ISEDA Keristani tadikaka bona taihu be Keristani heboudia dekenai idia mai totona nega idia atoa bona idia gaukara goada. Hebou dekenai idia herevalaia gaudia amo namo idia davaria totona, idia kamonai namonamo diba be namo.

Idaunegai Israela dekenai, saun gaudia idia noho lasi. Israela taudia be Gwauhamata Tanona dekenai idia vareai gwauraia neganai Mose ese Moaba ena tano palakana dekenai ia hereva henidia lalonai, edena dala ai idia noho taudia milioni momo ese ena hereva idia kamonai diba? Reana Mose ese taunimanima ia gaukaralaidia, reana kamepa lalonai gabu idauidau ai idia gini taudia ese Mose ena hereva idia gwauraia lou. (Deu. 1:1; 31:1) Israela taudia ese Ioridane ena west kahana ai tano idia abia matamaia bena nega sisina murinai, Iosua ese Gerisima Ororona bona Ebala Ororona edia vairanai bese ibounai ia haboua, bona reana Levi taudia be ororo edia huanai ia noho kourana ai idia gini. Unuseniai taunimanima ibounai ese hanamoa herevadia bona hadikaia herevadia idia kamonai bona idia abia dae. (Ios. 8:​33-35) Reana unai neganai danu taunimanima ia gaukaralaia ena hereva idia gwauraia lou totona, to danu, unai bamona gabu dekenai ta ena gado regena idia kamonai namonamo diba.

Lagani 1,500 bamona murinai, Iesu ena hereva idia kamonai totona Galilea Gohu dekenai “taunimanima momo idia haboua” neganai, ia be vanagi ta dekenai ia guia, kone amo ia doria, ia helai, bona hutuma ia hereva henia. (Mar. 4:​1, 2) Dahaka dainai Iesu be vanagi amo ia hereva? Badina be taunimanima edia gado regena be ranu ena latanai ia hedinarai goevagoeva.

Idaunegai amo ema bona lagani 1900 murinai, kamonai taudia ese hereva idia kamonai namonamo diba bema hereva henia tauna ena gado regena ia bada bona ia hedinarai goevagoeva. To, lagani 1920 murinai, Iehova ena hesiai taudia ese edia hebouhebou badadia  dekenai saun gaudia amo taunimanima edia gado regena idia habadaia matamaia.

Saun Gaudia. Unai bamona gaudia ese hereva henia tauna ena gado regena idia habadaia bona ena regena bona ena tiuni idia do namo noho. Hereva henia tauna ese ena gadona ia hadikaia lasi. Kamonai taudia ese ena hereva kamonai totona idia hekwarahi lasi. Ia herevalaia gauna idia laloa namonamo diba.

Iehova ena Witnes taudia edia distrik bona sekit hebouhebou dekenai saun gaudia namodia idia gaukaralaia totona gaukara badana idia karaia. Danu, Kingdom Hall momo dekenai saun gaudia idia gaukaralaia, hereva idia henia, hebou idia hakaua, eiava platfom ai idia duahiduahi taudia edia gado regena habadaia totona. Bona kongregesen haida be mai edia maikrofon, kamonai taudia ese hebou lalonai haere idia henia totona. Bema emu kongregesen dekenai unai gaudia idia noho, namona be gaukaralaia namonamo dalana oi diba.

Heduru Herevadia Haida. Unai gaudia oi gaukaralaia namonamo totona, inai gaudia oi laloatao be namo: (1) Namona be maikrofon ena daudau emu uduna amo be sentimita 10 ia lao 15 huanai. Bema maikrofon be kahirakahira momokani, emu hereva ia hadikaia. Bema ia daudau herea, emu gado regena idia kamonai lasi. (2) Namona be maikrofon be oi vairanai ia noho, kahana ta ai lasi. Bema emu kwarana be idiba kahana eiava lauri kahana ai oi giroa, maikrofon be oi vairanai ia noho sibona neganai oi hereva. (3) Ta ida oi hereva neganai oi gaukaralaia gado regena ena bada bona goada oi habadaia. To oi boiboi be badina lasi. Saun gaudia dainai daudau idia helai taudia danu ese emu hereva idia kamonai diba. (4) Bema oi ura emu gadona hagoevaia totona oi huahua bamona eiava oi asimana, emu kwarana be maikrofon amo oi giroa.

Pablik Tok Oi Henia Neganai. Platfom dekenai oi lao neganai, nega momo tadikaka ta ese maikrofon ena gabu ia hamaoromaoroa. Unai ia karaia lalonai, oi gini namonamo bona kamonai taudia oi vaira henia. Emu pepa be podium dekenai oi atoa, bona namona be pepa oi itaia dalana be maikrofon ese ia koua lasi.

Oi hereva matamaia neganai, oi kamonai spika dekenai emu gado regena be edena bamona. Gado regena ia bada herea, eiava hereva haida  edia regena ia dika, a? Reana sentimita 2 ia lao 5 bamona oi gini lou. Emu pepa oi itaia sisina neganai, namona be oiemu vairana be maikrofon vairanai eiava sisina ataiai ia noho sibona neganai oi hereva, henunai ia noho neganai oi hereva lasi.

Platfom amo Oi Duahiduahi Neganai. Namona be Baibel eiava buka o magasin be imana dekenai oi dogoatao, unai amo kamonai taudia oi vaira henia diba. Maikrofon be emu vairanai ia noho dainai, reana oi duahia gauna be sisina kahana ta ai oi dogoatao be namo. Unai ena anina be emu kwarana be sisina maikrofon ena kahana ma ta ai ia noho. Unai dala ai oi duahiduahi neganai, emu gado regena be maoromaoro maikrofon dekenai ia vareai.

Gima Kohorona Stadi lalonai idia duahiduahi tadikaka momo idia gini bona idia haginia maikrofon dekenai idia hereva. Unai dainai idia hahodi namonamo bona mamina ia hahedinaraia dalanai idia duahiduahi diba. Namona be oi laloatao paragraf duahia karana be unai hebou ena kahana badana. Bema kamonai taudia ese oi duahia gauna idia kamonai namonamo hebou amo idia abia heduru ia bada.

Hebou ai Oi Haere Neganai. Bema emu kongregesen dekenai kamonai taudia idia haere neganai maikrofon idia gaukaralaia, unai neganai danu oi hereva namonamo bona emu gado regena ia bada be namo. Haere oi henia neganai, oi stadilaia gauna eiava oiemu Baibel be emu imana dekenai oi dogoatao. Unai dala ai oi herevalaia gauna oi itaia namonamo bona maikrofon dekenai oi hereva.

Kongregesen haida ai tadikaka idia abia hidi idia haere taudia dekenai maikrofon idia abia lao totona. Bema emu kongregesen dekenai unai bamona idia karaia, oi haere gwauraia neganai emu imana oi abia isi noho, maikrofon ia mailaia tauna ese oi ia itaia bona ia mai haraga totona. Bema maikrofon be imana dekenai do oi dogoatao, oi hegaegae oi abia totona. Oi haere lasi ela bona maikrofon be gabu maorona dekenai ia noho. Emu haere oi haorea neganai, maoromaoro maikrofon oi henia lou.

Haheitalai Lalonai. Haheitalai lalonai maikrofon gaukaralaia dalana oi laloa guna be namo. Bema maikrofon ia gini, emu imana ruaosi amo Baibel bona pepa oi dogoatao diba. Bema maikrofon be imana dekenai oi dogoatao reana oi marere diba, to reana turana oi hadibaia guna ia ese maikrofon do ia dogoatao be namo. Unai dala ai emu imana ruaosi amo Baibel oi gaukaralaia diba. Namona be oi bona emu durua tauna ese unai do umui tohoa, dogoatao dalana maorona ia diba  totona. Danu, namona be oi laloatao platfom ai oi noho neganai, emu doruna be kamonai taudia dekenai oi henia lasi, bona oi hereva neganai unai be gau badana.

Reana Hesiai Hebou ena haheitalai lalodiai taunimanima be momo bona reana platfom dekenai do idia marere. Unai dainai, reana maikrofon momo idia gaukaralaia. Maikrofon be edia gabu dekenai idia noho hegaegae eiava haheitalai taudia be platfom dekenai idia lao neganai idia dekenai idia henia. Maikrofon be nega maorona ai gabu maorona dekenai idia noho totona palani idia karaia guna be namo. Haheitalai idia tohoa guna neganai dala ia kehoa, karaia taudia dekenai maikrofon gaukaralaia dalana maorona hadibaia totona. Platfom dekenai unai idia karaia diba lasi neganai, namona be karaia taudia ese maikrofon bamona gauna ma ta be edia imana dekenai idia dogoatao, maikrofon gaukaralaia dalana maorona idia tohoa totona. Haheitalai murinai, karaia taudia ese imana dekenai idia dogoatao maikrofon do idia atoa namonamo, bona idia naria namonamo platfom idia rakatania neganai idia noho maikrofon ma haida edia varo dainai idia moru garina.

Maikrofon gaukaralaia dalana ita laloa namonamo neganai iseda hebou edia badina badana ta, Dirava ena Hereva ita herevalaia lalonai ita hagoadaia heheni karana, ita durua. (Heb. 10:​24, 25) Maikrofon gaukaralaia dalana maorona ita dibaia neganai, ita ta ta ese unai mai anina bada gauna ita habadaia.