BAIBEL idia torea gado ginigunana dekenai, inai Heberu herevana sheʼohlʹ bona inai Greek hereva haiʹdes be nega 70 mai kahana idia gaukaralaia. Unai hereva ruaosi ese mase idia herevalaia. Baibel haida ese unai hereva ruaosi idia hahanaia “guria gabuna,” “hel” eiava “guri.” Nega momo Buka Helaga ese unai hereva rua idia hahanaia “mase taudia edia gabu,” “guria gabuna,” “hel,” eiava “mase gabuna.” To, gado momo dekenai unai Heberu bona Greek herevadia, edia anina korikori ia hahedinaraia herevana ta ia noho lasi. Unai dainai, New World Translation Baibel ese inai hereva “Sheol” bona “Hades” ia gaukaralaia. Unai hereva rua edia anina be dahaka? Baibel ena siri haida ese unai hereva rua idia gaukaralaia dalana mani ita itaia.

Hadibaia Tauna 9:10 ia gwau: “Mase taudia edia gabu, [eiava Sheol] oi lao gabuna, dekenai be kara ta lasi, laloa ta lasi, diba bona aonega ta lasi.” Unai ena anina be Sheol ese iseda lalokau taudia ita guria gabuna ta ia herevalaia, a? Lasi. Baibel ese mase taudia guria gabuna korikorina ia herevalaia neganai, Heberu bona Greek gado hereva ma haida ia gaukaralaia, to sheʼohlʹ bona haiʹdes ia gaukaralaia lasi. Danu, Baibel ese mase tauanina momo be gabu tamona dekenai guria karana, hegeregere famili ta ena guria gabuna ia herevalaia neganai, “Sheol” ia gaukaralaia lasi.​—Genese 49:​30, 31.

Vadaeni, “Sheol” be edena bamona gabu ia herevalaia? Baibel ese ia hahedinaraia “Sheol” eiava “Hades” be mase tauanina be gabu tamona dekenai idia guria gabuna ia herevalaia sibona lasi. Hegeregere, Isaia 5:14 ia gwau mase gabuna eiava Sheol “ese iena uduna ia kehoa bada noho.” Laulau dalanai, ena be Sheol ese mase taudia momo ia hadonoa vadaeni, to ia boga kunu lasi, ia ura ma haida ia hadonoa. (Aonega Herevadia 30:​15, 16) Mase taudia guria gabu korikorina ai idia guria taudia edia namba be maragi, to “mase taudia edia gabu [eiava Sheol] be ia honu haorea diba lasi.” (Aonega Herevadia 27:20) Anina be ia be mai ena hetoana lasi. Unai dainai, Sheol eiava Hades be gabu korikorina ta lasi. To mase taudia ibounai idia mahuta noho gabuna ia laulaulaia.

Baibel ese toreisi lou ia herevalaia dainai “Sheol” bona “Hades” edia anina dekenai diba ma haida ita abia. Baibel ese ia  hahedinaraia Sheol bona Hades dekenai idia noho taudia be do idia toreisi lou. * (Iobu 14:13; Kara 2:31; Apokalupo 20:13) Danu, Sheol eiava Hades dekenai Iehova idia hesiai henia taudia sibona lasi, to Ia idia hesiai henia lasi taudia momo danu idia noho. (Genese 37:35; Salamo 55:15) Unai dainai, Baibel ia gwau “mase taudia dohore idia toreisi lou, kara maoromaoro taudia, bona kara maoromaoro lasi taudia danu.”​—Kara 24:15.