HEREVANA Dirava ena hesiai taudia ese dahaka hekwakwanai idia davaria, namona be Keristani kongregesen ese idia ia hagoadaia diba. Unai ia vara totona namona be elda taudia ese hagoadaia dalanai edia hereva bona sisiba idia henia. Namona be elda taudia be “lai koua gabuna hegeregere do idia lao. Idia be guba bada ia toa neganai hunia gabudia namodia hegeregere. Idia be tano kaukau gabudia lalonai sinavai maragidia hegeregere. Idia be nadi badana ena ikerukeru bamona, tano kaukau dekenai.”​—Isa. 32:2.

Bema oi be elda ta, emu hereva ese ma haida idia hagoadaia, a? Idia ura Iehova idia badinaia taudia idia hagoadaia, a? Idia hagoadadia, herevana taunimanima idia ura lasi eiava idia dagedage to Dirava ena ura do idia karaia noho, a? Bema kamonai taudia haida idia daradoko, moni ena hekwarahi bada dainai idia laloa momo, eiava idia hanamoa diba lasi gorere idia haheaukalaia be edena bamona? ‘Emu uduna dekena amo, oi ese emu tadikaka oi hagoadaia diba.’​—Iobu 16:5.

Oi be hereva henia tauna dainai, oi dekenai ia kehoa dalana oi gaukaralaia bona emu tadikaka oi durua, Iehova bona ia henia gaudia amo helaro bona goada idia abia totona.​—Roma 15:13; Efe. 6:10.

Iehova ese Ia Karaia Gaudia Oi Gwauraia. Ma haida hagoadaia dalana badana ta be Iehova ese gunaguna hekwakwanai lalonai ena taunimanima ia durua daladia oi gwauraia.​—Roma 15:4.

Israela be ena inai besedia idia noholaia Gwauhamata Tanona dekenai idia do vareai lasi neganai, Iehova ese Mose ia hamaoroa Iosua do ia “hagoadaia” bona ‘iena lalona ia ha-aukaia.’ Edena dala ai Mose ese unai ia karaia? Iosua ia noho neganai, Mose ese unai bese ibounai dekenai Aigupito idia rakatania negana amo Iehova ese idia totona ia karaia gaudia ia gwauraia lou. (Deu. 3:28; 7:18) Iehova ese idia ia durua dainai Amoro taudia idia halusia negadia ia gwauraia danu. Bena Mose ese Iosua ia hagoadaia, ia gwau: “Do oi goada, oiemu lalona do oi ha-aukaia.”  (Deu. 31:​1-8) Emu tadikaka oi ura hagoadaia neganai, idia oi durua Iehova ese idia totona ia karaia vadaeni gaudia idia laloa lou bona goada idia abia, a?

Nega haida, hekwakwanai ese haida idia hametaua momokani dainai, idia laloa reana Basileia ena hahenamo do idia itaia lasi. Idia dekenai oi hadibaia lou, Iehova ese ena gwauhamata iboudiai do ia hagugurua.​—Ios. 23:14.

Tano haida ai eda tadikaka idia hekwarahi, badina gavamani ese sivarai namona harorolaia gaukarana ia taravatua. Unai neganai, lalokau elda taudia ese edia tadikaka idia durua diba, Iesu Keriso ena aposetolo taudia dekenai idia vara gaudia amo goada idia abia totona. (Kara 4:1–5:42) Bona Eseta bukana lalonai Dirava ese idia vara gaudia ia biagua dalana oi herevalaia neganai, tadikaka ese goada do idia abia.

Nega haida taunimanima be kongregesen heboudia dekenai idia lao, to kara ma haida idia karaia lasi. Reana idia laloa edia mauri dalana gunana ia dika momokani dainai, Dirava ese edia kara ia gwauatao diba lasi. Reana Iehova ese King Manase ia kara henia dalana oi herevalaia diba. (2 Siv. 33:​1-16) Eiava reana idaunegai Korinto taudia edia sivarai oi gwauraia, idia ese edia mauri dalana idia haidaua, Keristani taudia ai idia lao, bona Dirava vairanai idia maoromaoro.​—1 Kor. 6:​9-11.

Haida idia laloa hekwakwanai idia davaria badina Dirava ese idia ia lalo-namo henia lasi, a? Reana Iobu dekenai idia vara gaudia bona Iehova ia badinaia noho dainai ia abia hahenamo badadia oi gwauraia diba. (Iobu 1:​1-22; 10:1; 42:​12, 13; Sal. 34:19) Iobu idia hagoadaia taudia koikoidia idia gwau Iobu ese kara dika ta ia karaia. (Iobu 4:​7, 8; 8:​5, 6) To, Paulo bona Banaba be hahediba taudia idia abidadama noho totona idia hagoadaia neganai, idia gwau: “Hisihisi momo lalonai Dirava ena Basileia do ita raka vareai.” (Kara 14:​21, 22) Hari danu, dagedage idia davaria taudia oi hagoadaia diba bema idia oi hadibaia Keristani taudia ibounai be dagedage lalonai idia haheauka be gau badana bona Dirava ena matana ai unai be kara namona ta.​—Aon. 27:11; Mat. 24:13; Roma 5:​3, 4; 2 Tim. 3:12.

Kamonai taudia oi hagoadaia, Iehova ese edia mauri lalonai ena gwauhamata ia hagugurua daladia idia laloa totona. Idia oi durua karana amo, reana idia itaia Iehova ese idia dekenai kara ta ia karaia vadaeni, guna ia gwauhamata hegeregerena. Salamo 32:8 ia gwau: “Lau ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.” Bema kamonai taudia oi durua dainai Iehova ese idia ia hakaua bona hagoadaia daladia idia laloatao,  idia be dala namona ai idia itaia diba Iehova ese idia ia naria bona herevana edena bamona hekwakwanai idia haheaukalaia, idia do ia durua noho.​—Isa. 41:​10, 13; 1 Pet. 5:7.

Oi Hahedinaraia Hari Dirava Ia Karaia Gaudia Oi Moalelaia. Emu tadikaka oi ura hagoadaia neganai, Iehova ese hari ia karaia gaudia oi gwauraia. Bema unai gaudia oi herevalaia neganai oi hahedinaraia unai gaudia oi moalelaia, kamonai taudia edia kudouna lalonai unai bamona hemami oi havaraia.

Iehova ese mauri ena lalo-hekwarahi gaudia haheaukalaia totona ita ia durua daladia oi laloa. Ia ese ita dekenai mauri dalana namona ia hahedinaraia. (Isa. 30:21) Ia ese taravatu utua karana, kara gageva, ogogami, gorere, bona mase edia badina bona unai gaudia do ia haorea dalana ia hahedinaraia. Ita dekenai lalokau tadikaka oreana ia henia. Ita dekenai guriguri ena hahenamo badana ia henia. Ita dekenai dala ia kehoa dainai ena Witnes taudia ai ita lao. Iseda matana ia kehoa bona ita itaia, Keriso be guba dekenai ia lohia vadaeni bona inai tanobada dikana ena dokona be kahirakahira.​—Apok. 12:​1-12.

Unai hahenamo sibona lasi, to kongregesen heboudia, sekit hebouhebou bona distrik hebouhebou ia henia danu. Ia henia gaudia be laloa bada dalanai oi herevalaia neganai, ma haida oi hagoadaia edia tadikaka ida idia hebou karana idia reaia lasi.​—Heb. 10:​23-25.

Iehova ese haroro gaukara lalonai eda hekwarahi ia hanamoa karana idia hahedinaraia sivaraidia ese iseda lalona idia hagoadaia danu. Aposetolo edia negai Paulo bona Banaba be Ierusalema dekenai idia lao neganai, idau bese taudia ese edia lalona idia giroa ena sivarai idia gwauraia bona tadikaka iboudiai “idia moale bada.” (Kara 15:3) Oi danu ese tadikaka oi hamoalea diba bema idia dekenai ekspiriens namodia oi gwauraia.

Taunimanima ese goada idia abia danu, bema oi hahedinaraia idia karaia gaudia be mai anina bada. Keristani haroro gaukara idia karaia dainai idia oi hanamoa. Idia buruka eiava idia gorere dainai gaukara badana idia karaia diba lasi to mai kamonai ida idia haheauka noho taudia oi hanamoa. Idia dekenai oi hahedinaraia, Iehova be ena ladana dainai idia hahedinaraia lalokauna ia laloaboio lasi. (Heb. 6:10) Hahetoho ese idia ha-aukaia abidadama be dava bada kohuna bamona.  (1 Pet. 1:​6, 7) Iseda tadikaka dekenai unai ita gwauraia loulou be namo.

Vaira Negana Ena Helaro Oi Herevalaia Neganai Emu Hemami Oi Hahedinaraia. Dirava ena lauma amo idia torea gwauhamata vaira negana totona be Dirava idia lalokau henia taudia idia hagoadaia bada. Reana kamonai taudia momo ese nega momo unai idia kamonai vadaeni. To bema unai gwauhamata oi herevalaia neganai, oi hahedinaraia unai oi moalelaia bada, unai gaudia oi hamauria bamona, kamonai taudia oi durua bena idia abia dae momokani unai gaudia do idia vara, bona edia kudouna oi hamarerea unai gaudia dainai idia tanikiu bada totona. Tiokratik Haroro Sikuli ai oi dibaia gaudia oi badinaia neganai unai oi karaia diba.

Iehova ena taunimanima dekenai ia be Hagoadaia Tauna Badana bona Goada Ia Henia Tauna. To, ia ida oi gaukara hebou diba ma haida hagoadaia totona. Kongregesen oi hereva henia neganai, namona be unai heduru henia dalana oi gaukaralaia namonamo.