1, 2. Dahaka dainai Paulo be Ierusalema dekenai ia lao, bona unuseniai dahaka hekwakwanai do ia davaria?

 IERUSALEMA ena dala dekenai taunimanima momo idia raka lao mai, bona Paulo be unai dala amo ia raka lao. Ierusalema siti be tano ma haida bamona lasi, badina unuseniai Iehova ese ena taunimanima totona gau momo ia karaia. Unai dainai, unuseniai idia noho taudia be unai siti ena histori dainai idia heagi. Paulo ia diba Keristani taudia momo be guna gaudia sibona idia laloa bada dainai, ena be idia diba Iehova ese ena taunimanima kara henia dalana ia haidaua vadaeni, to unai dala idia badinaia lasi. Paulo be guna Efeso ai ia noho neganai, ia itaia Ierusalema tadikaka idia ogogami dainai ia ura ia vadivadi henidia. To ia itaia danu, idia haida be Mose ena Taravatu idia do badinaia noho. (Kara 19:21) Ena be Paulo ia diba dagedage do ia davaria, to unai siti vadivadi henia lou lalohadaina ia haidaua lasi.

² Ierusalema ai Paulo be dahaka do ia davaria? Keriso murinai idia raka taudia amo hekwakwanai do ia davaria, idia kamonai haida ese Paulo idia sivarailaia koikoi neganai, unai idia laloa momo. To Keriso ena inai taudia amo hekwakwanai momo herea do ia davaria. Idia ese Paulo do idia samania koikoi, do idia dadabaia, bona ia hamasea herevana do idia gwauraia. Unai gaudia ese dala do ia kehoa, Paulo be hereva momokani totona do ia hereva. Unai nega aukadia lalonai Paulo ese manau, boga-auka, bona abidadama karana ia hahedinaraia, bona unai be haheitalai namona hari Keristani taudia dekenai. Mani unai ia hahedinaraia daladia ita itaia.

3-5. (a) Paulo be dahaka hebou totona Ierusalema dekenai ia lao, bona dahaka idia herevalaia? (b) Paulo be Ierusalema elda taudia ida ia hebou karana amo dahaka ita dibaia?

³ Paulo bona ena bamodia be Ierusalema ai idia ginidae bona murina dinana ai, kongrigeisen idia naria tau badadia dekenai idia lao. Inai sivarai Kara bukana ai ese idia do mauri noho aposetolo taudia ia herevalaia lasi, reana tano ma haida dekenai idia noho kongrigeisen durua totona idia lao. To Iesu ena tadina, Iamesi, sibona be unuseni ia noho. (Gal. 2:9) Unai dainai, Paulo bona “tau badadia ibounai be unuseni” idia noho neganai, Iamesi ese unai hebou ia gunalaia.​—Kara 21:18.

⁴ Paulo ese tau badadia ia hanamoa “bena ena hesiai gaukara amo Dirava ese idau bese taudia huanai ia karaia gaudia ia herevalaia.” (Kara 21:19)  Unai sivarai ese tadikaka ia hagoadadia bada. Ita danu ese tano haida dekenai gaukara ia bada ena sivarai ita kamonai neganai, ita moale.​—Aon. 25:25.

⁵ Unai negai danu, Paulo ese idia dekenai Europe amo ia mailaia kontribusen ia herevalaia. Gabu daudau ai idia noho tadikaka be idia totona unai bamona kara idia hahedinaraia ena sivarai idia kamonai neganai, reana unai ese idia ia hamoalea bada. Paulo ia gwauraia sivaraina dainai, Baibel ia gwau: “[Tau badadia ese] Dirava idia hanamoa.” (Kara 21:20a) Unai hegeregerena, hari inai negai momo ese disasta bona gorere badadia idia davaria neganai, tadikaka taihu edia heduru bona hagoadaia herevadia ese idia ia hamoalea bada.

6. Paulo be edena hekwakwanai ena sivarai ia kamonai?

⁶ Gabeai elda taudia ese Paulo idia hamaoroa, ia idia sivarailaia koikoi dainai, Iudea dekenai hekwakwanai ta ia vara. Idia gwau: “Tadikaka e, oi itaia, Iuda taudia huanai abidadama taudia tausen momo idia noho, bona idia ibounai be mai ura bada ida Taravatu idia badinaia. To haida amo inai idia kamonai: ‘Paulo be idau bese taudia huanai idia noho Iuda taudia ibounai ia hadibaia, Mose ena taravatu idia dadaraia totona. Bona ia gwau edia natudia edia kopina do idia utua lasi, eiava kastom karadia idia badinaia be anina lasi.” a—Kara 21:20b, 21.

7, 8. (a) Iudea ai idia noho Keristani taudia momo be dahaka lalohadai kererena idia abia? (b) Iuda Keristani taudia haida edia lalohadai kererena ese ia hahedinaraia, idia be dirava koikoidia idia tomadiho henia, a?

⁷ Dahaka dainai Keristani taudia momo ese Mose ena Taravatu—lagani 20 gunanai ia doko taravatuna unai—idia do badinaia noho? (Kol. 2:14) Lagani 49 C.E. ai, Ierusalema ai idia hebou aposetolo taudia bona tau badadia ese kongrigeisen  ibounai dekenai idia siaia revarevana lalonai idia hahedinaraia, idau bese huanai idia noho abidadama taudia ese kopina idia utua bona Mose ena Taravatu henunai idia noho be anina lasi. (Kara 15:23-29) To, unai revareva ese Iuda abidadama taudia ia herevalaia lasi dainai, momo idia laloparara lasi Mose ena Taravatu ena gaukara be ia ore vadaeni.

⁸ Unai lalohadai kererena dainai, Iuda abidadama taudia be hegeregere lasi Keristani taudia ai idia lao totona, a? Lasi. Namo lasi ita laloa idia be guna dirava koikoidia idia tomadiho henia bona tomadiho koikoi karadia idia do badinaia noho. Unai Iuda abidadama taudia ese idia laloa bada Taravatuna be Iehova ese ia henidia. Bona unai Taravatu be demoni amo ia mai lasi eiava ia be kerere lasi. Unai Taravatu be gwaubou gunana henunai ia noho, to hari Keristani taudia be gwaubou matamatana henunai. Tomadiho goevana badinaia karana lalonai, Taravatu gwaubouna badinaia be anina lasi, badina ena siahu ia ore vadaeni. Iuda Keristani taudia idia laloparara lasi idia be gwaubou matamata henunai idia noho, unai dainai Taravatu gwaubouna idia badinaia noho be anina lasi. Gau badana be edia laloa dalana idia haidaua, unai amo Dirava ese unai negai ia hahedinaraia dala matamatana idia badinaia. b—Ier. 31:31-34; Luka 22:20.

9. Paulo ese Mose ena Taravatu be edena bamona ia herevalaia?

⁹ Haida idia gwau, Paulo ese Idau Bese taudia huanai idia noho Iuda taudia ia hadibaia, “edia natudia edia kopina do idia utua lasi, eiava kastom  karadia idia badinaia be anina lasi.” Unai be momokani, a? Paulo be Idau Bese taudia edia aposetolo tauna, bona ia abia dae, Idau Bese taudia be Taravatu henunai idia noho be anina lasi. Danu ia hahedinaraia, bema ta ese Idau Bese abidadama tauna ia doria Mose ena Taravatu henunai ia noho totona ena kopina ia utua, unai be kerere. (Gal. 5:1-7) Paulo ese ia vadivadi henia taoni momo lalodiai, Iuda taudia dekenai sivarai namona ia harorolaia danu. Kamonai taudia dekenai ia hahedinaraia, Iesu ena mase ese Mose ena Taravatu ena siahu ia haorea bona abidadama ese kara maoromaoro ia havaraia, to Taravatu badinaia karana lasi.​—Roma 2:28, 29; 3:21-26.

10. Taravatu badinaia bona kopina utua karana dekenai, Paulo be dahaka lalohadai maorona ia hahedinaraia?

¹⁰ To, Paulo be mai laloparara ida Iuda ena kastom karadia—Sabati dinana ai gaukara lasi eiava aniani haida ania lasi—idia badinaia taudia ia kara henia. (Roma 14:1-6) Bona Paulo ese kopina utua karana dekenai taravatu ia atoa lasi. Ia ese Timoteo ena kopina ia utua, unai amo Iuda taudia be Timoteo do idia dadaraia lasi—iena tamana be Grik tauna. (Kara 16:3) Kopina utua karana be ta ta ena disisen. Paulo ese Galatia taudia ia hamaoroa: “Kopina utua karana eiava kopina utua lasi karana be anina lasi, to abidadama be mai anina bada, bona lalokau dainai abidadama ese anina ia havaraia.” (Gal. 5:6) To, bema ta be kopina ia utua badina ia ura Taravatu ia badinaia eiava Iehova ena lalonamo ia abia, unai be abidadama karana lasi.

11. Elda taudia ese Paulo dekenai dahaka hakaua herevana idia henia, bona dahaka do ia karaia unai ia hagugurua totona? (Futnout itaia danu.)

¹¹ Ena be Paulo dainai idia gwauraia hereva be koikoi, to Iuda abidadama taudia be idia do laloa momo. Unai dainai, tau badadia ese Paulo dekenai inai hakaua hereva idia henia: “Iniseniai tatau 4 idia noho, idia sibodia be Dirava dekenai gwauhamata ta idia karaia. Inai tatau oi abidia bona  umui lao bena taravatu hegeregerena umui sibona umui hagoevaia, bona idia totona davana oi karaia, bena edia kwara huina do idia sevia. Unai amo taunimanima ibounai do idia diba idia kamonai herevana be momokani lasi, to oiemu kara be ia namo bona Taravatu oi badinaia noho.” c—Kara 21:23,24.

12. Edena dala ai Paulo ia hahedinaraia ena laloa dalana ia haidaua bona Ierusalema elda taudia edia hereva ia badinaia?

¹² Paulo ese idia ia hamaoroa diba, unai hekwakwanai ia vara badina Iuda abidadama taudia idia ura Mose ena Taravatu idia badinaia noho, to unai be ia totona idia gwauraia koikoi herevadia dainai ia vara lasi. To, mai ena ura ida ena lalona ia haidaua bona elda taudia ese idia gwauraia gaudia ia badinaia, bema unai ese Dirava ena hakaua herevadia idia utua lasi. Guna ena toretore lalonai ia gwau: “Ena be taravatu henunai lau noho lasi, to taravatu henunai idia noho taudia dekenai, lau be taravatu henunai lau noho tauna ai lau lao, unai amo idia be Keriso ena dala dekenai lau hakaua mai.” (1 Kor. 9:20) Unai nega ai, Paulo be Ierusalema elda taudia ida ia gaukara hebou bona ‘taravatu henunai ia noho.’ Paulo be unai bamona ia karaia neganai, ita dekenai haheitalai namona ia hahedinaraia, hari ita ese elda taudia edia hereva ita badinaia bona sibona eda dala ita badinaia lasi.​—Heb. 13:17.

13. (a) Dahaka dainai Iuda taudia haida be dubu helaga lalonai heiriheiri idia havaraia? (b) Edena dala ai Paulo idia hamauria?

¹³ Dubu helaga dekenai gau ibounai idia heau namonamo lasi. Gwauhamata hagugurua dinadia idia kahirakahira lalonai, Asia amo idia mai Iuda taudia ese Paulo idia itaia, bona idia samania koikoi, idia gwau ia ese Idau Bese taudia be dubu helaga lalonai ia hakaua vareai, unai dainai heiriheiri idia havaraia. Bema Roma ena tuari biaguna ese kara ta ia karaia lasi, toana be Paulo idia alaia mase diba. Unai tuari biaguna ese Paulo ia hadiburaia. Unai dina amo, Paulo be lagani foa mai kahana dibura ruma lalonai do ia noho. Bona iena mauri lalonai dika do ia davaria noho. Tuari biaguna ese Iuda taudia ia nanadaia, dahaka dainai Paulo idia dadabaia neganai, idia ese samani hereva koikoidia idia gwauraia. Regerege be bada dainai, tuari biaguna be gau ta ia lalopararalaia lasi. Dokonai, Paulo be unai gabu amo idia huaia raka-lasi. Bena Roma tuari taudia ese Paulo be edia noho gabuna dekenai idia abia vareai gwauraia neganai, ia ese tuari biaguna ia hamaoroa: “Oi lau noia, lau dekenai gwaumaoro oi henia taunimanima lau hereva henia totona.” (Kara 21:39) Tuari biaguna ese Paulo dekenai maoro ia henia, bona Paulo be mai gari lasi ida ena abidadama ia herevalaia.

14, 15. (a) Paulo be Iuda taudia dekenai dahaka ia herevalaia? (b) Tuari biaguna ese Paulo idia badu henia ena badina ia diba totona, dahaka ia karaia?

 ¹⁴ Paulo ia gwau: “Mani egu sivarai umui kamonai.” (Kara 22:1) Bena Paulo ese Heberu gado ai hutuma ia hereva henia neganai, idia kamonai. Ia ese Keriso ena murinai ia raka ena badina be idia dekenai ia gwauraia hedinarai. Oibe, mai aonega ida ia hereva karana ese dala ia kehoa, Iuda taudia ese ena hereva idia tahua totona, bema idia be momokani eiava lasi. Paulo be ladana bada tauna—Gamaliela—ese ia hadibaia bona Keriso murinai idia raka taudia ia dagedage henia, unuseniai idia noho taudia haida be unai idia diba. To, Damaseko dala amo ia lao noho lalonai, ia toreisi lou tauna, Keriso, be matahanai amo Paulo ia hereva henia. Paulo idia bamoa taudia be diari ta idia itaia bona gado ta idia kamonai, to ia hereva tauna ena hereva idia lalopararalaia lasi. (Kara 9:7; 22:9) Unai murinai, Paulo idia bamoa taudia ese ia idia hakaua lao ela bona Damaseko dekenai. Unuseniai, Anania—unai gabu ai idia noho Iuda taudia ese idia diba tauna—be hoa dalanai Paulo ena matana ia hanamoa.

¹⁵ Paulo ese idia ia hamaoroa, Ierusalema dekenai ia giroa lou neganai, Iesu be dubu helaga lalonai ia dekenai ia hedinarai lou. Unai neganai, Iuda taudia idia badu bona idia boiboi badabada, idia gwau: “Inai bamona tauna hamasea, badina ia hegeregere lasi ia mauri totona!” (Kara 22:22) Paulo gimaia totona, tuari biaguna ese Paulo be tuari taudia edia ruma dekenai ia abia lao. Tuari biaguna ia ura Iuda taudia be Paulo dekenai idia badu ena badina ia diba, unai dainai oda ia henia Paulo do idia kwadia bona henanadai henia. To Paulo ese sibona ia gimaia totona, gavamani ena taravatu hegeregerena ia hahedinaraia ia be Roma tauna. Hari Iehova idia tomadiho henia taudia danu be gavamani ena taravatu idia gaukaralaia, edia abidadama  ena maoro idia hamomokania totona. (Inai maua, “ Roma Taravatu Bona Roma Taudia”; bona “ Hari Witnes Taudia Dekenai Idia Karaia Kota” itaia.) Tuari biaguna ia kamonai Paulo be Roma tauna neganai, dala ma ta ia tahua hereva ma haida ia dibaia totona. Murina dinana ai, ia ese Sanhedrin—Iuda taudia edia kota badana—ena hebou dekenai Paulo ia hakaua mai.

16, 17. (a) Paulo ese Sanhedrin ia hereva henia neganai, dahaka ia vara? (b) Paulo idia botaia neganai, edena dala ai manau karana ia hahedinaraia?

¹⁶ Paulo be Sanhedrin vairanai ena abidadama ena maoro ia hamomokania neganai, ia gwau: “Tadikaka e, lau be mai lalomamina goevana ida Dirava vairanai lau noho ema bona hari.” (Kara 23:1) To Paulo be ia hereva daudau lasi. Baibel ia gwau: “Unai neganai, hahelaga tauna badana Anania ese Paulo badinai idia gini taudia ia oda henia, Paulo ena uduna idia botaia totona.” (Kara 23:2) Unai be dika momokani! Badina ena hereva idia do kamonai lasi, to ia idia gwauraia koikoi tauna. Unai dainai Paulo ia haere, ia gwau: “Oi be koikoi tauna, Dirava ese oi do ia botaia. Iniseniai oi helai bona Taravatu hegeregerena lau oi hahemaoro henia, to oi ese Taravatu oi utua danu, badina oda oi henia ta ese lau ia botaia totona. Unai bamona kara be maoro, a?”​—Kara 23:3.

¹⁷ Idia gini taudia haida be Paulo ia botaia tauna dekenai idia hoa lasi, to Paulo ena hereva dekenai idia hoa! Unai dainai idia gwau: “Dirava ena hahelaga tauna badana oi hereva dika henia, a?” Paulo ena haere amo ia hahedinaraia, ia manau bona Taravatu ia matauraia. Ia gwau: “Tadikaka e, lau diba lasi ia be hahelaga tauna badana. Toretore Helagadia ia gwau, ‘Namo lasi emui taunimanima ia lohiaia tauna do oi hereva dika henia.” d (Kara 23:4, 5; Eso. 22:28) Paulo ese gau ma ta ia herevalaia. Ia diba Sanhedrin lalonai Farisea bona Sadukea taudia idia noho, unai dainai ia gwau: “Tadikaka e, lau be Farisea tauna, bona Farisea taudia edia natuna. Mase taudia do idia toreisi lou helarona dainai, lau idia hahemaoro henia noho.”​—Kara 23:6.

18. Dahaka dainai Paulo be sibona ia gwauraia Farisea tauna, bona edena dala ai Paulo ena haheitalai ita tohotohoa diba?

¹⁸ Dahaka dainai Paulo be sibona ia gwauraia Farisea tauna? Badina ia be “Farisea taudia edia natuna,” ena famili be unai tomadiho oreana amo. Unai dainai,  momo idia gwau ia be Farisea tauna. e To Paulo be edena dala ai Farisea taudia edia hahediba herevana—toreisi lou—dekenai ia lalotamona? Farisea taudia idia abia dae, mase tauna ena lauma ia mauri noho, bona kara maoromaoro taudia edia mase laumana be ma haida edia tauanina lalonai do ia mauri lou. Paulo be unai lalohadai ia abia dae lasi. To ia be Iesu ese ia hahedibalaia toreisi lou herevana ia abia dae. (Ioa. 5:25-29) To Paulo be Farisea taudia ida ia lalotamona, mase murinai helaro ia noho, to Sadukea taudia be mase murinai ta ia mauri lou lalohadaina idia abia dae lasi. Hari inai negai, tomadiho idauidau taudia ita davaria neganai, unai bamona dala ita gaukaralaia be namo. Ita gwau diba, ita danu be Dirava ita abidadama henia, idia bamona. Idia be reana Toi Tamona idia abia dae, to ita be Baibel ese ia gwauraia Diravana ita abia dae. To, idia bona ita be inai lalohadai ita abia dae, Dirava ia noho.

19. Dahaka dainai Sanhedrin taudia idia lalotamona lasi?

¹⁹ Paulo ena hereva dainai, Sanhedrin taudia idia lalotamona lasi. Baibel ia gwau: “Idia boiboi badabada, bona Farisea taudia edia taravatu hadibaia taudia haida idia toreisi bona mai badu ida idia hereva: ‘Inai tauna dekenai kerere ta ai davaria lasi. To bema guba dekenai ia noho lauma tauna eiava aneru ta ese ia hereva henia . . . ’” (Kara 23:9) Aneru ta ese Paulo ia hereva henia karana be Sadukea taudia ese idia abia dae lasi, badina aneru idia noho lalohadaina idia abia dae lasi! (Inai maua, “ Sadukea Bona Farisea Taudia” itaia.) Hepapahuahu ia bada momokani neganai, Roma ena tuari biaguna ese Paulo ia gimaia lou. (Kara 23:10) To Paulo ena mauri lalonai dika do ia davaria noho. Ia dekenai dahaka do ia vara? Karoa gabena ai hereva ma haida do ita dibaia.