KING SOLOMONA ese “aonega herevadia ia laloa, bona ia tahua, bona edia momokani ia tohoa.” Dahaka dainai? Badina ia ura “ia torea herevadia be momokani, bona maoromaoro.” (Had. 12:​9, 10) Luka ese Keriso ena mauri lalonai idia vara gaudia ia “tahua namonamo vadaeni, edia hamatamaia nega dekena amo,” dala maorona ai idia ia torea totona. (Luka 1:⁠3) Unai Dirava ena hesiai taudia ruaosi ese tahua karana idia karaia.

Tahua karana be dahaka? Ia be gau ta dekenai diba ita tahua namonamo karana. Unai ena anina be duahiduahi bona stadi karaia daladia ita badinaia. Reana taunimanima haida ita henanadai henia danu.

Edena nega ai tahua karana ita karaia be namo? Haheitalai haida be inai. Reana sibona emu stadi eiava Baibel duahiduahi lalonai, oi dekenai mai anina bada henanadai idia vara. Oi haroro henia tauna ta ese henanadai ia henia bona oi ura hereva maorona oi davaria ia oi haere henia totona. Reana platfom amo hereva ta do oi henia.

Mani oi laloa oi be hereva ta do oi henia. Ia lalonai do oi herevalaia gauna be reana taunimanima iboudiai totona. Edena dala ai emu gabu ai umui badinaia diba? Tahua karana amo ena anina oi habadaia. Bema hamomokania gaudia haida eiava oi herevalaia gauna dekenai bona kamonai taudia dekenai ia hegeregere haheitalai ta oi gwauraia, reana guna helai taudia idia laloa idia diba vadaeni herevana dekenai edia diba oi habadaia, bona idia ia hagoadaia kara ta do idia karaia. Reana oi gaukaralaia herevana be duahia taudia tanobada hegegemadai totona idia printaia, to namona be unai hereva ena anina oi habadaia, oi haheitalaia, bona kongregesen ta eiava taunimanima ta ese ia badinaia dalana oi hahedinaraia. Edena bamona oi karaia be namo?

Tahua karana oi do hamatamaia lasi neganai, emu hereva do idia kamonai taudia oi laloa. Dahaka idia diba vadaeni? Dahaka idia diba be namo? Bena hereva oi henia ena badina oi laloa. Emu ura be gau ta do oi gwauraia hedinarai? oi hamomokania? oi hakoikoia? eiava oi ura gau ta do idia badinaia, a? Bema oi ura gau ta oi gwauraia hedinarai, ena anina ia hedinarai goevagoeva herevadia ma haida oi henia be namo. Ena be hereva badadia idia lalo-pararalaia, to reana ia namo bema oi hahedinaraia edena nega ai eiava edena dala ai do idia karaia. Bema oi ura gau ta  oi hamomokania, badina haida amo oi hahedinaraia dahaka dainai unai gauna be unai bamona, bona hamomokania gaudia oi hahedinaraia danu. Hereva ta oi hakoikoia lalonai, unai hereva idia hepapahuahulaia herevadia oi diba namonamo bona kahana ruaosi idia gaukaralaia hamomokania herevadia oi laloa namonamo be namo. Momokani, ita ura lalohadai goadadia ita hahedinaraia sibona lasi, to danu, ita ura hebogahisi dalanai ita karaia. Bema oi ura gau ta do idia badinaia, namona be edia kudouna oi hamarerea. Anina be helai taudia ese oi herevalaia gauna idia badinaia totona edia lalona ia veria bona edia ura ia habadaia gauna ta oi hahedinaraia. Hekwakwanai lalonai danu, unai kara idia karaia taudia edia mauri sivaraidia ese taunimanima edia kudouna idia hamarerea diba.

Hari oi hamatamaia diba, a? Lasi. Do oi hahedinaraia herevana ena bada oi laloa. Reana nega be mai ena anina bada. Bema oi davaria dibana be ma haida dekenai do oi hahedinaraia, miniti hida oi gaukaralaia diba? Miniti 5, a? Miniti 45, a? Nega idia gwauraia, kongregesen ena hebou lalonai bamona, eiava nega be hetoana lasi, Baibel stadi eiava mamoe naria gaukarana lalonai bamona.

Bona dokonai, edena buka idia noho, tahua karana lalonai oi gaukaralaia diba totona? Ruma dekenai haida idia noho, bona Kingdom Hall ena laiberi dekenai ma haida idia noho danu, a? Lagani momo lalonai Iehova idia hesiai henia tadikaka haida ese gwaumaoro do idia henia edia laiberi gaudia oi gaukaralaia totona, a? Emu gabu kahirakahira ai laiberi ta dekenai buka haida amo diba oi tahua diba, a?

Bema oi tahua gauna be Baibel siri ta ena anina, Baibel lalonai oi tahua guna be namo.

Badina Siridia Itaia. Oi sibona oi nanadaia: ‘Inai hereva be daika dekenai idia torea? Badina siridia idia hahedinaraia dahaka ia vara bena unai hereva idia gwauraia eiava taunimanima ese inai lalohadai idia hahedinaraia, a?’ Nega momo unai bamona gaudia ese ita idia durua hereva ta ena anina ita lalo-pararalaia totona, bona reana oiemu hereva lalonai oi gaukaralaia neganai, emu hereva do idia hanamoa bada.

Hegeregere, nega momo Heberu 4:12 idia torea hanai bona ia amo idia hahedinaraia Dirava ena Hereva ena siahu ese kudouna ia hamarerea bona mauri ia haidaua diba. Badina siridia amo edena bamona unai ia vara ita lalo-pararalaia bada. Unai siri be Israela taudia ese lagani 40 lalonai, Iehova be Aberahamo dekenai ia gwauhamatalaia tanona dekenai idia do vareai lasi neganai, tano gagaena ai idia davaria gaudia idia hahedinaraia. (Heb. 3:​7–4:13) “Dirava ena hereva,” Aberahamo ida ia karaia gwauhamata taravatuna  hegeregerena laga-ani gabuna ai idia do ia hakaua vareai gwauhamatana, be ia do mase lasi; ia mauri noho bona ia guguru gwauraia. Badina momo dainai Israela taudia ese idia abidadama henia be namo. To, Iehova ese Aigupito amo Sinai Ororona bona Gwauhamata Tanona dekenai idia ia hakaua lalonai, idia hahedinaraia loulou idia be abidadama lasi taudia. Unai dala ai, Dirava ese ena hereva ia hagugurua dalana idia matauraia lasi karana amo edia kudouna lalonai idia noho gauna idia hahedinaraia. Iseda negai be unai bamona danu, Dirava ena gwauhamata herevana ese taunimanima edia kudouna lalonai idia noho gauna ia hahedinaraia.

Idia Torea Siri Ma Haida Itaia. Baibel haida lalonai siri ta ta ida do oi hahegeregerea siridia ma haida idia torea. Oiemu Baibel be unai bamona, a? Bema oibe, reana oi do ia durua bada. New World Translation of the Holy Scriptures Baibel lalonai ia noho haheitalai mani oi itaia. Petero Ginigunana 3:6 ia gwau Sara be haheitalai namona Keristani headava hahinedia dekenai. Idia torea siri ma ta, Genese 18:​12, ese unai ia durua, badina ia gwau Sara ese “sibona ena lalona dekenai” Aberahamo ia gwauraia lohiabada. Ia hedinarai, mai ena kudouna ibounai ida Aberahamo henunai ia noho. Idia torea siri ma haida ese unai bamona diba sibona lasi to reana Baibel ena peroveta herevana ta ia guguru dalana eiava Taravatu gwauhamatana ese ia laulaulaia gauna ta idia hahedinaraia. To, namona be oi lalo-parara, idia torea siri haida ese unai bamona diba idia henia lasi. Reana idia ese unai bamona lalohadai ma ta eiava tau ta eiava gabu ta idia gwauraia herevadia idia hahedinaraia sibona.

Baibel Konkodens Oi Gaukaralaia. Baibel konkodens be alfabet hegeregerena Baibel lalonai idia gaukaralaia herevadia edia indeks ta. Oi ia durua diba oi tahua gauna idia herevalaia siridia oi davaria totona. Idia oi tahua neganai, diba namodia ma haida do oi abia. Oi ese Dirava ena Hereva lalonai ia hedinarai “hereva momokani” ena toana do oi itaia. (2 Tim. 1:13) New World Translation Baibel be mai ena lista ta ladana “Bible Words Indexed.” To, Comprehensive Concordance bukana ena lista be bada herea. Bema emu gado dekenai idia karaia, Baibel lalonai idia noho hereva badadia ta ta idia noho siridia do ia hahedinaraia.

 Rau 33 ai ia noho mauana ese “hesiai tauna mai ena kamonai, bona mai ena kara maoromaoro” oreana ese ia halasia durua gaudia ma haida ia hahedinaraia. (Mat. 24:​45-47) Idia momo dekenai anina ena lista ia noho, bona idia momo edia dokona kahana ai hereva edia indeks ia noho, unai idia karaia oi ura herevana oi davaria totona. Lagani ta ta edia dokonai, Gima Kohorona bona Awake! lalonai, unai lagani ai idia halasia herevadia edia indeks idia noho.

 Unai Baibel stadi bukadia lalonai idia hahedinaraia gaudia oi diba neganai, emu tahua karana oi karaia haraga diba. Hegeregere, reana oi ura peroveta herevana ta, hadibaia herevana ta, Keristani karana ta, eiava Baibel ena hakaua herevana ta badinaia karana dekenai diba oi abia. Reana Gima Kohorona amo unai gauna do oi davaria. Awake! ese hari idia vara gaudia bona hekwakwanai, tomadiho, saiens, bona tano idauidau taudia ia herevalaia. Evanelia Bukadia edia sivarai be Tau Hereadaena bukana lalonai idia noho hegeregerena idia vara. Baibel bukadia haida edia siri iboudiai idia herevalaia bukadia haida be Apokalupo​—⁠Ena Hagugurua Negana Ia Kahirakahira!, Daniela Ena Peroveta Herevana Oi Laloa Namonamo!, bona Isaiah’s Prophecy​​—⁠Light for All Mankind bukana ena volium rua. Buka Helaga Herevalaia bukana lalonai be nega momo haroro gaukara ai idia gwauraia henanadai handred momo edia haere namodia idia noho. Tomadiho ma haida, edia hahediba herevadia, bona idia vara sivaraidia oi diba totona Mankind’s Search for God bukana oi itaia. Hari inai negai Iehova ena Witnes taudia edia sivarai haida be Iehova Ena Witness Taudia be Lalo-Tamona ai Dirava Ena Ura Idia Karaia Tanobada Ibounai Dekenai buklet lalonai idia noho. Tanobada hegegemadai sivarai namona harorolaia gaukarana lalonai idia vara gaudia oi diba totona inai lagani ena January 1 Gima Kohorona oi itaia. Insight on the Scriptures be Baibel ensaiklopidia bona atlas. Unai buka be namo herea, bema oi ura Baibel lalonai idia herevalaia taunimanima, gabu, gau, gado, eiava sivarai haida dekenai diba oi abia.

“Watch Tower Publications Index.” Inai Index, gado 20 mai kahana ai idia halasia, ese iseda buka momo dekenai oi ia hakaua. Ia be mai ena kahana rua, hereva edia indeks bona Baibel siri edia indeks. Hereva ta dekenai oi ura ma diba haida oi davaria neganai, hereva edia indeks amo unai hereva oi tahua. Oi ura siri ta dekenai emu lalo-parara oi habadaia neganai, siri edia indeks amo unai siri oi tahua. Bema unai Index ia hahedinaraia laganidia lalonai oi tahua hereva eiava siri idia herevalaia gaudia be emu gado ai idia halasia, unai gaudia idia torea. Index ena matamana kahanai ia noho lista amo buka ta ta edia leta oi itaia. (Hegeregere, unai heduru amo do oi diba w99 3/1 15 ena anina be March 1, 1999, Gima Kohorona ena rau 15.) Sinado badadia, hegeregere “Field Ministry Experiences” bona “Life Stories of Jehovah’s Witnesses” henunai idia noho herevadia ese oi do idia durua kongregesen hagoadaia herevana do oi henia. Hiri Motu gado ai Baibel Siri Edia Indeks ia noho danu.

Tahua karana ese emu lalona do ia veria badabada diba dainai, oi naria namonamo, ma gau idauna ta oi tahua garina. Namona be do oi gaukaralaia gauna oi tahua noho. Bema Index ese buka o magasin ta ia gwauraia, ia hahedinaraia rau(dia) oi kehoa, bena hereva kwarana maragidia bona paragraf  edia sentens ginigunadia oi itaia oi tahua herevana oi davaria totona. Bema Baibel siri ta ena anina oi tahua, idia gwauraia rau oi kehoa bona unai siri oi tahua guna. Bena ia vairanai bona murinai idia torea herevadia oi duahia.

“Watchtower Library” CD-ROM ai. Bema kompiuta oi gaukaralaia diba, reana kompiuta disket ai ia noho Watchtower Library ese oi do ia durua, badina iseda buka momo herea be ia lalonai idia noho. Auka lasi tahua program amo hereva ta, hereva haida, eiava siri ta be Watchtower Library lalonai idia noho buka iboudiai amo oi tahua diba. Ena be emu gado ai ia noho lasi, to reana oi diba gado badana ta ai ia amo heduru oi abia diba.

Paulo ese Timoteo dekenai ia torea revareva helagana iharuana lalonai, unai tau matamata ia noia, ‘buka bona boromakau kopina dekena amo idia karaia buka haida’ be Roma dekenai ia totona do ia mailaia. (2 Tim. 4:13) Paulo ese toretore haida ia laloa bada bona ia dogoatao. Oi ese unai oi karaia diba danu. Oi ese Gima Kohorona, Awake!, bona Iseda Basileia Gaukara pepadia be kongregesen heboudia lalonai ita gaukaralaia murinai oi dogoatao, a? Bema oi dogoatao, emu tahua karana lalonai oi abia Keristani bukadia ma haida ida oi gaukaralaia diba. Kongregesen momo ese Kingdom Hall ena laiberi dekenai tiokratik bukadia idia dogoatao. Unai be kongregesen ibounai durua totona, Kingdom Hall dekenai idia noho neganai idia gaukaralaia diba.

Hereva oi henia bona oi hadibaia lalonai oi gaukaralaia diba gaudia oi reaia lasi. Bema oi ese haroro lalonai oi gaukaralaia diba niusi ta, namba haida, eiava sivarai ta be niuspepa eiava magasin ta dekenai oi davaria, do oi utua oho eiava pepa dekenai oi torea. Halasia dinana, niuspepa eiava magasin ena ladana, bona reana torea tauna eiava halasia tauna ena ladana oi torea danu. Kongregesen heboudia dekenai, ma haida dekenai hereva momokani oi gwauraia hedinarai lalonai oi idia durua diba hereva bona haheitalai oi torea. Nega ta oi ese haheitalai namona oi laloa to dala ia kehoa lasi maoromaoro oi gaukaralaia totona, a? Unai oi torea, bona emu faila dekenai do oi atoa. Tiokratik Haroro Sikuli dekenai lagani haida ai oi noho neganai, hereva momo oi hegaegaelaia vadaeni. Unai hereva totona oi torea gaudia oi negea lasi, to oi dogoatao be namo. Oi karaia tahua karana ese reana gabeai oi do ia durua.

Taunimanima amo gau momo oi dibaia diba. Ia hedinarai Luka ese ena Evanelia Bukana ia torea neganai, idia vara gaudia idia itaia taudia ia henanadai henia karana amo hereva momo ia abia. (Luka 1:​1-4) Reana emu Keristani tadikaka ia hegeregere oi tahua gwauraia gauna dekenai oiemu diba do ia habadaia. Efeso 4:​8, 11-16 hegeregerena, Keriso ese tatau haida “harihari  gaudia” bamona ia gaukaralaia, ita idia durua “iseda diba [“maoromaoro,” NW ] Dirava ena natuna dekenai” ita habadaia totona. Dirava ena hesiai gaukara idia manadalaia taudia oi henanadai henia neganai, lalohadai namodia oi kamonai diba. Danu, taunimanima ida oi herevahereva neganai idia laloa gaudia oi diba, bona unai heduru amo taunimanima ia durua herevana ta do oi henia.

Uiti ena anina idia utua murinai, uhe bona ena kopina idia hapararaia be namo. Oiemu tahua karana amo oi davaria gaudia be unai bamona danu. Oi do gaukaralaia lasi neganai, mai anina bada gaudia be anina bada lasi gaudia amo oi hapararaia be namo.

Bema oi abia dibana be hereva ta lalonai oi gaukaralaia gwauraia, namona be oi sibona oi nanadaia: ‘Lau gaukaralaia gwauraia gauna ese egu hereva do ia hanamoa momokani, a? Eiava, ena be ia be lalohadai namona, to do lau herevalaia gauna badana amo helai taudia edia lalona ia veria, a?’ Bema oi laloa hari idia vara gaudia eiava hanaihanai idia idau idia lao saiens eiava medikol gaudia do oi gaukaralaia, namona be oi hamomokania hari danu unai gaudia idia momokani. Danu, namona be oi lalo-parara, guna iseda buka lalodiai idia halasia gaudia be reana idia hamatamataia, unai dainai vanegai idia halasia herevana oi tahua be namo.

Bema tanobada oreadia ese idia halasia gaudia amo hereva haida oi abia gwauraia, namona be oi naria namonamo. Oi laloaboio lasi Dirava ena Hereva be hereva momokani. (Ioa. 17:17) Dirava ena ura hagugurua karana lalonai Iesu ena gaukara be bada. Unai dainai, Kolose 2:3 ia gwau: “Keriso be ki bamona, ia ese Dirava ena aonega ibounai bona diba ibounai, hunia gaudia, ia kehoa noho.” Tahua karana amo oi davaria gaudia be unai ida oi hahegeregerea. Tanobada oreadia idia halasia gaudia amo oi davaria gaudia dainai, oi sibona oi nanadaia: ‘Inai hereva ena anina idia habadaia kava, ia be lalohadai herevana, eiava idia laloa dobu lasi, a? Idia ese sibona edia namo eiava moni idia tahua dainai idia torea, a? Unai hereva dekenai diba taudia ma haida idia lalo-tamona, a? Bona gau badana Baibel ena hereva momokani ida ia hegeregere, a?’

Aonega Herevadia 2:​1-5 ese ita ia hagoadaia, diba, lalo-parara, bona laloa kehoa be ‘siliva bona idia hunia kohu’ bamona do ita tahua. Anina be ita hekwarahi bona davana namona ita abia. Tahua karana be mai ena hekwarahi, to oi karaia amo Dirava ena lalohadai gau idauidau dekenai oi davaria, lalohadai kereredia oi hamaoromaoroa diba, bona hereva momokani do oi dogoatao goada. Danu, unai ese emu hereva do ia hanamoa, do oi henia neganai oi moale bona helai taudia ese idia kamonai neganai do idia moale.