1-3. Ita ibounai ia lulua noho inai tauna be daika, bona dahaka dainai Baibel ena hadibaia hereva dibaia karana ese ita ia durua?

MANI inai oi laloa, oi be emu inai tauna dikana amo oi heau siri noho. Iena goada be bada bona ia heau haraga. Oi diba ia be hebogahisi lasi tauna, badina oi itaia ia ese emu turadia haida ia alaia vadaeni. Herevana oi hekwarahi ia oi heautania totona, to ia be oi kahirakahira ia mai noho. Toana be roho mauri dalana be lasi. To, ta ia hedinarai oi ia hamauria totona. Iena siahu ese emu inai tauna ena siahu ia hereaia momokani, bona ia gwauhamata oi do ia durua. Oi moale bada herea!

² Unai hegeregerena inai tauna ta ese ita ibounai ia lulua noho. Karoa gunanai ita itaia bamona, Baibel ia gwau mase be iseda inai tauna. Ita ta lasi ese mase ita reaia diba. Ita momo ita itaia vadaeni unai inai tauna ese iseda lalokau taudia ia hamasea vadaeni. To Iehova ena siahu ese mase ena siahu ia hereaia momokani. Ia be iseda lalokau Hamauria Tauna, bona ia hahedinaraia vadaeni ia ese unai inai tauna do ia halusia. Bona ia gwauhamata unai inai tauna, mase, do ia haorea momokani. Baibel ia gwau: “Ia dekenai idia tuari taudia ibounai [“inai tauna,” BHğ] ia ese ia haorea murinai, Dirava ese mase danu do ia haorea.” (1 Korinto 15:26) Unai be sivarai namona!

³ Ita diba tauna ta ia mase negana ai ita abia hemamina mani  ita laloa sisina. Unai ese ita do ia durua ita ia hamoalea gauna ta ita lalopararalaia totona. Iehova ia gwauhamata mase taudia do idia mauri lou. (Isaia 26:19) Unai be toreisi lou helarona.

4. (a) Dahaka dainai Iesu ena haheitalai ese ita dekenai Iehova ena hemami mase dekenai ia hahedinaraia? (b) Iesu ese edena bamona hetura karana namona ia moalelaia?

⁴ Oiemu lalokau tauna ta ia mase vadaeni, a? Reana oi lalohisihisi bada bona oi mamia gau ta oi karaia diba lasi. Unai bamona negadiai, namona be Dirava ena Hereva dekenai heduru ita tahua. (2 Korinto 1:​3, 4) Baibel ese ita ia durua Iehova bona Iesu edia hemami mase dekenai ita lalopararalaia totona. Iesu, ena Tamana ena kara ia hahedinaraia goevagoeva tauna, be mase ese ia havaraia lalohisihisina ia diba. (Ioane 14:9) Iesu be Ierusalema dekenai ia noho neganai, nega momo Lasaro bona ena taihudia, Maria bona Mareta ia vadivadi henia, idia be Betania dekenai idia noho. Idia foa be tura namodia ai idia lao. Baibel ia gwau: “Iesu ese Mareta mai ena tadina Maria danu, bona Lasaro danu, ia lalokau henia.” (Ioane 11:5) To, karoa gunana dekenai ita diba bamona, Lasaro be ia mase.

5, 6. (a) Iesu be Lasaro ena lalohisihisi ruma bese bona turadia ida ia noho neganai, ena hemami be edena bamona? (b) Dahaka dainai Iesu ena lalona ia hisihisi bada karana ese ita ia hagoadaia?

⁵ Iesu ena turana ia mase neganai, ena hemami be edena bamona? Iesu ia mai neganai, Lasaro ena varavara bona turadia idia tai. Unai ese ena lalona ia hamarerea momokani. “Iena lalona ia hisihisi bada, mamina ia abia momokani.” Bena, sivarai ia gwau, “Iesu ia tai.” (Ioane 11:​33, 35) Iesu ena lalona ia hisihisi bada badina ia be helaro lasi, a? Lasi. Momokani, Iesu ia diba gau namo hereana ta do ia vara. (Ioane 11:​3, 4) To, mase ese ia havaraia lalohisihisina ia mamia.

⁶ To, Iesu ena lalona ia hisihisi bada karana ese ita ia hagoadaia. Ita ia hadibaia Iesu bona ena Tamana, Iehova ese mase idia inai henia. To Iehova Dirava ese unai inai tauna do ia heatu henia bona halusia! Dirava ese Iesu dekenai ia henia gaukarana mani ita laloa.

7, 8. Dahaka dainai taunimanima idia laloa Lasaro be helaro lasi, to Iesu be dahaka ia karaia?

⁷ Lasaro be kohua ta lalonai idia guria, bona Iesu ese ia noidia kohua vairanai ia noho nadina do idia kokia. Mareta ia ura lasi unai bamona idia karaia badina Lasaro ena tauanina be dina foa ia noho vadaeni dainai, reana ia bodaga. (Ioane 11:39) Taunimanima edia lalohadai dekenai, helaro ta ia noho lasi, ani?

⁸ Nadi idia kokia bona Iesu ia boiboi badabada: “Lasaro e, oi mai murimuri dekenai.” Dahaka ia vara? “Mase tauna be ia raka murimuri dekenai.” (Ioane 11:​43, 44) Unuseniai idia noho taudia edia moale oi laloa diba, a? Herevana Lasaro be edia tadina, varavara, turana, eiava dekena tauna, idia diba ia mase vadaeni. To, hari idia lalokau henia tauna be idia edia huanai ia gini. Unai idia hoalaia bada. Momo ese mai moale ida Lasaro idia rosia. Oibe, Iesu ese mase ia halusia!

9, 10. (a) Iesu ese Lasaro ia do hatorea isi lou lasi neganai, edena dala ai Iesu ia hahedinaraia ia abia siahuna be Iehova amo? (b) Baibel lalonai idia noho toreisi lou sivarai idauidau duahia karana ese dahaka namo ia mailaia?

⁹ Iesu ia gwau lasi unai hoa karana be sibona ena siahu amo ia karaia. Iesu ese Lasaro ia do boiboi henia lasi neganai, ia gwauraia gurigurina lalonai ia hahedinaraia Iehova ena siahu amo Lasaro ia hatorea isi lou. (Ioane 11:​41, 42) Iehova ese ena siahu be unai nega sibona dekenai ia gaukaralaia lasi. Baibel lalonai idia noho toreisi lou sivarai idauidau nain amo Lasaro ena sivarai be idia ta. * Unai sivarai idauidau duahia bona stadilaia karana ese moale ia havaraia. Ita idia hadibaia Dirava ese ta ena toana ia laloa lasi, badina ia hatorea isi lou taudia be matamata bona buruka, tau bona hahine, Israela tauna bona Israela lasi tauna. Bona unai sivarai idauidau ese taunimanima idia mamia moalena ia herevalaia! Hegeregere, Iesu ese mase  amo kekeni matamata ta ia hatorea isi lou neganai, ena tama sina idia moale bada. (Mareko 5:42) Momokani, Iehova ese ia karaia karana dainai, idia abia moalena be do idia laloaboio diba lasi.

¹⁰ Oibe, Iesu ese ia hatorea isi lou taudia be idia mase lou. Unai ena anina be Iesu ese idia ia hatorea isi lou be anina lasi, a? Lasi. Unai sivarai idauidau Baibel lalonai ese hereva momokani idia hamomokania bona ita dekenai helaro ia henia.

11. Lasaro ena toreisi lou sivaraina ese edena dala ai Hadibaia Tauna 9:5 ena hereva ia hamomokania?

¹¹ Baibel ia gwau “mase taudia be gau ta idia diba lasi.” Idia be idia mauri noho lasi bona gau ta idia laloa diba lasi. Lasaro ena sivarai ese unai ia hamomokania. Lasaro ia toreisi lou neganai, guba gaudia ia herevalaia karana amo taunimanima ia hamoalea, a? Eiava hel lahina ena sivarai amo taunimanima ia hagaridia, a? Lasi. Baibel lalonai Lasaro be unai bamona hereva ta ia gwauraia lasi. Unai dina foa guria gabuna dekenai ia noho neganai, ia ‘be gau ta ia diba lasi.’ (Hadibaia Tauna 9:5) Lasaro be mase dekenai ia mahuta noho.​—Ioane 11:11.

12. Dahaka dainai ita diba momokani Lasaro ena toreisi lou sivaraina be ia vara momokani gauna?

¹² Danu, Lasaro ena sivarai ese ita ia hadibaia toreisi lou be ia vara momokani gauna, ia be gori sivaraina ta sibona lasi. Iesu ese Lasaro ia hatorea isi lou neganai, taunimanima momo ese idia itaia. Iesu idia inai henia tomadiho gunalaia taudia ese unai hoa karana idia itaia danu. Idia gwau: “Edena bamona do ita karaia, badina be unai tau ese toa kara momo ia karaia?” (Ioane 11:47) Taunimanima momo be idia lao ia toreisi lou vadaeni tauna idia itaia totona. Unai dainai, idia momo ese Iesu idia abidadama henia. Lasaro ia mauri lou karana amo ia hamomokania Iesu be Dirava ese ia siaia. Unai dainai hebogahisi lasi Iuda tomadiho gunalaia taudia ese palani idia karaia Iesu bona Lasaro idia alaia totona.​—Ioane 11:53; 12:​9-11.

13. Dahaka dainai ita abia dae momokani Iehova ese mase taudia do ia hatorea isi lou?

 ¹³ Dahaka dainai toreisi lou ita abia dae be namo? Badina Iesu ia gwau nega ta “mase guria gabu dekenai idia noho taudia ibounai” be do idia toreisi lou. (Ioane 5:28) Iehova be mauri gaudia ibounai ia Havaraia Tauna. Unai dainai mauri ia henia lou lalohadaina ita abia dae be auka, a? Momokani, Iehova ese idia ia laloatao noho be namo. Iseda lalokau mase taudia ia laloatao diba, a? Hisiu trilioni momo ese iunives idia hahonua, to Iehova ese idia ta ta dekenai ladana ia henia! (Isaia 40:26) Unai dainai Iehova Dirava ese iseda lalokau mase taudia ia laloatao diba, bona ia noho hegaegae idia dekenai mauri ia henia lou totona.

14, 15. Iobu ena hereva ese ia hahedinaraia bamona, Iehova ena lalohadai mase taudia hatorea isi lou karana dekenai be dahaka?

¹⁴ Iehova ena lalohadai mase taudia hatorea isi lou karana dekenai be dahaka? Baibel ia gwau ia ura dikadika mase taudia do ia hatorea isi lou. Abidadama tauna Iobu ia henanadai: “Bema tau ta ia mase, ia be do ia mauri lou, a?” Iobu ena hereva ena anina be, guria gabuna dekenai do ia naria ela bona Dirava ese ia do ia laloatao. Iehova dekenai ia gwau: “Oi ese lau dekenai do oi boiboi, vadaeni oi dekenai do lau haere, bona lau, oi ese oi karaia tauna dekenai, do oi moale noho.”​—Iobu 14:​13-15.

¹⁵ Mani oi laloa! Iehova ia moale mase taudia do ia hatorea isi lou. Iehova ia ura dikadika unai bamona do ia karaia dainai, ita moale be namo, ani? Vaira negana ai do ia vara toreisi lou neganai daidia do idia toreisi lou bona edeseniai?

16. Mase taudia do idia toreisi lou bona edena bamona gabu dekenai do idia noho?

¹⁶ Baibel lalonai idia noho toreisi lou sivarai idauidau ese ita dekenai vaira negai do ia vara toreisi lou karana ai gau momo ia hadibaia. Guna inai tanobada dekenai idia mauri lou taudia  be edia lalokau taudia ida idia noho hebou lou. Vaira negai unai bamona do ia vara​—to guna gauna do ia hereaia. Karoa 3 dekenai ita diba bamona, Dirava ena ura be tanobada ibounai be paradaiso ai do ia halaoa. Mase taudia do idia toreisi lou tanobadana ai tuari, taravatu utua karadia bona gorere be lasi. Unai dainai inai tanobada dekenai mai maino bona moale ida do idia noho diba ela bona hanaihanai.

17. Taunimanima hida do idia toreisi lou?

¹⁷ Daidia do idia toreisi lou? Iesu ia gwau “mase guria gabu dekenai idia noho taudia ibounai ese iena [Iesu ena] gadona do idia kamonai. Vadaeni guria gabu dekena amo do idia toreisi.” (Ioane 5:​28, 29) Unai hegeregerena, Apokalupo 20:13 ia gwau: “Davara lalonai idia mase vadaeni taudia be davara ese idia ia henia daekau lou. Bona Mase, bona mase taudia edia gabu ese idia lalonai idia koua noho taudia idia henia daekau lou.” “Mase taudia edia gabu” be mase taudia guria gabuna ia herevalaia. (Rau 212-13 dekenai ia noho Apendiks itaia.) Guria gabu ibounai dekenai mase tauna ta do ia noho lasi. Unuseniai idia laga-ani taunimanima bilioni momo be do idia toreisi lou. Aposetolo Paulo ia gwau: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Unai ena anina be dahaka?

18. Do idia toreisi lou “kara maoromaoro taudia” be daidia, bona unai helaro ese edena dala ai oi ia durua?

¹⁸ Unai “kara maoromaoro taudia” edia sivarai be Baibel lalonai ita duahia, idia momo be tanobada ai Iesu ia do mai lasi negana ai idia noho. Idia haida be Noa, Aberahamo, Sara, Mose, Ruta, Eseta, bona ma momo. Unai abidadama tatau bona hahine haida edia sivarai be Heberu karoa 11 ese ia herevalaia. To “kara maoromaoro taudia” be iseda negai idia mase Iehova ena hesiai taudia ia herevalaia danu. Toreisi lou helarona dainai, mase garina do ita gari lasi.​—Heberu 2:15.

19. “Kara maoromaoro lasi taudia” be daidia? Idia dekenai Iehova ese dahaka hahenamo do ia henia?

¹⁹ To Iehova idia hesiai henia lasi, eiava ia idia kamonai henia  lasi badina ia idia diba lasi taudia be edena bamona? Iehova ese unai “kara maoromaoro lasi taudia” bilioni momo do ia laloaboio lasi. Idia danu do idia toreisi lou bona Iehova ese idia dekenai nega do ia henia Dirava momokanina do idia dibaia bona ia do idia hesiai henia totona. Lagani 1,000 lalonai, mase taudia be do idia toreisi lou bona tanobada ai idia noho abidadama taudia ida Iehova do idia hesiai henia. Unai be nega namo hereana. Baibel ese unai nega ia gwauraia Kota Badana Dinana. *

20. Gehena be dahaka, bona daidia be unuseni idia lao?

²⁰ Unai ena anina be guna idia mauri taudia ibounai be do idia toreisi lou, a? Lasi. Baibel ia gwau mase taudia haida be “mase gabuna” eiava Gehena dekenai idia noho. (Luka 12:5) Unai ladana Gehena be idaunegai Ierusalema hanua ena murimurinai ia noho momoru negea gabuna amo idia abia. Unuseniai mase tauanina bona momoru idia gabua. Iuda taudia idia laloa, unuseniai idia negea taudia edia kara be dika dainai idia guridia lasi bona idia ura lasi Dirava ese idia do ia hatorea isi lou. Unai dainai Gehena be mase hanaihanai ia laulaulaia. Ena be Iesu ese mauri taudia bona mase taudia do ia hahemaoro henia, to Iehova be Hahemaoro Tauna badana. (Kara 10:42) To kara dika taudia bona idia ura lasi edia kara idia haidaua taudia do ia hatoredia isi lou lasi.

21, 22. (a) Edena toreisi lou ma ta ia noho? (b) Daika be lauma tauanina dekenai ia toreisi lou tauna ginigunana?

²¹ Baibel ese toreisi lou ma ta ia herevalaia, unai be lauma tauanina ai do ia toreisi lou bona guba dekenai do ia noho. Baibel lalonai unai dala amo ia toreisi lou tauna ena sivarai tamona sibona ia noho, unai be Iesu Keriso.

²² Iesu idia hamasea murinai, Iehova ese ena Natuna be guria gabuna dekenai ia rakatania lasi. (Salamo 16:10; Kara 13:​ 34, 35) Dirava ese Iesu ia hatorea isi lou, to taunimanima edia tauanina dekenai lasi. Aposetolo Petero ia gwau Keriso ena “tauanina idia alaia, to Lauma dekena amo ia toreisi lou.” (1 Petero 3:18) Unai be hoa kara badana. Iesu be lauma tauna goadana ai ia toreisi lou! (1 Korinto 15:​3-6) Iesu be tau ginigunana unai bamona dala ai ia toreisi lou totona. (Ioane 3:13) To ia be ginigabena lasi.

23, 24. Daidia be Iesu ena “orea maragi” taudia, bona idia be hida?

²³ Iesu ia diba kahirakahira guba dekenai do ia giroa lou dainai, ia murinai idia raka taudia ia hamaoroa ia ese ‘gabu ta do ia karaia hegaegae’ idia totona. (Ioane 14:2) Iesu ese guba dekenai do idia lao taudia ia gwauraia “orea maragi.” (Luka 12:32) Taunimanima hida be unai orea maragi lalonai idia noho? Apokalupo 14:1 ai, aposetolo Ioane ia gwau: “Ma lau itaia, Mamoe ena Natuna [Iesu Keriso] be Siona Ororo dekenai ia gini. Ia danu be taunimanima 144,000 idia gini, iena ladana, bona iena Tamana ena ladana be edia baguna dekenai Dirava ese ia torea.”

²⁴ Unai 144,000 Keristani taudia, bona Iesu ena aposetolo taudia be guba maurina dekenai do idia toreisi lou. Unai toreisi lou be edena negai do ia vara? Aposetolo Paulo ia gwau Keriso ia giroa mai neganai unai do ia vara. (1 Korinto 15:23) Karoa 9 dekenai do oi itaia, ita be hari unai nega dekenai ita noho. Unai dainai iseda negai idia noho 144,000 taudia oredia idia mase neganai, lauma taudia ai idia lao bona maoromaoro guba dekenai idia daekau. (1 Korinto 15:​51-55) To, taunimanima hutuma, be vaira negana ai tanobada Paradaisona ai do idia toreisi lou.

25. Karoa gabena dekenai dahaka do ita herevalaia?

²⁵ Oibe, Iehova ese iseda inai tauna, mase, do ia halusia bona do ia haorea momokani! (Isaia 25:8) To, reana do oi laloa, ‘Idia toreisi lou bona guba dekenai idia daekau taudia ese dahaka gaukara do idia karaia?’ Guba dekenai Basileia gavamani namona ta ai do idia lao. Karoa gabena ai unai gavamani dekenai diba ma haida do ita abia.