1-3. Petero be dahaka matahanai ia itaia, bona dahaka dainai ena anina ita lalopararalaia be namo?

 LAGANI 36 C.E. ai, Iopa ena taoni dekenai Petero be ruma ta ena guhi palakana ataiai ia guriguri, unai ruma be davara badinai ia noho. Ia be unai ruma tauna ese ia abia dae bona unuseniai dina haida ia noho. Petero be unai ruma dekenai ia noho karana ese ia hahedinaraia, ia ese bese ma ta ia lalodika henia lasi. Unai ruma ena biaguna, Simona, be boromakau kopina gaukaralaia tauna, bona Iuda taudia momo idia ura lasi unai bamona tauna ida idia noho. a To Iehova ena lalohadai, taunimanima edia toana laloa lasi karana dekenai, Petero be gau ta do ia dibaia.

² Petero ia guriguri noho lalonai, matahanai ta ia itaia. Bema Iuda tauna ta ese Petero ia itaia matahanaina ia itaia, unai ese ia do ia hahekwakwanaia. Unai matahanai lalonai gau ta, ena toana be dabua badana ta bamona be guba amo ia diho, ia lalonai Taravatu ese ia gwauraia goeva lasi animal ibounai idia noho. Gado ta ese Petero ia hamaoroa, unai gaudia do ia alaia bona ania, unai neganai Petero ia gwau: “Nega ta miro bona goeva lasi gauna ta lau ania lasi.” Unai gado be nega tamona lasi, to nega toi Petero ia hamaoroa: “Namo lasi Dirava ese ia hagoevaia vadaeni gaudia oi gwauraia miro.” (Kara 10:14-16) Unai matahanai dainai Petero ia daradara, to gabeai ia laloparara.

³ Petero ena matahanai ena anina be dahaka? Gau badana be unai matahanai ita lalopararalaia, badina unai amo Iehova ese taunimanima ia laloa dalana do ita dibaia. Ita be Keristani taudia momokanidia dainai, Dirava ese taunimanima ia laloa dalana ita dibaia be namo, unai amo Iena Basileia ita harorolaia guguru diba. Petero ena matahanai ena anina ita diba totona, mani idia vara gaudia ita tahua.

4, 5. Korenelio be daika, bona ia guriguri lalonai dahaka ia vara?

⁴ Petero be inai ia diba lasi: Dina ta gunanai, Kaisarea hanua dekenai tau ta ladana Korenelio danu ese Dirava amo matahanai ta ia abia. Unai hanua be kilomita 50 bamona Iopa amo. Korenelio be Roma ena ami ofesa ta, bona ia be “tomadiho ia laloa bada.” b Ia be ruma bese naria karana dekenai haheitalai namona ia hahedinaraia, badina “iena ruma taudia ibounai be Dirava idia gari henia.” Korenelio be Iuda tomadihona ia abia dae lasi, bona ia be kopina utua lasi Idau Bese tauna. To, ogogami Iuda taudia ia hebogahisi henia dainai, tauanina dalanai ia durudia. Inai kudou-maoro tauna be “hanaihanai Dirava ia guriguri henia.”​—Kara 10:2.

⁵ Adorahi 3 oklok bamona ai, Korenelio ia guriguri lalonai, matahanai ta ia itaia bona aneru ta ese ia hamaoroa: “Emu guriguri bona hebogahisi dainai ogogami taudia oi durua karana be Dirava dekenai idia daekau bona ia laloatao.” (Kara 10:4) Aneru ena hereva dainai, Korenelio ese tatau haida ia siaia aposetolo Petero idia boiria totona. Kopina utua lasi Idau Bese tauna, Korenelio, ese guna ia kamonaia lasi hahemauri sivaraina be hari do ia kamonai.

6, 7. (a) Edena dala ai Dirava ese kudou-maoro taudia edia guriguri ia haerelaia? Ekspiriens gwauraia. (b) Unai bamona ekspiriens amo dahaka ita dibaia?

⁶ Oi laloa hari, Dirava ese ia idia ura dibaia taudia edia guriguri ia haerelaia, a? Mani inai ekspiriens ita laloa. Albania ai, hahine ta ese Gima Kohorona ena kopi ta ia abia, bona ia lalonai atikol ta ese natudia naria karana ia herevalaia. c Ia ia vadivadi henia Witnes taihu dekenai ia gwau: “Oi do mai lasi lalonai, Dirava lau guriguri henia, lau ia durua egu natuna kekenidia lau hadibaia namonamo totona. Ia ese oi ia siaia! Lau moale dikadika, badina lau ura henia gauna oi hahedinaraia!” Unai hahine bona ena natuna kekenidia idia stadi, bona gabeai ena adavana danu ia stadi.

 ⁷ Unai bamona sivarai be guna idia vara, a? Oibe! Unai bamona sivarai be tanobada hegegemadai ia vara loulou dainai, ita gwau diba unai be ia vara kava lasi. Unai amo dahaka ita dibaia? Ginigunana be, Iehova ese ia idia tahua kudou-maoro taudia edia guriguri ia haerelaia. (1 Kin. 8:41-43; Sal. 65:2) Iharuana be, eda haroro gaukara lalonai aneru ese ita idia durua.​—Apok. 14:6, 7.

8, 9. Lauma helaga be Petero dekenai dahaka ia gwau, bona Petero be dahaka ia karaia?

⁸ Petero be ruma ena guhi ataiai dekenai, bona matahanai ena anina “ia laloa momo” lalonai Korenelio ese ia siaia taudia be unai ruma dekenai idia ginidae. (Kara 10:17) Unai matahanai lalonai, Petero ia gwau Taravatu henunai idia goeva lasi gaudia do ia ania lasi, to unai taudia ida Idau Bese tauna ena ruma dekenai do ia lao, a? Dala haida ai, Dirava ese lauma helaga amo Petero dekenai ena ura ia hahedinaraia. Lauma helaga be Petero dekenai ia gwau: “Itaia! Tatau toi be oi totona idia henanadai noho. Vadaeni oi toreisi, oi diho bona idia ida oi lao. Oi daradara lasi, badina lau ese idia lau siaia.” (Kara 10:19, 20) Petero ia itaia matahanai ese ia hahegaegaea, lauma helaga ena hakaua dalana ia badinaia totona.

⁹ Petero ia laloparara, Korenelio be Dirava ena hereva hegeregerena ai, ia totona hereva ia siaia dainai, unai Idau Bese taudia be ruma dekenai “ia boiridia vareai bona unuseniai idia noho.” (Kara 10:23a) Unai kamonai aposetolo tauna be Dirava ena ura ia dibaia murinai, ena lalohadai ia haidaua.

10. Edena dala ai Iehova ese ena taunimanima ia hakaua, bona ita sibona dekenai dahaka henanadai ita henia be namo?

¹⁰ Idaunega amo ema bona hari, Iehova ese ena taunimanima dekenai metairametaira gau idauidau ia hahedinaraia. (Aon. 4:18) Iena lauma helaga amo, “hesiai tauna mai ena kamonai bona mai ena aonega” ia gunalaia. (Mat. 24:45) Nega haida, Dirava ena Hereva dekenai diba matamata ita abia, eiava orea ena heau dalana dekenai gau haida idia haidaua. Namona be sibona ita nanadaia: ‘Bema unai bamona gaudia idia vara, edena bamona do lau kara? Unai gaudia dekenai Dirava ena lauma ena hakaua dalana lau badinaia, a?’

11, 12. Petero be Kaisarea dekenai ia ginidae neganai dahaka ia karaia, bona dahaka ia dibaia?

¹¹ Petero ese unai matahanai ia abia bena murina dinana ai, ia bona tatau nain—Korenelio ese ia siaia taudia toi bona “[Iuda] tadikaka 6” be Iopa amo Kaisarea dekenai idia lao. (Kara 11:12) Korenelio be Petero ia naria dainai, “ena varavara bona tura korikoridia” ia haboua—idia ibounai be Idau Bese taudia. (Kara 10:24) Petero ia ginidae neganai, ia karaia diba lasi gauna ta ia karaia, kopina utua lasi Idau Bese tauna ena ruma lalonai ia vareai! Petero be idia dekenai ia gwau: “Umui diba, Iuda tauna ta ese idau bese tauna ta ia bamoa eiava ia hereva henia be taravatu. To Dirava ese lau dekenai ia hahedinaraia, tau ta do lau gwauraia lasi ia miro eiava ia goeva lasi.” (Kara 10:28) Unai negai Petero ia laloparara, aniani idauidau  ia ania diba, to unai sibona lasi, unai matahanai ese ia dekenai gau ta ia hadibaia danu. Namona be ia ese ‘tau ta [Idau Bese tauna danu] do ia gwauraia lasi ia miro.’

¹² Korenelio ena ruma ai idia hebou taudia ibounai be idia ura bada Petero ena hereva idia kamonai. Korenelio ia gwau: “Hari ai ibounai be Dirava vairanai ai noho, Iehova ese oi dekenai ia gwauraia herevana ai kamonai totona.” (Kara 10:33) Bema kamonai tauna ta amo unai bamona hereva oi kamonai, do oi moale bada, ani? Petero be inai hereva mai siahuna amo ena hereva ia hamatamaia: “Hari lau laloparara momokani, Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.” (Kara 10:34, 35) Petero ia laloparara, Dirava ese taunimanima ia laloa, herevana edia bese o kopina ena kala be idauidau. Petero ese idia dekenai Iesu ena haroro gaukara, mase, bona toreisi lou sivaraina ia harorolaia.

13, 14. (a) Lagani 36 C.E. ai, Korenelio bona Idau Bese taudia ma haida idia helalo-kerehai neganai, dahaka ia vara? (b) Dahaka dainai taunimanima edia toana dainai ita hahemaoro henidia lasi?

¹³ Gau idauna ta ia vara: “Petero be unai gaudia ia herevalaia lalonai,” Dirava ese ena lauma helaga be unai “idau bese taudia” latanai ia bubua. (Kara 10:44, 45) Baibel ese inai nega sibona ia herevalaia, bapatiso idia do abia lasi neganai, lauma helaga idia abia. Unai kara amo Petero ia itaia, Dirava ese Idau Bese taudia ia abia dae, vadaeni idia “ia hagania . . . bapatiso do idia abia.” (Kara 10:48) Lagani 36 C.E. ai, Iuda Bese taudia idia helalo-kerehai neganai, Dirava ese Iuda taudia ia lalonamo henia negana ia doko. (Dan. 9:24-27) Unai nega ai Petero ese “Basileia ena ki” ihatoina o ginigabena ia gaukaralaia. (Mat. 16:19) Unai ki ese dala ia kehoa kopina utua lasi Idau Bese taudia be horoa Keristani taudia ai idia lao totona.

¹⁴ Ita be Basileia harorolaia taudia dainai, ita laloparara “Dirava ese maka tamona dekenai taunimanima ibounai ia kara henia.” (Roma 2:11) Iena ura be “taunimanima idauidau do ia hamauria.” (1 Tim. 2:4) Unai dainai, namo lasi taunimanima edia toana dainai ita hahemaoro henidia. Iseda gaukara be Dirava ena Basileia ita harorolaia guguru, anina be taunimanima ibounai ita haroro henidia, herevana idia be kopina, bese, toana, bona tomadiho idauidau taudia.

15, 16. Dahaka dainai Iuda Keristani taudia haida be Petero ida idia hepapahuahu, bona ia ese ena kara ena badina be edena bamona ia herevalaia?

¹⁵ Oibe, Petero ia ura bada idia vara gaudia ia herevalaia dainai, Ierusalema dekenai ia lao. To kopina utua lasi Idau Bese taudia ese “Dirava ena hereva idia abia dae” ena sivarai be Ierusalema ai idia kamonai vadaeni. Unai dainai Petero be unuseni ia ginidae neganai, “kopina utua karana idia badinaia taudia be ia danu idia hepapahuahu matamaia.” Idia badu badina Petero be ‘kopina utua lasi taudia edia ruma lalonai ia vareai bona idia ida ia aniani.’ (Kara 11:1-3) Oibe, Iuda hahediba taudia idia hepapahuahu badina Idau Bese taudia be Keriso murinai idia raka dainai lasi. To idia gwau Idau Bese taudia ese Taravatu—kopina utua taravatuna danu—idia badinaia be namo, unai amo Iehova ese edia tomadiho do ia abia dae. Ia hedinarai  goevagoeva, Iuda hahediba taudia haida ese Mose ena Taravatu idia dadaraia be auka.

¹⁶ Petero ese ena kara ena badina be edena bamona ia herevalaia? Kara 11:4-16 ena hereva bamona, ia hamaorodia Dirava ese unai dala ia hahedinaraia, bona hamomokania gaudia foa ia herevalaia: (1) Dirava amo ia abia matahanaina (Siri 4-10); (2) lauma helaga ena hereva (Siri 11, 12); (3) aneru ese Korenelio ia vadivadi henia (Siri 13, 14); bona (4) Dirava ese Idau Bese taudia latanai lauma helaga ia bubua. (Siri 15, 16) Petero ena hereva dokonai, lalona veria henanadai ta ia henia, ia gwau: “Unai dainai, bema Dirava ese [abidadama Idau Bese taudia] dekenai davana lasi harihari gauna [lauma helaga] ia henia, ita [Iuda taudia], Lohiabada Iesu Keriso ita abidadama henia taudia dekenai ia henia bamona, vadaeni lau be daika Dirava lau koua totona?”​—Kara 11:17.

17, 18. (a) Petero ena hereva dainai Iuda Keristani taudia ese dahaka idia karaia be namo? (b) Dahaka dainai ia auka kongrigeisen lalonai lalotamona ia noho totona? Bona dahaka henanadai ita lalodia be namo?

¹⁷ Petero ena hereva dainai Iuda Keristani taudia ese edia kara idia haidaua be namo. Idia ese bese ma ta lalodika henia karana idia dadaraia bona idia bapatiso matamata Idau Bese taudia be edia Keristani tadikaka bamona do idia kara henia, a? Baibel ia gwau: “Unai gaudia idia [aposetolo taudia bona Iuda Keristani taudia ma haida] kamonai neganai, hepapahuahu karana idia hadokoa bona Dirava idia hanamoa, idia gwau: ‘Dirava ese idau bese taudia dekenai dala ia kehoa idia helalo-kerehai totona, unai amo idia danu mauri idia abia diba.’” (Kara 11:18) Unai lalohadai namona ese kongrigeisen lalonai lalotamona ia havaraia.

¹⁸ Hari, tomadiho momokani taudia idia hekwarahi lalotamona ai idia noho totona, badina idia be “bese ibounai, iduhu ibounai, taunimanima bona gado idauidau amo” idia mai. (Apok. 7:9) Kongrigeisen momo lalonai, ita ese iduhu, kastom, bona noho daladia idauidau taudia ita davaria. Namona be sibona ita nanadaia: ‘Taunimanima inai henia kava karana be egu kudouna amo lau kokia momokani, a? Egu Keristani tadikaka lau kara henidia neganai, lau ese bese bona iduhu abia isi karana, eiava kastom o kopina kala dainai hekokoroku karana lau hahedinaraia, a?’  Idau Bese taudia ginigunadia idia helalo-kerehai bona lagani haida murinai, Petero (Kepa) dekenai ia vara gauna mani ita laloa. Petero be Iuda taudia ese ma haida idia laloa maragi karana ia laloa dainai, Idau Bese Keristani taudia ida noho hebou karana “ia hadokoa bona ia bamodia lasi.” To Paulo ese ena lalohadai ia hamaoromaoroa. (Gal. 2:11-14) Namona be bese ma ta lalodika henia karana ita dadaraia.

19. Antioka ai idia noho Iuda Keristani taudia be daidia idia haroro henia, bona unai ese dahaka namo ia havaraia?

¹⁹ Iesu murinai idia raka taudia be kopina utua lasi Idau Bese taudia dekenai idia haroro matamaia, a? Suria ai ia noho hanuana, Antioka dekenai ia vara gauna mani ita laloa. d Unai hanua ai Iuda taudia momo idia noho, to idia bona Idau Bese taudia huanai heiriheiri karana ia noho lasi. Unai dainai Antioka be teritori namona Idau Bese taudia haroro henia totona. Unuseniai, Iuda hahediba taudia haida be “Grik gado ai idia hereva taudia” dekenai sivarai namona idia harorolaia. (Kara 11:20) Idia be unai taudia sibona dekenai idia haroro lasi, to kopina utua lasi Idau Bese taudia idia haroro henia danu. Iehova ese unai gaukara ia hanamoa bona “hutuma be abidadama taudia ai idia lao.”​—Kara 11:21.

20, 21. Edena dala ai Banaba ia manau, bona eda hesiai gaukara lalonai, edena dala ai manau karana ita hahedinaraia?

²⁰ Antioka ai kamonai taudia momo idia noho dainai, Ierusalema kongrigeisen ese Banaba be unuseniai ia siaia. To gaukara be bada dainai, ia hegeregere lasi unai gaukara ia karaia totona. Bese idauidau taudia edia aposetolo ai do ia lao tauna, Saulo, be ia hegeregere momokani unai gaukara ia karaia totona, ani? (Kara 9:15; Roma 1:5) Banaba ese Saulo do ia dadaraia, a? Lasi, ia ese manau karana ia hahedinaraia. Badina dala ia karaia Taso dekenai do ia lao, Saulo ia tahua, bona Antioka dekenai do ia hakaua mai, idia gaukara hebou totona. Unuseniai lagani tamona idia noho, bona kongrigeisen taudia idia hagoadaia.​—Kara 11:22-26a.

²¹ Iseda haroro gaukara lalonai, edena dala ai manau karana ita hahedinaraia diba? Unai kara idia hahedinaraia taudia idia laloparara, idia karaia diba gaudia be mai ena hetoana. Ita ibounai eda goada bona diba be idauidau. Hegeregere, haida ese ruma ta ta o dala idauidau ai haroro gaukara idia karaia namonamo, to idia hekwarahi lou henia idia karaia o Baibel stadi idia hamatamaia totona. Bema oi ura emu hesiai gaukara ena kahana haida oi hanamoa, heduru oi tahua be namo, ani? Unai bamona oi karaia neganai, emu hesiai gaukara lalonai huahua momo do oi havaraia bona do oi moale bada.​—1 Kor. 9:26.

22, 23. Antioka Keristani taudia ese edena dala ai tadikaka lalokau henia karana idia hahedinaraia? Bona hari edena dala ai Dirava ena taunimanima ese unai kara idia tohotohoa?

²² Antioka ai “Dirava ena hakaua henunai, hahediba taudia ese nega ginigunana inai ladana Keristani idia abia.” (Kara 11:26b) Unai ladana be Dirava ese ia abia dae  bona ia be Keriso ena murinai idia raka taudia edia mauri dalana ia hahedinaraia goevagoeva. Idau Bese taudia be Keristani taudia ai idia lao neganai, idia bona Iuda taudia huanai tadikaka lalokau henia karana ia noho, a? Lagani 46 C.E. ai, hitolo bada ia vara neganai, mani ia vara gauna ita laloa. e Idaunegai, hitolo bada ese ogogami taudia edia mauri ia hadikaia momokani, badina idia dekenai moni bona aniani bada ia noho lasi. Unai nega lalonai, Iudea ai idia noho Iuda Keristani taudia momo be ogogami taudia, unai dainai aniani bona heduru gaudia ma haida idia abia be namo. Antioka ai idia noho tadikaka—Idau Bese Keristani taudia danu—ese unai sivarai idia kamonai neganai, ‘heduru gaudia be Iudea ai idia noho tadikaka dekenai idia siaia.’ (Kara 11:29) Unai be tadikaka lalokau henia karana momokani!

²³ Hari, Dirava ena taunimanima danu be unai bamona idia karaia. Bema ita kamonai iseda tadikaka—tano ma ta ai o iseda gabu ai—idia dabu, mai eda ura ida dala ita tahua ita durudia totona. Brens Komiti ese maoromaoro Disasta Relief Komiti idia hegaegaelaia, unai amo dika badadia hegeregere lai gubadia, tano mareremarere, bona sunami ese ia hadikaia tadikaka bona taihu idia durua. Unai bamona heduru henia daladia ese tadikaka lalokau henia karana ia hahedinaraia.​—Ioa. 13:34, 35; 1 Ioa. 3:17.

24. Edena dala ai ita hahedinaraia, Petero ia itaia matahanai ena anina ita laloa bada?

²⁴ Ita be Keristani taudia korikoridia dainai, Petero ese Iopa ai ruma ataiai ia itaia matahanai ita dekenai be mai anina bada. Ita tomadiho henia Diravana ese taunimanima edia toana ia laloa lasi. Iena ura be ena Basileia ita harorolaia guguru, unai dainai kopina, bese, bona taga eiava ogogami taudia ita haroro henidia. Vadaeni namona be dala ita karaia, kamonai taudia ibounai dekenai sivarai namona ita harorolaia totona.​—Roma 10:11-13.