ENA BE emu hadibaia gaukara ia namo be mai anina bada, to emu hereva ena nega danu oi laloa namonamo be namo. Iseda hebou idia matamaia bona idia ore negadia idia gwauraia. Unai ia vara totona program lalonai kahana idia karaia taudia ibounai ese unai idia laloa be gau badana.

Baibel negadia ai, taunimanima ese mauri idia laloa dalana bona hari idia laloa dalana be idau. Nega maorona idia gwauraia lasi, to idia gwau “hora ihatoina bamona” eiava “hora namba ten bamona.” (Mat. 20:​3-6; Ioa. 1:​39, NW) Dina ta ta gaukara edia nega korikorina idia atoa be badina lasi. Hari tanobada ena kahana haida ai, nega laloa dalana be unai bamona.

To, ena be gabu ena kastom dainai eiava ta ta ena ura dainai taunimanima be nega idia laloa bada lasi, to nega laloa dalana maorona ita dibaia neganai heduru ita abia. Program lalonai haida be mai edia kahana neganai, unai kahana ta ta totona idia makaia nega idia laloa be namo. Inai hakaua herevana, “ekalesia ena gaukara ibounai umui karaia namonamo, mai dala maorona, karaia kava lasi,” be hebou ena kahana edia nega ita laloa neganai ita badinaia diba.​—1 Kor. 14:40.

Nega Badinaia Dalana. Hegaegae be gau badana. Nega momo, nega dainai idia hekwarahi taudia be idia hegaegae namonamo lasi. Reana sibona edia diba dekenai idia tabekau. Eiava idia hegaegae lasi ela bona nega ia kwadogi. Nega oi badinaia totona gau badana be emu kahana oi laloa bada bona oi ura oi hegaegaelaia namonamo.

Duahiduahi do oi karaia, a? Gau ginigunana be, Stadi 4 ia lao 7 oi itaia lou, idia ese hereva namonamo, laga-ani, mai anina herevadia hahedinaraia, bona lalohadai badadia hahedinaraia daladia idia herevalaia. Bena, oi dekenai idia henia kahana oi duahia badabada neganai unai sisiba oi badinaia. Oi karaia negana oi itaia. Idia makaia negana lalonai oi haorea totona emu duahiduahi oi haharagaia be namo, a? Anina lasi kahadia oi duahia haraga, to lalohadai badadia oi duahia neganai oi laga-ani bona oi haraga lasi be namo. Oi karaia loulou. Oi duahia namonamo neganai, nega do oi naria namonamo diba.

 Oi hereva neganai nouti do oi gaukaralaia, a? Nega oi badinaia totona hereva momo oi torea, hegeregere maniuskrip oi karaia, be badina lasi. Stadi 25 lalonai, dala namona oi dibaia vadaeni. Inai gau faiv oi laloatao: (1) Lalohadai namodia oi abia hidi, to momo herea lasi. (2) Lalohadai badadia oi dibaia namonamo, to sentens edia hereva ta ta oi laloatao toho lasi. (3) Autlain ena kahana ta ta totona oi atoa negana eiava kahana ta do oi matamaia neganai oi gaukaralaia vadaeni negana oi makaia. (4) Oi hegaegae neganai, namona be oi laloa, edena hereva oi rakatania diba bema idia makaia negana oi hanaia gwauraia. (5) Hereva oi karaia loulou.

Oi karaia loulou be mai anina bada. Unai oi karaia lalonai, emu hereva ena kahana ta ta edia nega oi itaia. Emu hereva oi karaia loulou ela bona hereva ibounai be idia makaia negana lalonai oi gwauraia diba. Gau momo oi herevalaia toho lasi. Nega ibounai oi haria ore lasi, badina taunimanima vairanai hereva oi henia ena haraga be reana oi sibona oi karaia hegeregerena lasi.

Kahana Edia Nega Oi Haria Dalana. Nega badinaia karana dekenai hereva ena kahana edia nega haria karana be mai anina. Nega bada be emu hereva ena anina oi gwauraia totona oi atoa. Oi hadibaia hereva badadia be unai kahana lalonai idia noho. Namona be hamatamaia herevana ena lata ia maoro, Stadi 38 ia herevalaia gaudia toi ia hagugurua sibona. Namo lasi hereva ena anina kahana be lata herea bena nega be lasi Stadi 39 hegeregerena hereva dokona namona oi gwauraia totona.

Bema emu nega oi badinaia namonamo, emu hereva ia namo bona ia hahedinaraia program lalonai kahana ma haida idia henia taudia bona kongregesen ibounai oi matauraia.