1-4. Petero dekenai dahaka ia vara? Bema oi be Petero, emu hemami be edena bamona?

 PETERO be dibura ruma ena auri geiti badana amo ia vareai bona unai geiti be mai rege bada ida ia koua. Ia be Roma gadi taudia rua ida idia seinia, bona ena dibura daiutuna dekenai idia hakaua lao. Ia diba lasi ia dekenai dahaka do ia vara, unai dainai hora eiava dina momo lalonai mai haheauka ida ia naria. Unai dibura ruma lalonai ia itaia gaudia be ena daiutu ena haba, iduara ena loka, ena seini, bona gadi taudia.

² Bena dokonai, ia dekenai do ia vara sivarai dikana ia kamonai. King Heroda Agripa Ginigunana ia ura Petero do ia mase. a Oibe, Pasova murinai, Petero be hutuma vairanai do ia mailaia, bona ena hamasea herevana ese hutuma do ia hamoalea. Unai be hagaria herevana ta sibona lasi, to do ia vara momokani. Petero ia bamoa aposetolo tauna, Iamesi, be daudau lasi gunanai Heroda ese ia hamasea.

³ Petero be murina dinana ai do idia hamasea, to unai hanuaboi ai ena dibura daiutuna lalonai, dahaka ia laloa noho? Lagani haida gunanai Iesu ese Petero ia hamaoroa, nega ta ia do idia guia bona do idia hakaua lao bona hamasea. Petero ese unai hereva ia laloatao, a? (Ioa. 21:18, 19) Reana Petero ia laloa, Iesu ia gwauraia negana ia ginidae unai.

⁴ Bema oi be Petero, emu hemami be edena bamona? Reana momo do idia lalomanoka, do idia laloa ta ese idia do ia durua lasi. To, Iesu Keriso murinai idia raka taudia ese unai bamona hekwakwanai idia davaria negadiai, heduru be lasi, a? Petero bona ena bamodia ese dagedage karana idia haheaukalaia amo, dahaka ita dibaia? Mani ita itaia.

5, 6. (a) Dahaka dainai bona edena dala ai King Heroda Agripa Ginigunana ese Keristani kongrigeisen ia dagedage henia? (b) Dahaka dainai Iamesi ena mase be hahetoho ta kongrigeisen dekenai?

⁵ Karoa 9 ai ita itaia bamona, Idau Bese tauna Korenelio bona ena famili idia helalo-kerehai karana be moale bada gauna Keristani kongrigeisen  dekenai. To, reana abidadama lasi Iuda taudia idia hoa, badina idia itaia Iuda Keristani taudia momo bona Iuda lasi taudia be Dirava idia tomadiho henia hebou.

⁶ Heroda ia laloa, unai dala ia gaukaralaia abidadama lasi Iuda taudia edia lalona ia veria, Keristani taudia idia dagedage henia totona. Ia kamonai, aposetolo tauna Iamesi be Iesu Keriso ena turana namona. Unai dainai, Heroda ese “Ioane ena tadikaka Iamesi be tuari kaia amo ia alaia.” (Kara 12:2) Kongrigeisen dekenai unai be hahetoho badana ta! Iamesi bona aposetolo taudia ma rua be Iesu ena toana ia idau karana bona hoa karadia ma haida idia itaia, unai gaudia be aposetolo taudia ma haida ese idia itaia lasi. (Mat. 17:1, 2; Mar. 5:37-42) Iamesi bona ena tadikaka Ioane edia ura goadana dainai, Iesu ese ia gwauraidia “Guba Boiboi Natudia.” (Mar. 3:17) Unai dainai Iamesi ia mase neganai, kongrigeisen ese abidadama witnes tauna bona idia lalokau henia bada aposetolo tauna idia haboioa.

7, 8. Petero idia hadiburaia neganai, kongrigeisen taudia be dahaka idia karaia?

⁷ Agripa ena ura hegeregerena, Iamesi ena mase ese Iuda taudia ia hamoalea. Unai kara dainai, Agripa be goada ia abia bona ia ura Petero ia hamasea danu. Inai karoa ena matamanai ia hahedinaraia, ia ese Petero ia dogoatao. To karoa 5 dekenai ita itaia bamona, Agripa ia laloatao, guna aposetolo taudia be hoa dalanai dibura ruma amo idia raka-lasi. Heroda ese Petero be seini amo ia guia bona gadi rua ese idia gimaia, gadi ibounai 16 be dina bona hanuaboi ai edia nega ta ta ai Petero idia naria, unai amo do ia heau lasi. Bema Petero be dibura amo ia heau, anina be unai gadi taudia do idia hamasedia. Unai nega aukana lalonai, Petero ena Keristani tadikaka be dahaka do idia karaia?

⁸ Kongrigeisen taudia idia diba dahaka do idia karaia. Kara 12:5 ia gwau: “Vadaeni Petero be dibura ruma ai ia noho, to kongrigeisen taudia be ia totona Dirava  idia guriguri henia goadagoada.” Oibe, idia be mai edia kudouna ibounai ida Petero totona idia guriguri. Iamesi ena mase ese edia lalona ia hamanokaia lasi, eiava unai kara dainai guriguri karana idia laloa maragi lasi. Iehova dekenai guriguri karana be mai anina bada. Bema eda guriguri be Iehova ena ura hegeregerena, vadaeni do ia haerelaidia. (Heb. 13:18, 19; Iam. 5:16) Hari, Keristani taudia dekenai guriguri karana be mai anina bada danu.

9. Petero ena Keristani tadikaka edia guriguri karana amo, dahaka ita dibaia?

⁹ Hekwakwanai idia davaria tadikaka taihu haida oi diba, a? Idia haida be dagedage karadia idia davaria, gavamani ese ia koudia, idia gorere, eiava disasta badadia idia davaria. Idia totona ita guriguri be gau badana. Reana ita diba taudia haida ese idia davaria hekwakwanai idauidau ita diba lasi. Hegeregere ruma bese ena metau idauidau, lalomanoka gaudia, o abidadama ia tohoa gaudia haida idia haheaukalaia. Oi laloa dobu guna bona oi guriguri neganai, reana Iehova, “Guriguri kamonai Diravana,” oi hereva henia lalonai idia ta ta edia ladana oi gwauraia diba. (Sal. 65:2) Laloaboio lasi, metau oi davaria negadiai, oi ura emu tadikaka taihu danu be oi totona idia guriguri, ani?

10, 11. Iehova ena aneru ese dibura rumana amo Petero ia ruhaia dalana, mani oi herevalaia.

¹⁰ Petero do idia hamasea dainai ia lalohekwarahi, a? Unai ita diba lasi, to unai hanuaboi ginigabena ai dibura ruma ai ia noho neganai, ia be gadi taudia rua huanai ia mahuta boio. Inai abidadama tauna ia diba momokani, herevana dahaka do ia vara, to Iehova ese do ia gimaia. (Roma 14:7, 8) Oibe, Petero ia diba lasi unai hanuaboi ai hoa gaudia do idia vara. Diari ta ese ia noho dibura ruma ena daiutu ia  hadiaria. Aneru ta be Petero badinai ia gini bona ia ia hanogaia, to gadi taudia be unai aneru idia itaia lasi. Bona Petero ena imana idia guia seini—toana be do idia makohia diba lasi gauna—be tano dekenai ia moru!

¹¹ Aneru ese Petero dekenai hadibaia hereva kwadogidia haida ia henia: “Oi toreisi haraga! . . . Oi hegaegae bona emu sandolo oi kwatua. . . . Emu ataiai dabua oi karaia.” Petero be mai ura bada ida aneru ena hereva ia badinaia. Dokonai, aneru ia gwau: “Lau oi badinaia.” Bona Petero be unai bamona ia karaia. Dibura ruma ena daiutu idia rakatania, murimuri ai idia gini gadi taudia huana amo idia raka hanai, bona mai regerege lasi ida auri geiti badana dekenai idia raka lao. To edena bamona unai geiti badana amo do idia raka-lasi? Reana Petero be nega sisina sibona lalonai unai ia laloa. Badina geiti kahirakahira idia lao neganai, “unai geiti be sibona ia kehoa.” Petero bona aneru be unai geiti amo idia raka-lasi bona dala dekenai idia lao murinai, aneru ia boio. Bena daudau lasi Petero ia laloparara, unai gaudia ibounai be idia vara momokani. Inai be matahanai ta lasi. Aneru ese Petero ia ruhaia!​—Kara 12:7-11.   

12. Iehova ese Petero ia ruhaia karana ita laloa neganai, unai ese edena bamona ita ia hagoadaia?

¹² Iehova ena siahu be bada ena hesiai taudia ia hamauria totona, unai ita laloa karana ese ita ia hagoadaia, ani? Unai nega ai ia noho gavamani goadana ese Petero ia hadiburaia. To, Petero be dibura rumana amo ia raka-lasi! Oibe, Iehova be ena hesiai taudia ibounai totona unai bamona hoa karadia ia karaia lasi. Ia ese hoa dalanai Iamesi ia hamauria lasi, bona gabeai Petero dekenai Iesu ena hereva ia guguru neganai, ia dekenai ia vara gauna Ia koua lasi. Hari inai negai, Keristani taudia idia laloa lasi Dirava ese hoa dalanai do ia hamauridia. To namona be ita laloatao, Iehova ena kara ia haidaua lasi. (Mal. 3:6) Bona kahirakahira ena Natuna amo taunimanima milioni momo be mase—dibura ruma bamona—amo do ia ruhadia. (Ioa. 5:28, 29) Hari, hahetoho ita davaria neganai, unai gwauhamata herevadia amo goada ita abia.

13-15. (a) Maria ena ruma dekenai idia hebou taudia be Petero idia itaia neganai, edena bamona idia kara? (b) Kara bukana ese dahaka ia herevalaia matamaia, bona Petero be dahaka ia karaia ena tadikaka bona taihu ia durua totona?

¹³ Petero be unai hanuaboi ena dibura dekenai ia gini, ia diba lasi edeseni do ia lao. Bena ena lalona ia hadaia, Keristani hahinena, Maria, ena ruma dekenai do ia lao. Ia be vabu ta bona ruma badana ai ia noho, unai ese ia hahedinaraia ia be mai ena kohu momo, bona kongrigeisen taudia be unuseni idia hebou. Ia be Ioane Mareko ena sinana, Kara bukana lalonai nega ginigunana ena ladana ia gwauraia. (1 Pet. 5:13) Herevana unai be hanuaboi momokani, to kongrigeisen taudia be Maria ena ruma dekenai idia guriguri goadagoada noho. Oibe, Iehova ese Petero do ia ruhaia totona idia guriguri, to idia diba lasi gauna be, edia guriguri ia haerelaia!

¹⁴ Petero be geiti ena iduara ai ia pidipidi neganai, hesiai kekenina Roda ia mai.  Roda be Grik ladana, ena anina be “Rose,” unai be flaoa ta ena ladana. Petero ena gadona ia kamonai neganai, ia hoa dikadika! Unai dainai, iduara ia kehoa lasi, to mai moale ida ia heau lao bona tadikaka taihu ia hadibaia Petero be iduara ai ia gini. Idia gwau ia kavakava, to ia hereva goadagoada noho. Ia hamaorodia Petero be momokani ia mai. Reana ena lalohadai durua totona, idia haida idia gwau, reana aneru ta ena gadona ia kamonai. (Kara 12:12-15) Unai ia vara noho lalonai, Petero be iduara dekenai ia do pidipidi noho, ela bona idia mai bona iduara idia kehoa.

¹⁵ Bena Petero “idia itaia neganai, idia hoa dikadika”! (Kara 12:16) Ia idia itaia dainai idia moale bada, ena imana amo toa ia karaia do idia regerege lasi, bena ena sivarai ia gwauraia, bona ia hamaorodia unai sivarai be hahediba tauna Iamesi bona tadikaka dekenai do idia gwauraia. Unai murinai idia ia rakatania, Heroda ena tuari taudia ese ia idia davaria garina. Bona gabu ma ta dekenai ia lao, ena hesiai gaukara ia karaia totona. To gabeai kopina utua hepapahuahu ia vara neganai, Kara karoa 15 ese Petero ia sivarailaia, to unai murinai ia ia sivarailaia lou lasi. To aposetolo Paulo ena gaukara bona loaloa ia herevalaia matamaia. To ita diba momokani, Petero ia lao gabudia ibounai dekenai, tadikaka bona taihu edia abidadama ia hagoadaia bada. Unai dainai, Maria ena ruma ai idia hebou tadikaka taihu danu be idia moale bada, vadaeni idia ia rakatania bona ia lao.

16. Dahaka dainai vaira negai do ita moale bada?

¹⁶ Nega haida Iehova ese ena hesiai taudia dekenai idia noia gaudia sibona ia henia lasi, to gau ma haida danu ia henia, bona unai ese edia moale ia habadaia. Unai hanuaboi ai, Petero totona idia guriguri tadikaka taihu be unai bamona hemami idia abia. Hari inai negai, Iehova amo hahenamo ita abia neganai, unai bamona hemami ita abia danu. (Aon. 10:22) Vaira negai do ita itaia, Iehova ese tanobada hegegemadai ena gwauhamata ibounai do ia hagugurua. Unai nega namona ia vara neganai, Iehova ese hari ita laloa gaudia sibona do ia henia lasi, to hahenamo momo herea do ia henia. Unai dainai bema hari eda abidadama ita dogoatao noho, vaira negai gau namodia momo do ita moalelaia.  

17, 18. Dahaka dainai hutuma ese Heroda idia hanamoa?

¹⁷ Petero ia heau mauri karana dainai Heroda ia hoa. Karaharaga Heroda ese oda ia atoa unai gabu ibounai dekenai Petero idia tahua totona, bena unai gadi taudia idia henanadai henidia danu. Unai gadi taudia ese “idia hakaua lao idia panisidia totona,” toana be do idia hamasedia. (Kara 12:19) Heroda Agripa be hebogahisi tauna lasi. Unai tau dikana idia panisia, a?

¹⁸ Agripa be Petero hamasea karana dekenai ia kwalimu lasi dainai, reana unai ese ia hahemaraia, to daudau lasi ena hekokoroku karana ia hahedinaraia lou. Hekwakwanai ta ia vara bona ena inai taudia idia ura ia ida maino idia karaia, bona toana be ia ura hutuma vairanai ena hereva ia gwauraia. Luka ia gwau  unai negai, “Heroda be king ena dabua ia hahedokilaia.” Histori torea Iuda tauna, Josephus, ese Heroda ena dabua ia herevalaia neganai, ia gwau unai dabua be siliva amo, unai dainai dina ia diari neganai, king ena toana ia diaridiari. Unai hekokoroku tauna be ena hereva ia gwauraia. Heroda idia hanamoa hutuma idia boiboi, idia gwau: “Inai be dirava ta ena gadona, taunimanima ena gadona lasi!”​—Kara 12:20-22.

19, 20. (a) Dahaka dainai Iehova ese Heroda ia panisia? (b) Heroda Agripa ena mase sivaraina ese edena dala ai ita ia hagoadaia?

¹⁹ Dirava dekenai unai hanamoa idia henia be namo, badina Dirava ese unai ia itaia! Heroda ese dika ia davaria lasi totona, hutuma edia lalohadai ia hamaoromaoroa eiava edia hereva dekenai ia moale lasi be namo. To, inai aonega herevana be ia dekenai ia guguru: “Hekokoroku karana be dika ia lao henia.” (Aon. 16:18) “Maoromaoro Iehova ena aneru ese ia botaia,” bona unai hekokoroku tauna be dala dikana ai hisihisi ia abia bona ia mase. Oibe, Heroda be “gaigai maragidia ese ena tauanina idia ania bona ia mase.” (Kara 12:23) Josephus ia gwau danu, Agripa be maoromaoro hisihisi ia ania, bona ma ia hahedinaraia, king ia gwau ia mase badina hutuma edia hanamoa hereva ia abia dae. Josephus ma ia gwau Agripa be dina faiv sibona ia noho bena ia mase. b

²⁰ Nega haida Dirava idia dadaraia taudia be edia kara dika ena panisi idia abia lasi. Unai kara dainai ita hoa lasi, badina “tanobada ibounai be Dika Tauna ena siahu lalonai ia noho.” (1 Ioa. 5:19) To, toana be kara dika taudia ese panisi idia abia lasi neganai, Dirava ena abidadama hesiai taudia be nega haida unai idia lalohisihisilaia. Unai dainai, Heroda dekenai ia vara gauna ese ita ia hagoadaia. Oibe, ita itaia Iehova be kara ta ia karaia, unai amo ena hesiai taudia ia hadibaia, ia be hahemaoro goeva ia ura henia Diravana. (Sal. 33:5) Kahirakahira ena hahemaoro goeva karana do ia hahedinaraia momokani.

21. Kara karoa 12 ai, dahaka mai anina bada gauna ita dibaia, bona hari edena dala ai ita do ia hagoadaia?

²¹ Unai sivarai ena dokonai ia noho herevana ese ita ia hagoadaia: “Iehova ena hereva ia tubu daekau bona gabu ibounai dekenai ia lao.” (Kara 12:24) Unai negai, Iehova ese haroro gaukara ia hanamoa dainai, edia namba ia bada daekau, hari inai negai danu, Ia ese iseda gaukara ia hanamoa. Kara karoa 12 ese aposetolo tauna ta ena mase, bona ta be dibura ruma amo ia heau mauri sivaraidia sibona ia gwauraia lasi. To ia hahedinaraia danu, Satani ia ura Keristani kongrigeisen bona ena haroro goadagoada karana ia hadikaia, to Iehova ese unai ia koua. Oibe, unai bamona palani ta be do ia kwalimu diba lasi. (Isa. 54:17) Danu, Iehova bona Iesu edia kahanai idia gini taudia ese idia karaia gaukarana be ta ese do ia hadikaia lasi. Unai ese iseda lalona ia hagoadaia, ani? Hari inai negai, “Iehova ena hereva” ita harorolaia be hahenamo bada!