1-3. (a) Stefano dekenai dahaka gari gauna ia vara, to edena bamona ia kara? (b) Edena henanadai do ita lalodia?

 STEFANO be kota vairanai ia gini. Ierusalema ena dubu helaga mai hairaina ena badinai ia noho ruma badana ta lalonai, tatau 71 idia helai. Unai be Sanhedrin ena kota gabuna, bona Stefano hahemaoro henia totona idia hebou. Diadi taudia be mai edia siahu bona ladana bada, bona idia momo ese Iesu ena hahediba tauna idia matauraia lasi bona idia ura henia lasi. Hahelaga Tauna Badana, Kaiapa, ese unai diadi taudia ia haboua. Hua haida gunanai, unai kota ese Iesu Keriso hamasea herevana ia gwauraia neganai, Kaiapa ese unai kota ia gunalaia. Stefano ia gari, a?

² Unai nega ai Stefano ena toana ia idau momokani. Diadi taudia idia itaia ena vairana ena “toana be aneru ta bamona.” (Kara 6:15) Aneru be Iehova Dirava ena sivarai idia gwauraia dainai, gau ta dekenai idia gari lasi, bona idia dekenai maino ia noho. Unai dainai Stefano danu be unai bamona, bona idia badu diadi taudia ese unai idia itaia danu. Dahaka dainai ena toana be unai bamona?

³ Hari, Keristani taudia be unai henanadai ena haere amo gau momo idia dibaia diba. Danu, Stefano be unai kota vairanai ia gini ena badina ita diba be namo. Edena dala ai guna ena abidadama ia dogoatao auka? Bona edena dala ai ia ita tohotohoa?

4, 5. (a) Dahaka dainai Stefano be kongrigeisen ia durua namonamo? (b) Edena dala ai Stefano be ‘hebogahisi tauna bona Dirava ena siahu amo ia honu’?

⁴ Ita diba vadaeni, Stefano be Keristani kongrigeisen matamata ia durua namonamo tadikaka ta. Karoa 5 ai ita itaia bamona, idia abia hidi tatau seven amo ia be ta, bona aposetolo taudia be heduru totona idia noia neganai, mai ura bada ida ia durudia. Dirava ese Stefano dekenai harihari gaudia momo ia henia, unai amo ena manau karana ita itaia diba.  Kara 6:8 ai ia hahedinaraia, ia be “hoa bona toa kara badadia” ia karaia, aposetolo taudia haida idia karaia bamona. Danu, Baibel ia gwau ia be “Dirava ese ia lalonamo henia bona Dirava ena siahu amo ia honu” tauna. Unai ena anina be dahaka?

⁵ Grik herevana “Dirava ese ia lalonamo henia” ena anina ma ta idia hahanaia be “hebogahisi.” Stefano be hebogahisi bona manau tauna dainai, taunimanima ese idia ura henia. Ia be lalona veria dalanai ia hereva dainai, ena kamonai taudia idia itaia diba, ia be mai momokani ida ia hereva bona ia hadibaia gaudia be edia namo totona. Bona mai manau ida Iehova ena lauma ena hakaua dalana ia badinaia dainai, unai lauma be ia latanai ia gaukara. Ena be hoa karadia ia karaia bona ia be mai ena diba, to unai gaudia ia hekokorokulaia lasi. Ia ese hanamoa ibounai be Iehova ia henia bona ia hereva henia taudia ia laloa bada. Unai ibounai dainai, ena inai taudia idia laloa ia be dika do ia havaraia!

6-8. (a) Stefano ena inai taudia ese edena hereva koikoidia rua idia gwauraia, bona dahaka dainai? (b) Dahaka dainai, hari Keristani taudia dekenai Stefano ena haheitalai be mai anina bada?

⁶ Kota lalonai, tatau idauidau idia toreisi bona Stefano ida idia hepapahuahu, to “idia hegeregere lasi, badina ia be mai aonega ida bona lauma helaga ena heduru amo ia hereva.” a Bena idia badu dainai, “hehuni ai tatau haida edia lalona idia veria” Stefano idia samania koikoi totona. Danu, idia ese tatau badadia bona taravatu hadibaia taudia amo “taunimanima . . . edia lalona idia veria,” unai amo Stefano be Sanhedrin ena kota vairanai idia hakaua lao. (Kara 6:9-12) Ena inai taudia ese idia samania koikoi neganai, inai gaudia rua idia gwauraia: Ia be Dirava bona Mose edia ladana hadikaia herevadia ia gwauraia. Edena dala ai?  

⁷ Stefano idia samania koikoi taudia idia gwau, ia be Dirava ena ladana ia hadikaia, badina ia ese “inai helaga gabuna”—Ierusalema ena dubu helaga—ia gwauraia dika. (Kara 6:13) Idia gwau, ia ese Mose ena ladana ia hadikaia, badina Mose ese ia henia hanai kastom karadia ia haidaua. Unai be samania hereva badana, badina unai negai Iuda taudia ese dubu helaga, Mose ena Taravatu, bona unai Taravatu dekenai idia atoa kau kastom karadia momo idia laloa bada. Bona unai samani herevadia dainai, taunimanima idia laloa Stefano be tau dikana bona ia mase be maoro!

⁸ Ita hoa lasi, badina tomadiho taudia ese unai dala tamona idia gaukaralaia Dirava ena hesiai taudia idia hadikaia totona. Hari inai negai, tomadiho idia inai henia taudia ese tanobada taudia idia gaukaralaia, Iehova ena Witnes taudia idia dagedage henia totona. Ita herevalaia gaudia idia mogea o ita idia samania koikoi neganai, dahaka ita karaia? Stefano amo gau momo ita dibaia.

9, 10. Stefano ese Sanhedrin vairanai ia gwauraia hereva be haida ese edena bamona idia laloa, bona dahaka ita laloatao be namo?

⁹ Inai karoa ena matamanai ita itaia bamona, Stefano be ena inai taudia edia samani herevadia ia kamonai lalonai, ena vairana toana be aneru bamona. Kaiapa be Stefano ia itaia bona ia gwau: “Inai gaudia be momokani, a?” (Kara 7:1) Bona Stefano ia hereva negana ia ginidae neganai, ia hereva!

¹⁰ Haida ese Stefano ena hereva idia maumauraia, badina idia gwau, ena be ena hereva be lata, to ia idia samania ena badina ia haerelaia lasi. To momokani, sivarai namona dainai idia henanadai taudia “haere henia” dalana dekenai, Stefano ese haheitalai hereadaena ia hahedinaraia. (1 Pet. 3:15) Laloatao, idia gwau Stefano ese Dirava ia gwauraia dika, badina dubu helaga ia dadaraia bona Mose ia gwauraia dika, unai amo Taravatu ia dadaraia. Stefano ena haere lalonai, ia ese Israela ena histori ai nega idaudia toi ia herevalaia, bona hereva badadia haida ia hahedinaraia goevagoeva. Namona be unai nega idaudia toi ita herevalaia.

11, 12. (a) Stefano ese edena dala ai Aberahamo ena haheitalai ia gaukaralaia namonamo? (b) Dahaka dainai Stefano ena hereva lalonai, Iosepa ia herevalaia be mai anina bada?

¹¹ Iduhu kwaradia edia nega. (Kara 7:1-16) Stefano ese Aberahamo ia herevalaia matamaia, ena abidadama dainai Iuda taudia ese ia idia matauraia bada. Unai ia herevalaia lalonai, ia hahedinaraia Aberahamo be guna Mesopotamia dekenai ia noho neganai, “hairai Diravana,” Iehova, be nega ginigunana ia dekenai ia hedinarai. (Kara 7:2) Oibe, Aberahamo be idau tauna bamona Gwauhamata Tanona dekenai ia noho. Iena negai, dubu helaga eiava Mose ena Taravatu ia noho lasi. To, ta be unai bamona dala sibona amo Dirava ia abidadama henia diba, a?

¹² Stefano ena kota herevana idia kamonai taudia be Aberahamo ena tubuna, Iosepa, idia laloa bada, to Stefano ese ia hamaorodia, Iosepa be ena tadikaka ese idia dagedage henia bona igui hesiai tauna bamona idia hoihoilaia. To, Dirava ese Iosepa ia gaukaralaia, doe negana lalonai Israela besena ia durua totona. Stefano ia itaia, Iosepa bona Iesu Keriso dekenai gau haida idia hegeregere, to unai gaudia ia herevalaia lasi, unai amo diadi taudia ese ena hereva idia kamonai noho.

13. Stefano ese Mose ia herevalaia karana amo, edena dala ai ia idia samania herevana ia haerelaia, bona dahaka mai anina bada herevana ia hahedinaraia?

 ¹³ Mose ena nega. (Kara 7:17-43) Stefano be mai aonega ida Mose ia karaia gaudia ia herevalaia, badina Sanhedrin taudia momo be Sadukea taudia, bona idia be Baibel bukadia idia dadaraia, to Mose ese ia torea gaudia sibona idia abia dae. Danu, Stefano idia samania koikoi herevana ta be, ia ese Mose ia gwauraia dika. To ena hereva amo unai ia haerelaia goevagoeva, bona ia hahedinaraia ia be Mose bona ena Taravatu ia matauraia bada. (Kara 7:38) Ia hahedinaraia danu, Mose ia ura ena bese taudia ia hamauria, to ia idia dadaraia, unai negai ena mauri lagani be 40. Israela taudia ese lagani 40 lalodiai, ena hakaua dalana idia badinaia lasi. b Unai dala amo Stefano ese inai mai anina bada herevana ia hahedinaraia: Iehova ese ena taunimanima hakaua totona ia abia hidi taudia idia dadaraia loulou.

14. Stefano ese Mose ena haheitalai ia gwauraia neganai, dahaka mai anina herevana ia hahedinaraia?

¹⁴ Stefano be ena kamonai taudia ia hamaoroa, Mose be ia gwauhamata ia bamona tauna ta be Israela huanai do ia toreisi. Unai be daika, bona ena bese taudia ese do idia abia dae, eiava? Stefano ese unai henanadai ia haerelaidia lasi. To, mai anina bada gauna ma ta ia hahedinaraia: Mose ia dibaia gauna be inai, ia araia noho auna amo Iehova ese ia hereva henia neganai, ia gini tanona be tano helagana ai ia lao. Unai dainai gabu tamona, hegeregere Ierusalema ena dubu sibona lalonai, Iehova ita tomadiho henia diba, a? Mani ita itaia.

15, 16. (a) Dahaka dainai Stefano ese palai dubu ia herevalaia be mai anina bada? (b) Stefano ese edena dala ai Solomona ena dubu ia herevalaia?

¹⁵ Palai dubu bona dubu helaga. (Kara 7:44-50) Stefano ese kota taudia ia hamaoroa, Ierusalema ai dubu helaga ia do noho lasi neganai, Dirava ese Mose ia hamaoroa Ia do ia tomadiho henia totona, palai dubu ta do ia haginia. Ta ia gwau diba lasi, palai dubuna be anina lasi, badina Mose be unuseni ia tomadiho, ani?

¹⁶ Gabeai, Solomona ese Ierusalema ai dubu helaga ia haginia neganai, lauma helaga ena siahu amo ia gwauraia gurigurina ese ita dekenai mai anina bada gauna ta ia hadibaia. Stefano ese unai guriguri ia herevalaia, “Ataiai Momokani Diravana be imana amo idia karaia rumana lalonai ia noho lasi.” (Kara 7:48; 2 Siv. 6:18) Iehova ese dubu helaga ia gaukaralaia Iena ura ia hagugurua totona, to Ia be dubu lalodiai ia noho lasi. Vadaeni, dahaka dainai Ia idia tomadiho henia taudia idia laloa, taunimanima ese idia karaia rumadia dekenai Ia idia tomadiho henia diba? Stefano be ena hereva hadokoa totona, Isaia ena hereva ia gwauraia lou, ia gwau: “Guba be egu terona bona tanobada be egu aena atoa gauna. Edena bamona ruma be lau totona do umui haginia? Eiava egu noho gabuna be edeseniai? Egu imana amo inai gaudia ibounai lau karaia, ani?”​—Kara 7:49, 50; Isa. 66:1, 2.

17. Edena dala ai Stefano ena hereva amo (a) ena kamonai taudia edia lalohadai kererena ia hahedinaraia, bona (b) ia dekenai idia gwauraia samani herevana ia haerelaia?

 ¹⁷ Stefano ese Sanhedrin vairanai ia herevalaia gaudia oi laloa neganai, do oi diba ia idia samania taudia edia laloa dalana be kerere, ani? Ia hahedinaraia, Iehova ena ura ia gaukara noho bona ia be sene herevadia hegeregerena lasi, to ia be mai ena siahu bona metairametaira ia hedinarai. Ierusalema ai ia noho dubu helaga bona Mose ena Taravatu badinaia karana amo idia mai kastom karadia idia laloa bada dainai, idia ese Taravatu bona dubu helaga ena anina korikorina idia lalopararalaia lasi! Stefano ena hereva amo mai anina bada henanadai be ina: Iehova badinaia karana amo, Taravatu bona dubu helaga idia matauraia be gau badana, a? Momokani, Stefano be Iehova ia badinaia momokani dainai, ena hereva amo iena kara ena badina ia gwauraia hedinarai goevagoeva.

18. Edena dala ai Stefano ita tohotohoa be namo?

¹⁸ Stefano ena hereva amo dahaka ita dibaia? Ia be Baibel ia diba namonamo. Unai hegeregerena, Dirava ena Hereva ita stadilaia goadagoada be namo, unai amo ‘hereva momokani ita hadibaia maoromaoro.’ (2 Tim. 2:15) Danu, Stefano amo ita dibaia gauna ta be, ia be mai aonega bona mai gado namo ida ia hereva. Ia idia kamonaia taudia momo be ia idia inai henia! To idia ia hereva henia neganai, idia diba bona laloa bada gaudia ia herevalaia. Danu, idia ia gwauraia “tamadia” unai amo idia dekenai hemataurai ia hahedinaraia. (Kara 7:2) Namona be ita danu ese mai “manau bona hemataurai bada ida” Baibel ena hereva momokanidia ita gwauraia hedinarai.​—1 Pet. 3:15.

19. Edena dala ai Stefano be mai gari lasi ida Sanhedrin vairanai Iehova ena hahemaoro herevadia ia gwauraia?

¹⁹ To, namo lasi gari ese ita ia koua hereva momokani ita gwauraia lasi totona, eiava Dirava ena hahemaoro herevana ita hamanokaia. Unai kara dekenai, Stefano ese haheitalai namona ia hahedinaraia. Ia laloparara, Sanhedrin vairanai ia herevalaia gaudia ibounai ese unai laloauka diadi taudia edia lalona ia haidaua diba lasi. Unai dainai, lauma helaga ena heduru amo, mai gari lasi ida ia gwau idia be edia tubudia bamona, idia ese Iosepa, Mose, bona peroveta taudia ibounai idia dadaraia. (Kara 7:51-53) Momokani, Sanhedrin ena diadi taudia ese Mesia—Mose bona peroveta taudia ibounai ese ena mai idia herevalaia tauna unai—idia hamasea. Oibe, idia ese Mose ena Taravatu idia dadaraia momokani!

20, 21. Stefano ena hereva dainai Sanhedrin taudia be dahaka idia karaia, bona edena dala ai Iehova ese ia hagoadaia?

²⁰ Stefano be hereva momokani ia gwauraia dainai, diadi taudia idia badu. Bona edia isena idia koria matamaia, bona mai hemataurai lasi ida ia idia kara henia. Unai abidadama tauna ia itaia, ena Biaguna Iesu, idia hebogahisi henia lasi hegeregerena, ia dekenai unai bamona do idia karaia danu.

²¹ Stefano be do ia vara gauna ia haheaukalaia totona, ia goada be namo, bona ia itaia matahanai amo Iehova ese ia hagoadaia bada. Stefano ese Dirava ena hairai  bona Iesu ia itaia, ia be Iehova ena imana idibana kahanai ia gini! Stefano ese unai matahanai ia herevalaia neganai, diadi taudia ese edia taiana idia koua. Dahaka dainai? Badina guna Iesu ese unai kota taudia ia hamaoroa, ia be Mesia bona kahirakahira ena Tamana ena idiba kahanai do ia helai. (Mar. 14:62) Stefano ena matahanai ese ia hahedinaraia, Iesu ia hereva momokani. Oibe, unai Sanhedrin taudia ese Mesia ena mase dalana idia karaia bona idia hamasea! Idia ibounai idia heau lao, Stefano be nadi amo idia hodoa mase totona. c

22, 23. Edena dala ai Stefano ena mase be iena Biaguna ena bamona? Bona edena dala ai, hari Keristani taudia be Stefano bamona idia lalogoada diba?

²² Stefano be ena Biaguna bamona mai maino ida ia mase, Iehova ia abidadama henia momokani, bona ia idia hamasea taudia edia dika ia gwauatao. Stefano be matahanai lalonai Iesu bona ena Tamana ia do itaia noho dainai, ia gwau: “Lohiabada Iesu Keriso e, egu mauri oi abia.” Momokani, Stefano be Iesu ena hagoadaia herevadia ia diba: “Toreisi lou be lau bona mauri be lau.” (Ioa. 11:25) Dokonai, Dirava ia guriguri henia badabada, ia gwau: “Iehova e, edia kara dika ena davana oi henia lasi.” Unai ia gwauraia murinai, ia mase.​—Kara 7:59, 60.

²³ Keriso ena murinai idia raka taudia huanai, Stefano be ena abidadama dainai ia mase tauna ginigunana. (Inai maua, “ Grik Herevana Mar’tys Ena Anina” itaia.) To ia mase murinai, momo herea idia mase danu. Ema bona hari, tomadiho bona politikol goadalaia taudia, bona dagedage taudia ma haida ese Iehova ena abidadama hesiai taudia haida idia hamasea. To, badina namona dainai Stefano bamona ita lalogoada diba. Iesu be hari King ai ia lao, bona ena Tamana ese ia henia siahu badana ia gaukaralaia noho. Gau ta ese do ia koua lasi ena abidadama hesiai taudia ia hatorea isi lou totona.​—Ioa. 5:28, 29.

24. Edena dala ai Saulo ese Stefano ena mase ia durua? Bona unai abidadama tauna ena mase ese dahaka namo ia havaraia?

²⁴ Unai gaudia ibounai idia vara lalonai, tau matamatana, Saulo, ia noho. Ia ese Stefano ena mase ia itaia, bona nadi amo Stefano idia hodoa taudia edia dabua ia naria danu. Unai murinai, ia vara dagedage kara badana ia gunalaia. To Stefano ena mase ese namo ia havaraia noho. Badina iena haheitalai ese Keristani taudia ma haida ia hagoadaia, edia abidadama dekenai idia gini goada bona Stefano bamona idia kwalimu totona. Danu, Saulo—lagani haida murinai idia gwauraia Paulo—be gabeai Stefano ena mase dainai ia lalohisihisi bada. (Kara 22:20) Ia ese Stefano hamasea karana ia durua, to gabeai ia laloparara bona ia gwau: “Guna Dirava ena ladana lau hadikaia, iena taunimanima lau dagedage henia, bona hemataurai karana lau hahedinaraia lasi.” (1 Tim. 1:13) Ia hedinarai goevagoeva, Paulo be Stefano ese kota vairanai ia gwauraia herevana ia laloaboio lasi. Oibe, Paulo ena hereva bona toretore haida lalonai, Stefano ena hereva haida ia gwauraia lou. (Kara 7:48; 17:24; Heb. 9:24) Gabeai, Paulo be Stefano ena abidadama bona gari lasi karana ia tohotohoa. Stefano be “hebogahisi tauna bona ia be Dirava ena siahu amo ia honu.” To henanadai be inai, ita danu be unai bamona do ita karaia, a?