BAIBEL ena hakaua herevadia oi badinaia matamaia neganai, guna oi manadalaia lalohadai, hereva, bona kara oi haidaua matamaia. Unai gaudia momo be Tiokratik Haroro Sikuli lalonai oi do vareai lasi neganai oi haidaua. Reana emu goada ia bada ia lao bona Iehova dekenai emu mauri oi gwauhamatalaia vadaeni. Unai ena anina be hari emu goada habadaia karana oi hadokoa diba, a? Lasi. Emu bapatiso be matamana sibona.

Hahediba tauna Timoteo be Keristani elda gaukarana ia karaia vadaeni lalonai Paulo ese ia hagoadaia, ia abia sisiba bona ena gaukara kongregesen lalonai do ia “laloa namonamo”​—⁠unai gaudia dekenai ena “lalona ibounai” ia henia​—⁠bena unai amo “taunimanima iboudiai do idia itaia [iena] goada ia bada ia lao.” (1 Tim. 4:​12-15, NW) Herevana hari sibona hereva momokani ena dala oi badinaia matamaia eiava Keristani mauri dalana oi manadalaia vadaeni, to namona be oi ura emu goada oi habadaia.

Efeso 3:​14-19 ia gwau aposetolo Paulo ia guriguri, ena tadikaka ese hereva momokani ‘ena lababa bona lata bona ataiai bona dobu do idia diba momokani.’ Unai dainai, Iesu ese tatau haida ia henia, kongregesen idia hadibaia, durua, bona hagoadaia totona. Hanaihanai Dirava ena Hereva ita lalohadailaia bona idia manada hadibaia taudia edia heduru dainai, lauma dalanai “ita tubu daekau” diba.​—⁠Efe. 4:​11-15.

Unai bamona ita tubu daekau ena anina ta be ‘eda lalona ita hamatamataia.’ Anina be, do ita abia lalohadai mai siahuna be Dirava bona Keriso edia bamona. Unai dainai, hanaihanai edia lalohadai oi abia, ‘mauri matamata oi atoa totona.’ (Efe. 4:​23, 24) Evanelia Bukadia oi stadilaia neganai, oi laloa Keriso ena mauri sivaraidia be do oi tohotohoa dalana idia hahedinaraia, a? Iesu ese ia hahedinaraia kara ta ta ibounai oi dibaia bona oi gaukara goada, emu mauri lalonai oi tohotohoa totona, a?​—⁠1 Pet. 2:⁠21.

Oi herevalaia gaudia ese oiemu goada ena bada idia hahedinaraia. Mauri matamata idia atoa vadaeni taudia ese koikoi, samania koikoi, miro, bona hagoadaia lasi herevadia idia gwauraia lasi. To, edia hereva amo ‘kamonai taudia ese heduru bona namo idia davaria, bona goada idia abia.’ (Efe. 4:​25, 26, 29, 31; 5:​3, 4; Iuda 16) Edia haere bona hereva,  edia mauri lalonai bona kongregesen heboudia lalonai, ese idia hahedinaraia hereva momokani ese edia mauri ia haidaua noho.

Hadibaia hereva idauidau ese ‘lai bamona oi idia doria lao doria mai’ lasi neganai, ia hedinarai emu goada ia bada ia lao. (Efe. 4:14) Hegeregere, inai tanobada ese oi dekenai lalohadai, hakaua herevadia, bona moale karadia matamatadia ia hahedinaraia neganai, dahaka oi karaia? Gau ma haida ese emu lalona idia veria dainai oi ura lauma gaudia amo nega oi abia, unai gaudia oi karaia totona, a? Unai bamona ia karaia tauna ese lauma dalanai ena goada habadaia karana ia koua. To aonega dalana be gaukara ma haida amo lauma gaudia totona nega oi abia!​—⁠Efe. 5:​15, 16.

Lauma dalanai emu goada oi habadaia ena bada be ma haida oi kara henia dalana ese ia hahedinaraia danu. Emu tadikaka bona taihu ‘hebogahisi henia, bona edia kara dika gwauatao’ karana oi dibaia vadaeni, a?​—⁠Efe. 4:⁠32.

Iehova ena dala badinaia karana be kongregesen ai bona ruma dekenai ia hedinarai be namo. Namona be sikuli ai, taunimanima idia noho gabudia ai, bona emu gaukara gabuna ai ia hedinarai danu. (Efe. 5:21–6:⁠9) Bema unai nega iboudiai Dirava ena kara hahedinaraia karana oi habadaia, ia hahedinaraia emu goada ia bada ia lao.

Iehova ese ita ta ta dekenai diba idauidau ia henia. Ia ura ita ese ma haida durua totona unai gaudia ita gaukaralaia, unai dala ai ia ese ita amo iena hariharibada ia hahedinaraia diba. Aposetolo Petero ese unai ia herevalaia, ia gwau: “Umui ese inai harihari gaudia do umui gaukaralaia, emui Keristani varavara taudia do umui durua totona. Unai dekena amo umui be Dirava ena . . . hariharibada idauidau umui hedinaraia noho.” (1 Pet. 4:10) Oi abia gauna be edena bamona oi gaukaralaia?

Petero be ma ia gwau: “Bema tau ta ena diba be haroro, Dirava ena sivarai do ia gwauraia.” (1 Pet. 4:11) Unai siri ese ia hahedinaraia emu maduna be haroro lalonai Dirava ena Hereva oi badinaia, Dirava oi hahairaia totona. Emu haroro dalana danu ese Iehova ia hahairaia be namo. Tiokratik Haroro Sikuli ese oi ia durua unai bamona dala ai oi abia harihari gauna do oi gaukaralaia​—⁠ma haida oi durua dalana amo Dirava do oi hahairaia. Unai be emu tahua gauna dainai, sikuli lalonai emu goada ena bada be edena bamona oi laloa be namo?

Namona be hereva hanamoa sisiba pepana ena kahana hida oi karaia vadaeni eiava oi dekenai idia henia kahadia oi laloa bada lasi, to oi idia  hadibaia dainai emu hereva amo oi henia boubou gauna ena namo ia bada oi laloa. Sikuli ese ita ia durua, haroro gaukara ita karaia namonamo totona. Unai dainai, oi sibona oi nanadaia: ‘Haroro gaukara lalonai do lau herevalaia gaudia lau hegaegaelaia namonamo, a? Lau haroro henia taudia laloa bada karana lau dibaia, a? Lou henia ena dala kehoa totona taunimanima ida do lau herevalaia diba henanadai lau gwauraia, a? Bema ta ida Baibel lau stadilaia, kudouna hamarerea hadibaia tauna ai lau lao totona lau gaukara goada, a?’

Oi laloa lasi, oi abia hesiai gaukara idauidau sibona ese emu goada ena bada idia hahedinaraia. Emu goada ena bada be oi abia gaukarana amo lasi, to unai gaukara oi karaia dalana amo ia hedinarai. Bema oi abia gaukarana lalonai ta oi hadibaia, oi sibona oi nanadaia: ‘Lau hadibaia namonamo, a? Lau hadibaia dalana dainai kamonai taudia edia mauri dekenai lau herevalaia gauna ese anina ia havaraia, a?’

Oi abia harihari gauna oi gaukaralaia ena anina be oi hekwarahi gau haida oi karaia totona. Dala oi kehoa, ma haida ida haroro gaukara oi karaia totona, a? Dala oi tahua, emu kongregesen dekenai idia noho memero kekeni, kamonai matamata, bona gorere taudia oi durua totona, a? Sibona oi henia, Kingdom Hall hagoevaia eiava hebouhebou gaukara ma haida oi durua totona, a? Nega haida heduru painia gaukara oi karaia diba, a? Regula painia gaukara oi karaia diba eiava kongregesen ma ta dekenai heduru oi henia diba, a? Bema oi be tadikaka, hesiai tauna eiava elda tauna ai ia lao diba tauna ena kara Baibel ese ia gwauraia hegeregerena oi badinaia totona oi gaukara goada, a? Oi ura heduru oi henia bona maduna oi huaia karana ese ia hahedinaraia emu goada ia bada ia lao.​—⁠Sal. 110:⁠3.

Bema Keristani mauri dalana oi do diba namonamo lasi, oi lalo-hekwarahi lasi. Dirava ena Hereva ese “aonega lasi taudia dekenai, aonega [ia] henia.” (Sal. 19:7; 119:130; Aon. 1:​1-4) Baibel ena sisiba ita badinaia neganai Iehova ena aonega goevadaena amo namo ita abia, bona unai ena namo ese nega daudau lalonai ita sibona ita abia diba ena namo ia hereaia. To, Iehova ena gaukara ai eda goada ia bada ia lao lalonai, iseda diba ia bada ia lao danu. Edena dala ai unai diba ita gaukaralaia bona ita do ia durua?

Ta ena mauri lalonai gau idauidau idia vara vadaeni dainai, reana ia laloa: ‘Inai bamona be lau dekenai ia vara vadaeni. Lau diba dahaka do lau karaia be namo.’ Unai be aonega dalana, a? Aonega Herevadia 3:7 ia  gwau: “Oi laloa lasi oi be mai emu aonega.” Momokani, eda mauri lalonai idia vara gaudia ita laloa neganai, iseda diba dainai kahana idauidau do ita laloa diba. To bema lauma dalanai eda goada ia bada ia lao, namona be ita abia diba dainai eda lalona bona kudouna dekenai ita abia dae, ita kwalimu totona Iehova ese iseda kara ia hanamoa be gau badana. Unai dainai, iseda goada be sibona eda diba dekenai idia vara gaudia ita hanaia amo ia hedinarai lasi, to eda mauri hakaua totona Iehova dekenai ita tabekau karana amo ia hedinarai. Bona unai goada ia hedinarai danu bema ita abia dae momokani iseda guba Tamana ese dala ia koua neganai gau ta ia vara diba lasi bona bema eda hetura karana ia ida ita naria namonamo noho.

Aposetolo Paulo be lauma dalanai ia goada horoa tauna ta, to ia diba gau badana be ‘vaira negana gaudia ia goadalaia,’ mauri do ia davaria totona. (Fili. 3:​13-16) Oi be unai bamona oi laloa danu, a?

Hari oiemu goada ena bada be edena bamona? Emu goada ena bada oi laloa neganai, mauri matamata oi atoa momokani eiava, Iehova ena lohia siahuna henunai oi noho momokani eiava, bona oi abia harihari gaudia be Iehova hanamoa totona oi gaukaralaia goadagoada eiava lasi, oi laloa bada. Tiokratik Haroro Sikuli amo heduru oi abia lalonai, Dirava ena Hereva ese ia hahedinaraia karadia be emu hereva bona hadibaia lalonai idia hedinarai be gau badana. Namona be oi tubu daekau lalonai unai gaudia oi laloa noho. Oibe, idia oi moalelaia, bona do ia hedinarai goevagoeva emu goada ia bada ia lao.