1, 2. (a) Paulo dekenai dahaka ia vara? (b) Paulo ia ura Kaisara ese ena kota herevana do ia kamonai, unai ese dahaka henanadai ia havaraia?

 KAISAREA ai, Paulo be ami taudia edia henari henunai ia noho. Lagani rua gunanai Paulo be Iudea dekenai ia giroa lou neganai, dina haida lalonai Iuda taudia be nega toi dala idia tahua ia idia alaia totona. (Kara 21:27-36; 23:10, 12-15, 27) Unai nega amo, Paulo ena inai taudia idia kwalimu lasi, to idia hesiku lasi. Paulo ia itaia, ia be ena inai taudia edia imana dekenai do idia atoa neganai, Roma ena Gavana, Festo, ia hamaoroa: “Lau ura Kaisara ese egu kota do ia kamonai!”​—Kara 25:11.

² Paulo ia ura Roma ena pavapava ese ena kota herevana do ia kamonai, Iehova ese unai ia durua, a? Inai nega dokona lalonai Dirava ena Basileia idia harorolaia guguru taudia dekenai, unai henanadai ena haere be mai anina bada. Paulo ese ‘kota vairanai sivarai namona ia hamomokania bona ena maoro ia gwauraia hedinarai’ karana dekenai haheitalai namona ia hahedinaraia, unai dainai ia ita tohotohoa be namo.​—Fili. 1:7.  

3, 4. (a) Dahaka dainai Paulo ena inai taudia idia ura Paulo be Ierusalema dekenai ia lao, bona edena dala ai ia idia hamasea lasi? (b) Iehova ese Paulo ia durua hegeregerena, hari edena dala ai ena hesiai taudia ia durua?

³ Festo be Roma ena provinsi, Iudea, ena gavana ai ia lao bona dina toi murinai, Ierusalema dekenai ia lao. a Unuseniai dubu biagudia bona Iuda ena tau badadia ese ia dekenai Paulo samania hereva metaudia idia gwauraia neganai, ia kamonai. Idia diba, Festo ia gaukara goada be namo idia bona Iuda taudia huanai maino ia karaia totona. Unai dainai idia ese Festo idia noia: Paulo be Ierusalema dekenai do idia abia lao, bona unuseniai idia kota henia. To unai bamona noinoi idia karaia, badina idia ura Paulo be Kaisarea amo Ierusalema ia lao henia lalonai, do idia alaia. Festo ese edia noinoi ia abia dae lasi, ia gwau: “Unai dainai umui huanai idia noho lohia taudia be lau danu [Kaisarea dekenai] idia mai be namo, bona  bema unai tauna be kerere ta ia karaia, vadaeni ia do idia samania.” (Kara 25:5) Unai dainai, Paulo be unai negai idia hamasea lasi.

⁴ Paulo be kota vairanai ia gini negadia ibounai lalonai, Iehova ese Lohiabada Iesu Keriso amo Paulo ia durua. Laloatao, matahanai ta lalonai Iesu ese Paulo ia hamaoroa: “Oi gari lasi!” (Kara 23:11) Hari inai negai, Dirava ena hesiai taudia be hadikaia herevadia bona dagedage idia davaria danu. Iehova ese ita davaria metau ibounai amo ita ia gimaia lasi, to aonega bona goada ia henia, unai ita haheaukalaia totona. Iseda lalokau Diravana ese ita dekenai “taunimanima edia siahu ia hereaia gauna” ia henia dainai, hanaihanai unai siahu dekenai ita tabekau.​—2 Kor. 4:7.

5. Paulo ena hereva dainai, Festo be dahaka ia karaia?

⁵ Dina haida murinai, Festo be Kaisarea ai “hahemaoro sea dekenai ia helai.” b Ia vairanai Paulo bona ia idia samania taudia idia gini. Bona Paulo ese edia samani herevadia haerelaia totona, ia gwau: “Lau be Iuda taudia edia Taravatu lau utua lasi, eiava dubu helaga bona Kaisara dekenai kerere ta lau karaia lasi.” Oibe, Paulo ia kerere lasi bona dibura ruma ai idia atoa be maoro lasi. Festo be dahaka do ia karaia? Ia ura Iuda taudia edia lalonamo ia abia dainai, Paulo ia nanadaia: “Oi ura Ierusalema dekenai oi daekau bona unai hereva dainai lau vairanai oi do idia hahemaoro henia, a?” (Kara 25:6-9) Unai be henanadai kavakavana! Bema Paulo be Ierusalema dekenai ia siaia lou, ena inai taudia ese ia do idia hahemaoro henia bona do idia hamasea. Festo be ena politikol gaudia sibona ia laloa dainai,  hahemaoro goevana ia karaia lasi. Guna Pontio Pilato be gavana neganai, Iesu dekenai unai bamona ia karaia danu. (Ioa. 19:12-16) Hari inai negai danu, diadi taudia ese ma haida edia lalonamo abia totona, unai bamona disisen kereredia idia karaia. Unai dainai, bema kota ese Dirava ena taunimanima idia kamonai murinai disisen kererena idia karaia, unai ita hoalaia lasi.

6, 7. Dahaka dainai Paulo be Kaisara dekenai apil ia karaia, bona edena dala ai Keristani taudia dekenai haheitalai namona ia hahedinaraia?

⁶ Bema Festo ese Iuda taudia edia lalonamo abia totona edia noinoi ia abia dae, vadaeni Paulo idia hamasea diba. Paulo be Roma tauna dainai, unai maoro ia gaukaralaia. Festo ia hamaoroa: “Lau be Kaisara ena hahemaoro sea vairanai lau gini, bona iniseniai lau do idia hahemaoro henia. Iuda taudia dekenai kerere ta lau karaia lasi, bona oi danu be unai oi lalopararalaia noho. . . . Lau ura Kaisara ese egu kota do ia kamonai!” Oibe, ta be unai bamona apil ia karaia neganai, ia haidaua diba lasi. Festo ia gwau: “Oi ura Kaisara danu ese emu kota herevana ia kamonai dainai, Kaisara dekenai do oi lao.” (Kara 25:10-12) Paulo be dagi bada siahu taudia dekenai apil ia karaia amo, Keristani taudia dekenai haheitalai namona ia hahedinaraia. Iseda inai taudia ese eda gaukara dekenai “taravatu ladanai kerere idia havaraia noho” neganai, ita ese gavamani edia taravatu amo heduru ita tahua, sivarai namona ena maoro ita gwauraia hedinarai totona. c—Sal. 94:20.

⁷ Unai dainai, ena be Paulo be kerere ia karaia lasi, to lagani rua dibura ruma ai ia noho, unai murinai maoro idia henia Roma dekenai ena keis ia herevalaia totona. To, unuseniai ia do lao lasi neganai, lohia tauna ma ta ia ura Paulo ia itaia.

8, 9. Dahaka dainai King Agripa ese Kaisarea hanua ia vadivadi henia?

⁸ Festo ese Paulo ena apil herevana ia kamonai bena dina haida murinai, King Agripa bona ena taihuna, Berenike, ese ia idia vadivadi henia, ia idia “hanamoa totona.” d Roma taudia edia nega ai, vaia king taudia ese gavana matamata idia vadivadi henia. Agripa ese Festo ia hanamoa, badina gavana dagina ia abia, unai amo ia ura politikol dalanai idia gaukara hebou bona tura namodia ai idia lao.​—Kara 25:13.

⁹ Festo ese king dekenai Paulo ena sivarai ia gwauraia, bona Agripa ia ura Paulo ena hereva ia kamonai. Murina dinana ai, unai lohia taudia rua be hahemaoro sea latanai idia helai. To mai hekokoroku ida edia siahu idia hahedinaraia karana be anina lasi, to idia vairanai ia noho dibura tauna do ia gwauraia herevana be mai anina bada.​—Kara 25:22-27.

10, 11. Edena dala ai Paulo ese Agripa dekenai hemataurai ia hahedinaraia, bona king dekenai ena mauri gunana be edena bamona ia herevalaia?

¹⁰ Paulo be mai hemataurai ida King Agripa ia tanikiu henia, badina nega ia henia ena maoro ia herevalaia totona, bona ia ese king ia hanamoa badina Iuda  taudia edia kastom bona hepapahuahu hamaoromaoroa daladia ia diba namonamo. Bena Paulo ese ena mauri gunana ia herevalaia: “Lau be Farisea tauna bona emai tomadiho ena hahediba herevadia lau badinaia goadagoada.” (Kara 26:5) Guna Paulo be Farisea tauna neganai, Mesia ena mai ia naria. To Keristani tauna ai ia lao neganai, mai gari lasi ida ia hahedinaraia, Iesu Keriso be idaunegai idia naria gwauhamata Mesia. Paulo bona ia idia samania taudia be unai idia abia dae, anina be Dirava ese edia sene taudia dekenai ia karaia gwauhamatana do ia hagugurua, to unai hereva dainai ia idia kota henia. Paulo ese unai ia herevalaia goevagoeva dainai, Agripa ia ura ena hereva ia kamonai. e

¹¹ Paulo ese guna Keristani taudia ia dagedage henia bada karana ia herevalaia neganai, ia gwau: “Guna lau danu lau laloa, Nasareta tauna Iesu ena ladana hadikaia karadia momo do lau karaia. . . . Bona idia [Keriso murinai idia raka taudia] dekenai lau badu dikadika dainai, siti ma haida dekenai danu lau lao bona lau dagedage henidia.” (Kara 26:9-11) Paulo be ia hereva koikoi lasi. Taunimanima momo idia diba, ia ese Keristani taudia ia dagedage henia. (Gal. 1:13, 23) Reana Agripa ia laloa, ‘Dahaka ese unai tauna ena kara ia haidaua?’

12, 13. (a) Paulo ia helalo-kerehai dalana mani oi herevalaia. (b) Paulo be edena dala ai ‘au mai matana ia kikia noho’?

¹² Gabeai, Paulo ia gwauraia herevana amo, unai henanadai ena haere ita itaia: “Damaseko dekenai lau lao, badina dubu biagudia amo gwaumaoro lau abia, unuseniai unai bamona lau karaia totona. Vadaeni King e, dina tubu ai dala ai lau lao  noho lalonai diari ta lau itaia, unai diari ese dina ena diari ia hereaia. Ia be guba amo ia hedinarai, bona lau bona egu bamodia ia hagegea. Bona ai ibounai be tano dekenai ai moru neganai, gado ta lau kamonai, Heberu gado ai lau ia hereva henia, ia gwau: ‘Saulo e, Saulo e, dahaka dainai lau oi dagedage henia noho? Au mai matana oi kikia noho dainai, oi sibona oi hahisia.’ To lau gwau: ‘Tau badana e, oi be daika?’ Bona ia haere: ‘Lau be Iesu, oi dagedage henia noho tauna.’” f—Kara 26:12-15.

¹³ Paulo be unai matahanai ia do itaia lasi neganai, ia be laulau dalanai ‘au mai matana ia kikia noho.’ Kohu huaia animal ese au mai matana ia kikia bona sibona ia haberoa hegeregerena, Paulo be Dirava tura henia karana ia dadaraia. Ia toreisi lou tauna, Iesu Keriso, be Damaseko ena dala ai Paulo dekenai ia hedinarai karana amo, ia ese unai kudou-maoro tauna ia durua, ena lalohadai kererena ia haidaua totona.​—Ioa. 16:1, 2.

14, 15. Paulo ese ena mauri ia haidaua karana be edena bamona ia herevalaia?

¹⁴ Momokani, Paulo be ena mauri lalonai gau momo ia haidaua. Agripa ia hereva henia neganai, ia gwau: “Guba amo ia mai matahanai hegeregerena lau badinaia. Vadaeni Damaseko dekenai lau lao guna bona murinai Ierusalema, bena Iudea ena gabu ibounai bona bese idauidau dekenai lau lao. Idia lau hadibaia, namona be idia helalo-kerehai bona Dirava dekenai idia giroa, bona edia kara amo unai do idia hamomokania.” (Kara 26:19, 20) Lagani momo lalonai, Paulo be Iesu Keriso ese matahanai amo ia henia gaukarana ia karaia. Unai ese dahaka namo  ia havaraia? Paulo ia harorolaia sivarai namona idia abia dae taudia ese matabodaga bona kara koikoi amo idia helalo-kerehai, bona Dirava dekenai idia giroa. Unai bamona taudia be Basileia ena taunimanima ai idia lao, bona gavamani ena taravatu idia badinaia bona matauraia.

¹⁵ To, Iuda taudia ese unai namo idia laloa bada lasi. Paulo ia gwau: “Unai dainai Iuda taudia be dubu helaga lalonai lau idia dogoatao bona idia ura lau idia hamasea. To Dirava ena heduru lau abia dainai, unai nega amo ema bona hari, dagi bada bona dagi maragi taudia dekenai sivarai namona lau harorolaia.”​—Kara 26:21, 22.

16. Diadi bona lohia taudia vairanai eda abidadama ita herevalaia neganai, edena dala ai Paulo ita tohotohoa?

¹⁶ Ita be Keristani taudia dainai, namona be ‘nega ibounai do ita noho hegaegae’ iseda abidadama ita gwauraia hedinarai totona. (1 Pet. 3:15) Diadi bona lohia taudia vairanai eda abidadama ita herevalaia neganai, namona be Paulo ese Agripa bona Festo ia hereva henia dalana ita tohotohoa. Mai hemataurai ida siahu taudia dekenai, hereva momokani ese ita bona sivarai namona idia kamonai taudia edia mauri ia haidaua dalana ita herevalaia neganai, reana edia lalona ia haidaua diba.

17. Paulo ena hereva dainai, Festo be dahaka ia karaia, bona hari edena dala ai taunimanima ese unai kara idia hahedinaraia?

¹⁷ Unai lohia taudia rua ese Paulo ena hereva idia kamonai neganai, idia ura edia lalohadai idia gwauraia danu. Ia vara gauna mani ita laloa: “Paulo be inai gaudia ia herevalaia noho lalonai, Festo be ia hereva badabada, ia gwau: ‘Paulo e, oi be oi kavakava! Emu diba bada ese oi ia hakavaia noho!’” (Kara 26:24) Festo ena hereva amo ia hahedinaraia, hari taunimanima be unai bamona lalohadai idia abia danu. Idia momo idia laloa, Baibel ena hereva momokani idia hadibaia taudia be tomadiho goadalaia kava taudia. Tanobada ena aonega taudia ese nega momo Baibel ena hadibaia herevana, mase taudia do idia toreisi lou herevana unai, idia abia dae be auka.

18. Paulo be edena dala ai Festo ia haere henia, bona Agripa be dahaka ia gwauraia?

¹⁸ To Paulo ese gavana ia haere henia, ia gwau: “Egu Lohia Festo e, lau kavakava lasi, to hereva momokani lau gwauraia bona mai laloa maoromaoro ida lau hereva. Momokani, king be unai gaudia ia diba namonamo, unai dainai mai gari lasi ida ia lau hereva henia. Bona lau diba ia be inai gaudia ibounai ia itaia, . . . King Agripa e, peroveta taudia edia hereva oi abia dae, a? Lau diba oi abia dae.” Agripa ia haere: “Nega kwadogi lalonai egu lalona do oi veria Keristani tauna ai lau lao totona.” (Kara 26:25-28) Herevana king be mai momokani ida unai hereva ia gwauraia eiava lasi, to Paulo ena hereva ese iena lalona ia hamarerea.

19. Festo bona Agripa ese Paulo totona dahaka disisen idia karaia?

¹⁹ Bena Agripa bona Festo idia gini, unai amo idia hahedinaraia unai hebou ia doko. “Unai gabu idia rakatania neganai, ta ta dekenai idia gwau: ‘Inai tauna be gau ta ia karaia lasi ia mase eiava dibura ai ia noho totona.’ Vadaeni, Agripa be Festo dekenai ia gwau: ‘Bema inai tauna be Kaisara dekenai ia noinoi lasi, do ita ruhaia diba.’” (Kara 26:31, 32) Idia diba, kerere lasi tauna be edia vairanai ia gini. Reana unai nega amo, idia ese Keristani taudia do idia lalonamo henia.

20. Paulo be lohia taudia dekenai ia haroro dainai, unai ese dahaka namo ia havaraia?

²⁰ Inai sivarai ese ia gwauraia lohia taudia rua be Dirava ena Basileia sivarai namona idia abia dae lasi. Paulo be unai tatau rua edia vairanai ia gini be aonega karana, a? Oibe. Iudea dekenai Paulo be ‘king bona gavana taudia vairanai idia hakaua lao,’ unai ese dala ia kehoa Roma ena lohia taudia dekenai sivarai namona ia herevalaia totona. (Luka 21:12, 13) Danu, iena mauri lalonai idia vara gaudia bona dagedage negadiai ena abidadama ia dogoatao auka karana amo, ena tadikaka bona taihu ia hagoadaia.​—Fili. 1:12-14.

21. Basileia gaukarana ita goadalaia noho neganai, dahaka anina namodia do idia vara?

²¹ Hari inai negai unai bamona ia vara danu. Ena be hahetoho bona dagedage ita davaria, to bema haroro gaukara ita goadalaia noho, vadaeni anina namodia do idia vara. Reana unai ese dala do ia kehoa, nega momo ita haroro henia lasi dagi bada taudia ita hereva henia diba. Iseda haheauka karana ese eda tadikaka bona taihu do ia hagoadaia, mai gari lasi ida Dirava ena Basileia sivarai namona idia harorolaia guguru totona.