KOTA Badana Dinana be dahaka? Momo idia laloa, taunimanima bilioni momo be tamona tamona Dirava ena terona vairanai do idia hakaudia lao. Bena Dirava ese idia ta ta do ia kota henia. Haida be mai moale ida guba dekenai do idia noho, bona ma haida be hisihisi abia hanaihanai gabuna dekenai do idia lao. To, Baibel ese Kota Badana Dinana ia herevalaia dalana be idau. Baibel ia gwau lasi unai dina be gari bada dinana, to ia gwau unai dina be hanamoa lou negana.

Apokalupo 20:​11, 12 ai, aposetolo Ioane ese Kota Badana Dinana be inai bamona ia gwauraia: “Helai gabuna badana kurokurona ta lau itaia, bona ia latanai ia helai Tauna danu. Vadaeni iena vairanai tanobada bona guba be idia heau boio, bona tau ta ese idia ia itaia lou lasi. Bona mase taudia, ladana bada taudia bona ladana maragi taudia be lau itaia, helai gabuna badana ena vairanai idia gini. Vadaeni Dirava ese buka haida ia kehoa, bona buka ma ta ia kehoa, mauri bukana. Bona mase taudia be Dirava ese ia kota henia, edia kara buka lalonai ia torea hegeregerena.” Unai siri ese ia herevalaia kota henia tauna be daika?

Iehova Dirava be taunimanima ia Kota Henia Tauna badana. To, taunimanima kota henia gaukarana be ma ta dekenai ia henia. Kara 17:31 ai, aposetolo Paulo ia gwau: “Dirava ese dina ta ia abia hidi vadaeni, unai dina dekenai iena abia hidi Tauna ese  tanobada ibounai do ia kota henia mai maoromaoro danu.” Ia abia hidi Kota Henia Tauna be ia toreisi lou tauna, Iesu Keriso. (Ioane 5:22) Vadaeni, Kota Badana Dinana be edena negai do ia matamaia? Bona unai dina ena lata be edena bamona?

Apokalupo bukana ese ia hahedinaraia, Satani ena tanobada be Aramagedono tuarina lalonai do ia ore, bena unai murinai Kota Badana Dinana do ia matamaia. * (Apokalupo 16:​14, 16; 19:19–20:3) Aramagedono murinai, Satani bona ena demoni be guri dobu masemasena dekenai do ia lokaia ela bona lagani 1,000 ia ore. Unai nega dekenai, 144,000 taudia be kota gaukarana do idia karaia bona “Keriso danu lohia siahu idia abia, ela bona lagani 1000 idia ore.” (Apokalupo 14:​1-3; 20:​1-4; Roma 8:17) Kota Badana Dinana be hora 24 dekenai do ia vara haraga gauna lasi. Unai kota gaukarana be lagani 1,000 lalonai do idia karaia.

Lagani 1,000 lalonai, Iesu Keriso ese “mauri noho taudia, bona idia mase vadaeni taudia” do ia kota henidia. (2 Timoteo 4:1) “Mauri noho taudia” be Aramagedono amo do idia roho mauri “hutuma bada herea” taudia. (Apokalupo 7:​9-17; Taravatu Matamatana) Aposetolo Ioane ese “mase taudia . . . helai gabuna badana ena vairanai idia gini” ia itaia danu. Iesu ena gwauhamata hegeregerena, “mase guria gabu dekenai idia noho taudia ibounai ese [Keriso ena] gadona do idia kamonai. Vadaeni guria gabu dekena amo do idia toreisi” lou. (Ioane 5:​28, 29; Kara 24:15) To dahaka gaudia dekenai idia do ia kota henia?

Aposetolo Ioane ese ia itaia matahanaina hegeregerena, Dirava ese “buka haida ia kehoa” bona “mase taudia be Dirava ese ia kota henia, edia kara buka lalonai ia torea hegeregerena.” Unai buka lalonai taunimanima ese idia karaia kara gunadia idia torea, a? Lasi, taunimanima ese guna idia do mase lasi neganai idia karaia gaudia dainai do ia kota henidia lasi. Edena bamona unai ita diba? Baibel ia gwau: “Tau ta ia mase neganai be kara dika ese unai tau ia guia lou diba lasi.” (Roma 6:7) Idia toreisi lou taudia be guna idia karaia karadia ese do idia guidia lou lasi. Unai dainai, unai buka ese Dirava ena hahegani ma haida ia laulaulaia. Aramagedono amo idia roho mauri taudia bona idia toreisi lou  taudia idia mauri hanaihanai totona, Dirava ena taravatu bona lagani 1,000 ai do ia henia taravatu matamatadia do idia badinaia danu be namo. Unai dainai, taunimanima ese Kota Badana Dinana lalonai do idia karaia karadia dainai Keriso ese idia do ia kota henia.

Taunimanima bilioni momo be guna Dirava ena ura idia diba lasi, unai dainai Kota Badana Dinana ese dala do ia kehoa Dirava ena ura idia dibaia bona badinaia totona. Anina be hadibaia gaukara badana do ia vara. Oibe, tanobada dekenai idia noho taudia ibounai “ese kota maoromaoro ena anina” do idia dibaia. (Isaia 26:9) To, haida ese Dirava ena ura do idia badinaia lasi. Isaia 26:10 ia gwau: “Sedira kara dika taudia dekenai do oi bogahisihisi henia, to idia ese kara maoromaoro karaia dalana do idia diba lasi. Momokani inai tano be mai ena kara maoromaoro, to inai tano danu lalonai, taunimanima idia kara dika noho. Idia ese Lohiabada ena hairaina idia do itaia lasi.” Kota Badana Dinana ai, unai bamona taudia be do idia mase ore momokani.​—Isaia 65:20.

Kota Badana Dinana ena dokonai, idia roho mauri taudia be mauri goevadaena do idia abia. (Apokalupo 20:5) Unai neganai, tau bona hahine ginigunadia hegeregerena taunimanima be do idia goevadae. (1 Korinto 15:​24-28) Bena hahetoho ginigabena do ia vara. Satani be guri dobu masemasena amo do idia ruhaia bona taunimanima do ia koia toho lou. (Apokalupo 20:​3, 7-10) Satani idia dadaraia taudia dekenai Baibel ena gwauhamata do ia momokani: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29) Oibe, Kota Badana Dinana dainai, Dirava idia kamonai henia taudia ibounai ese namo do idia davaria!