1, 2. Hari inai negai edeseniai heau mauri gabuna namona ita davaria diba?

MANI oi laloa, kahirakahira medu do ia diho bona oi be dala dekenai oi raka noho. Guba be ia dibura ia lao. Kevaru, guba ia boiboi, bena medu bada ia diho matamaia. Oi heau haraga bona gabu namona ta oi tahua. Bena dala badinai ruma ta oi itaia. Unai ruma ena haba be ia goada, ena lalona ia kaukau bona unuseniai oi noho diba. Unai gabu namona oi davaria dainai oi moale!

² Ita be unai bamona lai gubana negana lalonai ita noho. Tanobada ai idia vara gaudia be idia dika idia lao noho. To heau mauri gabuna ta ia noho, unai gabu ese ita do ia gimaia bena gau dikana ta ese ita do ia hadikaia lasi. Unai heau mauri gabuna be dahaka? Baibel ia gwau: “Unai tau ese Dirava dekenai do ia hereva, do ia gwau, ‘Lohiabada e, oi be egu gima Tauna bona egu naria Tauna, Oi be egu Dirava, oi dekenai lau abidadama noho.’ ”​—Salamo 91:2.

3. Edena dala ai Iehova be iseda heau mauri gabuna ai ita halaoa diba?

³ Mani inai oi laloa! Iehova, Havaraia Tauna  bona guba bona tanobada edia Lohia, be iseda heau mauri gabuna. Ia ese ita idia hadikaia diba gaudia idauidau amo ita do ia gimaia badina ena siahu be bada herea. Herevana dika ita davaria, Iehova ese unai dika ia kokia diba. Edena dala ai Iehova be iseda heau mauri gabuna ai ita halaoa diba? Gau badana be ia ita abidadama henia. Baibel ia gwau: “Dirava ena lalokau lalonai do umui noho.” (Iuda 21) Oibe, namona be Dirava ena lalokau lalonai ita noho, bona iseda guba Tamana ita tura henia noho. Bena do ita diba momokani, ia be iseda heau mauri gabuna. To edena bamona Ia ita tura henia diba?

4, 5. Edena dala haida ai Iehova ese ena lalokau ia hahedinaraia?

⁴ Dirava ena lalokau lalonai ita noho totona, Iehova ese ita dekenai iena lalokau ia hahedinaraia dalana ita lalopararalaia be namo. Inai buka amo Baibel ena hadibaia hereva haida oi dibaia vadaeni. Idia haida oi laloa diba, a? Iehova be iseda Havaraia Tauna dainai, ita dekenai tanobada ia henia ita noholaia totona. Tanobada be aniani, ranu, tano lalonai noho gaudia bona animal amo ia hahonua. Bona tanobada ena gabu momo be gabu hairaidia ai ia halaoa. Dirava be Baibel Torea Tauna bona unai dala amo ena ladana bona kara be ita dekenai ia hahedinaraia. Baibel ese ia hahedinaraia danu ia ese ena lalokau Natuna tamona be tanobada dekenai ia siaia, bona ita dainai hisihisi ia abia bona ia mase. (Ioane 3:16) Ita dekenai unai harihari gauna ena anina be dahaka? Oibe, ita dekenai vaira nega namona ia henia.

⁵ Dirava ese gau ma ta ia karaia, bona unai gauna dainai ita ese vaira nega namona ita moalelaia diba. Iehova ese guba gavamanina ta ia haginia, unai be Mesia Basileiana. Unai Basileia ese hisihisi ibounai do ia haorea bona tanobada be paradaiso ai do ia halaoa. Mani inai oi laloa! Tanobada dekenai mai maino bona moale ida do ita noho ela bona hanaihanai. (Salamo 37:29) To hari, Dirava ese ita dekenai hakaua hereva namodia ia henia, unai amo mauri dala namona do ita noholaia. Ita dekenai ia henia harihari gauna ma ta be guriguri, unai dala  amo ia ida ita herevahereva diba. Unai dala haida amo Iehova ese taunimanima ibounai bona oi totona ena lalokau ia hahedinaraia.

6. Iehova ese oi dekenai ia hahedinaraia lalokauna dainai dahaka oi karaia be namo?

⁶ Sibona dekenai inai henanadai ita henia be namo: Iehova ena lalokau dainai dahaka lau karaia be namo? Momo do idia gwau, “Namona be Iehova lau lalokau henia.” Oi be unai bamona oi laloa, a? Iesu ia henia hahegani badana be inai: “Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.” (Mataio 22:37) Badina momo dainai Iehova Dirava oi lalokau henia be namo. Oi mamia oi ese Iehova oi lalokau henia dainai, oi gwau diba Ia oi lalokau henia mai emu kudouna, lauma bona lalona ibounai ida, a?

7. Dirava oi lalokau henia ena hemami sibona oi abia be hegeregere, a? Gwauraia hedinarai.

⁷ Baibel ese ia hahedinaraia bamona, Dirava lalokau henia karana be hemami ta sibona lasi. Ena be Iehova lalokau henia hemamina ita abia be mai anina bada, to unai be ia ita lalokau henia ena matamana sibona. Apolo ena uhe be mai anina bada, badina unai uhe maragina amo au ia tubu bona huahua ia havaraia diba. To, bema apolo ta oi ura, do oi moale bema ta ese oi dekenai apolo ena uhe ia henia, a? Lasi! Unai hegeregerena, ita mamia Iehova Dirava ita lalokau henia, to unai sibona be hegeregere lasi. Baibel ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” (1 Ioane 5:3) Dirava ia lalokau henia momokani tauna ese huahua namodia ia havaraia be namo. Iseda kara amo unai ita hahedinaraia be gau badana.​—Mataio 7:​16-20.

8, 9. Edena dala ai Dirava dekenai iseda lalokau bona laloa bada karana ita hahedinaraia diba?

⁸ Ita hahedinaraia Dirava ita lalokau henia bema ena taravatu bona hakaua herevadia ita badinaia. Unai bamona ita karaia  be auka lasi. Iehova ena taravatu be metau lasi, to ita ia durua mai moale ida mauri namona ita noholaia totona. (Isaia 48:​17, 18) Bema Iehova ena hakaua herevadia ita badinaia, ita hahedinaraia ita dainai ia karaia gaudia ibounai ita laloa bada. Madi, haida sibona ese unai idia karaia. Ita ura lasi Iesu ena negai idia noho taudia ese idia karaia karana ita tohotohoa. Iesu ese lepera taudia 10 ia hanamodia, to tamona sibona ese Iesu ia tanikiu henia. (Luka 17:​12-17) Ita ura unai tauna ena kara ita tohotohoa, to ita ura lasi tanikiu herevana idia gwauraia lasi taudia 9 edia kara ita tohotohoa!

⁹ Vadaeni, edena taravatu Iehova ese ia henia gauna, ita badinaia be namo? Inai buka dekenai ita herevalaia gaudia mani ita riviulaia. Dirava ena taravatu badinaia karana ese ita do ia durua Dirava ena lalokau lalonai ita noho totona.

10. Iehova Dirava dibaia karana ena badina mani oi gwauraia hedinarai.

¹⁰ Iehova kahirakahira ita lao totona ia ita dibaia be mai  anina bada. Namona be unai kara ita hadokoa lasi. Bema keru hanuaboina ai murimuri ai oi noho, lahi do oi karaia emu kopina oi hasiahua totona, to lahi ia bodo lasi totona au do oi atoa, ani? Unai amo lahi be do ia bada bona do ia siahu noho. Bema unai bamona oi karaia lasi, reana keru dainai do oi mase diba! Au ese lahi ia habadaia hegeregerena, “Dirava do oi diba” noho neganai, emu lalokau ia dekenai be do ia bada.​—Aonega Herevadia 2:​1-5.

11. Iesu ena hadibaia herevadia ese ena murinai idia raka taudia dekenai dahaka namo ia havaraia?

¹¹ Iesu ia ura ena murinai idia raka taudia edia lalokau Iehova bona Ena Hereva momokani dekenai be ia mauri bona lahi bamona ia araia noho. Ia toreisi lou murinai, ia dekenai idia momokani peroveta hereva haida Heberu Revarevadia amo, be ena hahediba taudia rua dekenai ia gwauraia. Unai ese idia dekenai dahaka namo ia havaraia? Idia gwau: “Dala dekenai ia hereva ita dekenai, bona Buka Helaga ena anina ita dekenai ia hadibaia neganai, iseda lalona be idia siahu, ani?”​—Luka 24:32.

12, 13. (a) Hari taunimanima edia lalokau Dirava bona Baibel dekenai be edena bamona? (b) Iseda lalokau ia keru lasi totona, dahaka ita karaia be namo?

¹² Baibel ia hadibaia gaudia oi dibaia matamaia neganai, oi moale bada bona emu lalokau Dirava dekenai be ia bada, ani? Reana unai oi mamia. Momo be unai bamona hemami idia abia. Gau badana be unai lalokau ia goada noho be namo. Ita ura lasi hari inai negai idia noho taudia edia kara ita tohotohoa. Iesu ia gwau: “Taunimanima momo edia lalokau be do ia keru.” (Mataio 24:12) Dahaka oi karaia diba unai amo emu lalokau Iehova bona Baibel ena hereva momokani dekenai do ia keru lasi?

¹³ Iehova Dirava bona Iesu Keriso dekenai diba oi abia noho. (Ioane 17:3) Baibel amo oi dibaia gaudia oi laloa dobu, bona sibona oi nanadaia: ‘Iehova Dirava dekenai dahaka lau dibaia? Edena badina ma ta dainai egu kudouna, lalona bona lauma ibounai ida ia do lau lalokau henia?’ (Salamo 119:97) Unai bamona laloa dobu karana ese emu lalokau Iehova dekenai do ia hagoadaia noho.

14. Iseda lalokau Iehova dekenai ia goada noho totona, edena dala ai guriguri ese ita ia durua?

 ¹⁴ Iseda lalokau Iehova dekenai ia goada noho dalana ta be, ita guriguri hanaihanai. (1 Tesalonika 5:17) Inai buka ena Karoa 17 dekenai ita dibaia bamona, guriguri be Dirava ese ia henia harihari gauna namo hereana. Ma haida ida ita herevahereva karana amo idia ita tura henia diba, unai hegeregerena, Iehova do ita tura henia diba bema ia ita guriguri henia hanaihanai. Namo lasi ia ita guriguri henia kava​—nega momo hereva tamona sibona ita gwauraia loulou, to namona be ita gwauraia herevadia be iseda kudouna dekenai ita mamia momokani. Namona be Iehova ita hereva henia, natu maragina ese ena lalokau tamana ia hereva henia hegeregerena. Namona be mai hemataurai ida ia ita hereva henia, bona mai momokani bona kudouna ibounai ida ita karaia. (Salamo 62:8) Oibe, iseda tomadiho karana dekenai, Baibel stadilaia karana bona mai iseda kudouna ibounai ida ita gwauraia guriguridia be mai anina bada, badina unai ese ita ia durua Dirava ena lalokau lalonai ita noho totona.

15, 16. Dahaka dainai Basileia harorolaia gaukarana be dava bada gauna ta bamona ita laloa be maoro?

¹⁵ Baibel stadilaia karana bona guriguri be ita sibona ita karaia diba tomadiho karadia. To taunimanima vairanai ita karaia tomadiho karana ta mani ita laloa: Baibel amo ita abia dae gaudia be ma haida dekenai ita herevalaia. Baibel ena hereva momokani be ma haida dekenai oi gwauraia vadaeni, a? Bema oibe, unai be hahenamo namona. (Luka 1:74) Iehova Dirava ena hereva momokani be ma haida dekenai ita gwauraia neganai, ita be Keristani taudia momokanidia ibounai ese idia karaia gaukarana ita durua​—unai be Dirava ena Basileia ena sivarai namona ita harorolaia.​—Mataio 24:14; 28:​19, 20.

¹⁶ Aposetolo Paulo ese ena haroro gaukara be dava bada gauna ta bamona ia laloa. (2 Korinto 4:7) Taunimanima dekenai Iehova Dirava bona ena ura oi herevalaia karana be oi karaia diba gaukara namo hereana. Ita be iseda Biaguna hereadaena  ena hesiai gaukara ita karaia, bona unai gaukara ese hahenamo namodia do ia mailaia. Unai gaukara oi karaia neganai, kudou-maoro taudia oi durua noho iseda guba Tamana kahirakahira idia lao, bona mauri hanaihanai ia lao henia dalana idia badinaia totona! Ita karaia gaukarana be gaukara namo hereana,  ani? Bona danu, Iehova bona ena Hereva harorolaia karana ese emu abidadama bona lalokau Iehova dekenai ia hagoadaia. Bona Iehova be emu hekwarahi ia laloa bada. (Heberu 6:10) Unai gaukara dekenai oi bisi karana ese oi do ia durua Dirava ena lalokau lalonai oi noho totona.​—1 Korinto 15:58.

17. Dahaka dainai Keristani haroro gaukara be mai anina bada?

¹⁷ Namona be ita laloatao Basileia harorolaia gaukarana be mai anina bada. Baibel ia gwau: “Sivarai Namona do oi harorolaia goadagoada.” (2 Timoteo 4:2) Dahaka dainai unai bamona ita karaia be mai anina bada? Baibel ia gwau: “Lohiabada ena dina badana be ia kahirakahira vadaeni inai. Ia be ia mai noho haraga.” (Sepanaia 1:14) Oibe, kahirakahira Iehova ese inai gau dikadia ibounai do ia haorea. Gau badana be taunimanima ita hadibaia! Namona be idia diba hari be nega namona Iehova be edia Siahu Ibounai Lohiana ai do idia halaoa. Badina Dirava ese inai gau dikadia ibounai do ia haorea negana “be do ia vara momokani.”​—Habakuku 2:3.

18. Dahaka dainai Keristani taudia momokanidia ida Iehova ita tomadiho henia be namo?

¹⁸ Iehova ia ura Keristani taudia momokanidia ida ia ita tomadiho henia. Unai dainai Baibel ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” (Heberu 10:​24, 25) Keristani heboudia dekenai abidadama tamona taudia ida ita hebou neganai, ita be mai iseda dala iseda lalokau Diravana ita hanamoa bona tomadiho henia totona. Danu, ita hagoadaia heheni diba.

19. Edena dala ai Keristani kongrigeisen dekenai iseda hetura karana ita hagoadaia diba?

¹⁹ Iehova idia tomadiho henia taudia ma haida ida ita hebou neganai, kongrigeisen lalonai lalokau bona tura heheni karana ita hagoadaia. Gau badana be ma ta ena kara namodia  ita tahua, Iehova ese iseda kara namodia ia tahua bamona. Namona be oi diba oiemu abidadama tamona taudia be idia goevadae lasi. Laloaboio lasi, iseda goada lauma dalanai be idauidau bona ita ibounai ese kerere ita karaia. (Kolose 3:13) Iehova idia lalokau henia bada taudia oi tura henidia, unai dala amo lauma dalanai oi goada diba. Oibe, emu Keristani tadikaka bona taihu ida Iehova oi hesiai henia neganai, unai ese oi do ia durua Dirava ena lalokau lalonai oi noho totona. Iehova idia tomadiho henia bona ena lalokau lalonai idia noho taudia be Iehova ese edena bamona ia hanamodia?

20, 21. “Mauri korikori” be dahaka, bona dahaka dainai ia be helaro namona?

²⁰ Iehova ese ena abidadama hesiai taudia dekenai mauri ia henia, to edena bamona mauri ia henidia? Oi be hari oi mauri noho, a? Reana ita ibounai do ita gwau, oibe. Ita hahodi, ita aniani, bona ranu ita inua diba dainai, ita be ita mauri noho. Bona ita moale neganai, reana ita gwau, “Hari egu mauri be namo herea!” To, Baibel ia gwau, hari inai negai tau ta ia gwau diba lasi ena mauri be namo herea.

²¹ Baibel ese ita ia hagoadaia ‘mauri korikori do ita abia.’ (1 Timoteo 6:​19, BHğ) Unai ese ia hahedinaraia “mauri korikori” be vaira negana ai do ita abia. Oibe, ita goevadae neganai, mauri namo hereana do ita abia, badina matamana negana ai unai be Dirava ena ura. Tanobada paradaisona ai gorere lasi maurina, maino bona moale ida ita noho neganai, “mauri korikori”​—mauri hanaihanai unai​—do ita moalelaia. (1 Timoteo 6:12) Unai be hahenamo namo hereana, ani?

22. Edena dala ai ‘mauri korikori do oi abia’?

²² Edena dala ai ‘mauri korikori ita abia’? Unai siri tamona ai, Paulo ese Keristani taudia ia hagoadaia “namo gaudia idia karaia” bona “kara namodia dekenai idia taga.” (1 Timoteo 6:18) Unai ese ia hahedinaraia goevagoeva, Baibel amo ita dibaia gaudia ita badinaia be mai anina bada. To Paulo ia gwau kara namodia ita karaia neganai, “mauri korikori” do ita abia, a?  Lasi, “Dirava ena hariharibada” dainai unai hahenamo namona ita abia diba. (Roma 5:15) To, mai abidadama ida Iehova idia hesiai henia taudia be Ia ese ia hanamodia. Ia ura oi ese “mauri korikori” oi abia. Dirava ena lalokau lalonai idia noho taudia ese mauri hanaihanai do idia abia bona mai moale bona maino ida do idia noho.

23. Dahaka dainai Dirava ena lalokau lalonai ita noho be mai anina bada?

²³ Namona be sibona ita nanadaia, ‘Dirava ese Baibel dekenai ia gwauraia dalana hegeregerena Ia lau tomadiho henia, a?’ Bema dina ta ta ai ita karaia gaudia ese ia hahedinaraia iseda haere be oibe, vadaeni, ita be dala maorona ita badinaia. Namona be ita diba momokani Iehova be iseda heau mauri gabuna. Ia ese inai tanobada ena gau dikadia amo ena abidadama hesiai taudia do ia gimaia. Bona kahirakahira do ia ginidae tanobada matamatana dekenai ita do ia hakaua vareai. Unai nega ita itaia totona, do ita moale bada! Bona do ita moale bada badina inai dina gabedia ai abia hidi maorona ita karaia! Bema hari unai bamona abia hidi oi karaia, matamana negana ai Iehova Dirava ia ura oi abia “mauri korikori” unai, do oi moalelaia ela bona hanaihanai!