REANA emu hereva totona hereva ma haida oi tahua bona oi hegaegaelaia namonamo. Reana lalona veria hamatamaia herevana oi karaia danu. To, gau ma ta be mai anina bada​—hereva dokona namona. Oi laloa lasi ena anina be maragi. Nega momo emu hereva ginigabedia idia laloatao namonamo. Bema hereva dokona ia namo lasi, oi herevalaia vadaeni gaudia edia namo ia hamaragia.

Mani inai oi laloa: Iosua ena mauri ena dokona kahana ai, Israela besena ena tau badadia dekenai hereva namona ta ia henia. Iosua ese Aberahamo ena nega amo Iehova ena kara Israela taudia dekenai ia gwauraia murinai, ena hereva dokonai unai sivarai ena hereva badadia ia gwauraia lou sibona, a? Lasi. To, taunimanima ia hagoadaia bona ena hemami ia hahedinaraia, ia gwau: “Lohiabada do umui gari henia, iena hesiai gaukara do umui karaia, mai emui momokani, bona mai emui laloa maoromaoro danu.” Iosua ena hereva dokona be Iosua 24:​14, 15 dekenai oi duahia.

Hereva namona ma ta be Kara 2:​14-36 dekenai, ia be aposetolo Petero ese lagani 33 C.E. ai Pentekoste Ariana totona Ierusalema dekenai idia mai taudia dekenai ia henia. Matamanai, ia gwau idia ese Ioela ena peroveta herevana, Dirava ese ena lauma ia bubua karana, idia itaia noho. Bena ia ese Salamo lalonai idia noho Mesia perovetalaia herevadia, Iesu Keriso do ia toreisi lou bona Dirava ena idibana kahana dekenai do ia helai herevadia, ida unai ia hakapua. Bena, ena hereva dokona lalonai, Petero be kamonai taudia ibounai ese idia laloa be namo gauna ta ia hahedinaraia goevagoeva. Ia gwau: “Unai dainai, Israela bese taudia ibounai idia diba momokani be namo, inai Iesu, satauro dekenai umui hamasea tauna, be Dirava ese Lohiabada bona Keriso ia halaoa vadaeni.” Idia noho taudia idia henanadai: “Aiemai varavara taudia e, dahaka do ai karaia?” Petero ia haere: “Emui lalona umui giroa bona bapatiso umui abia, Iesu Keriso ena ladana dekenai.” (Kara 2:​37, 38) Unai dina ai, kamonai taudia 3,000 bamona ese Iesu Keriso ia herevalaia hereva momokani idia abia dae, badina Petero ena hereva ese edia kudouna ia hamarerea.

 Oi Laloatao be Namo Herevadia. Namona be hereva dokona be hereva ena sinado ida ia hegeregere. Namona be emu hereva ena hereva badadia amo unai lalohadai oi abia. Ena be sinado ena hereva haida oi gwauraia diba, to sinado ibounai oi gwauraia eiava lasi be oiemu ura hegeregerena.

Nega momo, emu hereva ena tahua gauna be kamonai taudia oi hagoadaia, oi hahedinaraia herevadia dainai kara ta do idia karaia. Hereva dokona oi gwauraia ena badina badana ta be idia oi hadibaia dahaka idia karaia be namo. Sinado bona hereva badadia oi abia hidi neganai, kamonai taudia dekenai oi herevalaia gauna be mai anina bada ena badina bona emu tahua gauna oi laloa, a? Bema oi laloa vadaeni, dahaka oi ura idia karaia be oi diba. Hari unai kara oi herevalaia bona reana idia karaia dalana oi hahedinaraia.

Dahaka idia karaia be namo oi hahedinaraia sibona lasi, to namona be emu hereva dokona ese idia ia veria unai idia karaia totona. Unai idia karaia totona badina namona bona reana unai amo ia vara namo oi hahedinaraia. Bema sentens ginigabena oi laloa namonamo bona gwauraia namonamo, oiemu hereva ibounai ena namo do ia habadaia.

Oi laloatao hereva oi hadokoa gwauraia. Emu hereva amo unai oi hahedinaraia. Emu hereva ena haraga ia maoro danu be namo. Namo lasi oi hereva haraga ela bona dokona bena karaharaga hereva oi hadokoa. To danu, namo lasi emu gado regena oi hamaragia ela bona ia ore. Namona be gado regena ia hegeregere, to bada herea lasi. Sentens ginigabedia haida amo oi hahedinaraia hereva ia doko gwauraia. Mai emu ura bona lalo-goada ida oi gwauraia. Hereva henia dalana oi hegaegaelaia neganai, hereva dokona gwauraia dalana oi hegaegaelaia danu.

Hereva dokona ena lata be edena bamona? Unai be ena miniti do oi gwauraia gauna sibona lasi. Hereva dokona ia lata herea be namo lasi. Kamonai taudia edia hemami amo ena lata maorona oi diba. Anina ia hedinarai goevagoeva bona ia auka lasi hereva dokona idia moalelaia. Reana ia lata sisina to haheitalai ta ia hahedinaraia hereva dokona ia namo danu bema oi palanilaia namonamo. Hadibaia Tauna 12:​13, 14 ai Hadibaia Tauna bukana ibounai ena hereva dokona kwadogina bona Mataio 7:​24-​27 ai Iesu ena Haroro Herevana Badana, ia lata momokani lasi herevana, ena hereva dokona oi hahegeregerea.

Haroro Gaukara Lalonai. Haroro gaukara lalonai hereva dokodia momo do oi gwauraia, nega ma ta be unai bamona lasi. Oi hegaegae  namonamo bona taunimanima oi lalokau henia karadia amo, namo bada oi havaraia diba. Ta ida oi herevahereva neganai danu, rau gunadia dekenai idia noho sisiba momo oi badinaia diba.

Reana herevahereva ia kwadogi momokani. Reana ruma tauna ia bisi. Reana emu vadivadi ibounai be miniti tamona sibona. Bema ia hegeregere, reana oi gwau: “Lau lalo-parara. To lau ura lalona hagoadaia herevana ta lau gwauraia. Baibel ese ia hahedinaraia ita ia Havaraia Tauna be mai ena ura hereadaena​—inai tanobada be taunimanima ese mauri hanaihanai idia moalelaia gabuna ai do ia halaoa. Ita be unai Paradaiso lalonai ita noho diba, to Dirava ena ura ita dibaia be gau badana.” Eiava reana oi gwau ma nega ta ai do oi giroa.

Bema ruma tauna ena hereva ta​—reana ena hereva dikana ta​—dainai hereva oi hadokoa haraga, dala ia do noho namo oi havaraia totona. Mataio 10:​12, 13 bona Roma 12:​17, 18 edia sisiba oi laloatao. Emu hereva namodia dainai reana ena lalohadai Iehova ena Witnes taudia dekenai do ia haidaua. Bema unai ia vara gau namona oi havaraia unai.

Eiava, oi be reana ruma tauna ida oi herevahereva namonamo. Oi ura do ia laloatao hereva badana oi gwauraia lou be namo, ani? Bona ia oi hagoadaia kara ta do ia karaia.

Bema oi laloa nega ma ta do umui herevahereva lou be namo, hereva ta amo ruma tauna ena ura oi habadaia. Henanadai ta oi henia​—reana Buka Helaga Herevalaia bukana eiava Baibel stadi karaia totona idia karaia buka ta amo henanadai ta oi abia hidi. Iesu ese ia gwauraia tahua gauna Mataio 28:​19, 20 dekenai oi laloatao.

Baibel stadi ta ena hereva dokona oi gwauraia, a? Sinado oi gwauraia lou dainai stiuden tauna ese umui herevalaia gauna do ia laloatao. Bema riviu oi karaia namonamo, riviu henanadai ese stiuden tauna idia durua, hereva badadia ia laloatao totona. Bema henanadai ta oi gwauraia umui stadilaia gauna ese stiuden tauna ia durua dalana eiava ma haida dekenai ia herevalaia dalana ia hahedinaraia totona, stiuden tauna do ia durua ia dibaia gaudia ia gaukaralaia dalana ia laloa.​—Aon. 4:7.

Oi laloatao​—hereva dokona namona ese emu hereva ibounai ena namo ia habadaia.