APENDIKS
Iesu Keriso be Idia Gwauhamatalaia Mesiana
MESIA ita diba totona, Iehova Dirava be ena lauma amo peroveta taudia momo ia hasiahua, ita do ia Hamauria Tauna ena vara, haroro gaukara bona ena mase idia herevalaia totona. Baibel ena peroveta hereva ibounai be Iesu Keriso dekenai idia guguru. Unai peroveta herevadia ese idia gwauraia gaudia ibounai be idia vara momokani. Unai haheitalaia totona, Mesia ena vara bona ena maragi negana idia perovetalaia hereva haida mani ita laloa.
Peroveta tauna Isaia ia gwau Mesia be King Davida ena bese amo do ia vara. (Isaia 9:7) Momokani, Iesu be Davida ena bese amo ia vara.—Mataio 1:1, 6-17.
Peroveta tauna Mika ia gwau, inai mero be lohia tauna ai do ia lao bona ia be “Betelehema Eparata” dekenai do ia vara. (Mika 5:2) Iesu ia vara neganai, Israela lalonai hanua rua edia ladana be Betelehema. Idia ta be Nasareta ena not kahanai bona ma ta be Iuda ena hanua badana, Ierusalema kahirakahira ia noho. Ierusalema kahirakahira ia noho Betelehema be guna idia gwauraia Eparata. Peroveta herevana ese ia gwauraia hegeregerena, Iesu be unai hanua dekenai ia vara!—Mataio 2:1.
Baibel ena peroveta herevana ma ta hegeregerena, Dirava ena Natuna be “Aigupito dekena amo” do idia boiria. Iesu ia maragi neganai, ia be Aigupito dekenai idia laohaia. Heroda ia mase murinai, Aigupito idia rakatania bona edia hanua korikorina dekenai idia giroa lou, unai dala amo unai peroveta herevana ia guguru.—Hosea 11:1; Mataio 2:15.
Rau 200 dekenai ia noho lista ai, inai hereva kwarana “Peroveta Herevana” henunai idia noho siridia ese Mesia idia herevalaia. Mani unai siri be inai hereva kwarana “Guguru Negana” henunai idia noho siri ida oi hahegeregerea. Unai bamona oi karaia neganai, do oi abia dae momokani Dirava ena Hereva be momokani.
Unai siri oi duahia neganai, namona be oi laloatao lagani handred momo gunanai, Iesu ia do vara lasi neganai, unai peroveta herevadia idia torea. Iesu ia gwau: “Mose bona peroveta taudia edia Buka dekenai, bona Salamo Buka dekenai, lauegu sivarai idia torea herevadia ibounai, be do idia momokani.” (Luka 24:44) Sibona emu Baibel dekenai oi itaia bamona, unai peroveta herevadia ibounai be idia guguru.
