ese edia hekwarahi ia hanamoa, badina Dirava ena Hereva amo diba idia abia totona edia noho dalana hegeregerena idia karaia diba gaudia idia karaia. (Ioa. 17:⁠3) To, ita momo be unai bamona idia koua lasi. Namo lasi ita laloa, dina iboudiai Baibel ena siri ta ita duahia haraga dainai hoa dalanai ita do ia durua. To, hahenamo do ita davaridia, bema iseda mauri lalonai gau haida ita haidaua bona dina ta ta ai Baibel ena kahana ta ita duahia, ita laloa, bona iseda mauri lalonai ita gaukaralaia karadia ita atoa guna.

Ita diba, iseda palani namodia do idia moru diba. Unai ia vara neganai, ita ese mai anina bada gaudia ita atoa guna. Hegeregere, lalona ita hadaia kava lasi dina ta eiava rua lalonai ranu do ita inua lasi totona. Unai hegeregerena, herevana dahaka ia vara iseda mauri lalonai, namona be dina iboudiai nega ita atoa bona hereva momokani ena ranu amo sibona do ita hagoadaia.​—⁠Kara 17:⁠11.

Oi ese Baibel ibounai oi duahia vadaeni, a? Haida idia laloa Genese amo ela bona Apokalupo idia duahia be gaukara auka hereana. Unai dainai, idia ura Baibel ibounai idia duahia taudia momo ese Keristani Greek Revarevadia idia duahia guna. Dahaka dainai? Reana idia itaia haraga Keriso ena aena gabudia dekenai idia raka toho lalonai, unai Baibel bukadia amo heduru  idia abia diba. Eiava reana idia laloa Keristani Greek Revarevadia be kahana badana lasi​—⁠Baibel ibounai amo ia be kahana maragina. To unai buka 27 idia duahia ore murinai, Heberu Revarevadia edia buka 39 idia laloa bona idia duahia bona moalelaia matamaia. Heberu Revarevadia idia duahia ore neganai, Baibel duahia hanaihanai karana idia manadalaia vadaeni, bona unai idia karaia noho, Keristani Greek Revarevadia be nega iharuana idia duahia, bona unai kara idia haorea lasi. Oi danu, namona be dina iboudiai Dirava ena Hereva duahia karana be emu mauri ibounai lalonai oi karaia karana ta ai oi halaoa.

Emu ruma bese eiava kongregesen lalonai ia duahiduahi diba lasi tauna ta ia noho, a? Reana ia dekenai Baibel oi duahia hanaihanai diba? Oi ese namo do oi abia, bona ia ese ia kamonai gaudia ia lalohadailaia bona iena mauri lalonai ia badinaia neganai namo ia abia danu.​—⁠Apok. 1:⁠3.

Gabeai, reana oi ura oiemu Baibel duahiduahi idia durua karadia ma haida oi karaia. Unai bamona karadia haida dainai Baibel ena kahana idauidau edia anina kahana ma haida dekenai do oi laloa bada. Bema emu Baibel ena  rau lalodiai siri ma haida idia torea, unai ese oi idia hakaua histori ena sivarai bona sivarai ma haida oi itaia totona. Oi idia durua diba, salamo haida bona Iesu Keriso ena aposetolo taudia edia revareva haida idia torea ena badina oi itaia totona. Insight on the Scriptures volium be Baibel ese ia herevalaia taudia, gabudia, bona karadia idauidau dekenai diba bada idia henia. Lista haida ese Baibel ena peroveta herevadia edia guguru daladia bona nega tamona ai idia noho king bona peroveta taudia idia hahedinaraia, bona Baibel ena sivarai momo idia vara dinadia idia gwauraia.

Oi dibaia gaudia oi lalohadailaia neganai, Dirava ena taunimanima huanai idia vara gaudia edia badina do oi lalo-pararalaia. Iehova ese ena taunimanima ia kara henia daladia edia badina do oi davaria danu. Iehova ena lalohadai gavamani bona bese idauidau bona taunimanima ta ta edia kara dekenai do oi diba. Unai dainai iena laloa dalana do oi diba namonamo.

Idia vara gaudia edia gabu idauidau be emu lalona ai oi itaia neganai, Baibel ena sivarai ese oiemu lalona do idia veria. Baibel tanodia edia mapu ese gabu idauidau edia toana bona edia padana ena daudau idia hahedinaraia. Hegeregere, edena gabu ai Israela taudia ese Davara Kakakakana idia hanaia? Gwauhamata Tanona ena bada be edena bamona? Iesu ese tanobada dekenai ena hesiai gaukara ia karaia lalonai, ia raka ena daudau be edena bamona? Paulo ese ena misinari laolao lalodiai edena bamona gabudia ia itaia? Mapu bona gabu edia toana idia hahedinaraia toretoredia amo oi diba gaudia ese oiemu duahiduahi karana idia hanamoa. Baibel tanodia edia mapu be edeseniai oi davaria diba? Idia haida be New World Translation of the Holy Scriptures Baibel lalonai idia noho. Insight volium lalodiai be mapu 70 bamona idia noho, bona volium ginigunana ena dokona raudia haida ai be mapu edia indeks ia noho. Watch Tower Publications Index bukana oi gaukaralaia, mapu ma haida oi davaria totona. Bema unai bukadia idia noho lasi, Gima Kohorona lalonai idia halasia mapu do oi gaukaralaia, oiemu Baibel duahiduahi idia durua totona.

Heberu Revarevadia lalonai, King Davida ese Iehova ia hanamoa, ia gwau: “Dirava e, oiemu laloa be lau dekenai idia dobu bona namo herea momokani. Oiemu laloa be momo herea momokani.” (Sal. 139:17) Keristani Greek Revarevadia lalonai, aposetolo Paulo ese Iehova ia hanamoa badina Ia ese ‘iseda lalona dekenai iena diari ia atoa, ita do ia hadiaria totona. . . . Dirava ena hairai diarina be Keriso ena vairana dekenai ia hedinarai.’ (2 Kor. 4:⁠6) Paulo be lagani handred momo Davida ena nega murinai ia noho; to idia ruaosi ese Dirava ena Hereva idia moalelaia. Do oi moalelaia diba danu, bema nega oi atoa Iehova ena Hereva helagana lalonai oi dekenai ia hahedinaraia herevadia ibounai oi duahia.