HARI oi karaia karana be animal idia karaia diba lasi. Taunimanima siks siks amo ta ta be duahiduahi karana idia dibaia lasi​—⁠nega momo badina be dala be lasi sikuli dekenai idia vareai​—⁠bona idia duahiduahi diba taudia momo be hanaihanai idia karaia lasi. To, idia printaia herevadia oi duahia diba karana ese dala ia kehoa unai kara amo tano ma haida oi lao bamona, emu mauri idia hanamoa taudia ida oi hedavari bamona, bona mauri ena hekwarahi haheaukalaia totona oi do ia durua dibana namona do oi abia.

Bema matamata tauna ta ia duahiduahi diba, sikuli ai gau momo do ia dibaia. Gaukara ia tahua neganai, ia duahiduahi diba dainai, reana gaukara namona do ia abia bona reana hora haida sibona lalonai ia gaukara amo, mauri durua gaudia ia abia diba. Ruma dekenai idia gaukara hahinedia idia duahiduahi namonamo neganai, edia ruma bese idia durua aniani namona idia karaia diba, gau idauidau idia hagoevaia namonamo diba, bona gorere idia koua diba. Bona idia duahiduahi namonamo diba sinadia ese edia natudia edia laloa dalana idia hanamoa bada diba.

To, duahiduahi karana ia havaraia namo badana be oi ia durua “Dirava do oi diba” totona. (Aon. 2:⁠5) Dirava ita hesiai henia daladia momo dekenai ita duahiduahi diba be namo. Baibel bona Baibel idia herevalaia bukadia be kongregesen heboudia dekenai ita duahia. Oi duahiduahi namonamo neganai, reana haroro gaukara lalonai anina oi havaraia diba. Bona unai gaukara totona ita hegaegae neganai duahiduahi karana be mai anina bada. Unai badina dainai, lauma dalanai oi goada oi lao totona oi duahiduahi namonamo be gau badana.

Dirava ena dala idia dibaia taudia momo be sikuli bada taudia lasi. Reana lauma dalanai idia goada idia lao totona idia dekenai duahiduahi karana ita hadibaia be namo. Eiava reana edia duahiduahi karana idia hanamoa totona idia ita durua be namo. Bema heduru idia abia be namo, kongregesen ese buklet Apply Yourself to Reading and Writing eiava Duahiduahi Bona Toretore Dalana amo duahiduahi hadibaia kosi idia karaia. Taunimanima tausen momo ese unai kosi amo namo idia abia. Duahiduahi namonamo karana be mai anina  bada dainai, kongregesen haida ese duahiduahi hanamoa kosi be Tiokratik Haroro Sikuli ida idia hegaegaelaia. Ena be unai bamona kosi idia karaia lasi, to ta ese ena duahiduahi karana ia hanamoa bada diba bema dina ta ta ibounai nega ia atoa ia duahiduahi badabada totona bona hanaihanai haroro sikuli lalonai ia vareai bona hereva ia henia.

Madi, komik magasin bona televisen, bona gau ma haida danu, ese taunimanima momo edia mauri lalonai duahiduahi karana idia koua. Reana ta ese televisen ia raraia bona ia duahiduahi bada lasi dainai, ena duahiduahi namonamo karana, ena laloa bona hereva goevagoeva dalana, bona sibona ena lalohadai ia hahedinaraia dalana ia koua danu.

Baibel ita lalo-pararalaia totona ita idia durua bukadia be “hesiai tauna mai ena kamonai, bona mai ena kara maoromaoro” amo ita abia. Unai buka lalodiai lauma dalanai mai anina bada gaudia momo herea idia noho. (Mat. 24:45; 1 Kor. 2:​12, 13) Danu, idia ese tanobada ai idia vara gaudia bona edia anina ita dekenai idia hadibaia, ita idia durua tubutubu gaudia bona animal ita diba namonamo totona, bona ita lalo-hekwarahilaia gaudia haheaukalaia daladia ita dekenai idia hadibaia. Bona gau badana be, Dirava ia abia dae tomadiho dalana bona iena lalo-namo abia dalana idia hahedinaraia. Unai bamona gau namodia oi duahia karana ese oi ia durua lauma dalanai oi goada oi lao totona.

To momokani, duahiduahi namonamo karana sibona ese ita ia hanamoa lasi. Gau badana be dala maorona ai unai diba ita gaukaralaia. Aniani bamona, ita duahia gaudia ita abia hidi namonamo be namo. Ita ia durua lasi eiava ita ia hadikaia aniani ita ania be anina lasi, ani? Unai hegeregerena, lalona bona kudouna idia hadikaia gaudia be nega ta ita duahia lasi be namo, ani? Namona be ita duahia gaudia ibounai be Baibel ena hakaua herevadia hegeregerena ita abia hidi. Do oi duahia gauna oi ura abia hidi neganai, Hadibaia Tauna 12:​12, 13; Efeso 4:​22-24; 5:​3, 4; Filipi 4:8; Kolose 2:8; 1 Ioane 2:​15-17; bona 2 Ioane 10 oi laloa be namo.

Evanelia Bukadia ita tahua neganai ia hedinarai, badina maorona dainai ita duahiduahi be mai anina bada. Hegeregere, Mataio ena Evanelia Bukana lalonai ita itaia Iesu ese diba bada tomadiho gunalaia taudia edia Baibel henanadai ia do haerelaia lasi neganai, idia ia nanadaia, “Nega ta umui duahia lasi, a?” bona “Buka Helaga umui duahia lasi, a?” (Mat. 12:​3, 5; 19:4; 21:​16, 42; 22:31) Unai amo ita dibaia gauna ta be inai, bema badina maorona dainai ita duahiduahi lasi, reana lalohadai kererena ita abia eiava hereva badana ita reaia momokani. Farisea taudia ese Buka Helaga idia duahia ena badina be idia laloa unai amo mauri hanaihanai do idia abia. To Iesu  ia hahedinaraia unai harihari gauna be Dirava idia lalokau henia lasi bona Iena hahemauri dalana idia dadaraia taudia do idia abia lasi. (Ioa. 5:​39-43) Farisea taudia edia kara ena badina be sibona edia namo idia tahua; unai dainai, lalohadai kereredia momo idia abia.

Dirava lalokau henia be iena Hereva ita duahia karana ena badina goevana. Unai bamona lalokau dainai ita ura Dirava ena ura ita diba, badina lalokau be “hereva momokani ia moalelaia.” (1 Kor. 13:⁠6) Ena be reana guna duahiduahi karana ita moalelaia lasi, to ‘mai eda lalona ibounai’ ida Iehova ita lalokau henia dainai, mai goada ibounai ida iseda lalona ita gaukaralaia Dirava ita diba totona. (Mat. 22:37) Lalokau ese laloa bada karana ia havaraia, bona laloa bada karana ese diba abia urana ia habadaia.

Duahiduahi bona oi diba herevadia itaia karana idia gaukara hebou. Hari oi duahiduahi noho lalonai, oi diba herevadia oi itaia bona edia anina oi laloatao. Emu duahiduahi oi haharagaia diba, bema oi diba herevadia momo oi itaia. Hereva ta ta oi itaia lasi, to hereva haida nega tamona oi itaia hebou be namo. Unai kara dekenai oiemu diba oi habadaia neganai, do oi davaria oi duahia gauna oi lalo-pararalaia karana oi habadaia.

To, idia dobu gaudia oi duahia neganai, emu hekwarahi amo oi abia anina namona be ma dala ta ai oi habadaia diba. Iehova ese Iosua dekenai Buka Helaga duahia karana ia sisibalaia neganai, ia gwau: “Inai taravatu bukana be oiemu uduna amo do ia siri lasi, bona oi ese dina bona hanuaboi ai do oi duahia maragimaragi.” (Ios. 1:⁠8, NW) Nega momo ta ese gau ta ia lalohadailaia neganai ia hereva maragimaragi. Unai dainai, Heberu herevana idia hahanaia “duahia maragimaragi” be nega haida idia hahanaia “lalohadailaia.” (Sal. 63:6; 77:12; 143:⁠5) Ta be gau ta ia lalohadailaia neganai, ia laloa dobu; ia haragaharaga lasi. Lalohadai dalana ai ita duahiduahi karana ese dala ia kehoa Dirava ena Hereva be iseda  lalona bona kudouna ia hamarerea totona. Baibel lalonai be peroveta herevadia, sisiba, aonega herevadia, ane, Dirava ena hahemaoro herevadia, Iehova ena ura idia hahedinaraia herevadia, bona mauri sivaraidia momo herea idia noho​—⁠idia ura Iehova ena dala dekenai idia raka taudia ibounai dekenai mai anina bada gaudia unai. Unai dainai, oiemu lalona bona kudouna ia hamarerea diba dalana ai Baibel oi duahia be namo bada ia havaraia!

Oi duahiduahi neganai, mani oi laloa oi be unuseniai oi noho bamona. Emu lalona ena matana ai unai taudia oi itaia toho, bona edia mauri lalonai idia vara gaudia dainai idia mamia gaudia oi laloa. Samuela Ginigunana karoa 17 lalonai Davida bona Goliata edia sivarai oi duahia neganai, unai be auka momokani lasi. To Esodo bona Levitiko ese palai dubu ena haginia gaukarana eiava hahelaga oreana haginia gaukarana edia sivarai do idia mauri bamona, bema palai dubu ena bada bona idia gaukaralaia dabua be emu lalona ai oi itaia eiava idia gabua muramura ena bonana, idia gabua paraoa, bona gabua boubouna lalonai idia henia animal oi laloa namonamo. Hahelaga taudia edia gaukara ena hahenamo badana oi laloa! (Luka 1:​8-10) Unai dala ai emu lalona bona hemami oi gaukaralaia karana ese oi do ia durua oi duahia gauna ena anina oi lalo-pararalaia totona bona emu laloatao karana ia durua danu.

To, bema oi naria namonamo lasi, oi duahiduahi neganai oiemu lalona ia loaloa diba. Reana emu matana ese rau idia itaia, to emu lalona be gau ma ta ai ia noho. Miusiki oi kamonai, a? Televisen oi kehoa noho, a? Ruma bese taudia idia hereva, a? Bema hegeregere, regerege lasi gabuna ai oi duahiduahi be namo. To, reana oi ia veria gauna be emu lalona amo ia mai. Reana dina lalonai oi bisi bada. Madi, oiemu lalona ai dina dekenai oi karaia gaudia oi laloa lou be auka lasi! Momokani, idia vara gaudia oi laloa lou be namo​—⁠to oi duahiduahi neganai oi karaia lasi. Reana oi matamaia neganai emu lalona oi biagua namonamo, eiava reana guriguri amo emu duahiduahi negana oi hamatamaia. To oi duahiduahi noho lalonai, emu lalona ia loaloa matamaia. Oi tohoa lou. Oi sibona emu lalona oi biagua bona oi duahia gauna oi laloa. Gabeai do oi itaia, unai kara oi hanamoa vadaeni.

Oi lalo-pararalaia lasi herevana oi itaia neganai dahaka oi karaia? Reana oi duahia gauna lalonai oi diba lasi herevana ena anina idia gwauraia eiava idia herevalaia. Eiava idia noho herevadia ma haida amo unai hereva ena anina oi lalo-pararalaia diba. Bema lasi, diksenari ta ia noho neganai, unai hereva ena anina oi itaia, eiava unai hereva oi makaia gabeai ma ta amo ena anina oi henanadailaia totona. Unai dala ai oi diba herevadia edia momo  oi habadaia bona oi duahia gauna lalo-pararalaia karana ia hanamoa.

Aposetolo Paulo ese Timoteo ia hamaoroa duahiduahi do ia goadalaia noho neganai, Paulo ese ma haida durua totona do ia karaia duahiduahi karana ia herevalaia. (1 Tim. 4:13) Taunimanima vairanai duahiduahi namonamo karana be rau amo hereva gwauraia karana sibona lasi. Namona be duahia tauna ese ia duahia herevadia bona idia hahedinaraia lalohadai ia lalo-pararalaia. Unai negana sibona ai, lalohadai bona hemami ia hahedinaraia maoromaoro diba. To momokani, unai ia karaia totona ia hegaegae namonamo bona karaia loulou be namo. Unai dainai, Paulo ia gwau: “Taunimanima dekenai do oi duahia . . . noho.” Tiokratik Haroro Sikuli lalonai unai kara dekenai oi ese diba bada do oi abia.

“Mai haheauka danu ia gaukara noho tauna ena laloa [“palani,” NW], ese anina ia havaraia bada noho, to laloa haraga taudia be do idia ogogami.” (Aon. 21:⁠5) Duahiduahi urana dekenai unai be momokani! Unai “anina” ita abia totona, namona be palani ita karaia, unai amo gaukara ma haida ese iseda duahiduahi karana idia koua lasi.

Edena negai oi duahiduahi? Daba momokani ai duahiduahi karana amo namo oi abia, a? Eiava gabeai dina lalonai emu lalona ia gaukara namonamo? Bema dina ta ta iboudiai miniti 15 ia lao 20 sibona oi atoa oi duahiduahi totona, do oi hoa badina oi itaia unai nega lalonai danu gau momo oi karaia diba. Hanaihanai oi karaia be mai anina bada.

Dahaka dainai Iehova ese buka ta amo ena ura badana ia hahedinaraia? Unai amo taunimanima ese ena Hereva, idia torea gauna, idia duahia diba. Unai dala ai Iehova ena kara badadia idia laloa diba, edia natudia dekenai idia hadibadia diba, bona Dirava ena kara idia lalodiatao diba. (Sal. 78:​5-7) Iehova ese unai gauna amo ia hahedinaraia harihari bada ita laloa bada karana ita hahedinaraia dalana hereadaena be Iena hamauria Herevana duahia karana ita goadalaia.