BAIBEL ese ita ia hadibaia ‘taunimanima ibounai do ita matauraia’ bona ‘tau ta do ita gwauraia dika lasi.’ (1 Pet. 2:17; Tito 3:2) Momokani, ita davaria taudia ibounai be “Dirava ese iena toana bamona ia karaia taudia.” (Iam. 3:9) Keriso be idia totona ia mase. (Ioa. 3:16) Bona namona be idia ibounai ese sivarai namona idia kamonai, idia badinaia bona hahemauri idia abia totona. (2 Pet. 3:9) Taunimanima haida be edia kara ta eiava siahu dainai ita matauraia bada be namo.

Reana dahaka dainai haida ese Baibel ia herevalaia matauraia karana idia hahedinaraia lasi? Reana edia tano taudia edia mauri dalana amo idia itaia daidia do idia matauraia, unai taudia edia bese, idia be tatau eiava hahine, edia goada, mauri lagani, kohu, eiava dagi hegeregerena. Gavamani ena ofesa taudia edia kara gageva dainai, momo ese siahu taudia idia matauraia lasi. Tano haida ai taunimanima be edia mauri idia moalelaia lasi, reana mauri durua gaudia sibona idia abia totona hora momo lalonai idia gaukara, bona hemataurai idia hahedinaraia lasi taudia huanai idia noho. Matamata taudia be edia bamodia ese idia doria, idia ura henia lasi tisa taudia bona siahu taudia ma haida idia gwau-edeede henia totona. Televisen dekenai natudia ese edia tama sina idia kirikirilaia bona biagua karana idia hahedinaraia bona momo edia lalona ia veria. Unai bamona tanobada ena kara idauidau ese ma haida matauraia karana idia hadikaia lasi totona ita hekwarahi. To, taunimanima ita matauraia neganai, idia lalo-moale bona idia ida ita herevahereva be auka lasi.

Hedavari Neganai Hemataurai Karadia. Taunimanima idia ura tomadiho karadia ia karaia tauna ese ena dabua bona kara amo hemataurai ia hahedinaraia. Gabu ta dekenai unai idia karaia dalana maorona be idau bona gabu ma ta dekenai be idau. Haida idia laloa kwara gauna be kwarana dekenai eiava imana be poketi lalonai ia noho neganai ma ta hereva henia karana be hemataurai lasi karana. To gabu ma haida dekenai unai idia karaia diba. Emu gabu taudia edia hemami oi laloa, bena idia do oi habadua lasi. Unai oi karaia neganai sivarai namona oi harorolaia namonamo dalana idia koua gaudia oi hanaia.

Unai be hegeregere ma haida ita hedavari henia neganai danu, bona buruka  taudia dekenai unai be gau badana. Gabu momo ai matamata taudia ese taunimanima badadia edia ladana idia gwauraia be hemataurai lasi karana, bema gwaumaoro idia abia lasi. Gabu haida ai taunimanima badadia danu be idia diba lasi taudia edia ladana idia gwauraia lasi. Danu, gado momo ai lagani bada tauna eiava siahu tauna ta idia hereva henia neganai, hemataurai idia hahedinaraia totona inai hereva “umui” bamona herevana ta idia gaukaralaia.

Hemataurai Toadia. Gabu maragidia dekenai, idia noho taudia idia laloa dala dekenai oi raka neganai eiava ruma ta dekenai oi vareai neganai, namona be toa ta amo oi hahedinaraia oi davaria taudia oi itaia. Reana hedavari henia, kiri, kwarana hamarerea, eiava matana ataiai huina abia isi karadia amo unai oi karaia diba. Bema idia oi itaia lasi unai be hemataurai lasi karana.

To, reana haida idia laloa idia oi laloa lasi ena be unai bamona kara ta oi karaia. Dahaka dainai? Badina mamina idia abia, oi ese idia ta ta be taunimanima ta ta bamona oi itaia lasi. Nega momo haida edia tauanina ena toana dainai, ma haida ese orea bamona idia laloa. Nega momo tauanina dika bona gorere taudia idia laloa bada lasi. To, Dirava ena Hereva ese unai bamona taudia be mai lalokau bona hemataurai ida ita kara henia dalana ia hahedinaraia. (Mat. 8:​2, 3) Ita ibounai ese Adamu amo kara dika ita abia hanai ena anina ita mamia. Oi laloa oi idia matauraia bema hanaihanai emu dika gaudia idia laloa, a? Oi ura bada oiemu kara namodia momo idia laloa, ani?

Hemataurai ena anina ta be ta ena kwara dagina ita abia dae. Gabu haida ai ruma bese kwarana ita hereva henia guna bena gabeai ruma taudia ma haida ita hereva henia. Ena be iseda haroro bona hadibaia gaukarana ena hahegani be Iehova amo ia mai, to ita abia dae Dirava ese tama sina dekenai maduna ia henia edia natudia idia hadibaia, matahakani henia, bona hakaua totona. (Efe. 6:​1-4) Unai dainai, ruma ta ita vareai neganai, namona be natudia ita do hereva henia daudau lasi neganai tama sina ita hereva henia guna.

Ta ena mauri laganidia idia bada idia lao lalonai diba ia abia bona unai ita matauraia be namo. (Iobu 32:​6, 7) Sri Lanka dekenai painia taihu matamatana ta be unai ia lalo-pararalaia dainai tau burukana ta ia hereva henia neganai unai ese ia durua. Matamanai unai tau burukana ia ura lasi, ia gwau: “Edena dala ai oi bamona matamata kekeni ese lau dekenai Baibel oi hadibaia diba?” To taihu ia gwau: “Lasi, oi hadibaia totona lau mai lasi, to lau ia hamoalea gauna ta lau dibaia dainai lau ura bada ma haida dekenai lau gwauraia.” Painia taihuna be mai hemataurai ida ia haere dainai  unai tauna ena ura ia habadaia. Bona ia gwau: “Vadaeni lau oi hamaoroa, dahaka oi dibaia?” Taihu ia gwau: “Mauri hanaihanai dalana lau dibaia.” Unai tau burukana ese Iehova ena Witnes taudia ida Baibel ia stadilaia matamaia. Buruka taudia haida sibona do idia gwau idia ura ma haida ese mai hemataurai ida idia kara henidia, to idia momo ese unai idia moalelaia.

To, haida matauraia karana ita habadaia kava diba. Pacific motumotudia ai bona gabu ma haida ai, Witnes taudia ese hanua eiava iduhu edia lohia taudia idia hereva henia neganai, sene dalana idia badinaia dainai idia kamonai bona dala ia kehoa unai tau badadia bona idia biagua taudia idia hereva henia diba. To hanamoa koikoi karana be anina lasi bona ia namo lasi. (Aon. 29:5) Unai hegeregerena, reana gado ta ena grama dekenai be hemataurai hereva gwauraia daladia idia noho, to Keristani hemataurai karana lalonai unai gaudia ita habadaia kava lasi.

Ita Haroro mai Hemataurai Ida. Baibel ese ita ia hagoadaia “mai mataurai bona manau danu” eda helaro ena badina ita hahedinaraia. (1 Pet. 3:15) Unai dainai, ena be ma ta ena lalohadai ita hakoikoia haraga diba, to hemataurai lasi dalanai unai ita karaia be aonega karana, a? Reana ia namo bema mai haheauka ida ita kamonai, ena lalohadai ena badina ita henanadailaia, bona ia ida Baibel ita herevalaia neganai ena hemami ita laloa, ani?

Ta ida ita hereva neganai ita hahedinaraia hemataurai karana be platfom amo ita hereva neganai ita hahedinaraia danu be namo. Kamonai taudia ia matauraia hereva henia tauna ese idia ia gwauraia dika lasi bona inai bamona lalohadai, “Bema umui ura momokani inai umui karaia diba,” be ena hereva amo ia hahedinaraia lasi. Unai bamona hereva dalana ese ma haida ia hametaua. Namona be ia laloa kamonai taudia ibounai be Iehova idia lalokau henia bona idia ura ia idia hesiai henia taudia! Iesu ita tohotohoa dainai, lauma dalanai idia manoka, diba bada lasi, bona Baibel ena sisiba idia do badinaia haraga lasi taudia ita kara henidia lalonai, lalo-parara ita hahedinaraia.

Bema hereva henia tauna ia hahedinaraia ia danu ese Dirava ena Hereva badinaia karana ia habadaia be namo, kamonai taudia do idia itaia ia ese idia ia matauraia. Unai dainai, siri badinaia daladia hahedinaraia neganai, inai hereva “umui” ita gaukaralaia loulou lasi be namo. Hegeregere, inai henanadai “Umui karaia diba gaudia ibounai umui karaia, a?” bona inai hereva “Namona be ita ibounai be ita sibona ita nanadaia: ‘Lau karaia diba gaudia ibounai lau karaia, a?’” edia idau oi itaia. Unai henanadai ruaosi edia anina be tamona, to henanadai ginigunana ia hahedinaraia hereva henia tauna be kamonai taudia amo ia idau. Henanadai iharuana ese taunimanima ta ta, hereva henia tauna danu, ia hagoadaia ta ta edia noho dalana bona lalohadai idia laloa.

 Namo lasi kamonai taudia idia kiri sibona totona hereva haida oi gwauraia. Unai ese Baibel ena sivarai matauraia karana ia habadaia lasi. Momokani, iseda hesiai gaukara Dirava dekenai ita moalelaia be namo. Bona reana ita herevalaia gauna lalonai kiri idia havaraia gaudia haida idia noho. To, hereva henia tauna ese mai anina bada gaudia be kiri gaudia ai ia halaoa neganai, ia hahedinaraia kamonai taudia bona Dirava ia matauraia lasi.

Namona be ma haida ita hedavari henia, ita kara henia, bona ita hereva henia neganai, ita hahedinaraia Iehova ese ita ia hadibaia dalanai ma haida ita laloa.