OI DAVARIA ma haida ida oi herevahereva be auka lasi, a? Taunimanima momo be idia diba lasi taudia bona ma haida ida do idia herevahereva idia laloa neganai, idia lalo-hekwarahi bada. Reana idia be hemarai taudia. Reana idia laloa: ‘Dahaka do lau herevalaia? Edena dala ai herevahereva do lau hamatamaia? Dahaka do lau karaia emai herevahereva ia heau noho totona?’ Idia hemarai lasi bona idia hereva momo taudia be reana herevahereva idia biagua. Reana ma haida do idia veria edia lalohadai idia gwauraia totona bona ma haida idia hereva neganai idia kamonai totona idia hekwarahi. Unai dainai ita ibounai, herevana ita be hemarai eiava hemarai lasi taudia, ese herevahereva karana ita hanamoa be namo.

Reana ruma dekenai emu herevahereva karana oi hanamoa matamaia diba, ani? Herevahereva namonamo karana ese ruma bese ena moale do ia habadaia.

Unai bamona herevahereva lalonai ta ta laloa bada karana be mai anina bada. (Deu. 6:​6, 7; Aon. 4:​1-4) Ma ta ita laloa bada neganai, do ita hereva bona ia ura gau ta ia gwauraia neganai do ita kamonai. Gau namodia ita herevalaia be mai anina bada. Bema hanaihanai Baibel ita duahia bona stadilaia, ita herevalaia diba gaudia be momo. Dina Iboudiai Buka Helaga Tahua buklet gaukaralaia namonamo karana ese herevahereva ia havaraia diba. Reana dina lalonai haroro gaukara ai ekspiriens namona ita abia. Reana diba ia henia eiava kiri ia havaraia gauna ta ita duahia. Ruma bese ida ita herevahereva neganai, unai gaudia ita herevalaia be namo. Unai ese ita do ia durua, taunimanima ida ita herevahereva totona.

Taunimanima momo be idia diba lasi tauna ida herevahereva idia hamatamaia haraga lasi. To Iehova ena Witnes taudia ese Dirava bona edia dekena taudia idia lalokau henia dainai, herevahereva karana idia dibaia totona idia hekwarahi, badina idia ura ma haida dekenai Baibel ena hereva momokani idia harorolaia. Dahaka ese oi ia durua diba, unai kara oi hanamoa totona?

 Filipi 2:4 ena hakaua herevana be mai anina bada. Ita ia hagoadaia ‘eda namo sibona ita tahua lasi, to ma haida edia namo ita tahua.’ Namona be inai bamona oi laloa: Bema tau ta ida guna oi hedavari lasi, ena hemami be oi ia diba lasi. Edena dala ai ena hemami oi hanamoa diba? Do oi kiri bona oi hedavari henia, unai ese do ia durua. To gau ma ta oi laloa be namo danu.

Reana gau ta ia laloa noho neganai ena lalohadai oi utua. Bema oi ura ia ese oi laloa gauna ia laloa to ia laloa gauna oi laloa lasi, do ia ura kamonai, a? Samaria ai, Iesu be ranu guri dekenai hahine ta ia davaria neganai, dahaka ia karaia? Hahine ia ura ranu ia abia bona unai ia laloa. Iesu ese herevahereva ia matamaia neganai, ranu ia herevalaia, bona nega sisina murinai lauma gaudia idia herevalaia namonamo.​—Ioa. 4:​7-26.

Bema oi laloa namonamo, oi danu ese taunimanima idia laloa gaudia oi itaia diba. Tau ta ena toana be ia moale eiava ia lalohisihisi? Ia buruka, reana ia gorere, a? Toana haida amo oi diba ruma dekenai natudia idia noho, a? Toana be ruma tauna be kohu bada tauna eiava mauri durua gaudia abia totona ia hekwarahi? Ia eiava iena ruma ena herahera gaudia ese idia hahedinaraia tomadiho ta ia badinaia, a? Bema oi hedavari henia lalonai unai gaudia oi gwauraia, reana ruma tauna ia itaia oi ese ia laloa gaudia oi laloa.

Bema ruma tauna ese iduara ia kehoa lasi dainai ia oi itaia lasi to ena gadona sibona oi kamonai, dahaka oi laloa diba? Reana unai tauna ia gari bada. Unai oi diba dainai, dala oi kehoa diba ia ida oi herevahereva totona, a?

Gabu haida dekenai, tau ta be oi ida do ia herevahereva totona oi sibona emu sivarai​—oiemu tubu gabuna, ena iduara dekenai oi mai, Dirava oi abidadama henia, bona Baibel oi stadilaia matamaia ena badina, bona Baibel ese oi ia durua daladia​—be ia dekenai oi hahedinaraia guna be namo. (Kara 26:​4-23) To momokani, gau badana be mai aonega ida oi gwauraia bona oi gwauraia ena badina ia hedinarai namonamo. Bona reana unai dainai oi dekenai iena sivarai bona iena lalohadai do ia hahedinaraia.

Gabu haida dekenai, idau taudia abia dae karana be vaia taunimanima edia kara. Reana maoromaoro oi idia boiria, ruma dekenai oi vareai bona oi helai totona. Oi helai neganai, bema ruma bese ena noho oi henanadailaia bona mai momokani ida oi kamonai, reana ruma tauna ese oi  herevalaia gauna do ia kamonai namonamo. Taunimanima ma haida ese vadivadi taudia idia laloa bada momokani dainai, reana emui hedavari hereva ginigunadia do idia lata. Unai umui karaia lalonai, reana idia itaia gau haida dekenai umui lalo-tamona. Unai amo, lauma dalanai hagoadaia herevahereva oi hamatamaia diba.

Bema oiemu gabu ai taunimanima momo be emu gado dekenai idia hereva lasi be edena bamona? Edena dala ai unai taudia oi haroro henia diba? Bema unai gado idauidau ai hedavari herevana kwadogina oi dibaia toho, do idia diba idia oi laloa. Reana unai ese dala ia kehoa do umui herevahereva totona.

Herevahereva do ia heau noho totona oi hereva henia tauna ena lalohadai oi laloa bada. Bema ia ura ena lalohadai ia hahedinaraia, oi hagoadaia unai do ia karaia. Oi abia hidi namonamo henanadai ese oi ia durua diba. Iena lalohadai oi tahua henanadai oi henia be namo, badina idia dekenai oibe eiava lasi sibona do ia gwauraia lasi. Hegeregere, emui gabu ai momo ese idia lalo-hekwarahilaia hekwakwanai ta oi gwauraia murinai, oi henanadai: “Oi laloa dahaka ese unai hekwakwanai ia havaraia?” eiava “Oi laloa dahaka ese unai ia hanamoa diba?”

Henanadai oi gwauraia neganai, ena haere oi kamonai namonamo. Hereva ta, lalo-tamona toana, eiava toana ma ta amo oi hahedinaraia ena hereva oi laloa bada. Ena hereva oi utua lasi. Ia gwauraia gauna oi laloa namonamo. “Hereva dekenai do [oi] kamonai haraga, to hereva do [oi] gwauraia haraga lasi.” (Iam. 1:19) Bona do oi hereva neganai, emu hereva amo oi hahedinaraia ena hereva oi kamonai namonamo.

To, namona be oi lalo-parara taunimanima iboudiai ese emu henanadai do idia haere henia lasi. Taunimanima haida edia haere dalana be edia matana ataiai huina idia hamarerea eiava idia kiri sibona. Ma haida be reana idia gwau oibe eiava lasi sibona. Oi badu lasi. Oi haheauka. Ta ia hereva totona ia oi doria lasi. Bema ia ura kamonai, Baibel amo hagoadaia herevadia oi gwauraia. Reana gabeai, do ia laloa oi be turana ta, bona mai ena ura ida ena lalohadai ia hahedinaraia.

Taunimanima ida oi herevahereva neganai, vaira negana oi laloa. Bema ta ese henanadai momo ia gwauraia, haida oi haerelaia to ta eiava rua oi rakatania, gabeai do umui herevalaia hebou totona. Oi gwau hereva ma haida do oi tahua, bona oi davaria gaudia be ia dekenai do oi hahedinaraia. Bema henanadai ia gwauraia lasi, reana emu hereva ena dokona ai iena lalona ia veria henanadai ta oi gwauraia diba. Oi gwau gabeai  do umui herevalaia. Buka Helaga Herevalaia bukana, Dirava Ia Ura Dahaka Ita Karaia? buklet, bona Gima Kohorona bona Awake! matamatadia amo lalohadai namodia oi davaria diba.

Iehova ena Witnes tauna ma ta be nega ginigunana oi davaria neganai, ia oi diba namonamo totona dala oi kehoa toho, a? Eiava oi gini kava sibona? Iseda tadikaka ita lalokau henia dainai, ita ura idia do ita diba. (Ioa. 13:35) Edena bamona do oi matamaia? Reana oiemu ladana oi gwauraia bona ena ladana totona oi henanadai? Nega momo hereva momokani ia dibaia dalana oi henanadailaia neganai, do umui herevahereva namonamo bona umui diba heheni. Herevana oiemu hereva dalana ia metau sisina, to ia oi hereva henia dainai ia diba ia oi laloa, bona unai be mai anina bada.

Dahaka ese kongregesen tauna ma ta ida emu herevahereva ia hanamoa diba? Oi hahedinaraia ia bona ena ruma bese oi laloa bada. Hari sibona hebou ia ore, a? Oi idia durua lalohadai oi gwauraia. Unai ese umui ruaosi ia durua diba. Reana Gima Kohorona eiava Awake! matamatana ena hereva namona ta oi gwauraia. Emu diba heagilaia eiava ena diba tohoa totona unai oi karaia lasi. To unai oi karaia, ia dekenai oi moalelaia gauna oi hahedinaraia totona. Reana umui ta ese Tiokratik Haroro Sikuli dekenai do ia henia herevana bona do ia karaia dalana umui herevalaia diba. Haroro gaukara lalonai idia vara ekspiriens umui herevalaia diba danu.

Momokani, taunimanima ita laloa bada dainai nega momo taunimanima​—idia gwauraia bona karaia gaudia​—ita herevalaia. Reana kiri gaudia ita herevalaia. Ita herevalaia gaudia ese ma haida do idia hagoadaia, a? Bema Dirava ena Hereva ena sisiba ita laloatao bona Dirava ena lalokau ese ita ia hasiahua, iseda hereva ese ma haida do ia hagoadaia.​—Aon. 16:​27, 28; Efe. 4:​25, 29; 5:​3, 4; Iam. 1:26.

Haroro gaukara dekenai ita lao gwauraia neganai, ita hegaegae guna. Turadia ida oi herevahereva lalonai oi gwauraia diba sivaraina ta oi hegaegaelaia diba danu, ani? Emu lalona idia veria gaudia oi duahia eiava kamonai neganai, oi ura ma haida dekenai do oi gwauraia gaudia oi laloa. Gabeai, gau momo idia noho, oi abia hidi totona. Bema unai bamona oi karaia, ma haida ida dina ta ta gaudia sibona do oi herevalaia lasi. Bona inai be gau badana, namona be emu hereva ese ia hahedinaraia Dirava ena Hereva oi laloa bada!​—Sal. 139:17.