KERISTANI taudia haida be sikuli bada taudia lasi. Aposetolo Petero bona Ioane danu idia gwauraia “sikuli bada lasi bona aonega bada lasi taudia.” (Kara 4:13) To, gau badana be oi naria namonamo, hereva oi gwauraia kerere dainai Baibel ena hereva momokani idia kamonai lasi garina.

Inai Oi Laloa be Namo. Gado iboudiai edia hereva gwauraia maoro taravatudia be tamona lasi. Gado momo be alfabet letadia ai idia torea. Latin alfabet sibona lasi, to Arabic, Cyrillic, Greek, bona Heberu alfabet idia noho danu. China gado idia torea neganai, alfabet idia gaukaralaia lasi, to maka mai edia kahana idauidau idia gaukaralaia. Unai maka ese hereva ta eiava hereva ena kahana ta idia hahedinaraia. Ena be Japan gado bona Korea gado be China gado ena maka idia gaukaralaidia, to idia ese gado regena idauna idia gaukaralaia bona reana edia anina be tamona lasi.

Alfabet idia gaukaralaia gadodia ai, hereva oi gwauraia maoro totona leta ta ta eiava leta edia orea ta ta be gado regena maorona ai oi gwauraia. Unai ia auka lasi, bema gado be mai ena taravatu goadana, Greek, Spain, bona Zulu gadodia bamona. To, gado idauna ta ena hereva haida be gado lalonai idia vareai neganai, reana hereva gwauraia dalana be unai hereva ia mai gadona ena taravatu hegeregerena. Unai dainai, reana leta ta eiava leta edia orea gwauraia daladia be idauidau, bona nega haida, reana idia gwauraidia lasi. Namona be unai dala idauidau oi laloatao bona oi hereva neganai oi badinaia. China gado ai, hereva idia gwauraia maoro totona maka tausen momo idia laloatao be namo. Gado haida ai, gado regena idia haidaua neganai, hereva ena anina ia idau. Bema ta ese unai  ia laloa namonamo lasi, lalohadai kereredia ia hahedinaraia diba.

Bema gado ta ai hereva be mai edia kahana idauidau, kahana maorona idia gwauraia goada be gau badana. Unai bamona gadodia momo ai, dala tamona ai hereva idia gwauraia. Hereva ta be unai dala ia badinaia lasi neganai, reana idia torea herevana be mai ena maka ta. Unai amo ia auka lasi hereva idia gwauraia maoro. To, bema dala tamona ai hereva idia gwauraia lasi, hekwakwanai ia bada sisina. Hanaia totona gau momo idia laloatao be gau badana.

Gau haida ese hereva gwauraia maoro karana idia hadikaia diba. Bema hereva oi gwauraia maoro momokani, toana be oiemu hereva dalana ai oi hereva lasi, bona reana toana be oi hekokoroku. Hari idia gaukaralaia lasi dalana ai hereva oi gwauraia be unai bamona danu, badina unai ese taunimanima edia lalona ia veria hereva henia tauna idia laloa totona. To, hereva kava sibona bona hereva gwauraia namonamo lasi karana oi dadaraia danu. Unai gaudia haida be “Hereva Gwauraia Goevagoeva” kahana ai ita herevalaia vadaeni.

Reana tano idauidau ai, bona tano tamona ena kahana idauidau ai danu, gado ta ena hereva gwauraia maoro dalana be tamona lasi. Reana idau tano amo ia mai tauna ese hereva ia gwauraidia idau. Reana diksenari ese hereva gwauraia dalana maorona tamona sibona lasi, to dala maorodia haida idia hahedinaraia. Bona bema ta be sikuli bada lasi tauna eiava bema hari ia gaukaralaia gadona be iena gado korikorina lasi, heduru bada ia abia bema ia noho gabuna ena gado ai ia hereva namonamo tauna ena hereva dalana ia kamonai bona ia bamona hereva ia gwauraia toho. Ita be Iehova ena Witnes taudia dainai, ita ura ita harorolaia sivaraina ia hahairaia bona eda gabu ai idia noho taudia idia lalo-pararalaia haraga dalana ai ita hereva.

Dina ta ta ai oi hereva neganai, oi diba namonamo herevadia oi gaukaralaia be namo. Nega momo, taunimanima ida oi herevahereva neganai hereva gwauraia dalana be hekwakwanai lasi.

To, hereva oi duahia badabada neganai, reana dina ta ta ai oi gaukaralaia lasi herevadia oi davaria. Bona Iehova ena Witnes taudia idia duahiduahi badabada momo. Taunimanima ita haroro henia neganai, idia dekenai Baibel ita duahia. Tadikaka haida idia noia, Gima Kohorona Stadi eiava Kongregesen ena Buka Stadi dekenai paragraf idia  duahia totona. Gau badana be hereva ita duahia maoro bona namo lasi hereva ita gwauraia kerere dainai ita harorolaia sivaraina ita hahedinaraia namonamo lasi.

Oi laloa Baibel lalonai ladana haida oi gwauraia be ia auka, a? Oi gwauraia namonamo totona kahana maragidia ai oi hapararaia bona unai kahana ta ta oi gwauraia toho. Hegeregere, Me-le-ki-se-de-ka. Gabeai, unai kahana ta ta oi gwauraia hebou.

Hanamoa Daladia. Hereva idia gwauraia maoro lasi taudia momo be unai hekwakwanai idia itaia lasi. Bema sikuli naria tauna ese oi dekenai hereva gwauraia karana ena kahana haida ia herevalaia, namona be ena kara namo dainai oi moale. Hekwakwanai oi diba neganai, edena dala ai do oi hanamoa diba?

Dala ginigunana be duahiduahi kahana oi abia neganai, oi diba lasi herevadia be diksenari ai oi tahua. Bema diksenari gaukaralaia dalana oi diba namonamo lasi, ta oi noia oi dekenai ia hadibaia totona. Diksenari ai bema oi tahua herevana gwauraia dalana ia noho, oi gwauraia badabada nega momo.

Hereva gwauraia karana hanamoa dalana iharuana be tau eiava hahine ma ta​—hereva ia gwauraia namonamo tauna​—dekenai oi duahiduahi bona ia oi noia oi gwauraia kerere herevadia do ia hamaoromaoroa.

Hereva gwauraia karana hanamoa dalana ihatoina be ia hereva namonamo tauna ena hereva oi kamonai namonamo. Hiri Motu gado ai Society ena buka haida be kaset teipi dekenai idia duahia, unai oi kamonai henia diba. Oi kamonai neganai, oi tahua bema hereva haida be oi gwauraia dalana amo idia idau. Unai hereva oi torea, bona oi gwauraia loulou. Gabeai, hereva do oi gwauraia kerere lasi, bona unai ese emu hereva dalana ia hanamoa bada.