IDAUNEGAI, Keristani negana ia do mai lasi neganai, Iehova ese kamonai tauna Aberahamo dekenai “tanobada besedia ibounai” hanamoa dalana ia gwauraia. (Gen. 22:18) Danu, ena lauma amo Solomona ia hakaua, taunimanima iboudiai do idia karaia karana badana ta ia torea totona, ia gwau: “Dirava [“momokanina,” NW] do oi gari henia, bona iena oda do oi badinaia, badina be taunimanima edia gaukara korikori be unai sibona.” (Had. 12:13) To tanobada besedia ibounai ese unai gaudia be edena bamona do idia dibaia?

Ena be idaunegai amo ema bona hari Dirava ena hereva idia abia dae taudia idia noho, to Baibel ese ia hahedinaraia tanobada besedia ibounai dekenai sivarai namona harorolaia gaukarana be “Lohiabada ena Dina” lalonai do ia vara. Unai be lagani 1914 ai ia matamaia. (Apok. 1:10) Apokalupo 14:​6, 7 ese iseda nega ia perovetalaia neganai, ia gwau aneru edia hakaua dalana henunai “bese ibounai, iduhu ibounai, gado ibounai bona kopina idauidau ibounai taudia” dekenai mai anina bada sivaraina do idia harorolaia. Do idia hagoadadia: “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada, bona davara, bona ranu guridia ibounai ia karaia Diravana do umui tomadiho henia.” Dirava ena ura be unai sivarai harorolaia gaukarana ia vara. Iseda hahenamo be unai gaukara ita karaia.

“Dirava Momokanina.” Dirava momokanina be daika idia hepapahuahulaia negana ai, Iehova ese inai hereva, “Umui be lauegu hereva hamomokania taudia,” ia gwauraia. (Isa. 43:10) Taunimanima ese tomadiho ta idia badinaia eiava dirava ta idia abidadama henia sivaraina ita harorolaia lasi. To, namona be guba bona tanobada ia Havaraia Diravana be Dirava momokanina tamona idia diba dalana ita kehoa. (Isa. 45:​5, 18, 21, 22; Ioa. 17:3) Dirava momokanina sibona ese vaira negana ia gwauraia maoromaoro diba. Iseda gaukara be taunimanima ita hamaorodia, Iehova ena hereva be guna ia guguru dainai ita diba momokani vaira negana totona ia gwauraia gwauhamata iboudiai be do  idia guguru danu.​—Ios. 23:14; Isa. 55:​10, 11.

Momokani, ita haroro henia taudia momo be dirava idauidau idia tomadiho henia eiava idia gwau dirava ta idia tomadiho henia lasi. Eda hereva do idia kamonai totona, reana ita bona idia ese ita laloa gauna ta ita herevalaia guna be namo. Kara 17:​22-​31 ai ia noho sivaraina ese ita ia durua diba. Oi itaia, ena be aposetolo Paulo be mai kara namo ida ia hereva, to ia hahedinaraia goevagoeva taunimanima iboudiai ese guba bona tanobada ia Havaraia Diravana tamona vairanai edia kara ena badina do idia gwauraia.

Dirava Ena Ladana Hahedinaraia. Dirava momokani ena ladana oi hahedinaraia. Iehova ese ena ladana ia ura henia. (Eso. 3:​15, NW; Isa. 42:​8, NW) Ia ura taunimanima ese unai ladana idia diba. Iena ura dainai iena ladana hairaina be nega 7,000 bamona Baibel lalonai ia noho. Iseda maduna be taunimanima dekenai unai ladana ita hadibaia.​—Deu. 4:35.

Taunimanima ese Iehova idia diba bona mai abidadama ida ia dekenai idia noinoi neganai mauri do idia abia. (Ioe. 2:32; Mal. 3:16; 2 Tes. 1:8) To, taunimanima momo herea be Iehova idia diba lasi. Bona idia momo be idia gwau Baibel ese ia gwauraia Diravana idia tomadiho henia. To herevana Baibel idia abia bona idia duahia, reana Dirava ena ladana idia diba lasi badina hari idia hahanaia Baibel momo amo unai ladana idia kokia. Haida ese Iehova ena ladana idia diba ena badina tamona be edia tomadiho gunalaia taudia ese idia hamaorodia unai ladana do idia gaukaralaia lasi.

Edena dala ai taunimanima dekenai Dirava ena ladana ita hahedinaraia? Dala hereadaena be Baibel dekenai​—bema mai dalana, sibona edia Baibel dekenai​—ita hahedinaraia. Baibel haida ai, unai ladana be nega tausen momo ia noho. Baibel ma haida ai, ia be Salamo 83:18 eiava Esodo 6:​3-6 ai sibona ia noho, eiava reana Esodo 3:​14, 15 eiava 6:3 edia futnout dekenai ia noho. Baibel momo dekenai, “Lohiabada” bona “Dirava” idia gaukaralaia, bona leta idaudia ai idia torea bema gado ginigunadia ai Dirava ena ladana be unai kahadia dekenai ia noho. Bema Baibel ta dekenai inai nega ena gado hahanaia taudia ese Dirava ena ladana idia kokia momokani, reana idia karaia karana be Baibel gunana ta amo taunimanima dekenai umui hahedinaraia diba. Tano haida ai Dirava ena ladana be tomadiho anedia eiava ruma badadia haida ai oi hahedinaraia diba.

Dirava idauidau idia tomadiho henia taudia ida oi hereva neganai danu, New World Translation Baibel ai Ieremia 10:​10-13 oi gaukaralaia diba. Unai siri ese Dirava ena ladana sibona ia hahedinaraia lasi to ia be daika ia gwauraia hedinarai namonamo.

Iehova ena ladana be dagi ladadia “Dirava” bona “Lohiabada” amo oi hunia lasi, Kerisendom ese ia karaia bamona. To ita gwau lasi namona be emu herevahereva iboudiai oi hamatamaia negana amo unai ladana do oi gaukaralaia. Haida ese ita idia lalo-dika henia kava dainai, herevahereva do idia hadokoa haraga. To herevahereva oi hamatamaia namonamo murinai,  Dirava ena ladana oi gaukaralaia be namo.

Baibel ese Dirava ena ladana ia gaukaralaia negadia edia momo ese dagi ladadia “Lohiabada” bona “Dirava” ia gaukaralaia negadia ita haboua ena momo ia hanaia. To, Baibel idia torea taudia ese sentens iboudiai dekenai Dirava ena ladana idia gaukaralaia lasi. Edia hereva dalana hegeregerena idia gaukaralaia mai hemataurai ida. Unai be haheitalai namona.

Unai Ladana ese Ia Hahedinaraia Diravana. Dirava be mai ena ladana be hereva momokani badana ta, to unai sibona ita diba be hegeregere lasi.

Taunimanima ese Iehova idia lalokau henia bona mai abidadama ida ia dekenai idia noinoi totona, namona be idia diba ia be edena bamona Diravana. Iehova ese Sinai Ororona dekenai Mose dekenai sibona ena ladana ia hadibaia neganai, Ia ese ladana “Iehova” ia gwauraia loulou sibona lasi. Iena kara namodia haida ia gwauraia. (Eso. 34:​6, 7) Unai haheitalai ita tohotohoa be namo.

Herevana oi ese kamonai matamata taudia oi haroro henia eiava kongregesen dekenai hereva oi henia, Basileia ena hahenamo oi herevalaia neganai, unai gwauhamata ia henia Diravana idia hahedinaraia dalana oi gwauraia. Iena taravatu oi gwauraia neganai, iena aonega bona lalokau idia hahedinaraia dalana oi herevalaia. Oi hahedinaraia goevagoeva Dirava ena taravatu ese ita idia hametaua lasi, to ita idia durua totona ia henia. (Isa. 48:​17, 18; Mika 6:8) Iehova ese ena siahu ia gaukaralaia negadiai ena kara, ena taravatu, bona ena ura idia hahedinaraia daladia oi gwauraia hedinarai. Iehova ese ena kara idauidau ia hahedinaraia maoromaoro karana oi gwauraia bona idia itaia be namo. Namona be taunimanima idia kamonai oiemu hemami Iehova dekenai be edena bamona. Emu lalokau Iehova dekenai ese ma haida dekenai unai bamona lalokau ia havaraia diba.

Hari inai nega totona mai anina bada sivaraina be taunimanima ibounai ese Dirava idia gari henia be namo. Iseda hereva amo, unai bamona Dirava gari henia karana ita havaraia be namo. Unai gari be gari namona, Iehova hoalaia bona matauraia bada karana. (Sal. 89:7) Anina ta be ita diba momokani Iehova be Hahemaoro Tauna hereadaena bona iena lalo-namo ita abia amo mauri do ita abia. (Luka 12:5; Roma 14:12) Unai bamona gari karana be Dirava ita lalokau henia bada karana ida ita hakapua, bona unai dainai, ita ura bada ia ita hamoalea. (Deu. 10:​12, 13) Danu, Dirava ita gari henia dainai dika ibounai ita inai henia, Dirava ena taravatu ita badinaia, bona mai eda kudouna ibounai ida ia ita tomadiho henia. (Deu. 5:29; 1 Siv. 28:9; Aon. 8:13) Unai gari ese ita ia gimaia dainai Dirava ita hesiai henia lalonai tanobada ena gau idauidau ita ura henia lasi.​—1 Ioa. 2:​15-17.

Dirava Ena Ladana​​—“Kohoro Aukana.” Iehova idia diba momokani taudia be ia ese dika amo ia gimaia. Unai gauna be iena ladana eiava iena kara haida idia gwauraia diba dainai ia vara lasi. Unai ia vara ena badina be Iehova dekenai idia tabekau. Aonega Herevadia 18:10 (NW) ese unai bamona taudia ia herevalaia, ia gwau: “Iehova  ena ladana be kohoro aukana. Kara maoromaoro tauna be ia lalonai ia heau vareai bena ia ese ia gimaia.”

Dala ia kehoa negadiai, ma haida oi hagoadaia Iehova dekenai idia tabekau totona. (Sal. 37:3; Aon. 3:​5, 6) Unai bamona tabekau karana ese ia hahedinaraia Iehova bona ena gwauhamata idia abidadama henia. (Heb. 11:6) Bema taunimanima ese Iehova “ena ladana idia noinoi henia,” badina idia diba momokani Iehova be Guba bona Tanobada edia Lohia Badana, ena dala idia ura henia, bona idia abia dae hahemauri momokanina be ia sibona amo ia mai, idia be​—Dirava ena Hereva ese ita ia hamaoroa bamona​—mauri do idia davaria. (Roma 10:​13, 14) Ma haida oi hadibaia neganai, idia oi durua edia mauri ibounai lalonai unai bamona abidadama idia hahedinaraia totona.

Taunimanima momo ese edia mauri lalonai hekwakwanai badadia idia davaria. Reana hanaia dalana idia diba lasi. Idia oi hagoadaia, Iehova ena dala idia dibaia, ia idia abidadama henia, bona idia diba gaudia idia badinaia totona. (Sal. 25:5) Idia oi hagoadaia, mai momokani ida Dirava ena heduru abia totona idia noinoi bona ena hahenamo dainai ia idia tanikiu henia. (Fili. 4:​6, 7) Iehova idia diba neganai, Baibel ena hereva haida idia duahia sibona dainai lasi to edia mauri lalonai iena gwauhamata idia guguru dalana idia itaia dainai, Iehova ena ladana ena anina korikori idia lalo-pararalaia karana amo ia vara noho namona do idia moalelaia matamaia.​—Sal. 34:8; Ier. 17:​7, 8.

Idia kehoa daladia ibounai oi gaukaralaia namonamo, taunimanima oi durua Dirava momokanina, Iehova, gari henia karana bona iena taravatu badinaia karana ena aonega idia lalo-pararalaia bona laloa bada totona.

IESU KERISO ia toreisi lou to guba dekenai ia do giroa lasi neganai, iena hahediba taudia ia hadibaia, ia gwau: “Lauegu ladana do umui gwauraia hedinarai . . . tanobada ena kahana ibounai.” (Kara 1:8) Iseda negai Dirava ena kamonai hesiai taudia be idia gwauraidia “Iesu ena hereva momokani idia gwauraia hedinarai” taudia. (Apok. 12:17) Unai hereva momokani oi gwauraia goadagoada, a?

Mai momokani ida idia gwau Iesu idia abidadama henia taudia momo be idia diba lasi Iesu be tanobada dekenai ia do vara lasi neganai ia noho vadaeni. Idia laloa lasi tanobada ai ia noho neganai ia be tau korikorina. Ia be Dirava ena Natuna ena anina idia lalo-pararalaia lasi. Iesu ena gaukara Dirava ena ura hagugurua karana lalonai idia diba namonamo lasi. Hari ia karaia gaudia idia diba lasi, bona vaira negana ai do ia karaia gaudia edia anina edia mauri dekenai idia diba lasi. Reana idia laloa kerere, idia laloa Iehova ena Witnes taudia ese Iesu idia abidadama henia lasi. Unai gaudia dekenai hereva momokani ita hahedinaraia be namo.

Taunimanima ma haida idia abia dae lasi Baibel ese ia herevalaia bamona tauna Iesu be momokani ia mauri noho. Haida idia laloa Iesu be tau namo hereana ta sibona. Momo idia abia dae lasi Iesu be Dirava ena Natuna. Unai bamona taudia dekenai ‘Iesu ena hereva momokani ita gwauraia hedinarai’ totona, ita hekwarahi, ita haheauka, bona mai aonega ida ita karaia be namo.

 Herevana kamonai taudia edia lalohadai be dahaka, to Dirava ese ia henia mauri hanaihanai idia abia totona Iesu Keriso idia diba be gau badana. (Ioa. 17:3) Dirava ia hahedinaraia goevagoeva, ia ura idia mauri noho taudia ibounai ese “Iesu Keriso do idia gwauraia hedinarai ‘Lohiabada’” bona ena siahu henunai idia noho. (Fili. 2:​9-11) Unai dainai, lalohadai kereredia idia dogoatao goadagoada taudia bona lalo-dika taudia ita davaria neganai danu, unai gauna do ita herevalaia. Ena be nega haida Iesu Keriso ita herevalaia diba​—nega ginigunana ai ita vadivadi neganai danu​—to nega ma haida, namona be mai aonega ida ita hereva, kamonai taudia ese Iesu idia laloa maoro matamaia totona. Bona reana dala idauidau ita laloa, idia ita vadivadi henia lou neganai Iesu ena sivarai ita habadaia totona. To, reana gau ibounai ita herevalaia diba lasi ela bona ta ida Baibel stadi ita karaia.​—1 Tim. 2:​3-7.

Iesu Ena Gaukara Badana Dirava Ena Ura Lalonai. Namona be taunimanima ita durua bena do idia lalo-parara, Iesu be “dala” dainai bona ‘Tamana dekenai do idia lao taudia ibounai edia dala ta be lasi, ia sibona’ dainai, Dirava ida hetura karana namona idia abia diba lasi bema Iesu Keriso idia abidadama henia lasi. (Ioa. 14:6) Bema Iehova ese iena vara guna Natuna dekenai ia henia gaukara badana be ta ia lalo-pararalaia lasi, Baibel ia lalo-pararalaia diba lasi. Dahaka dainai? Badina be Iehova ese ena ura ibounai hagugurua karana lalonai gaukara badana be unai Natuna dekenai ia henia. (Kol. 1:​17-20) Baibel ena peroveta herevadia lalonai unai be mai anina bada. (Apok. 19:10) Iesu Keriso ese Satani ena gwau-edeede karana bona Adamu ena kara dika amo idia vara hekwakwanai iboudiai do ia hamaoromaoroa.​—Heb. 2:​5-9, 14, 15.

Ta ese Keriso ena gaukara ia lalo-pararalaia totona, namona be ia abia dae taunimanima edia noho be dika herea bona idia sibodia idia ruhaia diba lasi. Ita ibounai be kara dika lalonai ita vara. Unai ena anina eda mauri dekenai be idauidau. To, dokonai, ita ibounai ita mase. (Roma 3:23; 5:12) Oi haroro henia taudia ida unai gauna oi herevalaia. Bena oi hahedinaraia Iehova ese Iesu Keriso ena mauri davalaia boubouna amo mai ena lalokau ida dala ia kehoa, unai boubou gauna idia abidadama henia taudia be kara dika bona mase amo ia ruhaia totona. (Mar. 10:45; Heb. 2:9) Unai ese idia dekenai dala ia kehoa, mauri goevadaena do idia moalelaia ela bona hanaihanai. (Ioa. 3:​16, 36) Unai be dala ma ta amo ia vara diba lasi. (Kara 4:12) Oi be hadibaia tauna dainai, namona be unai gaudia oi gwauraia sibona lasi, herevana ma haida eiava kongregesen oi hadibaia. Mai hebogahisi bona haheauka ida kamonai taudia oi durua tanikiu hemamina idia abia totona badina Keriso be eda Mauri Hoia Lou Tauna. Ta ese unai harihari gauna ia laloa bada neganai, iena lalohadai, kara, bona mauri lalonai ia tahua  gaudia ia haidaua diba.​—2 Kor. 5:​14, 15.

Momokani, Iesu ese nega tamona sibona ena mauri ia bouboulaia. (Heb. 9:28) To hari, Hahelaga Tauna Badana gaukarana ia karaia noho. Ma haida oi durua, unai ena anina idia lalo-pararalaia totona. Idia kahirakahira idia noho taudia edia hebogahisi lasi karadia dainai lalo-hekwarahi, lalohisihisi, hisihisi, eiava hekwakwanai idia davaria, a? Iesu be taunimanima neganai, unai bamona gaudia be ia dekenai idia vara. Iseda hemami ia diba. Ita be goevadae lasi dainai, ita mamia Dirava ena hebogahisi be mai anina bada, a? Bema Iesu ena boubou gauna amo Iehova ita noia eda kara dika ia gwauatao totona Iesu be “durua tauna, iseda Tamana ena vairanai.” Mai hebogahisi ida “ita totona Dirava dekenai ia noinoi noho!” (1 Ioa. 2:​1, 2; Roma 8:34) Iesu ena boubou gauna bona Hahelaga Tauna Badana gaukarana dainai, ita be Iehova ena “bogahisihisi ia noho helai gabuna” kahirakahira dekenai ita lao diba, nega maorona ai heduru ita abia totona. (Heb. 4:​15, 16) Ena be ita be goevadae lasi taudia, to Iesu ese Hahelaga Tauna Badana gaukarana amo ia henia heduru dainai, mai eda lalona goevana ida Dirava ita hesiai henia diba.​—Heb. 9:​13, 14.

Danu, Iesu be mai ena siahu bada, badina Dirava ese Keristani kongregesen ena Kwarana ai ia halaoa. (Mat. 28:18; Efe. 1:​22, 23) Unai kwara dagina ia abia dainai, Dirava ena ura hegeregerena ita ia hakaua. Ma haida oi hadibaia bona durua neganai, namona be idia lalo-parara taunimanima ta lasi, to Iesu Keriso be kongregesen ena Kwarana. (Mat. 23:10) Kamonai taudia oi davaria neganai, nega ginigunana amo emui kongregesen heboudia dekenai idia oi boiria, badina unuseniai “hesiai tauna mai ena kamonai, bona mai ena kara maoromaoro” ese ia halasia bukadia amo Baibel ita stadilaia. Unai “hesiai tauna” be daika oi hahedinaraia sibona lasi, to Biaguna be daika oi hahedinaraia danu, bena idia itaia Iesu ese kongregesen ia hakaua. (Mat. 24:​45-47) Idia oi hakaua lao elda taudia do idia hedavari henia, bona Baibel ese elda taudia totona ia gwauraia taravatudia oi herevalaia. (1 Tim. 3:​1-7; Tito 1:​5-9) Oi hahedinaraia kongregesen be elda taudia edia lasi, to idia ese ita idia durua Iesu Keriso ena aena gabudia dekenai ita raka totona. (Kara 20:28; Efe. 4:16; 1 Pet. 5:​2, 3) Unai kamonai taudia oi durua bena idia itaia, tanobada ibounai oreana ta be Keriso ena kwara dagina henunai ia gaukara noho.

Evanelia Bukadia amo ita diba, Iesu ena mase be kahirakahira bona Ierusalema dekenai ia vareai neganai, iena hahediba taudia idia gwau “Lohiabada ena ladana dekenai ia mai King ita hanamoa inai!” (Luka 19:38) Taunimanima ese Baibel idia stadilaia namonamo neganai, idia itaia Iehova ese Iesu dekenai lohia siahuna ia henia vadaeni, bona bese iboudiai taudia dekenai unai be mai anina bada. (Dan. 7:​13, 14) Kongregesen dekenai hereva oi henia eiava stadi oi karaia neganai, taunimanima oi durua Iesu ena lohia siahuna ena anina ita iboudiai dekenai idia lalo-pararalaia bona laloa bada totona.

Namona be oi hamaorodia iseda mauri dalana ese do ia hahedinaraia Iesu Keriso be King ita abia dae momokani eiava lasi bona mai eda ura ida iena lohia siahuna henunai ita noho eiava lasi. Iehova ese King dagina abia totona Iesu ia horoa murinai, Iesu ese ia murinai idia raka taudia dekenai ia henia gaukarana oi herevalaia. (Mat. 24:14; 28:​18-20) Iesu, Sisiba Henia Tauna Namo Herea, ena hereva amo oi hahedinaraia iseda mauri lalonai dahaka ita tahua guna be namo. (Isa. 9:​6, 7; Mat. 6:​19-34) Idia dekenai Maino ena Lohia ena hereva oi hahedinaraia, ia murinai idia raka taudia ese idia hahedinaraia karadia idia laloa totona. (Mat. 20:​25-27; Ioa. 13:35) Oi naria namonamo, ma haida idia karaia  karadia idia hegeregere eiava lasi oi gwauraia kava lasi, to idia oi hagoadaia, edia kara ese idia hahedinaraia Keriso ena king dagina henunai idia noho eiava lasi idia laloa totona. Unai oi karaia lalonai, oi hahedinaraia oi danu be unai oi laloa be gau badana.

Keriso be Du Bamona Oi Atoa. Baibel ia gwau tau ta be Keristani hahediba tauna ta ai idia halaoa gaukarana be ruma ta haginia gaukarana bamona bona ruma ena du be Iesu Keriso. (1 Kor. 3:​10-15) Unai oi karaia totona, taunimanima oi durua Baibel ese ia gwauraia hegeregerena Iesu do idia diba. Oi naria namonamo, idia laloa idia be oi murinai idia raka garina. (1 Kor. 3:​4-7) Idia oi hagoadaia Iesu Keriso idia laloa bada totona.

Bema du oi atoa namonamo, stiuden taudia do idia lalo-parara Keriso ese haheitalai namona ia hahedinaraia, ‘iena aena gabudia dekenai do ita raka’ totona. (1 Pet. 2:21) Unai du latanai ruma oi haginia totona, stiuden taudia oi hagoadaia Evanelia Bukadia be histori ena sivarai korikoridia bamona do idia duahia sibona lasi, to idia laloa unai be do ita tohotohoa haheitalai idia hahedinaraia. Idia oi durua, Iesu ia hahedinaraia lalohadai bona kara do idia tohotohoa totona. Idia oi hagoadaia, Iesu ena hemami ena Tamana dekenai, hedibagani bona hahetoho ia haheaukalaia dalana, Dirava ena siahu henunai ia noho dalana, bona nega idauidau ai taunimanima ia kara henia dalana idia laloa totona. Iesu ena mauri lalonai ia karaia goadagoada gaukarana oi hahedinaraia. Bena, stiuden tauna be ena mauri lalonai hahetoho ia davaria bona gau ta ia abia hidi neganai, ia sibona do ia nanadaia: ‘Inai bamona nega ai Iesu be edena bamona do ia kara? Do lau abia hidi karana ese ia hahedinaraia lau totona ia karaia gaudia lau laloa bada, a?’

Kongregesen vairanai oi hereva neganai, oi laloa lasi emu tadikaka ese Iesu idia abidadama henia vadaeni dainai, Iesu oi hahedinaraia goevagoeva be badina lasi. Unai abidadama habadaia totona oi gwauraia herevadia be mai anina bada. Hebou oi herevalaia neganai, Iesu ena dagi, ia be kongregesen ena Kwarana, ida oiemu hereva oi hakapua. Haroro gaukara oi herevalaia neganai, Iesu ese ena gaukara ia karaia lalonai ia hahedinaraia lalohadai oi herevalaia danu, bona Keriso be King dainai tanobada matamatana dekenai taunimanima do idia mauri totona hari idia ia haboua gaukarana oi hahedinaraia danu.

Ia hedinarai goevagoeva Iesu ena sivarai idia diba sibona be hegeregere lasi. Taunimanima be Keristani taudia korikoridia ai idia lao totona Iesu idia abidadama henia bona idia lalokau henia momokani be gau badana. Unai lalokau dainai iena hereva do idia badinaia. (Ioa. 14:​15, 21) Unai lalokau ese taunimanima do ia durua, hekwakwanai negadiai abidadama dekenai do idia gini goada, edia mauri dinadia ibounai lalonai Keriso ena aena gabudia dekenai do idia raka noho, bona do idia hamomokania idia be lo Keristani taudia, du goadana latanai idia “gini goada.” (Efe. 3:17) Unai bamona kara ese Iehova, Iesu Keriso ena Dirava bona Tamana, ia abia isi.

IESU ese ena noho bona tanobada oromana ena dokona ena toana ia gwauraia neganai, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”​—Mat. 24:14.

Unai tanobada ibounai dekenai do idia harorolaia sivaraina be dahaka? Ia be Iesu ese ita ia hadibaia Basileia ena sivarai, Dirava ita guriguri henia neganai ita gwauraia, ita gwau: “Oiemu Basileia do ia mai.” (Mat. 6:10) Apokalupo 11:15 ia gwau “tanobada biagua siahuna [“basileia,” NW] be iseda Lohiabada [Iehova] bona iena Keriso idia abia vadaeni,” badina unai lohia siahuna be Iehova ena bona ia ese King Keriso dekenai ia henia. To namona be oi laloatao, Iesu ia gwau iseda negai idia gwauraia sivaraina ese aposetolo taudia edia nega lalonai ia murinai idia raka taudia idia harorolaia sivaraina ia hanaia. Idia ese taunimanima idia hamaoroa: “Dirava ena Basileia be umui dekenai kahirakahira ia ginidae.” (Luka 10:9) Unai neganai King dagina abia totona Iehova ese ia horoa tauna, Iesu, be idia kahirakahira ia noho. To Mataio 24:14 ena hereva bamona, Iesu ia peroveta Dirava ena ura ia guguru totona tanobada ibounai lalonai gau ma ta do idia harorolaia danu.

Peroveta tauna Daniela ese matahanai lalonai unai gauna ia itaia. Tau ta ia itaia, “iena toana be taunimanima edia toana bamona,” Iesu Keriso unai, ese “Mauri Noho Hanaihanai Tauna,” Iehova Dirava, amo “siahu bona mataurai bona dagi bada [“basileia,” NW]” ia abia bona “bese ibounai bona iduhu ibounai bona gado ibounai taudia ese iena hesiai gaukara do idia karaia.” (Dan. 7:​13, 14) Unai guba bona tanobada dekenai mai anina bada gauna be lagani 1914 ai guba dekenai ia vara. Unai murinai, Diabolo bona ena aneru be tanobada dekenai idia negea diho. (Apok. 12:​7-10) Tanobada ena oromana gunana ena nega dokona ia matamaia. To kokia momokani negana ia do mai lasi neganai, tanobada ibounai dekenai idia harorolaia sivaraina be Iehova ena Mesia Pavapavana be hari guba amo ia lohia. Gabu iboudiai dekenai taunimanima idia hadibaia. Unai sivarai dainai idia karaia gauna ese edia lalohadai “taunimanima edia basileia” ia Lohia Tauna, Ataiai Momokani Diravana, dekenai ia hahedinaraia.​—Dan. 4:32.

Momokani, gau ma haida do idia vara danu! Hari ita guriguri noho, “Oiemu Basileia do ia mai,” to unai bamona ita hereva neganai ita laloa lasi Dirava ena Basileia haginia negana ia  do abia lasi. Lasi, ita laloa gauna be guba Basileia ese kara ta do ia karaia, Daniela 2:44 bona Apokalupo 21:​2-4 edia peroveta herevadia ia hagugurua totona. Tanobada be paradaiso ai do ia halaoa, bona Dirava bona dekena taudia idia lalokau henia taudia amo do ia honu. Ita ese “Basileia ena sivarai namona” ita harorolaia neganai, unai vaira negana ai do idia vara gaudia ita herevalaia. To danu, mai lalo-goada ida ita hahedinaraia Iehova ese iena Natuna dekenai lohia siahuna ia henia vadaeni. Basileia oi harorolaia neganai, unai sivarai namona oi hahedinaraia, a?

Basileia Oi Gwauraia Hedinarai. Edena dala ai Dirava ena Basileia harorolaia ena hahegani ita hagugurua diba? Herevahereva be dala idauidau amo ita hamatamaia diba taunimanima edia lalona ita veria totona, to namona be daudau lasi murinai idia itaia goevagoeva Dirava ena Basileia ena sivarai ita harorolaia.

Unai gaukara ena kahana badana be unai Basileia idia herevalaia siridia ita duahia eiava gwauraia. Basileia oi herevalaia neganai, oi hereva henia taudia ese Basileia ena anina idia lalo-pararalaia be gau badana. Oi gwau diba Dirava ena Basileia be gavamani ta, to reana unai sibona be hegeregere lasi. Reana haida ese ita itaia diba lasi gavamanina idia abia dae be auka. Dala idauidau ai idia ida unai oi herevalaia diba. Hegeregere, lai ita itaia diba lasi, to iseda mauri lalonai unai lai be mai ena siahu. Unai lai ia biagua Tauna ita itaia diba lasi, to ia hedinarai goevagoeva iena siahu be bada. Baibel ese ia gwauraia “Noho Hanaihanai King.” (1 Tim. 1:17) Eiava oi gwau diba, tano badana ta dekenai taunimanima momo be tano ena siti badana idia vadivadi lasi eiava edia matana amo edia lohia tauna idia itaia lasi. Unai gaudia be nius sivaraidia amo idia diba. Unai hegeregerena, gado 2,200 mai kahana dekenai idia halasia bukana, Baibel, ese ita dekenai Dirava ena Basileia ia herevalaia; ita ia hadibaia daika ese lohia siahuna ia abia bona Basileia be dahaka ia karaia noho. Gima Kohorona magasin, magasin iboudiai amo gado momo herea ai idia halasia magasin, be iena rau ginigunana ai ia hahedinaraia bamona “Iehova Ena Basileia Ia Harorolaia.”

Taunimanima oi durua Basileia idia lalo-pararalaia totona, reana idia ura gavamani ese ia karaia gaudia haida oi herevalaia: noho namo moni dalanai, maino, taravatu utua karadia idia ore, dala tamona ai bese idauidau taudia kara henia karana, edukeisen, bona gorere hanamoa daladia. Oi hahedinaraia, Dirava ena Basileia sibona ese unai bona taunimanima edia ura maorodia ibounai do ia hagugurua diba.​—Sal. 145:16.

Iesu Keriso ese ia lohiaia Basileiana henunai idia noho urana be taunimanima dekenai oi havaraia. Oi hahedinaraia guna ia karaia hoa karadia amo ita itaia diba guba dekenai King dagina ia abia neganai dahaka do ia karaia. Iesu ese ia hahedinaraia kara namodia be nega momo oi herevalaia be namo. (Mat. 8:​2, 3; 11:​28-30) Oi hahedinaraia ita totona iena mauri ia henia bona unai murinai Dirava ese ia hatoreaisi lou bona guba dekenai mase diba lasi maurina ia abia. Unuseni amo King bamona ia lohia.​—Kara 2:​29-35.

Oi hahedinaraia Dirava ena Basileia be hari guba amo ia lohia. To namona be oi diba, taunimanima momo idia laloa unai bamona lohia dalana dainai do ia hedinarai toana be hari idia itaia lasi. Unai oi abia dae, bona oi henanadai bema idia diba Iesu Keriso ia gwau unai  lohia ena toana be dahaka. Mataio karoa 24, Mareko karoa 13, eiava Luka karoa 21 idia hahedinaraia toana haida oi herevalaia. Bena oi henanadai dahaka dainai Keriso be guba dekenai ia lohia matamaia neganai, tanobada dekenai unai bamona gaudia idia vara. Apokalupo 12:​7-10, 12 oi hahedinaraia.

Dirava ena Basileia ese ia karaia gauna hamomokania totona Mataio 24:14 oi duahia bona hari ia vara noho tanobada ibounai Baibel hadibaia gaukarana oi herevalaia. (Isa. 54:13) Taunimanima dekenai Iehova ena Witnes taudia idia durua sikuli idauidau oi herevalaia​—unai sikuli ibounai edia badina be Baibel, bona idia ibounai be davana lasi. Oi hahedinaraia ruma-ta-ruma-ta gaukarana sibona ita karaia lasi, to tano 230 ia hanaia lalonai taunimanima bona ruma besedia dekenai Baibel ita hadibaia. Tanobada ena gavamani ta ese ena taunimanima bona tanobada ibounai taudia be unai bamona hadibaia program badana amo ia hadibadia diba, a? Taunimanima be Kingdom Hall bona Iehova ena Witnes taudia edia hebouhebou badadia dekenai oi boiridia mai, unuseniai idia itaia edena bamona unai hadibaia gaukarana ese taunimanima edia mauri ia haidaua.​—Isa. 2:​2-4; 32:​1, 17; Ioa. 13:35.

To ruma tauna ese ia itaia unai be mai anina bada ia dekenai danu, a? Reana dala namona ai oi hahedinaraia emu vadivadi ena badina be taunimanima oi hadibaia idia ibounai dekenai dala ia kehoa, Dirava ena Basileia henunai mauri idia abia hidi totona. Edena bamona? Dirava ena ura idia dibaia bona hari unai ura idia badinaia karana amo.​—Deu. 30:​19, 20; Apok. 22:17.

Ma Haida Oi Durua Basileia Idia Atoa Guna. Ta ese Basileia ena sivarai ia abia dae murinai danu, gau haida ia abia hidi be namo. Iena mauri lalonai Dirava ena Basileia do ia atoa guna, eiava? Iesu ese ena hahediba taudia ia hagoadaia, ia gwau: “Dirava ena Basileia . . . do umui tahua guna.” (Mat. 6:33) Edena dala ai eda Keristani tadikaka ita durua diba unai idia karaia totona? Haheitalai namona ita hahedinaraia bona idia kehoa daladia ita herevalaia karana amo. Nega haida, ta ita nanadaia diba bema idia noho daladia haida ia laloa vadaeni bona ekspiriens haida amo ma haida idia karaia gaudia ita herevalaia. Baibel ena sivarai be ma ta ena lalokau Iehova dekenai ia habadaia dalanai ita herevalaia. Basileia ia noho momokani ita hahedinaraia. Eda hereva lalonai ita hahedinaraia Basileia harorolaia gaukarana be mai anina bada. Nega momo namo bada ita havaraia diba, bema ita gwau lasi dahaka idia karaia be namo, to idia dekenai unai idia karaia urana ita habadaia.

Ita daradara lasi, ita harorolaia sivaraina mai anina bada ese Iehova Dirava, Iesu Keriso, bona Basileia ia hahedinaraia namonamo. Namona be unai idia hahedinaraia hereva momokanidia be taunimanima ita haroro henia neganai, eda kongregesen lalonai, bona eda mauri lalonai ita hahedinaraia. Unai bamona ita karaia neganai, ita hahedinaraia iseda Tiokratik Haroro Sikuli amo heduru ita abia noho.