1-3. (a) Dahaka ese Keristani kongrigeisen ginigunana ena noho namo ia hadikaia? (b) Kara bukana ita stadilaia karana amo dahaka namo do ita abia?

 PAULO bona Banaba edia misinari loaloa ginigunana murinai, mai moale ida Suria ena Antioka dekenai idia giroa lou. Badina Iehova ese “idau bese taudia dekenai abidadama ena iduara ia kehoa.” (Kara 14:26, 27) Oibe, Antioka ena gabu ibounai dekenai sivarai namona idia harorolaia bona Idau Bese taudia “hutuma” be kongrigeisen lalonai idia vareai.​—Kara 11:20-26. 

² Unai moale sivaraina be ia bada ela bona Iudea dekenai idia kamonai. To Iudea taudia be unai sivarai dainai idia moale lasi, unai ese ia hahedinaraia, kopina utua karana ena hepapahuahu idia hamaoromaoroa be namo. Iuda bona Iuda lasi taudia edia hetura karana be edena bamona? Bona Iuda lasi taudia ese Mose ena Taravatu be edena bamona idia laloa be namo? Unai hekwakwanai ia bada ia lao bona Keristani kongrigeisen ia hapararaia. Edena dala ai unai hekwakwanai do idia hamaoromaoroa?

³ Kara bukana lalonai inai sivarai ita stadilaia neganai, mai anina bada gaudia momo do ita dibaia. Unai ese ita do ia durua, hepapahuahu idia vara neganai, mai aonega ida do ita kara.

4. Iuda abidadama taudia ese dahaka lalohadai kererena idia badinaia, bona dahaka henanadai ia vara?

⁴ Hahediba tauna Luka ia gwau: “Iudea amo tatau haida idia diho mai [Antioka dekenai] bona tadikaka idia hadibaia matamaia, idia gwau: ‘Bema Mose ena Taravatu hegeregerena, emui kopina umui utua lasi, hahemauri do umui abia lasi.’” (Kara 15:1) Reana ‘Iudea amo unai tatau’ be Keristani taudia ai idia do lao lasi neganai, idia be Farisea taudia, to Baibel ese unai ia gwauraia lasi. Herevana idia be Farisea taudia o lasi, to idia be Iuda tomadiho oreana ena taravatu hegeregerena idia laloa. Danu, idia gwau idia hadibaia noho gaudia be aposetolo taudia bona Ierusalema ai idia noho tau badadia amo. (Kara 15:23, 24) Dirava ena hahekau henunai, aposetolo Petero ese Keristani kongrigeisen lalonai, kopina utua lasi Idau Bese  taudia ia abia dae, to dahaka dainai lagani 13 murinai Iuda abidadama taudia ese kopina utua karana idia do goadalaia noho? a—Kara 10:24-29, 44-48.

5, 6. (a) Dahaka dainai Iuda Keristani taudia haida idia ura kopina utua taravatu idia badinaia noho? (b) Kopina utua gwaubou be Aberahamo gwaubouna ena kahana ta, a? Gwauraia hedinarai. (Futnout itaia.)

⁵ Reana ena badina be momo. Kopina utua karana ena taravatu be Iehova sibona ese ia atoa, bona unai bamona idia karaia neganai, idia hahedinaraia Iehova ida hetura karana namona idia moalelaia. Taravatu kontrakana do lasi neganai, kopina utua karana idia karaia, unai be Aberahamo bona ena ruma bese taudia ese idia hamatamaia, to gabeai ia be Taravatu kontraka ena kahana ai ia lao. b (Lev. 12:2, 3) Mose ena Taravatu henunai, idau taudia ese Pasova aniani ania eiava aria idauidau lalonai idia vareai totona, guna edia kopina idia utua be namo. (Eso. 12:43, 44, 48, 49) Momokani, Iuda taudia edia lalohadai dekenai, kopina utua lasi tauna be ia goeva lasi.​—Isa. 52:1.

⁶ Unai dainai, Iuda abidadama taudia ese hahediba hereva matamatana idia badinaia totona, gau badana be abidadama bona manau karana idia hahedinaraia. Gwaubou matamatana ese Taravatu gwaubouna ena gabu ia abia, unai dainai bema ta be Iuda tauna bamona ia vara, ia be maoromaoro Dirava ena taunimanima ta ai ia lao lasi. Bona gabu haida ai idia noho Iuda Keristani taudia—Iudea ai idia noho abidadama taudia danu—ese Keriso idia gwauraia hedinarai totona idia gari lasi be namo, bona kopina idia utua lasi Idau Bese Keristani taudia be edia tadikaka bamona idia abia dae.​—Ier. 31:31-33; Luka 22:20.

7. ‘Iuda amo tatau haida’ ese dahaka hereva momokanidia idia lalopararalaia lasi?

⁷ Oibe, Dirava ena taravatu ia idau lasi. Unai be momokani, badina gwaubou matamatana ese Mose ena Taravatu ena anina ia hamomokania. (Mat. 22:36-40) Hegeregere, Paulo ese kopina utua karana ia herevalaia neganai, ia gwau: “Ta ena kudouna ai ia noho gauna ese ia hahedinaraia ia be Iuda tauna korikorina, bona iena kopina utua karana be kudouna ai, unai be lauma helaga amo ia vara, to idia torea taravatu amo ia vara lasi.” (Roma 2:29; Deu. 10:16) ‘Iudea amo unai tatau’ ese unai hereva momokani ena anina idia lalopararalaia lasi, bona idia gwau Dirava ia ura ena bese be kopina do idia utua. Idia ese Paulo ia gwauraia herevana do idia badinaia, a?

8. Dahaka dainai kopina utua ena hepapahuahu herevana be Ierusalema ai ia noho hakaua oreana dekenai idia abia lao?

⁸ Luka be ma ia gwau: “Paulo bona Banaba be idia [‘Iudea amo idia diho mai tatau  haida’] ida idia lalotamona lasi bona idia hepapahuahu murinai, tadikaka ese dala idia karaia, Paulo, Banaba, bona ma haida be Ierusalema ai idia noho aposetolo bona tau badadia dekenai do idia daekau lao, unai hepapahuahu idia herevalaia totona.” c (Kara 15:2) Unai orea rua be “idia lalotamona lasi bona idia hepapahuahu,” unai ese edia hemami bona lalohadai goadana ia hahedinaraia, bona Antioka kongrigeisen ia hegeregere lasi unai ia hamaoromaoroa. Maino bona lalotamona ia noho totona, kongrigeisen ese dala ia karaia unai hepapahuahu herevana be “Ierusalema ai idia noho aposetolo bona tau badadia”—hakaua oreana unai—dekenai do idia abia lao. Antioka elda taudia edia kara amo dahaka ita dibaia?

9, 10. Hari inai negai, edena dala ai Antioka tadikaka, Paulo, bona Banaba, ese haheitalai namona idia hahedinaraia?

⁹ Ita dibaia mai anina bada gauna be inai, Dirava ena orea ita abidadama henia be namo. Mani ita laloa: Antioka ai idia noho tadikaka idia diba, hakaua oreana lalonai idia noho taudia ibounai be Iuda Keristani taudia. To idia abia dae, hakaua oreana ese Baibel ena hereva hegeregerena, kopina utua karana dainai ia vara hepapahuahu do ia hamaoromaoroa. Dahaka dainai? Antioka tadikaka idia diba momokani, Iehova be lauma helaga bona kongrigeisen Kwarana, Iesu Keriso amo, unai hepapahuahu do ia hamaoromaoroa. (Mat. 28:18, 20; Efe. 1:22, 23) Hari, hekwakwanai badadia idia vara neganai, namona be Antioka abidadama taudia edia haheitalai ita tohotohoa bona Dirava ena orea bona horoa Keristani taudia ita abidadama henia.

¹⁰ Danu, manau bona haheauka karana be mai anina bada. Paulo bona Banaba be lauma helaga ese ia abia hidi bese idauidau dekenai idia haroro, to unai siahu idia gaukaralaia lasi, Antioka dekenai unai hepapahuahu idia hamaoromaoroa totona. (Kara 13:2, 3) Paulo be gabeai ia gwau: “Lau daekau lao [Ierusalema dekenai], badina Lohiabada be lau dekenai ia hahedinaraia  unuseniai lau lao be namo.” Unai ese ia hahedinaraia, ia be Dirava ena hakaua dalana ia badinaia. (Gal. 2:2) Hari, unai bamona metau idia vara neganai, elda taudia idia hekwarahi manau bona haheauka karana idia hahedinaraia totona. Sibona edia lalohadai idia badinaia lasi, to Iehova ena lalohadai diba totona, Toretore Helagadia bona igui hesiai tauna amo ia mai hakaua hereva idia tahua.​—Fili. 2:2, 3.

11, 12. Dahaka dainai, mai haheauka ida Iehova ita naria be mai anina bada?

¹¹ Nega haida, mai haheauka ida ita naria ela bona Iehova ese ita daradaralaia gauna dekenai, diba ma haida ia hahedinaraia. Hegeregere Paulo ena negai, tadikaka idia naria ela bona lagani 13 murinai, Iehova ese kopina utua herevana ia hamaoromaoroa. Unai be lagani 36 C.E. ai Korenelio be lauma helaga ia abia negana amo ela bona lagani 49 C.E. ai. Dahaka dainai lagani momo murinai, Iehova ese unai hepapahuahu ia hamaoromaoroa? Reana Dirava ese nega ia henia, unai amo kudou-maoro Iuda taudia ese edia lalona idia haidaua diba. Badina Iehova ese edia tubuna Aberahamo ida kopina utua kontrakana ia karaia, to lagani 1,900 murinai, unai kontraka ia doko!​—Ioa. 16:12.

¹² Iseda haheauka bona hebogahisi guba Tamana ese ita ia hadibaia bona iseda kara ia haidaua noho be hahenamo badana! Badina unai ese hanaihanai anina namona do ia havaraia. (Isa. 48:17, 18; 64:8) Unai dainai orea lalonai gau haida idia haidaua eiava Baibel ena siri haida dekenai diba matamata idia halasia neganai, namo lasi sibona eda lalohadai ita dogoatao auka eiava ita maumau. (Had. 7:8) Bema oi laloa unai bamona kara oi hahedinaraia matamaia, vadaeni namona be mai guriguri ida Kara karoa 15 ai idia noho hakaua herevadia oi laloa dobu. d

13. Iseda hesiai gaukara lalonai, edena dala ai Iehova ena haheauka karana ita hahedinaraia diba?

¹³ Bema ita stadi henia taudia idia hekwarahi hahediba hereva koikoidia o Baibel ia taravatua kastom karadia idia rakatania totona, gau badana be ita haheauka. Bona reana nega ita henia, Dirava ena lauma helaga be edia lalona ia haidaua totona. (1 Kor. 3:6, 7) Danu, gau badana be unai ita gurigurilaia. Herevana edena dala ita badinaia, to Dirava ese nega korikori ai ita do ia durua dala maorona ita abia hidi totona.​—1 Ioa. 5:14.

14, 15. Edena dala ai Antioka kongrigeisen ese Paulo, Banaba, bona loaloa taudia haida idia matauraia? Bona edena bamona idia ese Poinikia bona Samaria ai idia noho tadikaka taihu idia durua?

¹⁴ Luka be ma ia gwau: “Kongrigeisen ese unai tatau idia hakaua lao bona dala huanai idia rakatania, bena unai tatau be Poinikia bona Samaria dekenai idia hanaia lao, bona tadikaka dekenai idau bese taudia idia helalo-kerehai ena sivarai idia gwauraia hedinarai namonamo, bona unai ese tadikaka ibounai ia hamoalea bada.” (Kara 15:3) Oibe, kongrigeisen taudia ese Paulo, Banaba, bona loaloa taudia ma haida idia hakaua lao bona dala dekenai idia rakatania, unai ese edia lalokau bona hemataurai karana ia hahedinaraia, bona idia ura Paulo bona ena bamodia  ese Dirava ena hanamoa idia abia. Oibe, Antioka ai idia noho tadikaka ese ita dekenai haheitalai namona idia hahedinaraia! Umui ese emui tadikaka taihu bona “idia gaukara goada Dirava ena hereva idia herevalaia bona idia hadibaia” elda taudia umui matauraia, a?​—1 Tim. 5:17.

¹⁵ Edia laolao ai, idia be Poinikia bona Samaria dekenai idia lao, bena unuseni idia noho tadikaka dekenai Idau Bese taudia edia sivarai idia gwauraia, unai amo idia ese tadikaka idia hagoadaia bada. Edia hereva idia kamonai taudia be reana Iuda abidadama taudia, Stefano ena mase murinai idia be unuseniai idia heau lao. Unai hegeregerena, hari inai negai, Iehova ese hahediba taudia halaoa gaukarana ia hanamoa ena ripoti ese tadikaka oreana, bona hahetoho idia davaria noho taudia ia durua bada. Oi ese kongrigeisen heboudia bona hebouhebou badadia ai unai bamona sivarai oi kamonai, eiava idia printaia pablikeisen o jw.org ai, oi duahia ekspiriens ese oi ia hagoadaia, a?

16. Dahaka ese ia hahedinaraia, kopina utua karana be hekwakwanai badana ai ia lao?

¹⁶ Antioka amo kilomita 550 bamona idia raka murinai, idia lao henia gabuna dekenai idia ginidae. Luka ia gwau: “Ierusalema ai idia ginidae neganai, kongrigeisen taudia, aposetolo taudia, bona tau badadia ese idia abidia dae, bona Paulo bona Banaba be Dirava ese idia amo ia karaia gaudia momo idia herevalaia.” (Kara 15:4) To, “guna Farisea tomadiho oreana idia badinaia abidadama taudia be edia helai gabuna amo idia toreisi bona idia gwau: “Namona be edia kopina idia utua bona umui haganidia Mose ena Taravatu idia badinaia totona.’” (Kara 15:5) Ia hedinarai goevagoeva, Idau Bese Keristani taudia edia kopina utua karana be hekwakwanai badana ai ia lao bona unai idia hamaoromaoroa be namo.

17. Ierusalema ai daidia be hakaua oreana lalonai idia noho, bona dahaka dainai “tau badadia” ida idia gaukara hebou?

¹⁷ Aonega Herevadia 13:10 ia gwau: “Sisiba idia tahua taudia dekenai aonega ia noho.” Unai hakaua hereva hegeregerena, “aposetolo taudia bona tau badadia idia haboua, [kopina utua lalohadaina] idia herevalaia totona.” (Kara 15:6) “Aposetolo bona tau badadia” be kongrigeisen ibounai totona abia hidi idia karaia, hari inai negai Hakaua Oreana danu be unai bamona ia karaia. Dahaka dainai “tau badadia” be aposetolo taudia ida idia gaukara hebou? Namona be ita laloatao, aposetolo Iamesi idia hamasea, bona aposetolo Petero be nega sisina daudau  lalonai dibura ruma ai ia noho. Aposetolo taudia ma haida dekenai unai bamona do ia vara, a? Horoa tadikaka ma haida idia noho dainai, aposetolo taudia idia durua diba kongrigeisen be dala maorona ai idia hakaua noho totona.

18, 19. Petero ena hereva mai siahuna ese dahaka ia hahedinaraia, bona ena hereva idia kamonai taudia ese dahaka lalohadai maorona idia abia be namo?

¹⁸ Luka be ma ia gwau: “Nega daudau lalonai unai idia herevalaia murinai, Petero ia toreisi bona . . . ia gwau: ‘Tadikaka e, umui diba momokani, idaunega amo Dirava ese umui huanai lau ia abia hidi, unai amo idau bese taudia ese sivarai namona idia kamonai bona idia abidadama henia diba. Bona Dirava, kudouna ia diba tauna, be idia dekenai lauma helaga ia henia, ita dekenai ia henia bamona. Unai amo ia hamomokania idia ia abia dae. Bona Dirava ese ia hahedinaraia idia bona ita be idau lasi, to idia be edia abidadama dainai, ia ese edia kudouna ia hagoevaia.’” (Kara 15:7-9) Buka ta ia gwau, Grik herevana idia hahanaia, “nega daudau lalonai unai idia herevalaia” siri 7 ena anina ma ta be “ idia tahua; idia henanadailaia.” Toana be unai tadikaka be mai edia lalohadai idauidau, bona mai momokani ida unai idia gwauraia hedinarai.

¹⁹ Petero ena hereva mai siahuna ese ia hahedinaraia, kopina utua lasi Idau Bese tauna ginigunana Korenelio, bona ena ruma bese taudia be lagani 36 C.E. ai lauma helaga idia abia neganai, ia be idia danu ia noho. Unai dainai bema Iuda bona Iuda lasi taudia be Iehova ena matanai idia hegeregere, vadaeni taunimanima be maoro lasi ta idia hahemaoro henia totona, ani? Danu, Keriso abidadama henia karana amo ta be ena kudouna ai ia goeva, bona unai be Mose ena Taravatu badinaia karana amo ia vara lasi.​—Gal. 2:16.

20. Kopina utua karana idia abia dae taudia ese edena dala ai ‘Dirava idia tohoa’?

²⁰ Dirava ena hereva bona lauma helaga edia hamomokania herevana dainai, Petero ia gwau: “Vadaeni, dahaka dainai Dirava umui tohoa bona hahediba taudia dekenai maduna metauna umui atoa? Unai maduna metauna be iseda sene taudia bona ita danu ese ita huaia diba lasi. To ita Iuda taudia ita abia dae, Lohiabada Iesu ena hebogahisi hereadaena amo hahemauri do ita abia, bona Iuda lasi hahediba taudia danu be unai idia abia dae.” (Kara 15:10, 11) Oibe, kopina utua karana idia abia dae taudia ese ‘Dirava idia tohoa’ eiava Baibel ta ena hereva bamona, ‘iena haheauka karana idia tohoa.’ Iuda taudia idia ura Idau Bese taudia ese idia badinaia taravatu idia badinaia danu, to Iuda taudia ese unai taravatu idia badinaia momokani lasi, unai dainai taravatu hegeregerena panisi do idia abia. (Gal. 3:10) To Petero ena hereva idia kamonai Iuda taudia idia moale be namo, badina Dirava ena hebogahisi hereadaena be Iesu amo ia hahedinaraia.

21. Banaba bona Paulo be dahaka idia herevalaia?

²¹ Oibe, Petero ena hereva idia kamonai taudia ese ena hereva ena anina idia lalopararalaia dainai, “idia ibounai be idia herevahereva lasi.” Unai murinai, Banaba bona Paulo be “Dirava ese idau bese taudia huanai ia karaia toa bona hoa kara badadia edia sivarai” idia herevalaia. (Kara 15:12) Bena dokonai, aposetolo taudia bona tau badadia be hereva ibounai idia tahua namonamo bona idia karaia disisen ese Dirava ena lalohadai kopina utua karana dekenai ia hahedinaraia.

22-24. (a) Hari inai negai, Hakaua Oreana ese edena dala ai hakaua orea ginigunana ia tohotohoa? (b) Edena dala ai elda taudia ibounai ese tiokratik dalana idia matauraia diba?

 ²² Hari inai negai danu, Hakaua Oreana ia hebou neganai, Baibel ena hakaua hereva ia tahua bona lauma helaga totona ia guriguri goada. (Sal. 119:105; Mat. 7:7-11) Oibe, Hakaua Oreana ese Dirava ena ura hegeregerena ai disisen ia karaia totona, ena memba ta ta ese unai hebou lalonai do idia herevalaia gaudia idia abia guna, unai amo mai guriguri ida unai gaudia idia lalohadailaia. (Aon. 15:28) Edia hebou lalonai, inai horoa tadikaka be mai hemataurai ida edia lalohadai idia gwauraia hedinarai. Edia herevahereva karadia lalonai, Baibel idia gaukaralaia momo.

²³ Kongrigeisen ena elda taudia ese unai haheitalai idia tohotohoa be namo. Bona bema elda taudia edia hebou ai hekwakwanai badana ta idia hamaoromaoroa lasi, vadaeni brens ofesi eiava sekit naria taudia idia itaia diba. Bema brens ofesi ia laloa Hakaua Oreana ia tore henia be namo, vadaeni unai bamona ia karaia diba.

²⁴ Oibe, mai manau, abidadama bona haheauka ida tiokratik dalana idia matauraia taudia be Iehova ese ia hanamodia. Karoa 14 ai do ita itaia, bema unai bamona ita karaia, Dirava amo ahuna namona hegeregere maino, noho namo, bona Keristani lalotamona do ita moalelaia.