1, 2. Ena be Keristani ginigunadia edia nega ai haroro gaukara idia koua, to unai ese edena dala ai namo ia havaraia?

 DAGEDAGE bada ia vara matamaia, bona Saulo ese kongrigeisen ia “dagedage henia bada.” (Kara 8:3) Hahediba taudia idia heau neganai, reana haida idia laloa Saulo ese Keristani tomadihona do ia hadikaia ore. To Keristani taudia be gabu idauidau dekenai idia lao neganai, idia laloa lasi gauna ta ia vara. Unai be dahaka?

² Tano ma haida dekenai idia heau lao taudia ese “Dirava ena hereva ena sivarai namona idia harorolaia” matamaia. (Kara 8:4) Mani ita laloa: Dagedage karana ese sivarai namona harorolaia gaukarana ia koua lasi, to unai gaukara ia habadaia! Ena be dagedage taudia ese hahediba taudia idia lulua, to unai ese dala ia kehoa, Basileia sivaraina be daudau gabudia dekenai idia gwauraia totona. Do ita itaia, hari iseda negai unai bamona ia vara danu.

3. (a) Filipo be daika? (b) Dahaka dainai Samaria taudia be sivarai namona idia do kamonai lasi, bona Iesu ia peroveta unai gabu ai dahaka do ia vara?

³ “Idia heau taudia” ta be Filipo. a (Kara 8:4; inai maua, “ ‘Evanelia Tauna’ Filipo” itaia.) Filipo be Samaria hanua dekenai ia lao, guna unuseniai haroro gaukara idia do karaia lasi, badina Iesu ese nega ta ena aposetolo taudia ia hamaoroa: “Samaria ena siti ta lalonai umui vareai lasi, to Israela besena ena boio mamoe sibona dekenai do umui lao.” (Mat. 10:5, 6) To, Iesu ia diba Samaria taudia be sivarai namona do idia kamonai, unai dainai guba dekenai ia do lao lasi neganai, ia gwau, “Ierusalema, Iudea ibounai, Samaria, bona tanobada ena daudau momokani gabudia dekenai lau do umui gwauraia hedinarai.”​—Kara 1:8.

4. Dahaka dainai Samaria taudia ese Filipo ena hereva idia abia dae?

 ⁴ Filipo ia itaia, Samaria ena witi uma “idia kurokuro vadaeni gogoa totona.” (Ioa. 4:35) Iena hereva amo unuseni idia noho taudia ia hagoadaia, bona unai ena badina ita lalopararalaia diba. Iuda taudia be Samaria taudia idia tura henia lasi, bona edia kara amo idia hahedinaraia Samaria taudia idia inai henia. To, Samaria taudia idia itaia, sivarai namona be taunimanima ibounai totona, Farisea taudia edia lalohadai bamona lasi, idia be haida sibona idia kara namo henia. Iuda taudia ese Samaria taudia idia lalodika henia, to Filipo ese unai kara ia hahedinaraia lasi, ia be mai ura bada ida idia dekenai sivarai namona ia harorolaia. Unai dainai, Samaria taudia momo be “mai lalotamona ida” Filipo ena hereva idia kamonai henia.​—Kara 8:6.

5-7. Edena dala ai Keristani taudia be tano ma ta dekenai sivarai namona idia abia lao? Haheitalai haida gwauraia.

⁵ Keristani taudia ginigunadia bamona, ena be hari Dirava ena taunimanima ese dagedage idia davaria, to haroro gaukara idia hadokoa lasi. Nega momo Keristani taudia idia doria edia gabu idia rakatania—tano o dibura ruma ma ta dekenai idia lao totona—bona unai amo idia lao gabudia dekenai Basileia sivaraina idia harorolaia. Hegeregere, Tanobada Tuarina Iharuana lalonai, Iehova ena Witnes taudia be Nazi dibura kamepadia dekenai idia noho neganai, ma haida idia haroro henia. Unuseniai Witnes taudia ia davaria Iuda  tauna ia gwau: “Unai neganai, Iehova ena Witnes dibura taudia idia lalogoada dainai, lau diba edia abidadama ena badina be Baibel dekenai—bona lau be Witnes ta ai lau lao.”

⁶ Nega haida, Witnes taudia idia dagedage henia taudia danu ese sivarai namona idia abia dae. Hegeregere, Austria dekenai Witnes ta ladana, Franz Desch, be Gusen kamepa dekenai idia abia lao neganai, unuseniai gadi ofesa ta ia stadi henia. Lagani haida murinai, hebouhebou badana ta dekenai idia hedavari lou bona idia moale bada herea, idia ruaosi be sivarai namona harorolaia taudia!

⁷ Keristani taudia be tano ta idia rakatania bona tano ma ta dekenai idia lao neganai, unai bamona gauna ta ia vara danu. Hegeregere, lagani 1970 lalodiai, dagedage dainai Malawi Witnes taudia be Mozambique dekenai idia lao neganai, unuseniai haroro gaukara idia karaia. Ena be Mozambique dekenai dagedage bada ia vara danu, to haroro gaukara idia hadokoa lasi. Francisco Coana ia gwau: “Momokani, emai haroro gaukara dainai, pulisi ese ai idia dogoatao loulou. To, momo be Basileia sivaraina idia kamonai bona abia dae neganai, ai diba Dirava ese ai ia durua, Keristani ginigunadia dekenai ia karaia bamona.”

8. Politikol bona moni ena siahu ia maragi karana ese edena dala ai haroro gaukara ia durua?

⁸ Oibe, dagedage karana dainai, idau tanodia dekenai Keristani taudia edia namba ia tubu daekau, to unai badina sibona lasi. Vanegai laganidia lalonai, politikol heiriheiri bona moni ena siahu ia maragi dainai, unai ese dala ia kehoa Basileia sivaraina be gado bona tano idauidau amo idia mai taudia dekenai idia gwauraia. Haida be tuari bona ogogami tanodia idia rakatania bona tano ma haida dekenai idia lao, bona unuseniai Witnes taudia ida Baibel idia stadilaia matamaia. Refiuji momo dainai, idau gado teritori matamatadia momo idia hamatamaia. Oi hekwarahi emu teritori ai “bese ibounai, iduhu ibounai, taunimanima bona gado idauidau” taudia oi haroro henia totona, a?​—Apok. 7:9.

9. Simona be daika, bona dahaka dainai abidadama tauna ai ia lao?

⁹ Filipo be Samaria ai hoa karadia momo ia karaia. Hegeregere, edia tauanina ena kahana ia dika taudia ia hanamoa bona lauma dikadia ia lulua danu. (Kara 8:6-8) Tau ta be Filipo ia karaia hoa karadia dainai ia hoa bada. Ia be Simona, meamea tauna, bona taunimanima ese idia laloa bada dainai, idia gwau: “Dirava ena siahu badana be inai tauna dekenai ia noho.” To Simona be Filipo ese ia karaia hoa karadia amo Dirava ena siahu korikorina ia itaia, unai dainai abidadama tauna ai ia lao. (Kara 8:9-13) To gabeai, Simona be abidadama tauna ai ia lao ena badina korikori ia hedinarai. Edena dala ai?

10. (a) Petero bona Ioane be Samaria dekenai dahaka idia karaia? (b) Hahediba taudia matamatadia ese lauma helaga idia abia neganai, Simona be dahaka ia karaia?

¹⁰ Aposetolo taudia idia kamonai Samaria dekenai kamonai taudia edia  namba ia bada neganai, Petero bona Ioane be unuseni idia siaia. (Inai maua, “ Petero ese ‘Basileia Ena Ki’ Ia Gaukaralaia” itaia.) Petero bona Ioane be unuseni idia ginidae neganai, unai hahediba taudia matamatadia latanai edia imana idia atoa, unai amo lauma helaga idia abia. b Simona be unai ia itaia neganai, unai ese ena lalona ia veria. Aposetolo taudia ia hamaoroa: “Lau dekenai inai siahu umui henia danu, unai amo idia latanai egu imana lau atoa taudia ibounai ese lauma helaga do idia abia.” Simona ese idia dekenai moni ia henia, badina ia ura Dirava ese idia dekenai ia henia siahuna ia hoia!​—Kara 8:14-19.

11. Petero ese Simona dekenai dahaka sisiba herevana ia gwauraia, bona Simona be dahaka ia karaia?

¹¹ Petero ese Simona ia hereva auka henia, ia gwau: “Namona be emu siliva moni be oi ida ia dika hebou. Oi laloa moni amo Dirava ese ai dekenai ia henia davana lasi harihari gauna do oi abia, a? Oi be inai hesiai gaukara ena kahana ta lalonai do oi vareai lasi, badina Dirava ena vairanai oiemu kudouna be ia maoro lasi.” Petero ese Simona ia noia ia helalo-kerehai bona ena dika gwauatao totona do ia guriguri. Petero ia gwau: “Iehova oi noinoi henia bona reana, ia ese emu kudouna ena ura dikadia [“emu koikoi karadia,” New Jerusalem Bible] do ia gwauatao.” Toana be Simona be tau dikana lasi, ia ura kara maorona ia karaia, to unai ia karaia totona dala maorona ia diba lasi. Unai dainai aposetolo taudia ia noia, ia gwau: “Mani lau totona Iehova umui noinoi henia, unai amo umui gwauraia gaudia ta  be lau dekenai do ia vara lasi.”​—Kara 8:20-24.   

12. “Simony” be dahaka? Bona Kerisendom lalonai unai kara be edena bamona ia bada ia lao?

¹² Petero ese Simona ia hereva auka henia amo hari Keristani taudia dekenai gau ta ia hadibaia. Unai kara ia vara murinai, inai hereva “Simony” idia gaukaralaia. Anina be dubu lalonai dagi hoia o hoihoilaia karana. Kerisendom ena histori lalonai unai bamona kara ia vara matamaia bona ia bada ia lao. Oibe, buka ta, The Encyclopædia Britannica (1878) volium 9, ia gwau: “Pope abia hidi hebouheboudia edia histori ia stadilaia tauna ia davaria, eleksen ibounai lalonai idia ese dagi hoia o hoihoilaia karana idia karaia, nega momo unai hebouhebou lalodiai unai kara be dika momokani, idia hemarai lasi, bona taunimanima ibounai ese idia itaia diba dalanai idia karaia.”

13. Edena dala ai Keristani taudia ese dagi hoia o hoihoilaia karana dekenai idia naria namonamo be namo?

¹³ Namona be Keristani taudia ese dagi hoia o hoihoilaia karana dekenai idia naria namonamo. Hegeregere, namo lasi idia ese maduna haida abia totona, kongrigeisen ai maduna idia huanai taudia dekenai hanamoa o harihari gaudia momo idia henia. Danu, maduna idia huaia taudia ese taga taudia sibona kara namo henia karana dekenai idia naria namonamo. Unai bamona kara be maoro lasi. Namona be Dirava ena hesiai taudia be taunimanima huanai “ia maragi tauna,” anina be mai haheauka ida idia naria, Iehova ena lauma ese idia ia abia hidi hesiai gaukaradia ena hahenamo idia abia totona. (Luka 9:48) Dirava ena orea lalonai, ‘sibona totona hanamoa bada idia tahua’ taudia totona gabu be lasi.​—Aon. 25:27.

14, 15. (a) Etiopia eunuko tauna be daika, bona edena dala ai Filipo ese ia davaria? (b) Etiopia tauna be Filipo ena hereva ia kamonai neganai, dahaka ia karaia? Bona dahaka dainai ena bapatiso be ia karaia haraga gauna lasi? (Futnout itaia.)

¹⁴ Iehova ena aneru ese Filipo ia hamaoroa, Ierusalema amo Gasa ia lao henia dalana dekenai do ia lao. Bona reana Filipo be unuseni ia lao ena badina ia lalohadailaia, to Etiopia eunuko tauna ia hereva henia murinai, ia lao ena badina ia lalopararalaia. Unai Etiopia tauna be “peroveta tauna Isaia ena  buka ia duahia badabada.” (Inai maua, “ ‘Eunuko’ Ena Anina be Dahaka?” itaia.) Iehova ena lauma helaga ese Filipo ia hakaua bona unai tau ena kariota dekenai ia lao. Bona Etiopia tauna ena kariota badinai ia heau lalonai, ia nanadaia: “Oi duahia gaudia oi diba, a?” Etiopia tauna ia gwau: “Edena bamona do lau diba bema ta ese lau ia hadibaia lasi?”​—Kara 8:26-31.

¹⁵ Etiopia tauna ese Filipo ia hamaoroa ena kariota dekenai ia guia totona. Bona idia ruaosi be mai moale ida gau momo idia herevalaia. Isaia ena peroveta herevana lalonai, ia gwauraia “mamoe” eiava “hesiai tauna” edia anina be nega daudau lalonai ia hedinarai lasi. (Isa. 53:1-12) To idia lao noho lalonai, Filipo ese Etiopia tauna dekenai ia hahedinaraia, unai peroveta herevana be Iesu Keriso dekenai ia guguru. Pentekoste 33 C.E. ai bapatiso idia abia taudia bamona, unai Etiopia tauna—Iuda tomadiho ia abia dae tauna unai—be maoromaoro ia diba dahaka do ia karaia be namo. Unai dainai Filipo dekenai ia gwau: “Itaia! Ranu inai, dahaka ese lau ia koua lau bapatiso totona?” Maoromaoro Filipo ese Etiopia tauna ia bapatisoa! c (Inai maua “ ‘Ranu’ Lalonai Bapatiso” itaia.) Unai murinai, lauma helaga ese Filipo be Asadoda dekenai ia hakaua lao, bona unuseniai sivarai namona ia harorolaia noho.​—Kara 8:32-40.

16, 17. Hari inai negai, edena dala ai aneru ese haroro gaukara idia durua?

¹⁶ Hari, Keristani taudia ese Filipo ia karaia gaukarana idia karaia be hahenamo ta. Nega momo, nega bona gabu idauidau ai Basileia sivaraina idia harorolaia. Kudou-maoro tauna idia davaria karana be nega momo ia vara kava lasi. Badina Baibel ia hahedinaraia aneru ese haroro gaukara idia hakaua dainai, sivarai namona be “bese ibounai bona iduhu ibounai, gado ibounai, bona kopi idauidau taudia ibounai” ese idia kamonai. (Apok. 14:6) Iesu ena peroveta hereva bamona,  aneru edia hakaua henunai haroro gaukara ita karaia. Witi bona ava dikadia ena parabole lalonai, Iesu ia gwau aniani gogoa negana—nega oromana ena dokona unai—ia ginidae neganai, “gogoa taudia be aneru.” Ma ia gwau, aneru ese ‘Basileia amo taunimanima idia hahekwakwanaia gaudia ibounai bona taravatu idia utua taudia do idia kokia.’ (Mat. 13:37-41) Unai nega dekenai danu, aneru ese Basileia lalonai do idia lohia taudia idia gogoa guna, bona unai murinai “mamoe ma haida” ena “hutuma bada” taudia do idia gogoa, Iehova ia ura idia be ena orea dekenai ia hakaua mai.​—Apok. 7:9; Ioa. 6:44, 65; 10:16.

¹⁷ Hari unai ia vara noho, haroro gaukara ai ita davaria taudia haida idia gwau, idia be Dirava ena heduru totona idia guriguri. Mani inai ekspiriens ita laloa, Basileia harorolaia pablisa rua bona natu maragina ta be haroro totona idia lao. Bona haroro gaukara ia ore murinai idia ura idia lao, to natu maragina be ia ura ia haroro noho. Unai dainai ia lao bona ruma ta ena iduara dekenai ia pidipidi! Hahine matamatana ta ese iduara ia kehoa neganai, pablisa rua idia lao bona unai hahine idia hereva henia. Idia hoa, badina unai hahine ia gwau, ia guriguri ta ese ia do ia durua Baibel ia lalopararalaia totona. Unai murinai, ia ura Baibel ia stadilaia!

18. Dahaka dainai iseda haroro gaukara ita laloa maragi lasi?

¹⁸ Oi be Keristani kongrigeisen ena kahana ta dainai, haroro gaukara badana lalonai aneru ida oi gaukara hebou be hahenamo badana. Namona lasi unai hahenamo oi laloa maragi. Haroro gaukara oi goadalaia bona “Iesu ena sivarai namona” oi harorolaia karana amo, moale bada do oi davaria.​—Kara 8:35.