URA bada ese emu hereva ia hamauria bamona. Kamonai taudia be emu hereva amo diba idia abia be gau badana, to ia mauri noho bona mai ura bada ida oi henia herevana ese edia lalona ia veria. Herevana emu mauri dalana bona kara be edena bamona, to emu ura oi habadaia diba.

Hemami Hahedinaraia Dalanai Oi Hereva. Iesu be Samaria hahinena ia hereva henia neganai, ia gwau Iehova idia tomadiho henia taudia ese “lauma bona momokani dekena amo” unai idia karaia be namo. (Ioa. 4:24) Iehova idia laloa bada dainai bona Dirava ena Hereva dekenai ia noho hereva momokani hegeregerena ia idia tomadiho henia be gau badana. Tau ta ena laloa bada karana be unai bamona ia bada neganai, ena hereva dalana dekenai ia hedinarai. Mai ena ura bada ida ma haida dekenai Iehova ena lalokau karadia ia herevalaia. Iena vairana ena toana, ena imana ia gaukaralaia dalana, bona ena gado regena ese ena hemami idia hahedinaraia.

Vadaeni, dahaka dainai Iehova ia lalokau henia bona ia herevalaia gauna ia abia dae momokani tauna ese hereva ia henia neganai, reana ura bada ia hahedinaraia lasi? Do ia herevalaia gauna ia hegaegaelaia sibona be hegeregere lasi. Namona be ia herevalaia gauna ese ia dekenai hemami ia havaraia. Mani ita laloa, ia be Iesu Keriso ena mauri davalaia boubouna do ia herevalaia. Namona be hereva henia tauna ese ena hereva ia henia neganai, ena lalona be diba sibona amo lasi to Iesu ena boubou gauna ena anina ia bona kamonai taudia dekenai ia laloa bada karana amo ia honu. Namona be Iehova Dirava bona Keriso Iesu ese unai gau namona idia karaia dainai ia mamia moalena ia laloa be namo. Namona be unai gauna ese taunimanima dekenai ia kehoa mauri namona ia laloa​—gorere lasi maurina tanobada paradaisona dekenai ela bona hanaihanai! Unai gaudia ese iena kudouna idia hamarerea be namo.

Baibel ese toretore tauna Esera, Israela dekenai ia noho hadibaia tauna, ia herevalaia neganai, ia gwau “Esera ese sibona ena kudouna ia hegaegaelaia Iehova ena taravatu amo sisiba do ia tahua bona do ia badinaia bona Israela dekenai . . . do ia hadibaia.” (Esr. 7:​10, NW) Bema unai  bamona ita karaia​—hereva sibona lasi to eda kudouna danu ita hegaegaelaia​—mai eda kudouna ibounai ida do ita hereva. Bona hereva momokani be mai eda kudouna ibounai ida ita hahedinaraia neganai, ita hereva henia taudia ia durua, hereva momokani do idia ura henia totona.

Kamonai Taudia Oi Laloa. Ura bada hahedinaraia lalonai mai anina bada gauna ma ta be, oi abia dae momokani kamonai taudia ese oi herevalaia gauna idia kamonai be namo. Unai ena anina be emu hereva oi hegaegaelaia neganai, diba namona oi haboua sibona lasi to Iehova oi guriguri henia, oi do ia durua bona do oi hereva henia taudia ia durua dalanai unai oi herevalaia totona. (Sal. 32:8; Mat. 7:​7, 8) Kamonai taudia ese unai diba idia kamonai be namo ena badina, edena dala ai idia do ia durua, bona ena anina do idia laloa bada totona edena bamona do oi hereva be namo oi laloa.

Do oi herevalaia gauna oi stadilaia ela bona emu ura ia habadaia gauna ta oi davaria. Reana ia be gau matamatana ta lasi, to reana dala matamatana ai oi herevalaia diba. Bema oi hegaegaelaia gauna ese kamonai taudia ia durua, edia hetura karana Iehova ida idia hanamoa totona, ia henia gaudia idia laloa bada totona, inai tanobada dikana lalonai hekwakwanai idia haheaukalaia totona, eiava edia haroro gaukara dekenai anina idia havaraia totona, emu hereva oi henia neganai ura bada oi hahedinaraia be mai badina badana.

Bema taunimanima vairanai do oi duahiduahi be edena bamona? Mai emu ura bada ida unai oi karaia diba totona, hereva eiava hereva haida oi gwauraia maoro sibona be hegeregere lasi. Do oi duahia gauna oi stadilaia. Bema Baibel ena kahana ta do oi duahia, hereva ma haida oi tahua. Namona be ena anina badana oi lalo-pararalaia. Oi bona kamonai taudia ia durua daladia oi laloa, bona oi duahia neganai kamonai taudia dekenai unai oi hahedinaraia toho.

Haroro gaukara totona oi hegaegae, a? Do oi herevalaia gauna bona oi gaukaralaia siridia oi itaia lou. Taunimanima idia laloa bada gaudia oi laloa danu. Niusi dekenai dahaka idia hahedinaraia? Edena bamona hekwakwanai idia davaria? Bema taunimanima dekenai oi hahedinaraia diba idia laloa momo gaudia hanaia daladia be Dirava ena Hereva ese ia herevalaia, mai moale ida unai do oi karaia, bona emu ura bada do ia hedinarai goevagoeva.

Emu Hereva Hamauria Karana amo Emu Ura Bada Oi Hahedinaraia. Bema emu hereva ia mauri, emu ura bada ia hedinarai goevagoeva. Unai be emu vairana ena toana ai ia hedinarai be namo. Namona be emu hereva  amo idia diba unai gauna oi abia dae momokani, to ta oi doria toho lasi.

Oi laloa maoromaoro be namo. Haida be gau iboudiai dekenai idia hoa bamona. Reana heduru idia abia be namo, bena do idia itaia ta be mai ena siahu eiava hemami bada herea ida ia hereva neganai, kamonai taudia ese ia idia laloa to ia herevalaia gauna idia laloa lasi. Danu, hemarai taudia ita durua be namo, ura bada hahedinaraia karana idia hanamoa totona.

Ta ena ura bada ese ma ta ena ura ia habadaia. Bema kamonai taudia oi raraia namonamo bona emu hereva dekenai emu ura bada ia hedinarai, kamonai taudia edia ura do ia bada danu. Apolo ia hereva neganai ena ura bada ia hedinarai, bona ia idia gwauraia mai aonega ida ia hereva tauna. Bema Dirava ena lauma ese oi ia hasiahua, emu ura bada ia hahedinaraia herevana ese kamonai taudia ia veria kara ta idia karaia totona.​—Kara 18:​24, 25; Roma 12:11.

Oi Herevalaia Gauna Hegeregerena Ura Bada Oi Hahedinaraia. Oi naria namonamo, emu hereva ibounai lalonai ura bada oi hahedinaraia badabada dainai kamonai taudia idia hesiku garina. Oi herevalaia gauna idia badinaia totona oi henia hagoadaia herevadia be do idia kamonai lasi. Unai ese ia hahedinaraia, emu hereva oi hegaegaelaia neganai, dala idauidau ai oi herevalaia diba gaudia oi abia hidi. Oi naria namonamo emu hereva oi laloa bada lasi karana oi hahedinaraia garina. Bema oi herevalaia gauna oi abia hidi namonamo, do oi laloa bada. To hereva haida oi gwauraia neganai mai ura bada herea ida oi gwauraia, ma hereva haida be unai bamona oi gwauraia lasi, bona namona be emu hereva lalonai unai gaudia oi hahedinaraia namonamo.

Namona be hereva badadia oi hahedinaraia mai ura bada ida. Namona be emu hereva lalonai hereva badadia do idia hedinarai, idia latanai emu hereva oi haginia totona. Idia be emu hereva ena anina bada kahadia dainai, nega momo idia amo kamonai taudia do oi hagoadaia. Kamonai taudia ese oi herevalaia gauna idia abia dae neganai, edia lalona do oi veria be namo, anina be oi herevalaia gauna idia badinaia karana ena namo oi hahedinaraia. Ura bada oi hahedinaraia karana ese oi do ia durua, kamonai taudia edia kudouna oi hamarerea totona. Hereva oi henia lalonai ura bada oi hahedinaraia kava lasi. Namona be ia be mai badina, bona oi herevalaia gauna ese unai badina do ia henia.