BEMA hereva henia tauna ena gado regena ia maragi, reana kamonai taudia haida do idia mahuta. Bema haroro gaukara lalonai pablisa ena gado regena ia maragi, reana ruma tauna ese gau ma haida ia laloa. Bona hebou dekenai haere idia henia taudia edia gado regena ena bada ia hegeregere lasi neganai, kamonai taudia idia hagoadaia lasi. (Heb. 10:​24, 25) To, bema hereva henia tauna ese nega kererena ai ena gado regena ia habadaia, reana kamonai taudia edia mamina ia hadikaia​—⁠reana do idia badu.​—⁠Aon. 27:⁠14.

Kamonai Taudia Oi Laloa. Daika dekenai oi hereva? tau ta? ruma bese ta? haroro totona idia hebou taudia? kongregesen ibounai? eiava hebouhebou badana taudia dekenai? Ia hedinarai, gabu ta dekenai ia hegeregere gado regena ena bada be gabu ma ta dekenai ia hegeregere lasi.

Nega haida, Dirava ena hesiai taudia be taunimanima hutuma dekenai idia hereva. Solomona ena negai Ierusalema ena dubu badana idia hahelagaia neganai, saun gaudia idia noho lasi. Unai dainai, Solomona be pata ta latanai ia gini bona “mai boiboi bada danu” taunimanima ia hanamoa. (1 Kin. 8:55; 2 Siv. 6:13) Bena lagani handred momo idia hanaia, bona Pentekoste 33 C.E. ai Keristani orea maragina be lauma helaga idia abia murinai, taunimanima hutuma​—⁠haida idia ura kamonai, haida idia kiri​—⁠be Ierusalema dekenai unai Keristani taudia kahirakahira idia mai. Petero ese aonega ia hahedinaraia, ia “toreisi” bona ena “gadona ia habadaia.” (Kara 2:14) Ia haroro mai siahu ida.

Edena bamona oi diba bema emu gado regena ena bada ia hegeregere? Kamonai taudia edia kara amo unai oi itaia diba. Bema oi itaia kamonai taudia haida be kamonai totona idia hekwarahi, namona be emu gado regena oi habadaia.

Herevana ita be tau ta eiava haida dekenai ita hereva, unai taudia ita  laloa be namo. Bema ta ena taiana idia dika, reana emu gado regena oi habadaia be namo. To reana buruka dainai idia haraga lasi taudia dekenai oi boiboi neganai, oi do idia ura henia lasi. Bona reana do idia laloa unai be hemataurai lasi karana. Gabu haida ai idia laloa, gado regena badana ena anina be hereva tauna ia badu eiava ia ura lasi ia naria.

Regerege Oi Laloa. Haroro gaukara lalonai, emu gado regena ena bada be idia vara gaudia hegeregerena ia idau be namo. Reana motuka, natudia, sisia, miusiki, eiava televisen edia regena oi hanaia be namo. To danu, ruma idia noho kahirakahira gabudiai, bema emu gado regena oi habadaia momokani, unai ese dekena taudia ia veria bena reana ruma tauna ia hemarai.

Tadikaka ese kongregesen eiava hebouhebou dekenai hereva idia henia neganai, gau idauidau idia laloa danu be namo. Ruma murimurinai kamonai taudia hereva henia be idau bona saun be namo rumana lalonai hereva henia be idau. Latin America ai, misinari tadikaka rua ese kamonai tauna ta ena patapata dekenai pablik tok idia henia neganai, kahirakahira ia noho taoni ena ariara dekenai pati ta dainai roketi maragidia idia hapoua bona kokoroku ia boiboi badabada noho!

Reana hereva oi henia neganai gau ta ia vara dainai, namona be oi laga-ani sisina ela bona regerege ia ore eiava emu gado regena oi habadaia. Hegeregere, bema hebou idia karaia rumana ena guhi be kapa amo idia karaia, medu ia diho neganai helai taudia ese hereva henia tauna ena hereva idia kamonai diba lasi. Reana natuna ta ena taitai eiava haida idia mai leiti dainai do oi hekwarahi. Unai gaudia hegeregerena emu gado regena ena bada oi haidaua be namo, oi herevalaia gauna ese kamonai taudia ia durua totona.

Saun gaudia idia noho be heduru namona, to gau haida idia vara dainai reana hereva henia tauna ese ena gado regena ia habadaia be namo. Nega momo paua ia bodo gabudiai, ena be maikrofon idia gaukara lasi, to hereva henia taudia ese edia hereva do idia henia noho.

Oi Herevalaia Gauna Oi Laloa. Oi herevalaia gauna hegeregerena emu gado regena oi haidaua be namo. Bema oi herevalaia gauna ena mamina be mai ena siahu, gado regena maragina amo unai oi hamanokaia lasi. Hegeregere, bema Baibel amo hahemaoro herevadia oi duahia, emu gado regena ena bada ese lalokau hahedinaraia totona sisiba oi henia neganai oi gaukaralaia gado regena ena bada ia hanaia be  namo. Emu gado regena ena bada be oi herevalaia gauna hegeregerena oi haidaua, to oi karaia dalana oi naria namonamo, kamonai taudia edia lalona oi veria bona oi idia laloa bada garina.

Emu Tahua Gauna Oi Laloa. Bema oi ura kamonai taudia oi hagoadaia mai edia ura bada ida gau ta do idia karaia, reana gado regena sisina bada oi gaukaralaia be namo. Bema oi ura edia lalohadai do idia haidaua, gado regena badana amo edia kamonai karana oi hadikaia lasi. Bema oi ura ta ena hemami oi hanamoa, gado regena manokana be ia namo.

Gado Regena Ena Bada Gaukaralaia Namonamo. Bema oi ura ia bisi tauna ese oiemu hereva ia kamonai, emu gado regena oi habadaia be heduru namona. Tama sina be unai idia diba, unai dainai natudia be gadara do idia rakatania bona idia mai totona idia boiria neganai, edia gado regena idia habadaia. Seamani ia ura kongregesen taudia eiava hebouhebou taudia idia helai namonamo neganai, reana ena gado regena ia habadaia. Reana haroro gaukara idia karaia pablisa taudia ese mai gado regena bada ida ruma murimurinai idia gaukara taudia idia hedavari henia.

Ta ese emu hereva ia kamonai matamaia murinai danu, emu gado regena ia hegeregere noho be namo. Ta be gado regena maragina ai ia hereva neganai, toana be ia hegaegae namonamo lasi eiava ia herevalaia gauna ia abia dae momokani lasi.

Hahegani oi henia bona nega tamona emu gado regena oi habadaia karana amo, taunimanima oi hagoadaia kara ta idia karaia totona. (Kara 14:​9, 10) Unai hegeregerena, mai boiboi ida oi henia hahegani amo dika ta oi koua diba. Filipi dekenai gima tauna ese sibona ia alaia gwauraia, badina ia laloa dibura taudia idia heau vadaeni. “To Paulo ia boiboi goada, ia gwau, ‘Oi sibona oi hadikaia lasi, badina be ai ibounai iniseni ai noho.’ ” Unai dala ai sibona alaia karana ta ia koua. Bena Paulo bona Sila be unai gima tauna bona ena ruma bese idia haroro henia, bona idia ibounai ese hereva momokani idia abia dae.​—⁠Kara 16:​27-33.

Emu Gado Regena Ena Bada Hanamoa Daladia. Haida ese gado regena ena bada gaukaralaia dalana idia dibaia be mai ena hekwarahi. Reana ta be gado regena maragina ai ia hereva badina ena gadona ia goada lasi. To bema ia hekwarahi, herevana ia be hereva manau tauna, ena gado regena ena bada do ia hanamoa. Emu hahodi bona gini daladia oi laloa. Hanaihanai oi helai bona gini maoro. Emu pagana be  murina dekenai oi halasia lao, bona oi hahodi vareai badabada. Emu baragi edia henuna kahana oi hahonua be gau badana. Unai hodahoda oi gaukaralaia namonamo dalana ai oi hereva neganai, emu gado regena ena bada oi biagua diba.

Ma haida edia hekwakwanai be edia hereva regena ia bada herea. Reana murimuri ai eiava regerege gabuna ta ai idia gaukara dainai unai idia manadalaia. Eiava, reana idia noho gabuna ai iboudiai be idia boiboi bona herevahereva utua karana be bada. Unai dainai idia laloa idia hereva dalana tamona be edia gado regena idia habadaia ela bona ma haida edia ia hanaia. Baibel ena sisiba hegeregerena “bogahisihisi, durua, manau, manada bona haheauka” idia hahedinaraia namonamo noho lalonai, ma haida ida idia herevahereva neganai idia gaukaralaia gado regena ena bada danu do idia haidaua.​—⁠Kol. 3:⁠12.

Oi hegaegae namonamo, hanaihanai oi haroro dainai oi abia dibana, bona Iehova oi guriguri henia karana amo heduru do oi abia gado regena maorona oi gaukaralaia totona. Herevana platfom amo hereva oi henia eiava haroro gaukara lalonai tau ta ida oi hereva, idia ese oi herevalaia gauna idia kamonai amo heduru idia abia dalana oi laloa.​—⁠Aon. 18:⁠21.