HEREVA ta ena hereva badadia be dahaka? Idia be oi gwauraia lalohadai namodia sibona lasi. Idia be edia anina oi herevalaia daudau lalohadai badadia. Unai lalohadai be mai anina bada, emu tahua gauna oi hagugurua totona.

Hereva badadia hahedinaraia totona kara badana ta be mai aonega ida oi herevalaia gaudia oi abia hidi bona hegaegaelaia. Hereva ma haida oi tahua neganai, hanaihanai gau momo oi davaria. Edena dala ai do oi gaukaralaia gaudia oi abia hidi diba?

Dala ginigunana be, kamonai taudia oi laloa. Oi herevalaia gauna idia diba lasi, eiava idia diba namonamo? Idia momo ese Baibel ena hereva unai gauna dekenai idia abia dae, eiava idia haida idia daradara? Dina ta ta ai unai Baibel ena hereva idia badinaia toho neganai, edena bamona hekwakwanai idia davaridia? Dala iharuana be, oi abia hidi gauna be kamonai taudia dekenai oi herevalaia karana amo dahaka oi ura hagugurua oi laloa noho. Oi davaria gaudia be unai dala rua ai oi laloa namonamo bona idia hegeregere gaudia sibona oi abia hidi.

Bema oi dekenai autlain mai ena sinado bona hereva badadia idia henia, unai oi badinaia be namo. To, hereva badadia ta ta oi herevalaia lalonai unai dala rua oi laloa noho neganai, emu hereva ena namo do idia habadaia. Autlain idia henia lasi neganai, hereva badadia oi abia hidi diba.

Hereva badadia oi diba namonamo bona idia ta ta durua herevadia oi hegaegaelaia neganai, hereva oi henia be auka lasi. Danu, kamonai taudia ese emu hereva amo heduru bada do idia abia.

Hereva Oi Hegaegaelaia Daladia Idauidau. Emu hereva ena kahana badana be dala idauidau ai oi hegaegaelaia diba. Idia oi diba neganai, do oi itaia idia haida ese namo idia havaraia bema emu tahua gauna hegeregerena idia oi gaukaralaia.

Dala namona ta be lalohadai idauidau hegeregerena hereva hapararaia. (Hereva badadia ta ta be mai anina, badina kamonai taudia edia lalo-parara oi herevalaia gauna dekenai idia habadaia eiava emu hereva ena tahua  gauna idia durua.) Dala ma ta be gau idauidau idia vara negana hegeregerena. (Hegeregere, Abata ia do vara lasi neganai idia vara gaudia oi herevalaia guna, murinai be lagani 70 C.E. ai Ierusalema idia do hadikaia lasi neganai idia vara gaudia, bona unai murinai iseda negai idia vara gaudia.) Dala ihatoina be gau ta bona ia vara ena badina. (Unai be dala rua ai oi karaia diba. Hegeregere, hari idia vara gaudia oi gwauraia guna, murinai idia dainai idia vara gaudia, bona idia vara ena badina oi hahedinaraia.) Dala namba 4 be idia idau gaudia oi hahegeregerea. (Reana oi ese namo be dika ida eiava lalo-goada be lalo-manoka ida oi hahegeregerea.) Nega haida hereva ta lalonai unai dala haida oi gaukaralaia hebou.

Iuda taudia edia Sanhedrin vairanai Stefano idia samania koikoi neganai, ia henia hereva namona lalonai gau idauidau be idia vara negana hegeregerena ia gwauraia. Kara 7:​2-53 oi duahia neganai, oi itaia kahana idauidau be mai badina dainai ia abia hidi. Guna Stefano ese ia hahedinaraia ia gwauraia gauna be kamonai taudia idia gorea diba lasi sivarai momokanina. Bena ia hahedinaraia ena be Iosepa ena kakadia ese ia idia dadaraia, Dirava ese ia amo hahemauri ia karaia. Murinai ia hahedinaraia Iuda taudia be Dirava ese ia gaukaralaia tauna Mose idia kamonai henia lasi. Dokonai ia hahedinaraia Iuda ena uru gunadia ese idia badinaia lalohadai goadana be Iesu Keriso idia hamasea taudia ese idia hahedinaraia danu.

Hereva Badadia Momo Lasi. Sinado iboudiai lalonai hereva badadia haida sibona oi herevalaia be namo. Nega momo idia be 5 idia hanaia lasi. Unai be maoro, herevana emu nega be miniti 5, miniti 10, miniti 30, eiava unai ia hanaia. Lalohadai momo oi hahedinaraia toho lasi. Kamonai taudia ese hereva tamona amo lalohadai haida sibona idia laloatao diba. Bona hereva ia lata neganai, unai lalohadai badadia oi hahedinaraia goevagoeva be gau badana.

Herevana oi gaukaralaia hereva badadia be hida, to namona be idia ta ta edia anina oi hahedinaraia namonamo. Kamonai taudia dekenai nega oi henia hereva badadia ta ta idia laloa namonamo totona, bena do idia laloatao diba.

Namona be emu hereva dalana be auka lasi. Do oi herevalaia gauna ena bada be herevana. Bema emu lalohadai be hereva badadia haida sibona idia durua namonamo bona idia ta ta edia nega ai edia anina oi herevalaia, hereva do idia kamonai be auka lasi bona do idia laloaboio lasi.

Hereva Badadia Oi Hahedinaraia. Bema dala namona ai emu hereva  oi hegaegaelaia, emu hereva dalana amo hereva badadia edia anina oi hahedinaraia be do ia auka lasi.

Hereva badana oi hahedinaraia totona hamomokania herevadia, siri, bona hereva ma haida oi gwauraia dalana amo lalohadai badana idia hahedinaraia bona ena anina idia habadaia. Namona be lalohadai iboudiai ese idia durua hereva badana idia hahedinaraia, hamomokania, eiava ena anina idia habadaia. Lalohadai idia namo sibona dainai, idia oi herevalaia lasi. Unai durua lalohadai edia anina oi herevalaia neganai, idia bona idia durua hereva badadia idia hakapua dalana oi hahedinaraia goevagoeva. Oi laloa lasi kamonai taudia sibona ese unai do idia itaia diba. Reana lalohadai badana idia hahedinaraia herevadia oi gwauraia lou eiava nega ta ta ai hereva badana ena anina oi gwauraia lou karana amo unai hakapua dalana oi hahedinaraia diba.

Hereva henia taudia haida ese hereva badadia be namba amo idia gwauraia hedinarai. Ena be hereva badadia hahedinaraia dalana ta be unai, to namo lasi unai sibona oi karaia bona do oi herevalaia gaudia oi abia hidi namonamo lasi bona idia oi hakapua dalana ia namo lasi.

Reana hereva badana oi gwauraia guna, bena murinai ia idia durua lalohadai oi herevalaia. Unai ese kamonai taudia ia durua do oi gwauraia herevadia edia namo idia laloa guna totona, bona unai hereva badana ia hahedinaraia. Reana hereva badana ta hagoadaia totona, ena anina oi herevalaia namonamo murinai unai hereva badana oi gwauraia lou.

Haroro Gaukara Lalonai. Ita herevalaia hakaua herevadia be tok henia neganai sibona lasi, to haroro gaukara lalonai ma haida ida oi herevahereva neganai oi badinaia danu. Oi hegaegae neganai, emu gabu dekenai taunimanima ese idia laloa bada gauna ta oi abia hidi. Baibel ia hahedinaraia helaro ese unai hekwakwanai ia hanaia dalana oi herevalaia totona sinado namona oi abia hidi. Unai sinado ena anina oi habadaia totona hereva badadia rua bamona oi abia hidi. Unai hereva badadia idia durua siridia oi abia hidi. Bena emu herevahereva oi hamatamaia dalana oi laloa. Unai bamona hegaegae dalana dainai dala idauidau ai unai gauna do oi herevalaia diba. Oi ia durua danu, ruma taudia ese do idia laloatao gaudia oi gwauraia.