SIBONA emu hereva dalana ai emu hereva oi henia neganai, ma haida ese oi idia abidadama henia. Oi ese ena kara korikori ia hunia toho tauna oi abidadama henia diba, a? Reana lasi. Unai dainai, oi sibona emu hereva dalana oi badinaia be namo.

Namo lasi oi laloa sibona emu hereva dalana oi badinaia dainai, oi hereva namonamo be anina lasi. Grama oi badinaia lasi, hereva oi gwauraia kerere, bona hereva oi gwauraia goevagoeva lasi be namo lasi. Bona hereva maorodia oi gaukaralaia. Ita ura hanaihanai eda hereva bona kara amo hemataurai karana maorona ita hahedinaraia. Sibona ena hereva dalana ia badinaia tauna ena hereva be auka lasi bona ma haida ese ena hereva idia abia isi totona ia karaia lasi.

 Haroro Gaukara Lalonai. Haroro totona ruma ta dekenai oi lao eiava taunimanima idia noho gabuna ta dekenai oi lao neganai oi gari, a? Ita momo ita gari, to haida idia gari bada. Reana unai dainai edia hereva dalana ia idau eiava gado regena ia marere, eiava dala idauna ai edia imana eiava kwarana idia hamarerea kava.

Pablisa ta dekenai reana unai ia vara ena badina be momo. Reana helai taudia edia lalohadai ia dekenai ia laloa eiava ia daradara ena hereva do ia namo eiava lasi. Unai be nega momo ia vara, to unai gaudia ita laloa bada neganai hekwakwanai idia vara. Haroro gaukara oi karaia gwauraia neganai, bema oi gari, dahaka ese oi ia durua diba? Hegaegae namonamo karana bona Iehova guriguri henia goadagoada karana. (Kara 4:29) Iehova ena hebogahisi bada oi laloa, ia ese taunimanima ia boiria Paradaiso lalonai gorere lasi maurina do idia moalelaia ela bona hanaihanai. Oi durua toho taudia bona idia ese sivarai namona idia kamonai be mai anina bada oi laloa.

Danu, oi laloatao taunimanima be ura kwalimu taudia bona oi gwauraia herevana idia abia dae eiava dadaraia diba. Iesu be idaunegai Israela dekenai ia haroro neganai unai bamona ia vara danu. Emu gaukara be oi haroro sibona. (Mat. 24:14) Ena be taunimanima ese emu hereva idia koua, to unuseniai oi noho karana ese gau ta ia hahedinaraia. Do oi kwalimu, badina dala oi koua lasi dainai Iehova ese ena ura hagugurua totona oi ia gaukaralaia  diba. To oi hereva totona dala ia noho neganai, emu hereva be edena bamona? Bema ma haida durua bada gaudia oi laloa, emu hereva do idia ura henia bona sibona emu hereva dalana ai do oi hereva.

Bema oi haroro lalonai, dina ta ta ai oi kara bona hereva dalana oi badinaia, kamonai taudia edia lalona ia namo. Reana oi ura gwauraia Baibel ena hereva momokani do idia ura kamonai danu. Idia oi hereva henia lasi, to idia ida oi herevahereva. Oi kara namo henidia. Oi hahedinaraia edia namo oi laloa, bona oi noia edia lalohadai idia gwauraia totona. To momokani, bema gado eiava emu gabu ena kastom hegeregerena, oi diba lasi taudia oi hereva henia neganai hemataurai hahedinaraia daladia idia noho, do oi ura unai oi badinaia. To hanaihanai emu lalo-moale dainai oi kiri diba be namo.

Platfom Dekenai. Hutuma oi hereva henia neganai, sibona emu hereva dalanai oi herevahereva be namo. Momokani, taunimanima hutuma idia noho neganai, emu gado regena oi gaukaralaia namonamo be namo. Bema emu hereva be emu kwarana amo oi henia toho eiava bema hereva momo oi torea, reana oi gaukaralaia herevadia oi laloa bada herea. Hereva maorodia be mai anina bada, to idia oi laloa bada herea neganai, hereva henia dalana ia auka bamona. Sibona emu hereva dalana oi haboioa. Namona be do oi herevalaia gaudia oi hegaegaelaia namonamo guna, to lalohadai badadia oi laloa, hereva ta ta lasi.

Hebou dekenai oi idia henanadai henia neganai be unai bamona danu. Oi hegaegae namonamo, to emu haere oi duahia lasi bona emu kwarana amo oi gwauraia toho lasi. Oi karaia neganai, sibona emu hereva dalana hegeregerena emu gado regena oi haidaua bena emu haere edia toana ia namo.

Danu, hereva hanamoa daladia oi badinaia goadagoada neganai, kamonai taudia idia mamia unai be sibona emu hereva bamona lasi. Hegeregere, namona be oi hereva goevagoeva bona hereva oi gwauraia maoro, to namo lasi unai oi karaia dalana dainai emu hereva ena toana be auka bona sibona emu hereva dalana bamona lasi. Mamina habadaia bona toana hahedinaraia totona imana oi gaukaralaia neganai, bema oi karaia namonamo, emu hereva idia hamauria bamona, to oi habadaia kava neganai, oi herevalaia gauna ena mamina do ia hadikaia. Gado regena ena bada ia hegeregere be namo, to oi boiboi badabada lasi. Nega haida emu hereva oi hasiahua be namo, to namo lasi hekokoroku dalanai oi hereva. Gado regena oi haidaua bona ura bada bona hemami oi hahedinaraia neganai, namo lasi oi karaia dalana amo kamonai taudia be oi idia laloa bada eiava edia mamina oi hadikaia.

 Taunimanima haida ese hereva idia gwauraia goevagoeva momokani, ena be pablik tok idia henia lasi. Ma haida edia hereva dalana be herevahereva bamona. Gau badana be dina ta ta ai oi hereva namonamo bona Keristani hairai namona oi hahedinaraia. Unai amo platfom ai oi hereva neganai, oi hereva bona kara dalana be sibona emu bamona bona kamonai taudia ese idia ura henia.

Taunimanima Edia Vairanai Oi Duahiduahi Neganai. Taunimanima vairanai emu dala hegeregerena oi duahiduahi be mai ena hekwarahi. Unai oi karaia totona, do oi duahia gauna ena lalohadai badadia oi itaia, bona idia hedinarai daladia oi itaia. Unai oi laloatao namonamo; bema lasi, hereva ta ta sibona do oi duahia. Oi diba lasi herevadia gwauraia daladia oi sekea. Oi duahiduahi badabada loulou, gado regena ena tiuni bona ena bada maorona oi davaria totona, bona lalohadai tamona idia hahedinaraia herevadia oi duahia hebou unai lalohadai ia hedinarai goevagoeva totona. Unai oi karaia loulou ela bona ia heau namonamo. Do oi duahia gauna oi dibaia namonamo guna, bena oi duahia neganai toana be herevahereva namona bamona. Unai be sibona emu hereva dalana oi badinaia karana.

Momokani, taunimanima vairanai ita karaia duahiduahi momo be Baibel idia herevalaia bukadia amo ita karaia. Tiokratik Haroro Sikuli lalonai ita duahiduahi sibona lasi, to haroro gaukara lalonai bona platfom amo hereva ita henia neganai Baibel siridia ita duahia. Tadikaka idia boiria, Gima Kohorona Stadi bona Kongregesen Buka Stadi lalonai idia herevalaia gaudia idia duahia totona. Idia hegeregere tadikaka haida dekenai maniuskrip idia henia, hebouhebou dekenai kamonai taudia vairanai idia duahia totona. Herevana oi be Baibel eiava gau ma ta oi duahia, to ta ese ia gwauraia herevadia be idia mauri bamona oi duahia. Bema taunimanima haida edia hereva idia noho, idia ta ta edia hereva oi duahia neganai emu gado regena oi haidaua. To namona be inai oi naria namonamo: Drama korikorina bamona oi duahia lasi, to sibona emu hereva bamona oi duahia dalanai idia oi hamauria bamona.

Duahiduahi namonamo dalana be herevahereva bamona. Ia be sibona emu hereva bamona bona abidadama ia hahedinaraia.