BAIBEL ese ita dekenai Iesu ena vara dinana ia gwauraia lasi. To, Baibel ena siri haida dainai ita gwau diba Iesu be December ai ia vara lasi.

Iesu ia vara gabuna, Betelehema, mani ita laloa. Iuda taudia edia hua ladana Chislev (November/December) be keru bona medu negana. Unai murina huana be Tebeth (December/January). Unai hua ai gabu be ia keru momokani, bona nega haida sinou ese ororo gabudia ia koua. Baibel ese unai gabu ia gwauraia dalana mani ita itaia.

Baibel torea tauna Esera ese ia hahedinaraia Chislev be keru bona medu negana. Ia gwau “hua namba 9 [Chislev] ena dina namba 20 dekenai” hutuma be Ierusalema dekenai idia haboua,  bona ia gwau, “medu bada ia diho noho, bona keru dainai, . . . idia hebou taudia idia heudeheude.” Idia haboua taudia ese unai nega be inai bamona idia gwauraia: “Medu bada ia diho noho. Ai be murimuri dekenai do ai gini diba lasi.” (Esera 10:​9, 13; Ieremia 36:22) Unai dainai December hua ai, unai gabu dekenai idia noho mamoe naria taudia ese hanuaboi ai edia mamoe be murimuri dekenai idia naria lasi!

To, Baibel ia gwau, Iesu ia vara hanuaboina ai, mamoe naria taudia be murimuri dekenai edia mamoe idia naria noho. Luka ese ia hahedinaraia, unai nega ai, mamoe naria taudia be Betelehema kahirakahira “uda [“murimuri,” NW] dekenai idia noho, hanuaboi neganai edia mamoe orea idia naria noho.” (Luka 2:​8-12) Baibel ia gwau, mamoe naria taudia be murimuri dekenai idia noho, unai dainai dina ai sibona idia loaloa lasi. Hanuaboi ai, edia mamoe be murimuri dekenai idia naria. Betelehema dekenai December hua be keru bona medu negana dainai, oi laloa mamoe naria taudia be edia mamoe ida murimuri dekenai do idia noho, a? Lasi. Iesu ia vara negana ai idia vara gaudia ese ia hamomokania, Iesu be December ai ia vara lasi. *

Baibel ese Iesu ia mase negana ia gwauraia, to ia vara negana dekenai hereva momo ia gwauraia lasi. Unai dainai King Solomona ena hereva ita laloatao, ia gwau: “Tau ta ena ladana namona ese davana bada muramura mai bonana namo ia hereaia noho. Bona tau ena mase dinana ese iena vara dinana ia hereaia noho.” (Hadibaia Tauna 7:1) Unai dainai ita hoa lasi badina Baibel ese Iesu ena haroro gaukara bona ena mase ia herevalaia momo, to ena vara dinana ia herevalaia momo lasi.