NEGA ta taunimanima oi itaia huahua idia abia hidi, a? Momo ese ena kala bona bada idia itaia, unai amo idia diba ia mage vadaeni eiava lasi. Haida ese idia bonaia. Ma haida ese idia dogoatao, reana idia gigia danu. Bona ma haida ese ena metau idia tohoa, imana kahana kahana ai ta idia dogoatao bona idia mamia edena ena ranu be bada. Unai taudia be dahaka idia laloa? Kahana maragidia idia laloa namonamo, edia idau gaudia idia tahua, guna idia karaia abia hidi idia laloatao, bona hari idia itaia gaudia be idia diba vadaeni gaudia ida idia hahegeregerea. Mamina namona ta do idia moalelaia badina unai gauna idia laloa namonamo.

Momokani, Dirava ena Hereva stadilaia karana ena namo ese unai ia hereaia momokani. Iseda mauri lalonai unai bamona stadi karana ita atoa guna neganai, iseda abidadama do ia goada, iseda lalokau do ia dobu, iseda haroro gaukara ese anina do ia havaraia, bona ita karaia abia hidi ese idia hahedinaraia laloa kehoa bona Dirava amo ia mai aonega ita abia. Aonega Herevadia 3:15 ese unai bamona namo ia herevalaia, ia gwau: “Oi ura henia gaudia ibounai edia huanai, ta ese aonega ia hereaia diba lasi.” Oi ese unai bamona namo oi abia noho, a? Oiemu stadi dalana be mai anina bada.​—⁠Kol. 1:​9, 10.

Stadi be dahaka? Ia be duahiduahi haraga karana lasi. Stadi lalonai oiemu lalona do oi gaukaralaia, gau ta be do oi laloa namonamo eiava nega daudau lalonai do oi laloa. Ena anina be oi duahia gauna oi laloa, oi diba vadaeni gaudia ida oi hahegeregerea, bona idia gwauraia herevadia edia badina oi laloa. Oi stadi neganai, namona be oi dekenai idia matamata lalohadai oi laloa dobu. Danu, namona be emu mauri lalonai Baibel ena sisiba do oi badinaia namonamo dalana oi laloa. Oi be Iehova ena Witnes tauna ta dainai, reana oi ura oi stadilaia gauna be ma haida durua totona oi gaukaralaia daladia oi laloa. Ia hedinarai goevagoeva, stadi lalonai oi stadilaia gauna do oi lalohadailaia namonamo.

Stadi totona oi hegaegae neganai, emu Baibel, oi gaukaralaia gwauraia bukana, pensolo eiava peni, bona reana noutbuk ta oi abia. To oiemu kudouna oi hegaegaelaia danu, a? Baibel ese ita  ia hadibaia, “Esera ese sibona ena kudouna ia hegaegaelaia Iehova ena taravatu amo sisiba do ia tahua bona do ia badinaia bona Israela dekenai taravatu bona kara maoromaoro do ia hadibaia.” (Esr. 7:​10, NW ) Unai bamona kudouna hegaegaelaia karana ena anina be dahaka?

Guriguri ese ita ia durua, lalohadai maorona dekenai Dirava ena Hereva ita stadilaia totona. Ita ura iseda kudouna, iseda lalona korikorina, ia hegeregere Iehova ena hadibaia herevadia ia abia dae totona. Nega ibounai stadi oi hamatamaia neganai, Iehova oi noia ena lauma ena heduru do ia henia. (Luka 11:13) Namona be ia oi noia oi ia durua do oi stadilaia gauna oi lalo-pararalaia totona, hegeregere oi stadilaia gauna ena anina iena ura dekenai be dahaka, namo bona dika edia idau oi dibaia totona edena dala ai oi ia durua, edena bamona emu mauri lalonai Iehova ena hakaua herevadia oi badinaia diba, bona edena dala ai oiemu hetura karana Iehova ida ia haidaua diba. (Aon. 9:10) Oi stadi lalonai, ‘Dirava oi noia aonega ia henia noho’ totona. (Iam. 1:⁠5) Lalohadai kereredia eiava dika havaraia urana oi kokia totona Iehova ena heduru oi tahua neganai, namona be mai momokani ida sibona emu kara be oi dibaia gaudia ida oi hahegeregerea. Nega ibounai Iehova ese ia hahedinaraia gaudia dainai ‘ia oi tanikiu henia.’ (Sal. 147:⁠7) Mai guriguri ida ita stadi neganai, Iehova kahirakahira ita lao, badina ena Hereva amo ita ia hereva henia neganai, ena hereva ita abia dae.​—⁠Sal. 145:⁠18.

Iehova ena taunimanima sibona be unai bamona idia karaia dainai stiuden taudia ma haida amo idia idau. Dirava idia badinaia lasi taudia momo be Baibel ai idia torea herevadia idia daradaralaia bona idia hepapahuahulaia. To ita be unai bamona lasi. Ita ese Iehova ita abidadama henia. (Aon. 3:​5-7) Bema gau ta ita lalo-pararalaia lasi, ita hekokoroku lasi bona karaharaga ita gwau lasi unai be kerere. Haere ita tahua bona geia lalonai, Iehova ita naria noho. (Mika 7:⁠7) Esera bamona, ita ura ita dibaia gaudia ita badinaia bona hadibaia. Iseda kudouna ena ura be unai bamona dainai, iseda stadi amo namo bada do ita abia.

Paragraf ginigunana amo maoromaoro oi hamatamaia ela bona dokona lasi, to unai hereva eiava karoa ibounai oi itaia guna. Hereva kwarana oi laloa namonamo guna. Unai be do oi stadilaia gauna ena sinado. Bena hereva kwarana maragidia edia anina unai sinado dekenai oi laloa. Idia noho laulau, lista, eiava hadibaia mauadia oi itaia namonamo. Oi sibona oi nanadaia: ‘Hari lau itaia guna gaudia ese idia hahedinaraia,  reana dahaka do lau dibaia? Edena dala ai lau dekenai ia be mai anina bada?’ Unai ese oiemu stadi hakaua dalana ia hahedinaraia.

Vadaeni, idia torea gaudia oi itaia. Gima Kohorona edia stadi herevadia bona buka haida be mai edia henanadai. Paragraf ta ta oi duahia neganai, haere oi makaia be namo. Ena be stadi henanadai idia noho lasi, to reana oi ura hereva badadia oi makaia do oi laloatao totona. Bema lalohadai ta be guna oi diba lasi, nega sisina unai gauna oi laloa, oi lalo-pararalaia namonamo totona. Haroro gaukara lalonai eiava do oi henia hereva ta lalonai oi gaukaralaia diba haheitalai eiava gau ta herevalaia daladia oi tahua. Taunimanima haida oi laloa, reana oi stadilaia gauna be idia ida oi herevalaia neganai edia abidadama ia hagoadaia. Oi ura do oi gaukaralaia gaudia oi makaia, bona emu stadi oi haorea neganai oi itaia lou.

Unai hereva oi stadilaia neganai, idia gwauraia siridia oi kehoa. Edia anina paragraf lalonai idia noho herevadia dekenai oi laloa namonamo.

Reana gau haida oi lalo-pararalaia haraga lasi eiava oi ura gabeai edia anina do oi tahua namonamo. Namo lasi idia ese emu stadi amo oi idia veria siri, to oi makaia gabeai do oi laloa totona. Nega momo, oi stadi noho lalonai unai gaudia idia hahedinaraia goevagoeva. Bema lasi, reana buka ma haida dekenai do oi tahua. Unai bamona do oi tahua gaudia haida be dahaka? Reana idia torea hanai siri ta oi lalo-pararalaia goevagoeva lasi. Eiava ena anina oi stadilaia herevana dekenai oi itaia haraga lasi. Reana oi laloa unai stadi lalonai gau ta oi lalo-pararalaia to reana ma ta dekenai oi gwauraia hedinarai be auka. Unai gaudia oi hanaia sibona lasi, to reana aonega dalana be oi stadilaia matamaia gauna oi haorea murinai buka ma haida dekenai edia anina oi tahua.

Aposetolo Paulo ese Heberu Keristani taudia dekenai ena revareva mai ena hereva momo ia torea neganai, ihuana kahanai ia gwau: “Hereva ena anina be inai.” (Heb. 8:⁠1) Nega ta ta oi sibona dekenai unai bamona oi gwauraia, a? Paulo ese unai ia karaia ena badina mani oi laloa. Iena revareva helagana ena karoa ginigunadia ai ia hahedinaraia Keriso be Dirava ena Hahelaga Tauna Badana bona guba dekenai ia vareai vadaeni. (Heb. 4:14–5:10; 6:20) To, Paulo ese karoa 8 ena matamanai unai anina badana ia gwauraia neganai, duahia taudia edia lalona ia hegaegaelaia, ia herevalaia gauna ena anina edia mauri lalonai do idia laloa dobu. Ia hahedinaraia Keriso be Dirava vairanai idia durua totona ia hedinarai bona dala ia kehoa, idia be unai “Helaga Gabuna” guba dekenai idia vareai diba totona. (Heb. 9:24; 10:​19-22) Edia helaro momokanina ese idia do ia hagoadaia, iena revareva lalonai abidadama, haheauka, bona Keristani kara dekenai ia henia sisiba ma haida idia badinaia totona. Unai hegeregerena, ita stadi neganai, hereva badadia ita laloa namonamo karana ese ita do  ia durua sinado idia hahedinaraia dalana ita itaia totona bona ita badinaia ena badina maorodia ita laloa bada totona.

Oiemu stadi ese oi ia hagoadaia kara ta oi karaia totona, a? Unai henanadai be mai anina bada. Gau ta oi dibaia neganai, oi sibona oi nanadaia: ‘Edena dala ai inai diba ese egu lalohadai bona mauri lalonai lau tahua gaudia ia haidaua be namo? Edena dala ai inai diba lau gaukaralaia diba hekwakwanai lau hanaia, abia hidi lau karaia, eiava tahua gauna ta lau davaria totona? Edena dala ai ruma bese, haroro gaukara, bona kongregesen lalonai lau gaukaralaia diba?’ Mai guriguri ida unai henanadai oi laloa, bona oi dibaia gaudia oi gaukaralaia negadia korikoridia oi laloa namonamo.

Karoa ta eiava hereva ta oi stadilaia murinai, nega sisina lalonai unai oi laloa lou. Hereva badadia bona idia hamomokania herevadia oi laloatao toho. Unai ese oi do ia durua, gabeai unai hereva oi laloatao bona oi gaukaralaia totona.

Ita Iehova ena taunimanima ita stadilaia diba gaudia be momo. To dahaka amo ita hamatamaia be namo? Namona be dina ta ta ibounai Dina Iboudiai Buka Helaga Tahua buklet amo dina ena siri bona ena hereva ita stadilaia. Pura ta ta ai, kongregesen heboudia dekenai ita lao, bona idia totona ita hegaegae neganai ita karaia stadi ese hebou amo ita abia heduru ia habadaia. Danu, haida ese aonega dalanai edia nega idia gaukaralaia bona hereva momokani idia do dibaia lasi neganai Society ese ia printaia Keristani bukadia idia stadilaia. Ma haida ese pura lalonai idia karaia Baibel duahiduahi ena kahana ta idia abia hidi bona unai siri idia stadilaia namonamo.

Bema oiemu noho dalana dainai pura ta ta ai kongregesen heboudia lalonai ita herevalaia gaudia ibounai oi stadilaia namonamo diba lasi be edena bamona? Namo lasi haragaharaga unai gaudia ibounai oi karaia kava, eiava ibounai oi karaia diba lasi dainai kahana ta oi karaia lasi be namo lasi momokani. Namona be oi stadilaia diba kahana oi laloa, bona unai kahana do oi karaia namonamo. Pura ta ta ibounai unai bamona oi karaia be namo. Gabeai, emu stadi negana oi habadaia toho, hebou ma haida edia hereva oi hegaegaelaia totona.

Iehova ia diba ruma bese kwaradia be tauanina dalanai edia lalokau taudia idia naria totona do idia gaukara goadagoada. Aonega Herevadia 24:27 (NW ) ia gwau: “Murimuri ai oiemu gaukara oi hegaegaelaia, bona oiemu uma gabu oi karaia ore.” To, lauma dalanai emu ruma bese idia durua gaudia oi reaia diba lasi. Unai dainai, unai siri ma ia gwau: “Murinai oiemu ruma taudia oi hagoadaia danu be gau badana.” Edena dala ai ruma bese kwaradia be unai  idia karaia diba? Aonega Herevadia 24:3 ia gwau: “Laloa kehoa tauna . . . ena famili idia tubu goada noho.”

Edena dala ai laloa kehoa ese emu ruma bese ia durua? Laloa kehoa ena anina be ita itaia gauna sibona lasi to ma gau haida danu ita laloa. Ita gwau diba famili stadi namona matamaia dalana namona be oiemu ruma bese oi stadilaia. Lauma dalanai emu ruma bese taudia idia goada idia lao, eiava? Idia ida oi herevahereva neganai oi kamonai namonamo. Maumau eiava badu mamina ta ia noho, a? Kohu tahua karana be mai anina bada, a? Emu natudia ida oi haroro lalonai, mai moale ida natudia ma haida vairanai idia hahedinaraia idia be Iehova ena Witnes taudia, a? Ruma bese ena Baibel duahiduahi bona stadi idia moalelaia, a? Idia ese Iehova ena dala be sibona edia mauri dalana ai idia halaoa momokani, a? Unai oi laloa namonamo neganai, do oi itaia oi, ruma bese kwarana, ese dahaka oi karaia be namo, ruma bese taudia ibounai ese lauma ena huahua idia hahedinaraia totona.

Gima Kohorona bona Awake! magasin lalodiai emu ruma bese durua herevadia oi tahua. Bena ruma bese taudia oi hadibaia dahaka do umui stadilaia, unai gauna idia laloa namonamo guna totona. Stadi lalonai lalokau oi hahedinaraia. Ruma bese taudia oi hahisia eiava hahemaraia lasi, to umui stadilaia gauna ena namo oi hahedinaraia, bona emu ruma bese lalonai umui badinaia diba gaudia oi gwauraia. Dala oi karaia ruma bese taudia ibounai be herevahereva lalonai idia vareai. Idia ta ta oi durua bena idia itaia Iehova ena Hereva be “namo momokani” mauri lalonai namo ita davaria totona.​—⁠Sal. 19:⁠7.

Lauma gaudia idia lalo-pararalaia lasi aonega taudia ese guba bona tanobada gaudia, tanobada ai idia vara gaudia, bona eda tauanina danu idia stadilaia diba, to idia itaia gaudia edia anina korikorina idia lalo-pararalaia lasi. To, Dirava ena lauma ena heduru amo hanaihanai Dirava ena Hereva idia stadilaia taudia ese unai gaudia lalonai Dirava ena gaukara, Baibel ena peroveta herevadia edia guguru dalana, bona Dirava ena ura kamonai taudia hanamoa totona ia guguru dalana idia itaia.​—⁠Mar. 13:​4-29; Roma 1:20; Apok. 12:⁠12.

Unai be gau namo hereana, to namo lasi ia dainai ita hekokoroku. To, dina iboudiai Dirava ena Hereva ita stadilaia karana ena heduru dainai ita manau. (Deu. 17:​18-20) Ita ia gimaia danu, ita be “kara dika ese ia koia garina,” badina Dirava ena Hereva be iseda kudouna lalonai ia mauri noho neganai, kara dika ena veria siahuna ese dadaraia urana do ia hamanokaia lasi. (Heb. 2:1; 3:13; Kol. 3:​5-10) Unai dainai, ‘Iehova ena ura hegeregerena do ita noho, bona nega ibounai ia do ita hamoalea bona eda mauri ese kara namodia edia anina do ia havaraia.’ (Kol. 1:10) Dirava ena Hereva ita stadilaia ena badina be unai, bona bema unai ita hagugurua, ia be davana hereadaena.