STADI 50
Kudouna Hamarerea Karana
TAUNIMANIMA oi haroro henia sibona lasi, to namona be oi hekwarahi edia kudouna oi hamarerea totona. Nega momo Baibel ese ia hahedinaraia tau ta ena toana bona ena kudouna be idau. Kudouna ese tau ta ena lalona momokani—ena hemami, ia laloa gaudia, ia lalodia ena badina, bona unai lalohadai ese ena kara idia biagua dalana—ia laulaulaia. Kudouna ese ia laulaulaia lalona dekenai, hereva momokani ena uhe ita hadoa. (Mat. 13:19) Bona gau badana be Dirava kamonai henia karana be kudouna amo ia mai.—Aon. 3:1; Roma 6:17.
Emu hadibaia gaukarana ese ta ena kudouna ia hamarerea totona, inai tahua gaudia oi laloa: (1) Kamonai tauna ena kudouna idia veria vadaeni gaudia oi laloa. (2) Kara namodia, hegeregere lalokau bona Dirava gari henia karana, oi habadaia. (3) Kamonai tauna oi hagoadaia, iena ura korikori ia tahua, Iehova do ia hamoalea diba totona.
Laloa Kehoa Hahedinaraia. Taunimanima ese hereva momokani idia do abia dae lasi ena badina be idauidau. Baibel stadi oi karaia neganai, reana ita idia inai henia kava karana oi haorea toho bona stiuden tauna ena lalohadai kereredia hamaoromaoroa totona hereva haida oi gwauraia, eiava hamomokania gaudia sibona oi hahedinaraia. Oi sibona oi nanadaia: ‘Inai tauna ia diba ia be taunimanima ta dainai ia dekenai lauma gaudia be mai anina bada, a? Dahaka ia abia dae vadaeni? Dahaka ia abia dae lasi? Dahaka dainai unai bamona ia laloa? Hereva momokani ia dibaia neganai ia abia maduna ia abia dae karana be ura haida ese idia koua diba dainai, hanaia totona heduru ia abia be namo, a?’
Nega haida taunimanima ese lalohadai haida idia abia dae ena badina ita diba be auka. Aonega Herevadia 20:5 ia gwau: “Taunimanima edia laloa gaudia be hunia, ranu dobuna bamona, to mai ena diba bada [“laloa kehoa,” NW] tauna ese, unai laloa gaudia ia davaria diba.” Laloa kehoa tauna ese ia hedinarai haraga lasi gauna ia itaia. Unai ia karaia diba totona gau idauidau ia itaia namonamo bona taunimanima ia laloa bada be namo.
Herevahereva ibounai be uduna sibona amo lasi. Reana hereva ta dainai stiuden tauna ena vairana ena toana eiava ena gado regena ia haidaua. Bema oi be tama eiava sina ta, oi diba emu natuna ena kara ia idau neganai, ena mauri lalonai gau matamata ta dainai unai bamona ia karaia. Unai toana oi laloa maragi lasi. Unai gaudia amo ena kudouna gaudia do oi dibaia.
Oi abia hidi namonamo henanadai amo ta ena kudouna gaudia oi dibaia diba. Reana oi henanadai: “Emu hemami be edena bamona . . . ?” “Dahaka dainai oi abia dae . . . ?” “Dahaka do oi karaia bema . . . ?” To henanadai momo herea amo idia oi hagaria lasi. Reana emu henanadai oi gwauraia matamaia neganai oi gwau, “Ia namo bema lau henanadai . . . ?” Kudouna lalonai idia noho gaudia oi dibaia be mai ena hekwarahi bona oi karaia haraga diba lasi. Nega momo, tau ta be nega sisina daudau murinai oi ia abidadama henia diba bona oi dekenai ena hemami korikorina ia hahedinaraia. Unai neganai danu, namona be oi naria namonamo, badina oi ura lasi ia laloa iena mauri gaudia oi herevalaia badabada.—1 Pet. 4:15.
Idia gwauraia gauna oi kamonai neganai danu laloa kehoa be mai anina bada. Oi laloatao emu tahua gauna be taunimanima edia hemami oi lalo-pararalaia, bena do oi diba edena Baibel herevadia ese edia lalona ia veria diba. Karaharaga oi gwau lasi edia lalohadai idia kerere. To, unai hereva idia hahedinaraia neganai edia hemami oi itaia toho. Bena do oi diba dahaka oi gwau be namo; bona stiuden tauna ia mamia iena hemami oi lalo-pararalaia dainai emu hereva do ia kamonai namonamo.—Aon. 16:23.
Taunimanima hutuma oi hereva henia neganai danu, edia lalona oi veria diba. Bema kamonai taudia oi itaia namonamo, edia vairana ena toana oi itaia, bona edia lalona dekenai idia haerelaia diba henanadai namodia oi gaukaralaia, kamonai taudia edia hemami emu hereva dekenai oi dibaia diba. Bema kamonai taudia oi diba namonamo, edia noho dalana oi laloa. Kongregesen taudia ida Dirava ena Hereva oi herevalaia neganai, edia lalohadai badana oi laloa.—Gal. 6:18.
Hemami Namona Oi Havaraia. Tau ta ese ia abia dae gaudia, ia abia dae lasi gaudia, bona unai ena badina oi diba neganai, unai oi gaukaralaia diba. Iesu ena toreisi lou murinai, “Buka Helaga ena anina” vanegai idia vara gaudia dekenai be iena hahediba taudia dekenai ia hadibaia karana amo edia kudouna ia hamarerea. (Luka 24:32) Oi danu ese ta dekenai idia vara gaudia, ia ura gaudia, bona Dirava ena Hereva lalonai ia itaia gaudia oi hakapua toho be namo. Stiuden tauna ena kudouna be heduru bada ia abia dalanai oi hamarerea bema gau ta ia lalo-pararalaia dainai ia gwau: “Inai be HEREVA MOMOKANI!”
Iehova ena kara namo, ena lalokau, ena hariharibada, bona ena kara maoromaoro daladia oi hahedinaraia neganai, oi hadibaia taudia oi durua, edia lalokau Dirava dekenai idia habadaia totona. Bema Dirava ese kamonai taudia ta ta dekenai ia itaia kara namodia be idia dekenai oi hahedinaraia, badina namona ta idia itaia dainai idia abia dae Dirava ena turana ai idia lao diba. Unai oi karaia diba, bema Salamo 139:1-3, Luka 21:1-4, bona Ioane 6:44 bamona siridia oi herevalaia, bona bema kamonai taudia oi durua Iehova ena lalokau badana ena hesiai taudia dekenai idia laloa bada totona. (Roma 8:38, 39) Oi hahedinaraia Iehova ese iseda kerere sibona ia itaia lasi, to eda mauri dala ibounai, iseda lalo-goada tomadiho goevana dekenai, bona iseda lalokau iena ladana dekenai ia itaia danu. (2 Siv. 19:2, 3; Heb. 6:10) Ita ta ta be edena bamona taudia ia diba bona ia laloatao namonamo, bona ia ese dala namona ai, “mase guria gabu dekenai idia noho taudia ibounai” do ia hatoreaisi lou. (Ioa. 5:28, 29; Luka 12:6, 7) Dirava ese sibona ena laulau bamona bona ena toana hegeregerena taunimanima ia karaia dainai, nega momo iena kara idauidau oi herevalaia karana ese edia kudouna ia hamarerea.—Gen. 1:27.
Ta be Iehova ese taunimanima ia laloa dalana ia dibaia neganai, ena kudouna ia hamarerea diba. Bema Dirava ese ita ia laloa bada, vadaeni lalohadai maorona be ma haida ia laloa bada danu, bona edia noho, bese, bona iduhu be anina lasi. (Kara 10:34, 35) Ta ese unai ia lalo-pararalaia neganai Baibel ese badina goadana ia atoa, ena kudouna amo badu bona inai henia kava karana ia kokia totona. Unai ese do ia durua dainai, Dirava ena ura ia karaia lalonai maino dalana ai ma haida do ia kara henia.
Danu, namona be ma haida oi durua, Dirava gari henia karana idia habadaia totona. (Sal. 111:10; Apok. 14:6, 7) Unai bamona hemataurai bada karana, eiava Dirava gari henia karana, ese ta ena lalona ia veria diba sibona ena goada amo ia karaia diba lasi gauna ia karaia totona. Iehova ena hoa kara badadia bona iena hebogahisi mai lalokauna oi herevalaia neganai, ma haida oi durua, Dirava habadua garina idia gari totona.—Sal. 66:5; Ier. 32:40.
Namona be emu heduru amo kamonai taudia idia lalo-parara Iehova ese edia kara ia laloa. Ia be mai ena hemami, bona iena hakaua herevadia ita badinaia neganai ia moale bona ita badinaia lasi neganai ia lalohisihisi. (Sal. 78:40-42) Taunimanima dekenai oi hahedinaraia dahaka dainai Dirava ese Satani ena hepapahuahu herevana ia haerelaia lalonai edia kara be mai anina bada.—Aon. 27:11.
Namona be kamonai taudia oi durua bena idia itaia Dirava ena ura idia Isa. 48:17) Unai oi karaia diba dalana ta be Dirava ena aonega dadaraia karana, herevana ta ese nega sisina sibona lalonai unai ia dadaraia, ese tauanina bona hemami dalanai ia havaraia dika oi hahedinaraia. Oi hahedinaraia kara dika ese Dirava amo ita ia veria siri, ma haida ese ita amo hereva momokani idia dibaia dalana ia koua, bona dala ma haida ai edia mauri gaudia ia hadikaia. (1 Tes. 4:6) Kamonai taudia oi durua, Dirava ena taravatu idia badinaia dainai idia abia hahenamo idia laloa bada totona. Iehova ena kara maoromaoro daladia ai ita raka karana ese dika momo amo ita ia gimaia dainai edia tanikiu hemamina oi habadaia. Bema ta ese ia abia dae Dirava ena dala be aonega dalana, unai dala idia badinaia lasi karadia ibounai do ia inai henia. (Sal. 119:104) Do ia abia dae kamonai karana be maduna metauna lasi, to Iehova dekenai eda lalokau hahedinaraia dalana.
karaia neganai namo idia davaria. (Ma Haida Oi Durua Edia Kudouna Idia Tahua Totona. Taunimanima be lauma dalanai idia goada idia lao totona, edia kudouna lalonai idia noho gaudia idia diba namonamo be namo. Unai dekenai Baibel ese idia ia durua dalana oi hahedinaraia.
Kamonai taudia dekenai oi hahedinaraia Baibel be taravatu, sisiba, histori ena sivarai, bona peroveta herevadia edia buka sibona lasi. Ia ese Dirava ena laloa dalana ia hahedinaraia danu. Iamesi 1:22-25 ia gwau Dirava ena Hereva be hevarivari bamona. Iseda lalohadai Baibel ena hereva dekenai bona Iehova ese ena ura ia hagugurua dalana dekenai ese eda kudouna lalonai idia noho gaudia ia hahedinaraia. Unai dala ai Dirava, ‘kudouna ia tohoa’ Tauna, ese ita ia itaia dalana ia hahedinaraia. (Aon. 17:3) Kamonai taudia oi hagoadaia unai idia laloatao totona. Idia oi hagoadaia Dirava ese Baibel dekenai ita totona ia torea herevadia bona Dirava idia hamoalea totona edia mauri idia haidaua daladia do idia laloa. Idia oi durua bena do idia itaia, Baibel idia duahia neganai Iehova ena lalohadai ‘edia lalona bona edia kudouna ena ura’ dekenai idia dibaia, unai amo edia kara idia haidaua diba Dirava ena ura hegeregerena idia noho totona.—Heb. 4:12; Roma 15:4.
Baibel stiuden taudia haida idia ura idia dibaia gaudia idia badinaia; to taunimanima ma haida edia lalohadai dainai idia lalo-hekwarahi. Reana tauanina ena ura badadia idia koua toho. Eiava reana dala idia tahua noho Dirava idia hesiai henia bona nega tamona tanobada ena kara idia karaia totona. Oi hahedinaraia edia lalona idia hadaia lasi dainai dika do idia davaria diba. (1 Kin. 18:21) Idia oi hagoadaia Dirava idia noia, edia kudouna ia tahua bona hanamoa totona.—Sal. 26:2; 139:23, 24.
Oi hahedinaraia Iehova ese edia hekwarahi ia lalo-pararalaia bona Baibel ese unai ia vara gauna ia gwauraia hedinarai. (Roma 7:22, 23) Namona be idia oi durua bena idia naria namonamo, goevadae lasi kudouna ese edia kara ia biagua lasi totona.—Aon. 3:5, 6; 28:26; Ier. 17:9, 10.
Idia ta ta oi hagoadaia idia karaia karadia edia badina idia laloa totona. Ia oi hadibaia ia sibona ia nanadaia: ‘Dahaka dainai lau ura inai lau karaia? Unai kara ese Iehova dekenai ia hahedinaraia lau totona ia karaia gaudia ibounai lau laloa bada, a?’ Namona be ia oi hagoadaia dainai ia diba momokani Iehova ida ena turana karana be ia abia diba dava bada gauna.
Namona be kamonai taudia oi durua dainai idia lalo-parara mai edia “kudouna ibounai” ida Iehova idia hesiai henia be gau badana. (Luka 10:27) Anina be edia hemami, ura, bona edia kara edia badina iboudiai be Iehova ena dala ida idia hegeregere be namo. Unai dainai kamonai taudia oi hadibaia edia kara sibona lasi, to edia hemami Dirava ena ura dekenai bona ia idia hesiai henia ena badina idia laloa namonamo totona. (Sal. 37:4) Emu stiuden taudia ese do idia hanamoa gaudia idia itaia neganai, idia oi hagoadaia Iehova dekenai idia guriguri, idia gwau: “Lauegu lalona do oi hatamonaia momokani, vadaeni lau ese oiemu ladana do lau matauraia bona gari henia.”—Sal. 86:11.
Stiuden tauna ena hetura karana Iehova ida ia goada ia lao neganai, ena abidadama dainai Dirava do ia kamonai henia, oiemu hagoadaia herevadia dainai sibona lasi. Bena ia sibona ese ‘Lohiabada ia ura henia karadia do ia tahua.’ (Efe. 5:10; Fili. 2:12) Unai dala ai mai kudouna ibounai ida Iehova ia kamonai henia dainai Iehova ia moale.—Aon. 23:15.
Namona be oi laloatao Iehova ese kudouna ia tohoa bona taunimanima ia veria ia ida hetura karana idia havaraia totona. (Aon. 21:2; Ioa. 6:44) Ita be ia ida ita gaukara hebou. (1 Kor. 3:9) Unai be hegeregere ‘Dirava ese eda uduna dekena amo ia noinoi noho.’ (2 Kor. 5:20; Kara 16:14) Iehova ese ta ia doria lasi hereva momokani ia abia dae totona, to Baibel ita gaukaralaia neganai, kamonai taudia ia durua diba bena idia lalo-parara idia kamonai herevana be edia henanadai—eiava guriguri—ena haere. Hadibaia negadia ibounai lalonai unai oi laloatao, bona mai emu ura bada ida Iehova oi noia oi do ia hakaua bona durua.—1 Siv. 29:18, 19; Efe. 1:16-18.