BAIBEL ese Keristani taudia ia hagania, Keriso ena mase ena Memorial hebouna idia karaia totona. Unai hebou idia gwauraia “Lohiabada ena Anibou.” (1 Korinto 11:20) Dahaka dainai unai hebou be mai anina bada? Edena negai bona edena dala ai unai hebou idia karaia be namo?

Lagani 33 C.E. ai, Iesu Keriso ese unai hebou be Iuda taudia edia Pasova hanuaboina ai ia karaia. Pasova ariana be lagani ta ta ai nega tamona sibona idia karaia bona Iuda taudia edia hua ladana Nisan ena dina namba 14 ai unai idia karaia. Unai dina ena deit idia davaria dalana be inai: March 21 dekenai Ierusalema ai diari be hora 12 bona dibura be hora 12. March 21 kahirakahira ia hedinarai hua matamata ena deit be Iuda taudia edia kalenda dekenai Nisan 1. Bona Nisan ena dina namba 14 ai, gabu ia dibura murinai be Pasova ariana ena nega.

 Iesu be ena aposetolo taudia ida Pasova ariana ia karaia murinai, Iuda ia siaia lao bena Lohiabada ena Anibou ia hamatamaia. Unai anibou ese Iuda taudia edia Pasova aria ena gabu ia abia, unai dainai lagani ta ta lalonai nega tamona ita karaia be namo.

Mataio ena Evanelia bukana ia gwau: “Iesu ese paraoa ia abia, ia hanamoa, ia makohia, ena diba tahua taudia dekenai ia henia, ia gwau, ‘Umui abia, umui ania, lauegu tauanina be inai.’ Ma kapusi ta ia abia, ia hanamoa, ia henia idia dekenai, ia gwau, ‘Umui ibounai umui inua. Inai be lauegu rarana, maino karaia ena rara, taunimanima momo totona do ia bubua, dika gwauatao totona.’”​—Mataio 26:​26-28.

Haida idia laloa Iesu ese paraoa bona uaina be ena hidio bona rara korikorina ai ia halaoa. To, Iesu ese unai paraoa ia henia neganai, ena tauanina ibounai ia do noho. Oi laloa Iesu ena aposetolo taudia ese ena tauanina bona rara korikorina idia ania bona inua, a? Lasi, badina taunimanima edia tauanina ania karana be Dirava ese ia taravatua. (Genese 9:​3, 4; Levitiko 17:10) Luka 22:20 ai, Iesu ia gwau: “Inai kapusi be maino karaia gwauhamata matamatana lauegu rarana dekenai, umui totona do ia bubua.” Unai kapusi be “gwauhamata matamatana” ta, a? Unai ia vara diba lasi, badina gwauhamata be ma ta ida oi karaia gauna, ia be oi itaia eiava dogoatao gauna ta lasi.

Unai dainai, paraoa bona uaina ese gau haida idia laulaulaia. Paraoa ese Keriso ena goevadae tauanina ia laulaulaia. Iesu ese Pasova ariana dekenai idia gaukaralaia paraoa orena ia gaukaralaia. Unai paraoa idia karaia neganai, hatubua gauna idia gaukaralaia lasi. (Esodo 12:8) Nega momo Baibel lalonai hatubua gauna ese kara dika bona kara gageva ia laulaulaia. Unai dainai paraoa ese Iesu ia bouboulaia tauanina goevadaena ia laulaulaia. Iena tauanina dekenai kara dika ta ia noho lasi.​—Mataio 16:​11, 12; 1 Korinto 5:​6, 7; 1 Petero 2:22; 1 Ioane 2:​1, 2.

Uaina kakakakana ese Iesu ena rara ia laulaulaia. Unai rara ese ia hahedinaraia, gwauhamata matamatana be mai anina bada. Iesu ia gwau ena rara ia bubua taunimanima momo edia “dika gwauatao totona.” Unai amo Dirava ena matanai taunimanima be idia goeva bona Iehova ida gwauhamata matamatana idia karaia diba. (Heberu 9:14; 10:​16, 17) Unai gwauhamata dainai, 144,000 taudia be guba dekenai idia daekau diba. Unuseniai  idia be king bona hahelaga gaukara do idia karaia taunimanima ibounai idia hanamoa totona.​—Genese 22:18; Ieremia 31:​31-33; 1 Petero 2:9; Apokalupo 5:​9, 10; 14:​1-3.

Daidia ese Memorial paraoa do idia ania bona uaina do idia inua be namo? Gwauhamata matamatana lalonai idia noho taudia​—guba dekenai do idia daekau taudia unai​—ese paraoa idia ania bona uaina idia inua. Dirava ena lauma helaga ese unai taudia ia hadibaia, idia be Dirava ese ia abia hidi guba dekenai king ai do idia lao. (Roma 8:16) Danu, idia be Iesu ida Basileia gwauhamatana lalonai idia noho.​—Luka 22:29.

Tanobada Paradaiso dekenai mauri hanaihanai helarona idia abia taudia be edena bamona? Idia ese Iesu ena hahegani idia badinaia bona mai hemataurai ida Lohiabada Ena Anibou dekenai idia lao, to paraoa idia ania eiava uaina idia inua lasi. Lagani ta ta lalonai nega tamona sibona, Nisan 14 ai dina ia diho neganai, Iehova ena Witnes taudia ese Lohiabada Ena Anibou idia karaia. Ena be tanobada hegegemadai taunimanima tausen haida sibona ese guba helarona idia abia, to Keristani taudia ibounai dekenai unai hebou be mai anina bada. Unai nega dekenai, ibounai ese Iehova Dirava bona Iesu Keriso ese idia hahedinaraia lalokau hereadaena idia laloa diba.​—Ioane 3:16.