STADI 43
Idia Henia Gauna Gaukaralaia
BAIBEL ia gwau Keristani kongregesen be tauanina ta bamona. Kahana ta ta be mai anina bada, to idia be “mai edia gaukara idauidau.” Unai dainai, ita abia hesiai gaukara iboudiai ita abia dae. Anina be do ita herevalaia totona idia henia gaudia ibounai ita lalo-pararalaia bona hegaegaelaia namonamo, bona namo lasi ita abia gauna ita laloa maragi badina ita laloa gau ma haida ita herevalaia be namo herea. (Roma 12:4-8) Hesiai tauna mai ena kamonai bona kara maoromaoro oreana ena maduna be lauma aniani be “aniani neganai” ia henia. (Mat. 24:45) Unai ubua dalana ita matauraia bema eda diba ita gaukaralaia ita idia hadibaia hegeregerena eda hereva ita hegaegaelaia totona. Unai ese kongregesen ena gaukara ia durua namonamo.
Oi Herevalaia Gaudia. Sikuli lalonai do oi herevalaia gauna idia henia neganai, unai gauna oi hegaegaelaia, gau idauna ta lasi. Nega momo, buka ta ena kahana idia gwauraia. Bema idia gwau lasi edena buka amo emu hereva totona diba ma haida oi abia, buka haida oi abia hidi diba. To, emu hereva oi hegaegaelaia neganai, emu hereva ibounai ese idia henia gauna ia hahedinaraia be namo. Oi herevalaia gaudia oi abia hidi neganai, kamonai taudia oi laloa danu.
Oi itaia bukana ena kahana maorona oi stadilaia namonamo, bona unuseniai idia noho siridia oi laloa namonamo. Bena kamonai taudia durua totona do oi gaukaralaia namonamo dalana oi laloa. Unai buka ena kahana amo hereva badadia rua eiava toi oi abia hidi, emu hereva ena hereva badadia totona. Unai hegeregerena, idia henia gauna amo do oi duahia bona herevalaia siridia oi abia hidi.
Idia henia gauna ibounai amo dahaka do oi herevalaia? Oi herevalaia namonamo diba gaudia sibona. Namo lasi diba bada oi ura herevalaia dainai, emu hadibaia namonamo gaukara ia hadikaia. Bema oi tahua herevadia haida be emu hereva ena tahua gauna ida idia hegeregere lasi, namona be unai tahua gauna hagugurua totona oi idia durua kahana sibona oi laloa. Idia henia gauna amo, kamonai taudia idia hadibaia bona
durua herevadia sibona oi gaukaralaia. Inai hereva hanamoa kahana lalonai, idia henia gauna ibounai oi gaukaralaia be oiemu tahua gauna lasi, to idia henia gauna oi gaukaralaia emu hereva ena badina oi haginia totona.Emu hereva lalonai idia henia gauna ena hereva badadia do oi gwauraia sibona lasi. Namona be ena kahana haida oi herevalaia namonamo, edia anina oi habadaia, oi haheitalaia, bona reana badinaia dalana oi hahedinaraia. Idia henia gauna ena gabu ai lalohadai ma haida oi herevalaia be namo lasi, to unai lalohadai oi gaukaralaidia idia henia gauna ena kahana badadia edia anina oi habadaia totona.
Idia hadibaia namonamo diba tadikaka be reana gabeai idia boiria Hesiai Hebou dekenai kongregesen idia hadibaia totona. Idia lalo-parara, hereva totona idia abia gauna idia gaukaralaia namonamo be mai anina bada bona ena gabu ai gau ma ta idia herevalaia lasi. Unai hegeregerena, pablik tok idia henia tadikaka dekenai autlain idia henia. Sibona edia dala ai hereva idia henia diba, to autlain dekenai edia anina do idia habadaia hereva badadia, idia durua lalohadai, bona hereva ena badina idia havaraia siridia idia hedinarai goevagoeva. Idia henia gauna gaukaralaia karana amo ma haida hadibaia dalana oi dibaia neganai, hereva ma haida henia totona oi hegaegae.
Danu, unai diba ese oi ia durua Baibel stadi namodia oi karaia totona. Umui stadilaia gauna herevalaia karana do oi dibaia bona umui stadilaia gauna lalo-pararalaia totona anina lasi gaudia oi herevalaia lasi, herevana idia be gau namodia. To, bema inai karoa ena anina korikori oi lalo-pararalaia, emu hadibaia dalana do ia auka lasi bona oi itaia stiuden tauna dekenai diba ma haida oi hadibaia be namo neganai, unai do oi karaia.