OI HEREVA neganai, sivarai sibona oi gwauraia lasi. Oi hekwarahi, emu hereva be kamonai taudia ese idia lalo-pararalaia dalana ai oi gwauraia totona. Unai ese oi ia durua, kongregesen taudia bona Witnes lasi taudia oi hereva henia neganai, do oi herevahereva namonamo.

Idia lalo-pararalaia herevana oi henia totona heduru gaudia be momo. Stadi 26, “Lalohadai Hakapua Namonamo,” ese idia haida ia hahedinaraia. Ma haida be Stadi 30, “Ma Ta Laloa Bada,” lalonai idia hedinarai. Inai karoa lalonai, ma haida do ita herevalaia.

Auka Lasi Herevadia, Auka Lasi Dalanai. Auka lasi herevadia bona sentens kwadogidia be herevahereva idia hanamoa gaudia badadia. Iesu ena Haroro Herevana Badana be taunimanima ibounai gabu iboudiai dekenai ese idia lalo-pararalaia diba herevana namona. Reana idia dekenai unai lalohadai be matamata. To, Iesu ena hereva idia lalo-pararalaia, badina ita ibounai ita laloa gaudia ia herevalaia: moale davaria dalana, ma haida ida hetura karana hanamoa dalana, lalo-hekwarahi hanaia dalana, bona mauri ena badina davaria dalana. Bona ia ese auka lasi herevadia amo ena lalohadai ia hahedinaraia. (Mat. Karoa 5-7) Momokani, Baibel lalonai sentens edia lata bona idia gwauraia daladia be idauidau. Emu tahua gauna badana be anina ia hahedinaraia goevagoeva bona idia lalo-pararalaia diba dalanai lalohadai oi gwauraia.

Ena be dobu gaudia oi herevalaia, to auka lasi dalanai oi gwauraia dainai do idia lalo-pararalaia haraga. Auka lasi dalanai edena bamona oi hereva diba? Lalohadai idauidau momo oi gwauraia lasi, kamonai taudia idia daradara garina. Do oi herevalaia gaudia oi atoa namonamo, idia ese hereva badadia idia hahedinaraia totona. Siri badadia oi abia hidi namonamo. Siri momo oi duahia haraga lasi, to idia oi duahia bona herevalaia. Lalohadai namona be hereva momo amo oi hunia lasi.

Baibel stadi oi karaia neganai, unai hakaua herevadia oi badinaia. Kahana  maragidia ibounai oi herevalaia toho lasi. Stiuden tauna oi durua lalohadai badadia ia lalo-pararalaia goevagoeva. Gabeai, sibona ena stadi bona kongregesen heboudia lalonai, unai kahana maragidia do ia dibaia.

Auka lasi dalanai gau ta oi herevalaia totona, oi hegaegae namonamo be namo. Namona be do oi herevalaia gauna oi lalo-pararalaia namonamo guna, bema oi ura ma haida ese idia lalo-pararalaia dalanai oi hahedinaraia. Gau ta oi lalo-pararalaia namonamo neganai, unai ena badina oi gwauraia diba. Danu, sibona emu hereva amo unai oi gwauraia diba.

Idia Diba Lasi Herevadia Edia Anina Oi Gwauraia. Nega haida kamonai taudia ese gau ta idia lalo-pararalaia totona idia diba lasi herevadia edia anina oi gwauraia be gau badana. Oi laloa lasi kamonai taudia edia diba be bada herea, to danu, oi laloa lasi edia lalo-parara ia maragi. Baibel oi stadilaia dainai, reana ma haida idia diba lasi herevadia oi gaukaralaia. Bema inai hereva “orena taudia,” “hesiai tauna mai ena kamonai, bona mai ena kara maoromaoro,” “mamoe idaudia,” bona “hutuma bada herea” edia anina oi gwauraia hedinarai lasi, Witnes lasi taudia do idia lalo-parara lasi unai be taunimanima edia orea idauidau. (Roma 11:​5, NW; Mat. 24:45; Ioa. 10:16; Apok. 7:​9, NW) Unai hegeregerena, bema ta be Iehova ena Witnes taudia edia orea ia diba lasi, reana ia ese hereva haida, hegeregere “pablisa,” “painia,” “sekit naria tauna,” bona “Memorial,” edia anina do ia lalo-pararalaia lasi.

Reana Baibel ena hereva haida, Witnes lasi taudia haida danu ese idia gaukaralaia momo herevadia, edia anina ita gwauraia be namo. Taunimanima momo idia laloa “Aramagedono” be niuklia tuarina ta. Reana idia laloa “Dirava ena Basileia” be tau ta lalonai ia noho gauna eiava guba gauna ta, to idia laloa lasi ia be gavamani ta. Bema inai hereva “souli” oi gwauraia, reana haida do idia laloa unai be tauanina ia mase murinai ia mauri noho laumana ta. Taunimanima milioni momo idia hadibadia, “lauma helaga” be lauma tauna ta, Toi Tamona ena kahana ta. Taunimanima momo herea ese Baibel dekenai idia noho kara maoromaoro taravatudia idia dadaraia dainai, reana Baibel ena hereva, “heudahanai karadia umui rakatania,” idia lalo-pararalaia totona heduru idia abia be namo danu.​—1 Kor. 6:18.

Reana Baibel idia duahia momo lasi taudia idia daradara bema oi  gwau, “Paulo ia torea . . . ” eiava “Luka ia gwau . . . ” Badina reana edia turadia eiava dekena taudia edia ladadia be unai bamona. Ia namo bema hereva haida amo oi hahedinaraia Luka be Keristani aposetolo tauna ta bona Luka be Baibel torea tauna ta.

Hari inai negai taudia ese heduru idia abia be namo, idaunegai taudia edia mauri dalana eiava gau idauidau edia bada idia hahedinaraia siridia lalo-pararalaia totona. Hegeregere, Noa ena lagatoi ena lata be mita 133, ena lababa be mita 22, bona ena ataiai be mita 13, to reana ena bada idia lalo-pararalaia momokani be auka. (Gen. 6:15) To bema idia diba gauna ta ena lata, lababa, bona ataiai ida unai oi hahegeregerea, lagatoi ena bada idia lalo-pararalaia haraga.

Oi Gwauraia Hedinarai. Kamonai taudia ese gau ta idia lalo-pararalaia namonamo totona, reana hereva ta ena anina oi gwauraia sibona be hegeregere lasi. Ierusalema dekenai Esera ena nega ai, Taravatu idia duahia neganai ena anina idia hahedinaraia namonamo danu. Taunimanima ese Taravatu idia lalo-pararalaia totona Levi taudia ese ena anina bona unai negai taudia edia mauri lalonai idia badinaia dalana idia gwauraia hedinarai namonamo. (Neh. 8:​8, 12) Unai hegeregerena, oi duahia siri edia anina bona badinaia dalana oi gwauraia hedinarai danu.

Iesu ia mase bona ia toreisi lou murinai, ena hahediba taudia dekenai ia hahedinaraia idia vara gaudia ese Baibel ena hereva idia hagugurua. Danu, ia hahedinaraia edia maduna be unai gaudia do idia gwauraia hedinarai. (Luka 24:​44-48) Bema taunimanima oi durua dainai idia itaia edena bamona idia dibaia gaudia ese edia mauri idia haidaua be namo, edia anina idia lalo-pararalaia haraga danu.

Kudouna Ena Gaukara. Ena be ta dekenai gau ta oi gwauraia hedinarai goevagoeva, to reana badina ma haida dainai ia lalo-pararalaia lasi. Ta ena kudouna ia namo lasi neganai, unai ese iena lalo-parara karana ia koua. (Mat. 13:​13-15) Gau iboudiai be tauanina dalanai idia laloa taudia ibounai dekenai, lauma gaudia be kavakava gaudia. (1 Kor. 2:14) Bema tau ta be unai bamona lalohadai ia hahedinaraia, reana aonega karana be herevahereva oi hadokoa​—reana nega ma ta ai oi tohoa lou.

To, nega haida ta ena kudouna ia namo lasi badina ena mauri ia auka. Bema unai bamona tauna ese nega sisina lalonai Baibel ena hereva momokani ia kamonai loulou, reana ena kudouna do ia namo. Iesu ese ena aposetolo taudia dekenai ia do idia hahisia bona hamasea herevana  ia gwauraia neganai, unai idia lalo-pararalaia lasi. Dahaka dainai? Badina unai idia laloa diba lasi bona idia ura lasi dainai! (Luka 18:​31-34) To gabeai, unai aposetolo taudia amo 11 idia lalo-parara, bona Iesu ese idia dekenai ia hadibaia gaudia idia badinaia karana amo unai idia hahedinaraia.

Haheitalai Namona Ena Namo. Hereva sibona amo lasi, to kara amo danu taunimanima oi durua, lalo-parara idia abia totona. Taunimanima momo idia gwau, Kingdom Hall dekenai idia lao negana ginigunana idia laloa neganai, hereva idia laloatao lasi to idia mamia lalokauna idia laloatao. Unai hegeregerena, moale ita hahedinaraia dainai, ruma taudia momo ese Baibel ena hereva momokani idia abia dae. Haida be Iehova ena orea taudia ese ta ta dekenai idia hahedinaraia lalokau bona hisihisi idia davaria taudia dekenai idia hahedinaraia hebogahisi idia itaia neganai, idia abia dae Witnes taudia edia tomadiho be tomadiho momokanina. Unai dainai, taunimanima ese Baibel ena hereva momokani idia lalo-pararalaia totona idia oi durua neganai, unai hereva momokani oi hahedinaraia dalana bona sibona emu haheitalai oi laloa.