1, 2. Dahaka dainai Paulo ese Ierusalema ai ia davaria dagedage dainai, ia hoa lasi?

 IERUSALEMA ai tuari taudia ese Paulo be ena inai taudia amo idia hamauria, to dibura ruma ai idia atoa lou. Ia ese unuseniai ia davaria dagedage ia hoalaia lasi. Badina peroveta herevadia amo ia diba, unai taoni ai ‘dibura dekenai ia do idia atoa bona hisihisi momo do ia davaria.’ (Kara 20:22, 23) Bona Paulo ia diba momokani lasi ia dekenai dahaka do ia vara, to ia diba Iesu ena ladana dainai hisihisi do ia davaria noho.​—Kara 9:16.

² Keristani peroveta taudia ese Paulo idia hadibaia, ia do idia guia bona “idau bese taudia edia imana dekenai do idia atoa.” (Kara 21:4, 10, 11) Vanegai sibona Iuda taudia be dala idia tahua Paulo idia hamasea totona, bona daudau lasi murinai, Sanhedrin ena memba taudia be ia totona idia heai, badina ia do “idia alaia garina.” Aposetolo Paulo be dibura tauna bamona Roma tuari taudia edia henari henunai ia noho, bona gabeai ia dekenai samani hereva idauidau do idia gwauraia bona kota vairanai do ia gini lou. (Kara 21:31; 23:10) Momokani, aposetolo Paulo ese heduru bona goada ia abia be namo!

3. Haroro gaukara ita karaia noho totona, edeseniai hagoadaia herevadia ita abia?

³ Inai nega dokona lalonai, ita diba “Keriso ida idia hakapua bona idia ura Dirava badinaia karana idia hahedinaraia taudia ibounai be dagedage do idia davaria danu.” (2 Tim. 3:12) Nega ta ta lalonai, namona be hagoadaia hereva ita abia, unai amo iseda haroro gaukara ita karaia noho. Ita moale badina “hesiai tauna mai ena kamonai bona mai ena aonega” ese nega korikorina ai ia halasia Baibel buka bona magasin bona hebou idauidau amo, heduru bona hagoadaia herevadia ita abia! (Mat. 24:45) Iehova ese ita ia hamaoroa, sivarai namona idia inai henia taudia be do idia kwalimu lasi. Idia ese Dirava ena hesiai taudia do idia hadikaia ore lasi eiava edia haroro gaukara do idia koua lasi. (Isa. 54:17; Ier. 1:19) To aposetolo Paulo be edena bamona? Herevana dagedage ia davaria, to haroro gaukara hagugurua totona heduru ia abia, a? Bema oibe, edena dala ai bona daika ese ia hagoadaia?

4, 5. Paulo be dahaka hagoadaia hereva ia abia, bona dahaka dainai unai be nega maorona ai ia abia?

⁴ Tuari taudia ese Sanhedrin amo aposetolo Paulo idia hamauria  hanuaboina ai, goada bada ia abia. Baibel ia gwau: “Lohiabada be ia badinai ia gini bona ia gwau: “Oi gari lasi! Ierusalema ai lau oi gwauraia hedinarai hegeregerena, namona be Roma dekenai do oi karaia danu.’” (Kara 23:11) Paulo be Iesu amo hagoadaia hereva ia abia murinai, ia diba do ia mauri. Danu ia diba, do ia mase lasi ela bona Roma dekenai ia ginidae, bona unuseniai Iesu ena sivarai do ia harorolaia.

⁵ Paulo be nega korikori ai unai heduru ia abia. Murina dinana ai, Iuda tatau 40 bamona “idia palani hebou bona gwauhamata metauna idia karaia, do idia aniani bona inuinu lasi ela bona Paulo idia alaia.” Unai Iuda taudia ese idia karaia “gwauhamata metauna” ia hahedinaraia, edia lalona idia hadaia, Paulo idia alaia mase totona. Bema idia karaia gwauhamata metauna idia hagugurua lasi, idia laloa idia dekenai dika ta do ia vara. (Kara 23:12-15) Idia karaia palanina be dubu biagudia bona tau badadia ese idia abia dae, idia ura Paulo be Sanhedrin dekenai do idia hakaua lao bona idia henanadai henia lou, toana be idia ura ia amo hereva ma haida idia diba. To edia palani be inai, idia ura dala dekenai Paulo idia naria bona ia do idia alaia.   

6. Edena dala ai Paulo alaia totona idia karaia palani ia hedinarai, bona matamata taudia ese edena dala ai Paulo ena vavana idia tohotohoa diba?

⁶ Paulo ena vavana ese edia palani ia kamonai bona Paulo dekenai ia gwauraia. Bona Paulo ese unai tau matamata ia hamaoroa, unai palani be Roma ena tuari biaguna, Klaudio Lusia, dekenai ia herevalaia. (Kara 23:16-22) Iehova ese matamata taudia—Paulo ena vavana bamona taudia—ia lalokau henidia, badina idia be mai gari lasi ida Dirava ena taunimanima edia namo idia laloa bona dala idauidau idia gaukaralaia Basileia gaukarana idia habadaia totona.  

7, 8. Klaudio Lusia be dahaka ia karaia, Paulo ia gimaia totona?

⁷ Klaudio Lusia, tuari taudia 1,000 ia naria tauna, ese unai ia kamonai neganai, oda ia henia gadi taudia 470—tuari taudia, io dogoatao taudia, bona hosi guia taudia—be unai hanuaboi ai Ierusalema do idia rakatania bona Kaisarea dekenai Paulo do idia abia lao. Unuseniai, ia be gavana Feliki dekenai do idia henia. a Ena be Kaisarea be Iudea ena taoni badana bona Roma ena gavamani ia noho gabuna, to Idau Bese taudia momo be unuseniai idia noho bona Iuda taudia be momo lasi. Kaisarea ai, taunimanima idia noho namonamo, to Ierusalema ai momo idia dagedage, tomadiho ma haida idia lalodika henia, bona heiriheiri idia havaraia. Danu Kaisarea ai, Iudea ai ia noho Roma ena tuari orea ena hedikwota ia noho.

⁸ Roma ena taravatu hegeregerena, Lusia ese Feliki dekenai revareva ia siaia bona Paulo ena kota ia herevalaia. Lusia ia gwau ia kamonai Paulo be Roma tauna bona Iuda taudia ese idia ura “alaia” neganai, ia ese Paulo ia gimaia. Lusia ia gwau, Paulo dekenai kerere ta ia davaria lasi, ia do ia “hamasea eiava hadiburaia totona,” to Paulo idia ura hamasea herevana dainai, Lusia ese Paulo be Feliki  dekenai ia siaia lao, unai amo gavana ese samania taudia edia hereva do ia kamonai bona do ia hamaoromaoroa.​—Kara 23:25-30.

9. (a) Paulo be Roma tauna, to edena dala ai unai maoro idia matauraia lasi? (b) Edena bamona negadiai, iseda maoro ita gaukaralaia be namo?

⁹ Lusia be ena revareva lalonai ia gwauraia gaudia be momokani, a? Hereva ibounai lasi, to haida sibona. Toana be ia ura gavana hamoalea totona unai bamona ia hereva. Ia kamonai Paulo be Roma tauna, to unai badina dainai Paulo ia durua lasi. Ma danu, Lusia be ena revareva lalonai ia hahedinaraia lasi, ia ese Paulo be ‘seini rua amo ia guia’ bona gabeai oda ia henia ia “do idia kwadia bona henanadai henia” totona. (Kara 21:30-34; 22:24-29) Oibe, ena be Paulo be Roma tauna, to Lusia ese unai maoro ia matauraia lasi. Hari inai negai, Satani ese tomadiho goadalaia taudia ia gaukaralaia ita idia dagedage henia bona Dirava tomadiho henia karana idia koua totona. To Paulo hegeregerena, Dirava ena taunimanima ese edia maoro—edia tano ai idia noho ena maoro unai—idia gaukaralaia bona gavamani ena taravatu amo heduru idia tahua diba.

10. Paulo dekenai dahaka samani hereva metaudia idia gwauraia?

¹⁰ Kaisarea ai, Paulo be ‘Heroda ena pavapava rumana ai idia gimaia,’ bona unuseniai Ierusalema amo do idia mai samania koikoi taudia ia naria. (Kara 23:35) Dina faiv murinai, hahelaga tauna badana Anania, loea tauna Teretulo, bona tau badadia haida idia ginidae. Matamanai, Teretulo ese Feliki ia hanamoa, Iuda taudia totona ia karaia gaudia dainai, ia ura gavana ese ia do ia lalonamo henia. b Gabeai, Teretulo ese Paulo ena kota keis ia herevalaia neganai, ia gwau Paulo be “kerere havaraia tauna, bona tanobada ibounai lalonai Iuda taudia huanai, gavamani gwau-edeede henia karadia ia havaraia, bona ia be Nasareta taudia edia tomadiho oreana ia gunalaia tauna. Danu ia ese dubu helaga ia hamiroa toho, unai dainai ia ai dogoatao.” Bona Iuda taudia ma haida ese “Paulo idia gwauraia dika bona Teretulo ena hereva idia durua.” (Kara 24:5, 6, 9) Edia samani herevadia be inai: Paulo ese gavamani ia gwau-edeede henia, orea dikana ta ia gunalaia, bona dubu helaga ia hadikaia—unai bamona samani hereva metaudia dainai ta ia mase diba.

11, 12. Paulo ese edena dala ai ia idia samania taudia edia hereva ia koua?

¹¹ Bena nega idia henia, Paulo ia hereva totona. Ena hereva ia hamatamaia, ia gwau: “Mai gari lasi ida egu sivarai do lau gwauraia.” Ia hahedinaraia goevagoeva, ia dainai idia herevalaia gaudia be koikoi. Paulo be dubu helaga ia gwauraia  dika lasi, eiava gavamani ia gwau-edeede henia lasi. Danu ia hahedinaraia, ia be Ierusalema dekenai “lagani momo” lalonai ia noho lasi, bona unuseniai reana hitolo bona dagedage karadia dainai idia ogogami Keristani taudia dekenai “heduru gaudia” ia abia lao. Paulo ia hahedinaraia danu, dubu helaga lalonai ia do vareai lasi neganai, ‘taravatu hegeregerena ia goeva’ bona ia hekwarahi ‘Dirava bona taunimanima vairanai ena lalomamina ia goeva totona.’​—Kara 24:10-13, 16-18.

¹² Bona Paulo ia gwau, ia be ena sene taudia edia Dirava dekenai hesiai gaukara helagana ia karaia, unai amo ‘idia gwauraia tomadiho oreana ena dala ia badinaia.’ To, ia gwau ia ese “Taravatu lalonai idia noho gaudia bona Peroveta Taudia ese idia torea hereva ibounai” ia abidadama henia. Bona ia idia samania taudia bamona, ia ese “kara maoromaoro taudia bona kara maoromaoro lasi taudia be do idia toreisi lou” herevana ia abia dae. Paulo ia ura ia idia samania taudia ese edia hereva idia hamomokania dainai, ia gwau: “Iniseni idia noho tatau ese oi do idia hamaoroa, Sanhedrin vairanai lau gini neganai, lau dekenai dahaka kerere idia davaria. To reana gau tamona dainai lau idia samania. Kota dekenai lau noho neganai, inai lau hereva: ‘Mase taudia be do idia toreisi lou herevana dainai hari dina emui vairanai lau idia hahemaoro henia noho!’”—Kara 24:14, 15, 20, 21.

13-15. Paulo be mai gari lasi ida siahu taudia vairanai ia haroro karana dekenai, dahaka haheitalai namona ia hahedinaraia?

¹³ Bema iseda tomadiho dainai haida ese siahu taudia vairanai ita idia abia lao bona idia samania koikoi, idia gwau ita be haida ita doria idia dagedage, gavamani ita gwau-edeede henia, o idia gwau ita be “tomadiho orea” dikana, namona be aposetolo Paulo ena haheitalai ita tohotohoa. Paulo ese gavana ena lalonamo  abia totona, ia ia hanamoa koikoi lasi, Teretulo ia karaia bamona. To Paulo ia manau bona hemataurai karana ia hahedinaraia. Ia ese mai aonega ida hereva momokani ia gwauraia hedinarai goevagoeva. Paulo ia gwau, “Asia ena provinsi amo Iuda taudia” ese ia idia samania koikoi bona idia gwau ia ese dubu helaga ia hadikaia, to idia be unuseni idia noho lasi; taravatu hegeregerena, Paulo be mai ena maoro idia ia davaria bona edia samani hereva koikoidia ia kamonai.​—Kara 24:18,19.

¹⁴ Mai anina bada gauna be inai, Paulo be ena abidadama ia gwauraia hedinarai. Aposetolo tauna be mai lalogoada ida toreisi lou herevana ia gwauraia lou, ena be guna Sanhedrin vairanai unai hereva dainai heiriheiri bada ia vara. (Kara 23:6-10) Paulo be hereva momokani totona ia hereva neganai, ia ese toreisi lou helarona ia herevalaia badabada. Dahaka dainai? Badina idia ese Iesu bona ena toreisi lou sivaraina idia abia dae lasi dainai, idia dekenai unai ia harorolaia. (Kara 26:6-8, 22, 23) Oibe, unai toreisi lou herevana—Iesu abidadama henia karana bona ena toreisi lou unai—ese hepapahuahu ia havaraia.

¹⁵ Paulo bamona, ita be mai gari lasi ida ita haroro bona Iesu ese ena hahediba taudia ia hamaoroa herevana amo goada ita abia, ia gwau: “Egu ladana dainai taunimanima ibounai ese umui do idia inai henia. To ia haheauka ela bona dokona tauna be mauri do ia abia.” Do ita herevalaia gaudia dainai ita laloa momo be namo, a? Lasi, badina Iesu ese inai hagoadaia herevana ia gwauraia: “Umui idia abia lao siahu taudia dekenai idia henia gwauraia neganai, dahaka do umui hereva umui lalohekwarahilaia lasi, to unai hora ai do umui gwauraia herevana do umui diba, badina unai be umui lasi, to lauma helaga ia hereva noho.”​—Mar. 13:9-13.

16, 17. (a) Paulo be kota dekenai ia gini neganai, Feliki be dahaka ia karaia? (b) Dahaka dainai Feliki ia gari, to dahaka badina dainai ia ura Paulo ia itaia loulou?

¹⁶ Inai be Gavana Feliki ena nega ginigunana lasi, Keristani hadibaia herevadia ia kamonai totona. Baibel ia gwau: “Feliki be Lohiabada ena dala ia diba namonamo dainai edia kota ia koua bona ia gwau: “Tuari biaguna Lusia ia diho mai neganai, emui samania hereva dekenai abia hidi do lau karaia.”. Bona ami ofesa dekenai oda ia henia Paulo do ia dogoatao, to gwaumaoro ia henia gau haida ia karaia totona, bona ena turadia ese idia vadivadi henia diba, ia idia durua totona.”​—Kara 24:22,23.

¹⁷ Dina haida murinai, Feliki bona ena adavana Drusila—Iuda hahinena—idia mai bena Feliki ese Paulo ia boiria “Keriso Iesu abidadama henia karana be ia dekenai ia harorolaia” totona. (Kara 24:24) To, Paulo be “kara maoromaoro, sibona biagua karana, bona do ia mai hahemaoro karana ia herevalaia neganai, Feliki ia gari,” badina ena mauri lalonai kara dika idauidau ia karaia, bona unai amo ena lalomamina ia dika. Unai dainai Paulo dekenai ia gwau: “Hari oi lao, to nega namona ta lau davaria neganai, oi do lau boiria lou.” Unai murinai, Feliki ese  Paulo be nega momo ia itaia, hereva momokani ia diba totona lasi, to ia ura Paulo ese ia dekenai moni ia henia.​—Kara 24:25, 26.

18. Dahaka dainai Paulo ese Feliki bona ena adavana dekenai, “kara maoromaoro, sibona ena ura biagua karana, bona do ia mai hahemaorona,” ia herevalaia?

¹⁸ Dahaka dainai Paulo ese Feliki bona ena adavana dekenai, “kara maoromaoro, sibona biagua karana, bona do ia mai hahemaoro karana,” ia herevalaia? Laloatao, idia ura “Keriso Iesu abidadama henia karana” ena anina idia diba. Paulo ia diba idia be matabodaga, dagedage, bona kara gageva taudia, unai dainai Iesu murinai idia raka taudia ibounai ese do idia karaia gaudia be idia dekenai ia herevalaia. Ena hereva amo ia hahedinaraia, Feliki bona ena adavana edia mauri dalana be Dirava ena kara maoromaoro taravatudia amo ia idau. Unai amo idia itaia diba, taunimanima ibounai be edia lalohadai, hereva, bona kara hegeregerena Dirava ese idia do ia hahemaoro henidia. Bona Dirava ese idia rua dekenai do ia karaia kota be mai anina bada, to Feliki ese Paulo dekenai do ia karaia kota be anina bada lasi. Unai dainai, Feliki “ia gari”!

19, 20. (a) Iseda hesiai gaukara ai, toana be haida ese eda hereva idia abia dae to bema idia ura lasi edia mauri dalana idia haidaua, dahaka ita karaia be namo? (b) Edena bamona ita diba Feliki be Paulo ena turana lasi?

¹⁹ Iseda haroro gaukara lalonai, reana Feliki bamona taudia ita davaria diba. Toana be matamanai idia ura hereva momokani idia dibaia, to idia ura lasi hereva momokani hegeregerena edia mauri idia haidaua. Unai dainai, unai bamona taudia ita durua neganai, namona be ita naria namonamo. To Paulo bamona, idia dekenai mai aonega ida Dirava ena kara maoromaoro taravatudia ita herevalaia diba. Reana hereva momokani ese edia kudouna do ia hamarerea. To bema idia ura lasi edia mauri dalana idia haidaua, idia ita rakatania bona hereva momokani idia ura diba taudia ita tahua.

²⁰ Feliki ena lalohadai korikorina be inai hereva ese ia hahedinaraia: “Lagani rua idia ore murinai, Porokio Festo ese Feliki ena gabu ia abia. To Feliki ia ura Iuda taudia edia lalonamo ia abia dainai, Paulo be dibura rumana lalonai ia rakatania.” (Kara 24:27) Feliki be Paulo ena turana korikorina lasi. Feliki ia diba “Lohiabada ena dala” idia badinaia taudia be gavamani idia gwau-edeede henia lasi. (Kara 19:23) Ia diba danu, Paulo ese Roma ena taravatu ia utua lasi. To, Feliki ia ura “Iuda taudia edia lalonamo ia abia dainai,” Paulo be dibura rumana ai ia rakatania.

21. Porokio Festo ese Feliki ena gabu ia abia murinai, Paulo dekenai dahaka ia vara? Bona dahaka dainai ia goada noho?

²¹ Kara karoa 24 ena siri dokona ese ia hahedinaraia bamona, Porokio Festo ese Feliki ena gabu ia abia neganai, Paulo be dibura ruma ai ia do noho. Unai dainai Paulo be nega momo kota idauidau bona dagi bada taudia momo edia vairanai ia gini. Momokani, inai gari lasi aposetolo tauna be “king bona gavana taudia vairanai” idia hakaua lao. (Luka 21:12) Do ita itaia, gabeai ia ese ena nega ai ia noho siahu bada lohia tauna do ia haroro henia. Unai ibounai lalonai, Paulo be ena abidadama dekenai ia gini goada. Guna Iesu ese ia dekenai ia gwauraia herevana dainai goada ia abia noho, Iesu ia gwau: “Oi gari lasi!”