DIRAVA ena Hereva ese eda mauri ia haidaua dainai ita moale, bona ita ura ma haida danu ese namo idia abia. Danu, ita diba taunimanima ese sivarai namona idia abia dae eiava lasi be mai anina edia vaira negana dekenai. (Mat. 7:​13, 14; Ioa. 12:48) Ita ura momokani hereva momokani idia abia dae. To, namo bada ita havaraia totona eda lalo-goada bona ura bada be mai laloa kehoa ida ita gaukaralaia be gau badana.

Bema ta ese ia ura henia hahediba herevana be hereva dalana aukana ai oi hakoikoia, herevana Baibel siri momo oi gwauraia, to reana unai do ia abia dae lasi. Hegeregere, bema oi gwau dina badadia moalelaia karadia be kaivakuku tomadiho henia taudia amo ia vara, reana taunimanima edia hemami unai gaudia dekenai do ia haidaua lasi. To mai laloa manada ida oi herevalaia neganai namo oi havaraia diba. Laloa manada ena anina be dahaka?

Baibel ese ita ia hadibaia “Dirava dekena amo aonega ia abia tauna ena . . . kara haida be inai: Mai ena maino, laloa manada bona gado namo.” (Iam. 3:17) Greek herevana, iniseniai idia hahanaia “laloa manada,” ena anina ma ta be “ma ta ena lalohadai abia dae karana.” Baibel ma haida ai idia hahanaia “ma haida edia namo tahua karana,” “hebogahisi,” eiava “haheauka.” Mani oi itaia, laloa manada be maino ida idia gwauraia hebou. Tito 3:2 ese ia hahedinaraia manada karana be manau ida ia hegeregere bona heai amo ia idau. Filipi 4:5 ia gwau namona be taunimanima vairanai ita “manau bona manada.” Ia manada tauna ese ia hereva henia tauna ena mauri, noho dalana, bona hemami ia laloa. Mai moale ida unai tauna ena lalohadai ia abia dae bema unai ia karaia be maoro. Unai dala ai ma haida ita kara henia amo edia lalona bona kudouna idia kehoa, unai dainai idia dekenai Baibel ita herevalaia neganai idia abia dae haraga.

Hamatamaia Dalana. Histori torea tauna Luka ia gwau aposetolo Paulo be Tesalonika dekenai ia noho neganai, Buka Helaga amo “ia hadibaia namonamo, Keriso ena hisihisi bona iena toreisi lou be mai badina.” (Kara 17:​2, 3) Paulo be Iuda taudia edia dubu lalonai unai ia karaia. Ia hereva  henia taudia idia abia dae Heberu Revarevadia be mai edia siahu. Idia abia dae gauna amo ena hereva ia hamatamaia be namo.

Paulo be Areo Ororona ai, Atena dekenai, Greek taudia ia hereva henia matamaia neganai, Buka Helaga ena hereva ia gwauraia lasi. To, idia diba bona abia dae gaudia amo ia matamaia, bona unai gaudia amo kamonai taudia ia hakaua, Havaraia Tauna bona Iena ura idia laloa totona.​—Kara 17:​22-31.

Hari inai negai, taunimanima bilioni momo edia mauri lalonai Baibel ena siahu idia abia dae lasi. To inai tanobada lalonai idia vara metau gaudia ese taunimanima ibounai edia mauri lalonai dika idia havaraia. Idia ura dikadika gau namona ta idia davaria. Bema idia laloa momo gauna oi laloa bada guna bena Baibel amo unai gauna oi herevalaia, reana unai bamona laloa manada karana dainai, Baibel ese Dirava ena ura taunimanima totona ia gwauraia herevadia be do idia kamonai.

Reana Baibel stiuden tauna ta ena tama sina ese ia dekenai tomadiho ta ena hahediba herevadia bona karadia idia hadibaia. Hari, unai stiuden tauna ia diba unai hahediba herevadia bona karadia ese Dirava idia hamoalea lasi, bona Baibel ese ia hadibaia gaudia dainai unai gau gunadia ia rakatania. Edena dala ai stiuden tauna ese ena tama sina dekenai unai ia gwauraia hedinarai diba? Reana idia laloa idia hadibaia gaudia ia dadaraia dainai, idia ia dadaraia. Reana Baibel stiuden tauna ia laloa ia abia hidi gauna be Baibel amo ia do hamomokania lasi neganai, ena tama sina ia hamaoroa idia ia lalokau henia bona matauraia noho.

Laloa Manau Negadia. Ena be Iehova be mai ena maoro hahegani ia henia totona, to ia ese laloa manada ia hahedinaraia. Iehova ena aneru ese Sodoma amo Lota bona iena ruma bese idia hamauria neganai, idia gwau: “Ororo dekenai do umui heau, umui mase garina.” To, Lota ia noinoi: “Lohia e, mani emui kara, inai bamona lasi.” Ia noinoi ia gwau Soara dekenai ia heau mauri be namo. Iehova ese Lota ena namo ia tahua dainai gwaumaoro ia henia; unai dainai hanua ma haida ia hadikaia neganai, Soara ia hadikaia lasi. To gabeai, Lota be Iehova ese guna ia gwauraia herevana ia badinaia bona ororo gabuna dekenai ia lao. (Gen. 19:​17-30) Iehova ia diba ena dala be maoro, to Lota ese unai ia do lalo-pararalaia lasi neganai mai haheauka ida ena namo ia tahua guna.

Ma haida ita kara namo henia totona, ita danu be mai laloa manada ida ita kara be namo. Reana ita diba ita hereva henia tauna ena lalohadai be kerere,  bona reana badina namodia amo unai ita hamomokania diba. To nega haida ia namo bema unai ita rakatania sibona. Ita laloa manada to Iehova ena dala amo ia idau lalohadaina ita abia dae lasi. Reana oi hereva henia tauna oi tanikiu henia badina ena lalohadai ia gwauraia eiava ena lalohadai kererena oi rakatania sibona, unai dala amo namo ia havaraia gauna ma ta oi herevalaia diba. Ena be oi abia dae gaudia ia gwauraia dika, to oi badu lasi. Reana ena lalohadai ena badina oi nanadaia diba. Ena haere oi kamonai namonamo. Unai amo ia laloa dalana do oi dibaia. Bona reana unai ese dala ia hegaegaelaia, vaira negana ai do umui herevahereva namonamo totona.​—Aon. 16:23; 19:11.

Iehova ese taunimanima dekenai diba ia henia abia hidi idia karaia totona. Unai idia gaukaralaia dalana ia kehoa, ena be reana aonega dalanai unai idia karaia lasi. Iosua, Iehova ena hereva ia gwauraia tauna, be Dirava ese Israela bese ia kara henia dalana ia herevalaia. To unai murinai ia gwau: “To bema Lohiabada ena hesiai gaukara dekenai umui daradara neganai, hari dina do umui abia hidi be namo. Edena dirava ena hesiai gaukara do umui karaia? Sedira emui sene taudia Mesopotamia dekenai idia tomadiho henia diravadia, o Amoro taudia edia dirava, inai hari umui noholaia tanona ena dirava, a? To lau, bona lauegu famili taudia, ai ese Lohiabada sibona ena hesiai gaukara do ai karaia.” (Ios. 24:15) Hari iseda gaukara be do ‘ita haroro,’ bona mai lalo-goada ida ita hereva, to ma haida ita doria lasi unai idia abia dae totona. (Mat. 24:14) Idia sibona ese unai idia abia hidi be maoro, bona ita ura lasi idia amo unai maoro ita kokia.

Henanadai Oi Gwauraia. Mai laloa manada ida gau ta herevalaia karana dekenai Iesu be haheitalai hereadaena. Ia ese taunimanima edia mauri ia laloa bona idia abia dae haraga haheitalai ia gaukaralaia. Danu, dala namona ai henanadai ia gaukaralaia. Unai amo dala ia kehoa ma haida ese edia lalohadai idia gwauraia bona edia kudouna ai idia noho gaudia idia hahedinaraia totona. Bona idia ia hagoadaia, mai manada ida gau ta idia herevalaia totona.

Taravatu ia diba namonamo tauna ta ese Iesu ia nanadaia: “Hadibaia tauna e, lau be edena bamona do lau karaia mauri hanaihanai abia totona?” Iesu ia haere haraga diba. To unai tau ia noia ena lalohadai ia gwauraia totona. “Taravatu ena buka lalonai edena bamona ia torea? Edena bamona oi duahia?” Unai tau ena haere ia maoro. Haere maorona ia henia dainai herevahereva ia ore, a? Lasi. Iesu ese ia koua lasi bona unai tau ia hereva noho, bona unai tau ena henanadai ta ese ia hahedinaraia ia ura ia hamomokania ia be kara maoromaoro tauna. Ia henanadai: “Lauegu badibadinai tauna be daika?” Iesu ese haere ia henia lasi, badina Iuda taudia be Idau Bese taudia bona Samaria taudia idia ura henia lasi dainai reana unai haere do ia abia dae lasi, to haheitalai ta ia gwauraia, unai tau ia laloa totona. Iena  haheitalai lalonai, henaoa taudia ese ena kohu idia henaoa bona idia haberoa tauna ta be kara namo Samaria tauna ta ese ia durua, to hahelaga tauna ta bona Levi tauna ta ese idia durua lasi. Auka lasi henanadai ta amo Iesu ese ia hamomokania unai tauna be iena haheitalai ena anina ia lalo-pararalaia. Iesu be mai laloa manada ida unai gauna ia herevalaia dainai, unai tau ese dala matamatana ai inai hereva “badibadinai tauna” ena anina ia lalo-pararalaia. (Luka 10:​25-37) Unai haheitalai namona ita tohotohoa be namo! Namo lasi oi sibona oi hereva noho, hegeregere ruma tauna ese do ia laloa gaudia oi gwauraia bamona, to henanadai bona haheitalai namodia gwauraia dalana oi dibaia, unai amo kamonai taudia oi hagoadaia idia sibona ese unai gaudia idia laloa totona.

Badina Oi Gwauraia. Aposetolo Paulo be Tesalonika ena dubu dekenai ia hereva neganai, kamonai taudia ese idia abia dae revarevana amo ia duahia sibona lasi. Luka ia gwau Paulo ese ia duahia gauna ia hadibaia namonamo, badina ia gwauraia, bona anina ia hahedinaraia. Unai dainai, “haida be idia abidadama henia, idia ese Paulo bona Sila danu idia hakapua.”​—Kara 17:​1-4.

Herevana kamonai taudia be daidia, gau ta be unai bamona dala ai oi herevalaia namonamo neganai namo ia havaraia. Unai be momokani, herevana varavara taudia, gaukara eiava sikuli turadia, bona haroro gaukara lalonai oi diba lasi taudia oi haroro henia, Baibel stadi oi karaia, eiava kongregesen ai hereva oi henia. Siri ta oi duahia neganai, reana oi be ena anina oi diba to reana ma ta be unai ia diba lasi. Reana anina oi gwauraia hedinarai eiava ena badina oi gwauraia neganai, toana be emu lalohadai aukana ta ai oi hahedinaraia. Siri ena hereva badadia haida oi gwauraia lou bona edia anina oi hahedinaraia be namo, a? Durua herevadia be badina siridia eiava unai gauna ia herevalaia siri ma ta amo oi abia diba, a? Haheitalai ta ese oi gwauraia herevana ena badina namodia ia hahedinaraia diba, a? Henanadai ese kamonai taudia do idia durua diba, unai gauna idia laloa namonamo totona, a? Unai bamona lalohadai herevalaia dalana dainai kamonai taudia edia lalona ia namo bona oi gwauraia gaudia do idia laloa noho.