HAMATAMAIA hereva be hereva iboudiai edia kahana badana. Bema kamonai taudia edia lalona oi veria momokani, emu hereva do idia kamonai namonamo. Haroro gaukara lalonai, bema hamatamaia hereva ese ta ena lalona ia veria lasi, reana emu haroro herevana oi gwauraia diba lasi. Kingdom Hall dekenai hereva oi henia neganai, kamonai taudia be do idia raka oho lasi, to bema edia lalona oi veria lasi, reana idia ese gau ma haida do idia laloa matamaia.

Hamatamaia hereva oi hegaegaelaia neganai, inai tahua gaudia oi laloa: (1) kamonai taudia do idia kamonai namonamo, (2) oi herevalaia gauna oi hahedinaraia goevagoeva, bona (3) oi hahedinaraia dahaka dainai do oi herevalaia gauna be mai anina bada kamonai taudia dekenai. Nega haida, unai tahua gaudia toi be nega tamona ai oi hagugurua diba. To, nega haida idia ta ta be dala idauidau ai oi hagugurua.

Kamonai Taudia Edia Lalona Oi Veria Daladia. Ena be taunimanima be hereva ta idia kamonai totona idia hebou, to do ita laloa diba lasi idia be idia hegaegae vadaeni oi herevalaia gauna idia kamonai namonamo totona. Dahaka dainai? Edia mauri lalonai do idia laloa gaudia be momo. Reana ruma dekenai hekwakwanai ta ia vara eiava gau ma ta dainai idia lalo-hekwarahi. Oi be hereva henia tauna dainai, emu gaukara be kamonai taudia edia lalona oi veria bona do idia kamonai noho. Unai oi karaia daladia be idauidau.

Hereva hereadaena ta be Iesu ena Haroro Herevana Badana. Edena dala ai ia hamatamaia? Luka ena hereva hegeregerena, Iesu ia gwau: “Ogogami taudia be umui namo, . . . harihari umui hitolo taudia be umui namo, . . . taunimanima ese do idia badu henia umui dekenai . . . be do umui namo.” (Luka 6:​20-22) Dahaka dainai unai ese edia lalona ia veria? Hereva haida sibona amo, Iesu ese kamonai taudia edia hekwakwanai badadia haida ia gwauraia. Bena, unai hekwakwanai ia herevalaia daudau lasi, to ia hahedinaraia unai bamona hekwakwanai  idia davaria taudia danu idia moale diba, bona unai ia karaia dalana dainai kamonai taudia idia ura hereva ma haida idia kamonai.

Lalona veria totona henanadai oi gaukaralaia diba, to idia maoro be namo. Bema emu henanadai idia hahedinaraia kamonai taudia ese guna idia kamonai vadaeni gaudia do oi herevalaia, reana idia ura lasi kamonai. Kamonai taudia idia hahemaraia eiava edia kerere idia hahedinaraia henanadai oi gaukaralaia lasi. To, henanadai oi henia dalana amo kamonai taudia ese gau ta do idia laloa be namo. Henanadai ta ta murinai oi laga-ani sisina, kamonai taudia ese edia lalona dekenai haere idia henia totona. Bema mamina idia abia oi ida idia herevahereva bamona, emu hereva do idia kamonai.

Lalona veria dalana namona ma ta be ia vara ekspiriens ta oi gwauraia. To bema unai ekspiriens ese kamonai tauna ta ia hahemaraia, reana sivarai gwauraia karana amo emu tahua gauna oi hagugurua lasi. Bema oi gwauraia sivaraina idia laloatao to idia ia hadibaia herevana idia laloatao lasi, emu tahua gauna oi hagugurua lasi. Hamatamaia hereva lalonai ekspiriens oi gaukaralaia neganai, namona be emu hereva ena kahana badana totona badina ia atoa. Ena be unai sivarai ia mauri totona ena kahana maragidia oi gwauraia, to oi naria namonamo ekspiriens ia lata garina.

Hereva henia taudia haida ese hereva idia hamatamaia neganai, niusi ta, niuspepa ena hereva ta, eiava dagi tauna ta ena hereva idia gwauraia. Unai danu ese anina idia havaraia bema oi herevalaia gauna ida bona kamonai taudia dekenai idia hegeregere.

Bema emu hereva be hereva toi edia kahana ta eiava Hesiai Hebou ena kahana ta, namona be emu hamatamaia hereva ia kwadogi. Bema pablik tok oi henia, hamatamaia hereva totona idia atoa negana oi badinaia namonamo. Kamonai taudia ia durua bada dibana be emu hereva ena anina lalonai ia noho.

Reana nega haida kamonai taudia ese emu hereva idia daradaralaia eiava idia ura lasi. Dahaka oi karaia diba emu hereva idia kamonai totona? Stefano, Keristani taudia ginigunadia ta bona ‘lauma helaga bona aonega dekenai ia honu tauna’ idia dogoatao bona Iuda taudia edia Sanhedrin vairanai idia abia lao. Unuseniai, Keristani mauri dalana ena maoro ia herevalaia namonamo. Edena bamona ia matamaia? Hemataurai dalanai ia hereva bona kamonai taudia idia abia dae gauna  ta ia gwauraia. “Lauegu varavara bona lauegu tamana ibounai e, lauegu hereva umui kamonai. Iseda sene tauna Aberahamo ia noho . . . neganai, Hairai Diravana ese ia dekenai ia hedinarai.” (Kara 6:3; 7:⁠2) Atena ai, Areo Ororona dekenai, aposetolo Paulo ena hamatamaia hereva be kamonai taudia edia noho hegeregerena ia gwauraia, ia gwau: “Atena taudia e, lau itaia vadaeni, dirava idauidau momo umui laloa bada.” (Kara 17:22) Unai hamatamaia herevadia namodia dainai, taunimanima idia ura hereva ma haida idia kamonai.

Haroro gaukara lalonai danu, taunimanima edia lalona oi veria be namo. Bema emu vadivadi umui palanilaia guna lasi, reana ruma tauna ia bisi. Gabu haida ai, idia boiria lasi vadivadi taudia ese edia vadivadi ena badina idia hahedinaraia haraga. Gabu ma haida ai, hedavari henia dalana maorona oi badinaia guna, bena murinai emu vadivadi ena badina oi gwauraia.​—⁠Luka 10:⁠5.

Herevana edena gabu ai oi noho, mai lalo-namo ida hereva oi gwauraia neganai herevahereva totona dala ia kehoa. Nega momo, ruma tauna ese ia laloa gauna oi gwauraia guna be namo. Edena bamona do oi diba dahaka oi gaukaralaia be namo? Ruma tauna dekenai oi lao neganai, gau ta ia karaia, a? Reana uma gaukara ia karaia, ena ruma ia noho gabuna ia hagoevaia, motuka ia hanamoa, ia nadunadu, dabua ia huria, eiava natudia ia naria. Gau ta​—⁠niuspepa eiava dala dekenai ia vara gauna​—⁠ia itaia, a? Gau haida idia hahedinaraia ia ese haoda, spot gadara, miusiki, loaloa, kompiuta, eiava gau ma ta ia laloa bada, a? Nega momo taunimanima ese reidio ai idia kamonai eiava televisen ai idia itaia gaudia idia laloa. Reana henanadai ta eiava hereva kwadogina ta amo unai gaudia oi gwauraia murinai do umui herevahereva namonamo diba.

Sukara kahirakahira ai, Iesu ese Samaria hahine ia hereva henia dalana be haroro totona herevahereva hamatamaia dalana ia haheitalaia namonamo.​—⁠Ioa. 4:​5-26.

Namona be hamatamaia hereva oi hegaegaelaia namonamo, bona bema kongregesen ena teritori umui karaia momo, unai be mai anina bada. Bema oi hegaegae namonamo lasi, reana dala ia kehoa lasi oi haroro totona.

Do Oi Herevalaia Gauna Oi Gwauraia. Keristani kongregesen ai, nega momo seamani eiava program lalonai ia hereva guna tauna ta ese emu hereva ena sinado bona emu ladana ia gwauraia. To, hamatamaia hereva lalonai do oi herevalaia gauna oi gwauraia lou be mai  ena namo. Reana emu sinado ena hereva ta ta, eiava reana ta ta ibounai lasi, oi gwauraia diba. Herevana edena bamona oi gwauraia, to namona be hereva oi henia lalonai sinado ia hedinarai namonamo noho. Hamatamaia hereva lalonai, dala ta ai do oi herevalaia gauna oi hahedinaraia be namo.

Iesu ese haroro totona ena hahediba taudia ia siaia neganai, do idia herevalaia sivaraina ia hahedinaraia goevagoeva. “Umui raka noho neganai do umui haroro, umui gwau, ‘Guba Basileia be kahirakahira ia mai vadaeni.’ ” (Mat. 10:⁠7) Iesu ese iseda nega ia herevalaia, ia gwau: “Basileia ena Sivarai Namona be tanobada ibounai dekenai do idia harorolaia.” (Mat. 24:14) Ita idia hagoadaia “hereva [ita] harorolaia,” anina be, haroro gaukara lalonai Baibel ena hereva hegeregerena ita haroro. (2 Tim. 4:​2, NW ) To, Baibel oi do kehoa lasi eiava Basileia oi do herevalaia lasi neganai, nega momo taunimanima ese idia laloa gauna ta oi gwauraia be namo. Reana taravatu utua karadia, gaukara be lasi, kara gageva, tuari, matamata taudia durua karadia, gorere, eiava mase oi gwauraia. To dika gaudia oi herevalaia daudau lasi; oi harorolaia sivaraina be sivarai namona. Dala oi karaia Dirava ena Hereva bona Basileia ena helaro oi herevalaia totona.

Oi Hahedinaraia Dahaka Dainai Kamonai Taudia Dekenai Unai be mai Anina Bada. Bema kongregesen ai oi hereva, oi diba kamonai taudia be idia ura oi herevalaia gauna idia kamonai. To idia be do idia kamonai namonamo, ena mauri dekenai mai anina bada gauna ta ia dibaia noho tauna bamona, a? Do idia kamonai namonamo badina idia itaia idia kamonai gaudia be edia noho dalana hegeregerena bona edia mauri idia hanamoa totona edia ura oi habadaia dainai, a? Unai ia vara bema emu hereva oi hegaegaelaia neganai, kamonai taudia​—⁠edia noho dalana, idia laloa gaudia, edia lalohadai​—⁠oi laloa namonamo. Bema unai oi karaia, namona be hamatamaia hereva lalonai dala ta ai unai oi hahedinaraia.

Herevana oi be platfom amo oi hereva eiava tau ta oi haroro henia, oi herevalaia gauna dekenai kamonai taudia edia lalona oi veria bema unai gauna idia laloa matamaia. Oi hahedinaraia oi herevalaia gauna ese edia hekwakwanai, edia dabu gaudia, eiava idia laloa henanadai ia gwauraia. Bema oi hahedinaraia goevagoeva oi ese gau ta do oi herevalaia sibona lasi to ena kahana idauidau danu do oi herevalaia, do idia kamonai namonamo. Unai oi karaia totona, oi hegaegae namonamo be namo.

 Oi Gwauraia Dalana. Hamatamaia hereva lalonai dahaka oi gwauraia be gau badana, to oi gwauraia dalana amo edia lalona oi veria danu. Unai dainai, oi hegaegae lalonai do oi herevalaia gauna sibona lasi to do oi herevalaia dalana oi laloa danu.

Emu tahua gauna oi hagugurua totona oi gaukaralaia herevadia be mai anina bada, unai dainai sentens ginigunadia rua eiava toi oi hegaegaelaia namonamo. Auka lasi sentens kwadogidia be namo. Kongregesen dekenai oi henia herevana totona, reana do oi torea, eiava oi ura oi laloatao bona emu kwarana amo oi gwauraia, unai amo hamatamaia hereva ena anina ia hedinarai namonamo. Hamatamaia hereva namona be karaharaga oi gwauraia lasi neganai, oi lalo-maino bona emu hereva oi gwauraia namonamo diba.

Oi Hegaegaelaia Negana. Unai dekenai taunimanima edia lalohadai be idauidau. Idia manada hereva henia taudia haida idia laloa hereva idia hegaegaelaia karana be hamatamaia hereva amo ia matamaia. Taunimanima vairanai hereva henia karana idia stadilaia taudia haida idia laloa hereva ena anina kahana oi hegaegaelaia murinai, ena hamatamaia hereva oi karaia.

Momokani, do oi herevalaia gauna bona do oi gaukaralaia hereva badadia oi diba be namo, bena hamatamaia hereva namona do oi karaia diba. To bema idia printaia autlain amo emu hereva oi henia be edena bamona? Autlain oi duahia murinai, bema hamatamaia hereva oi laloa vadaeni, unai oi torea be dika lasi. Danu, namona be oi laloatao hamatamaia hereva ia namo totona, kamonai taudia bona autlain dekenai ia noho herevana oi laloa.