1. Edena guriguri do ita herevalaia?

TANOBADA hegegemadai, taunimanima milioni momo be guriguri ta idia diba, momo ese idia gwauraia Lohiabada ena Guriguri. Unai be Iesu Keriso ese ia gwauraia gurigurina ia herevalaia. Unai guriguri be mai anina bada bona ena noinoi ginigunadia toi laloa karana ese oi do ia durua Baibel ena hadibaia hereva ma haida oi dibaia totona.

2. Iesu ese ena hahediba taudia ia hamaoroa edena gaudia toi totona do idia guriguri?

² Unai guriguri ena hamatamaia kahanai, Iesu ese ia idia kamonai henia taudia ia hamaoroa: “Unai dainai, inai bamona do umui guriguri: ‘Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.’” (Mataio 6:​9-13) Unai noinoi herevadia toi edia anina be dahaka?

3. Dirava ena Basileia dekenai dahaka ita diba be namo?

³ Dirava ena ladana, Iehova, dekenai gau momo ita dibaia vadaeni. Bona Dirava ena ura, taunimanima totona ia karaia vadaeni gaudia bona do ia karaia gaudia ita herevalaia. To, Iesu ia gwau “Oiemu Basileia do ia mai” totona ita guriguri neganai, ia be dahaka ia herevalaia? Dirava ena Basileia be dahaka? Edena dala ai Dirava ena ladana do ia hahelagaia? Bona edena  dala ai Basileia do ia mai karana ese Dirava ena ura do ia hagugurua?

4. Dirava ena Basileia be dahaka, bona ena King be daika?

⁴ Dirava ena Basileia be Iehova Dirava ese ia hegaegaelaia gavamanina, mai ena King, Dirava ese ia abia hidi tauna. Dirava ena Basileia ena King be daika? Iesu Keriso. Iesu ese tanobada lohia taudia ibounai ia hereaia bona Baibel ia gwau “ia be lohia ibounai edia Lohia, bona king ibounai edia King.” (Apokalupo 17:14) Ia be mai ena siahu gau namodia momo ia karaia totona, unai kara dekenai ia ese tanobada ena lohia taudia ibounai ia hereaia.

5. Dirava ena Basileia be edeseni amo do ia lohia, bona dahaka do ia lohiaia?

⁵ Dirava ena Basileia be edeseni amo do ia lohia? Iesu be edeseni ia noho? Oi diba vadaeni bamona, ia be au ta dekenai idia hamasea bena ia toreisi lou. Daudau lasi murinai, guba dekenai ia daekau. (Kara 2:33) Oibe, Dirava ena Basileia be guba dekenai ia noho. Unai dainai, Baibel ese ia gwauraia ‘guba Basileia.’ (2 Timoteo 4:18) Ena be Dirava ena Basileia be guba dekenai, to tanobada do ia lohiaia.​—Apokalupo 11:15.

6, 7. Dahaka dainai Iesu be King namo hereana?

⁶ Dahaka dainai Iesu be King namo hereana? Badina ta be ia be do ia mase lasi. Iesu be tanobada ena king taudia ida ita hahegeregerea neganai, Baibel ia gwau “ia sibona ia mase diba lasi, ia sibona diaridiari bada dekenai ia noho.” (1 Timoteo 6:16) Unai ena anina be Iesu ia karaia gaukara namodia ibounai be do idia noho hanaihanai. Bona taunimanima durua totona mai anina bada gaukara namodia do ia karaia.

⁷ Baibel ese Iesu ia perovetalaia herevana mani ita laloa, ia gwau: “Lohiabada ena Lauma ese, ia dekenai do ia kamokau. Bona inai bamona do ia hanamoa: Aonega bona laloa kehoa ena Lauma do ia henia. Sisiba namona henia dalana, bona siahu ena Lauma do ia henia, Diba maorona, bona Lohiabada gari henia kara, ena Lauma be do ia henia. Mai moale  bada danu, ia ese Lohiabada ena ura do ia karaia. Iena kota biaguna kara, be do ia maoromaoro momokani, taunimanima edia toana dekenai lasi, bona ia kamonai hereva sibona lasi. To ogogami taudia be mai maoromaoro danu, do ia kota henidia. Bona manoka taudia idia hisihisi henia taudia, be ia ese do ia panisidia.” (Isaia 11:​2-4) Unai hereva ese idia hahedinaraia Iesu be mai kara maoromaoro bona hebogahisi ida tanobada taudia do ia lohiaia. Oi ura unai bamona King ese oi ia lohiaia, a?

8. Daidia be Iesu ida do idia lohia?

⁸ Dirava ena Basileia lalonai: Iesu sibona do ia lohia lasi. Ma haida be ia danu do idia lohia. Hegeregere, aposetolo Paulo ese Timoteo ia hamaoroa: “Bema ita haheauka, bona ita gini goada noho, ita be ia danu do ita lohia.” (2 Timoteo 2:12) Oibe, Paulo, Timoteo bona Dirava ese ia abia hidi abidadama taudia ma haida be Iesu ida guba Basileiana lalonai do idia lohia. Taunimanima hida ese unai hahenamo do idia abia?

9. Taunimanima hida be Iesu ida do idia lohia, bona Dirava ese edena nega amo idia ia gogoa matamaia?

⁹ Inai buka ena Karoa 7 dekenai ita itaia bamona, aposetolo Ioane be matahanai amo ia itaia “Mamoe ena Natuna [Iesu Keriso] be Siona Ororo [ena king dagina guba] dekenai ia gini. Ia danu be taunimanima 144,000 idia gini, iena ladana, bona iena Tamana ena ladana be edia baguna dekenai Dirava ese ia torea.” Unai 144,000 taudia be daidia? Ioane ia gwau: “Idia ese Mamoe ena Natuna murinai idia raka, iena loaloa gabudia ibounai. Taunimanima ibounai edia huanai dekena amo Dirava ese idia ia hoia vadaeni. Bona idia be taunimanima ginigunadia Dirava bona Mamoe ena Natuna ese idia abia, edia.” (Apokalupo 14:​1, 4) Oibe, idia be Iesu Keriso murinai idia raka abidadama taudia, Dirava ese ia abia hidi guba dekenai Iesu danu idia lohia totona. Mase amo idia toreisi lou bona guba dekenai idia daekau murinai, Iesu ida “tanobada do idia gunalaia.” (Apokalupo 5:10) Aposetolo edia nega amo, Dirava ese kamonai Keristani taudia ia gogoa matamaia, inai namba 144,000 abia totona.

10. Dirava ese dala ia hegaegaelaia Iesu bona 144,000 taudia ese taunimanima idia lohiaia totona, dahaka dainai unai be lalokau karana?

 ¹⁰ Dirava ese dala ia hegaegaelaia Iesu bona 144,000 taudia ese taunimanima idia lohiaia totona be lalokau karana. Gau ma ta, Iesu be taunimanima edia kara bona idia mamia hisihisina ia diba. Paulo ia gwau Iesu ese “ita ia bogahisihisi henia diba. Badina be ia danu ese dibagani ena mamina ia abia, ita ese ena mamina ita abia hegeregerena. To Iesu ese kara dika ta ia karaia lasi.” (Heberu 4:15; 5:8) Ia ida idia lohia taudia danu be tanobada dekenai hisihisi idia abia bona idia haheauka. Bona danu, idia be kara dika taudia dainai idia hekwarahi bada bona gorere idauidau idia haheaukalaia. Momokani, taunimanima idia davaria hekwakwanai do idia lalopararalaia!

11. Dahaka dainai Iesu ia gwau, ena hahediba taudia ese Dirava ena ura gauna be guba dekenai do idia karaia totona idia guriguri be namo?

¹¹ Iesu ia gwau ena hahediba taudia be Dirava ena Basileia do ia mai totona do idia guriguri sibona lasi, to Dirava ena ura ‘tanobada dekenai do idia karaia, guba dekenai idia karaia bamona’ do idia gurigurilaia danu. Dirava be guba dekenai ia noho, bona unuseniai ia idia badinaia aneru ese hanaihanai ena ura idia karaia. To, inai buka ena Karoa 3 ai ita itaia bamona, aneru dikana ta ese Dirava ena ura ia karaia lasi bona Adamu bona Heva ia veria idia kara dika totona. Karoa 10 ai, Baibel ena hadibaia hereva unai aneru dikana, Satani Diabolo dekenai do ita dibaia. Satani bona ia murinai idia raka aneru​—demoni​—be nega sisina lalonai guba dekenai do idia noho. Unai neganai, guba dekenai idia noho aneru haida ese Dirava ena ura idia karaia lasi. Dirava ena Basileia ia lohia matamaia neganai, unai ia idau. Dirava ena King matamatana, Iesu Keriso, ese Satani ia tuari henia.​—Apokalupo 12:​7-9.

12. Apokalupo 12:10 ese edena mai anina bada gaudia rua ia herevalaia?

¹² Inai peroveta herevana ese do ia vara gauna ia gwauraia: “Lau kamonai, gado badana guba dekenai ia boiboi, ia gwau, ‘Harihari iseda Dirava ena hamauria ia ginidae vadaeni.  Harihari iena Keriso ese iena siahu ia hedinaraia vadaeni. Badina be unai samania tauna ese Dirava ena vairanai, dina bona hanuaboi, guna ia gini, iseda varavara ia samania, be hari aneru ese idia negea vadaeni. Guba dekena amo ia idia negea diho vadaeni.’ ” (Apokalupo 12:10) Unai Baibel siri ese ia gwauraia mai anina bada gaudia rua oi itaia, a? Gau ginigunana be, Iesu Keriso ese Dirava ena Basileia ia lohiaia matamaia. Gau iharuana be, Satani be guba amo tanobada dekenai idia negea diho.

13. Satani be guba amo idia negea diho dainai dahaka ia vara?

¹³ Unai vara gaudia rua dainai dahaka ia vara? Baibel ese guba dekenai ia vara gauna ia gwauraia: “Guba e, bona guba lalonai noho taudia e! Unai kara dainai do umui moale bada!” (Apokalupo 12:12) Oibe, guba dekenai idia noho kamonai aneru idia moale, badina Satani bona ena demoni be idia noho lasi, bona aneru ibounai ese Iehova Dirava idia kamonai henia. Unuseniai maino bona lalotamona korikorina ia noho. Dirava ena ura be guba dekenai idia karaia vadaeni.

14. Satani be tanobada dekenai idia negea diho dainai, dahaka ia vara?

¹⁴ To, tanobada be edena bamona? Baibel ia gwau: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” (Apokalupo 12:12) Satani ia badu badina guba amo idia negea diho bona ena nega be ia kwadogi sibona. Ia badu dainai tanobada dekenai hekwakwanai, eiava “nega dika bada” ia havaraia. Karoa gabena ai, unai “nega dika bada” dekenai diba ma haida do ita abia. To unai ita laloa noho lalonai, ita henanadai diba. Edena dala ai Basileia ese tanobada dekenai Dirava ena ura do ia karaia?

15. Dirava ena ura tanobada totona be dahaka?

¹⁵ Dirava ena ura tanobada totona mani oi laloa lou. Karoa 3 dekenai unai oi dibaia. Eden ai, Dirava ese ia hahedinaraia ia ura tanobada be paradaiso ai do ia halaoa bona kara maoromaoro taudia ese do idia hahonua bona noholaia ela bona hanaihanai. Satani ese Adamu bona Heva edia lalona ia veria dainai idia kara dika, unai dainai Dirava ena ura tanobada totona  be unai nega ai ia vara lasi, to unai ese Dirava ena ura ia haidaua lasi. Iehova ia ura “kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29) Bona Dirava ena Basileia ese unai do ia hagugurua. Edena dala ai?

16, 17. Daniela 2:44 ese edena dala ai Dirava ena Basileia ia herevalaia?

¹⁶ Daniela 2:44 dekenai ia noho peroveta herevana mani ita laloa. Ia gwau: “Unai basileia namba 4 ena nega lalonai, guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.” Unai amo dahaka ita dibaia Dirava ena Basileia dekenai?

¹⁷ Gau ginigunana be, ita ia hadibaia Dirava ena Basileia be “unai basileia namba 4,” eiava basileia ma haida idia lohia negana lalonai do ia haginia. Gau iharuana be, ita ia hadibaia Basileia be do ia noho ela bona hanaihanai. Gavamani ma ta ese do ia halusia lasi bona ena gabu do ia abia lasi. Gau ihatoina be, Dirava ena Basileia bona inai tanobada ena basileia be do idia tuari. Dirava ena Basileia do ia kwalimu. Dokonai, Dirava ena Basileia sibona ese taunimanima do ia lohiaia. Bena taunimanima be gavamani namo hereana ena lohia siahuna henunai do idia noho.

18. Dirava ena Basileia bona inai tanobada ena gavamani huanai do ia vara tuari ginigabena be dahaka?

¹⁸ Baibel ese Dirava ena Basileia bona inai tanobada ena gavamani huanai do ia vara tuari ginigabena dekenai gau momo ia gwauraia. Hegeregere, ia gwau dokona ia kahirakahira neganai, lauma dikadia ese sivarai koikoidia do idia gwauraia loaloa, “tanobada edia king ibounai” idia koia totona. Dahaka dainai unai bamona idia karaia? “Unai king ibounai be do idia haboua, Siahu Ibounai Diravana ena Dina Badana neganai, be do idia tuari hebou totona.” Tanobada ena king be “inai gabu ena ladana Heberu gado dekenai be Aramagedono” dekenai  do idia haboua. (Apokalupo 16:​14, 16) Unai siri rua ese idia gwauraia bamona, taunimanima edia gavamani bona Dirava ena Basileia huanai do ia vara tuari ginigabena idia gwauraia, Aramagedono.

19, 20. Hari inai negai, dahaka dainai Dirava ena ura be tanobada dekenai ia vara lasi?

¹⁹ Aramagedono amo Dirava ena Basileia ese dahaka do ia hagugurua? Dirava ena ura tanobada totona mani ita laloa lou. Iehova Dirava ia ura tanobada be kara maoromaoro idia karaia goevadae taudia ese idia hahonua bona Paradaiso lalonai ia idia hesiai henia. Dahaka dainai hari inai negai unai bamona ia vara lasi? Badina ita be kara dika taudia, bona ita gorere bona mase. To, Karoa 5 dekenai ita dibaia gauna be, Iesu be ita dainai ia mase, unai amo mauri hanaihanai ita abia diba. Ioane ese ia torea Evanelia sivaraina oi laloatao, ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”​—Ioane 3:16.

²⁰ Hekwakwanai ma ta be, taunimanima momo ese kara dikadia idia karaia. Edia hereva bona kara amo idia koikoi bona matabodaga karadia idia karaia. Idia ura lasi Dirava ena ura idia karaia. Kara dikadia idia karaia taudia be Dirava ena Aramagedono tuarina ai do idia mase. (Salamo 37:10) Bona danu badina ma ta dainai Dirava ena ura be tanobada dekenai ia vara lasi, unai badina be gavamani ese taunimanima idia hagoadaia lasi unai idia karaia totona. Gavamani momo be siahu lasi, idia kara auka, eiava idia kara gageva. Baibel ia gwau: “Taunimanima haida ese ma haida idia biagua noho, bona idia hisihisi henidia noho.”​—Hadibaia Tauna 8:9.

21. Edena dala ai Basileia ese Dirava ena ura tanobada dekenai do ia karaia?

²¹ Aramagedono murinai, gavamani tamona sibona ese taunimanima do ia lohiaia, unai be Dirava ena Basileia. Unai Basileia ese Dirava ena ura do ia karaia bona hahenamo namodia do ia mailaia. Hegeregere, Satani bona ena demoni do ia kokia. (Apokalupo 20:​1-3) Iesu ena mauri davalaia boubouna  do ia gaukaralaia taunimanima ia durua totona, unai amo abidadama taudia be do idia gorere bona mase lou lasi. To, Basileia ena lohia siahuna henunai do idia mauri ela bona hanaihanai. (Apokalupo 22:​1-3) Tanobada be paradaiso ai do ia lao. Basileia ese Dirava ena ura gauna tanobada dekenai do ia karaia bona Dirava ena ladana do ia hahelagaia. Unai ena anina be dahaka? Anina be Dirava ena Basileia ena lohia siahuna henunai mauri taudia ibounai ese Iehova ena ladana do idia hahelagaia.

22. Dahaka dainai ita diba Iesu be tanobada dekenai ia noho eiava ia toreisi lou neganai, Dirava ena Basileia be ia do mai lasi?

²² Iesu ese ena murinai idia raka taudia ia hamaoroa “Basileia do ia mai” totona do idia guriguri neganai, ia hahedinaraia goevagoeva Basileia be unai nega ai ia mai lasi. Iesu be guba dekenai ia daekau neganai ia mai, a? Lasi, badina Petero bona Paulo ruaosi idia gwau, Iesu ia toreisi lou murinai, Salamo 110:1 dekenai ia noho peroveta herevana ia guguru, ia gwau: “Lohiabada [“Iehova,” BHğ] ese egu Lohiabada dekenai ia hamaoroa, ia gwau, ‘Lauegu idiba kahana dekenai do oi helai, ela bona oi dekenai idia tuari henia taudia, be oiemu aena atoa gauna dohore lau halaoa.’ ” (Kara 2:​32-35; Heberu 10:​12, 13) Iesu be do ia naria.

23. (a) Dirava ena Basileia be edena negai ia lohia matamaia? (b) Karoa gabena ese dahaka do ia herevalaia?

²³ Iesu do ia naria ela bona edena negai? Lagani 1880 bamona ai, kudou-maoro Bible Student taudia idia laloparara  unai naria negana be lagani 1914 ai do ia ore. (Unai deit dekenai diba ma haida oi abia totona, rau 215-18 dekenai ia noho Apendiks itaia.) Lagani 1914 ai tanobada hegegemadai idia vara hamatamaia gaudia, ese idia hamomokania kudou-maoro Bible Student taudia ese idia lalopararalaia gauna be maoro. Baibel ena peroveta herevadia idia guguru karana ese idia hahedinaraia, lagani 1914 ai Keriso be King ai ia lao bona Dirava ena guba Basileiana ia lohiaia matamaia. Unai dainai, ita be Satani ena ‘nega kwadogina’ dekenai ita noho. (Apokalupo 12:12; Salamo 110:2) Ita diba momokani kahirakahira Basileia ese Dirava ena ura tanobada dekenai do ia karaia. Oi dekenai unai be sivarai namona, a? Oi abia dae unai hereva be momokani, a? Karoa gabena ese oi do ia durua bena do oi itaia Baibel ese unai gaudia ia hadibalaia.