1. Edena dala ai Keristani taudia ginigunadia bona Iehova ena Witnes taudia idia hegeregere?

 IDIA be mai edia ura bada ida sivarai namona idia harorolaia. Bona idia ura dikadika lauma helaga ena heduru bona hakaua dalana idia abia dae. Dagedage ese idia ia koua lasi, sivarai namona idia harorolaia totona. Bona Dirava ese ia hanamodia bada. Oibe, Keristani taudia ginigunadia dekenai unai ia vara, bona hari Iehova ena Witnes taudia dekenai unai ia momokani danu.

2, 3. Kara bukana ese dahaka gaudia ia sivarailaia?

² Oibe, Aposetolo Edia Kara bukana amo oi duahia sivaraidia momo ese emu abidadama idia hagoadaia bada, ani? Ia be buka idauna, badina Dirava ena lauma ese ia havaraia bona Keristani tomadihona ia hamatamaia ena histori ia herevalaia.

³ Kara bukana ese tano 32, siti 54, bona motumotu 9 ai idia noho taudia 95 edia ladana ia gwauraia. Unai buka ese taunimanima idauidau edia sivarai ia gwauraia, hegeregere ladana bada lasi taudia, hekokoroku tomadiho taudia, politikol taudia, bona dagedage taudia. To danu unai buka ese emu Keristani tadikaka taihu ginigunadia edia sivarai ia gwauraia, ena be mauri ena metau idauidau idia davaria, to mai goada ida sivarai namona idia harorolaia.

4. Edena dala ai aposetolo Paulo, Doreka, bona abidadama taudia ma haida ida hetura karana namona ita moalelaia?

⁴ Keristani ginigunadia edia nega amo ema bona hari, lagani 2,000 idia ore vadaeni. Inai taudia be mai goada ida idia gaukara, hegeregere aposetolo Petero bona Paulo, momo ese idia lalokau henia doketa tauna Luka, hariharibada tauna Banaba, gari lasi tauna Stefano, hebogahisi hahinena Tabita, heabidae hahinena Lidia, bona abidadama taudia ma momo herea danu. Ena be unai taudia be idaunegai idia noho, to idia ida hetura karana namona ita moalelaia. Dahaka dainai? Badina idia bamona, hahediba taudia halaoa gaukarana ita karaia danu. (Mat. 28:19, 20) Oibe, unai gaukara ita karaia be hahenamo badana!

5. Iesu ena murinai idia raka taudia ginigunadia be edeseniai sivarai namona idia harorolaia matamaia?

⁵ Mani Iesu ese ena murinai idia raka taudia dekenai ia henia gaukarana ita laloa. Ia gwau: “Lauma helaga be umui latanai ia diho neganai, siahu do  umui abia. Bena Ierusalema, Iudea ibounai, Samaria, bona tanobada ena daudau momokani gabudia dekenai lau do umui gwauraia hedinarai.” (Kara 1:8) Ginigunana be, lauma helaga ese hahediba taudia ia hasiahua, “Ierusalema” dekenai do idia haroro totona. (Kara 1:1–8:3) Bena lauma helaga ena hahekau henunai, ‘Iudea ibounai bona Samaria’ dekenai idia haroro. (Kara 8:4–13:3) Unai murinai, sivarai namona be “tanobada ena daudau momokani gabudia dekenai” idia abia lao matamaia.​—Kara 13:4–28:31.

6, 7. Iseda haroro gaukara ai dahaka ita gaukaralaia, to Keristani taudia ginigunadia dekenai unai gaudia idia noho lasi?

⁶ Keristani taudia ginigunadia edia negai Baibel ibounai ia noho lasi, haroro gaukara dekenai idia gaukaralaia totona. Mataio ena Evanelia bukana ia noho lasi ela bona lagani 41 C.E. ena murinai. Lagani 61 C.E. bamona ai, Luka ese Kara bukana ia do torea haorea lasi neganai, Paulo ese revareva haida ia torea vadaeni. To unai Keristani taudia ginigunadia dekenai Toretore Helagadia ena kopi ta eiava Baibel herevalaia bukadia ta ia noho lasi, kamonai taudia dekenai idia henia totona. Iuda Keristani taudia be Iesu ena hahediba taudia ai idia do lao lasi neganai, Heberu Toretoredia be sinagoga sibona dekenai idia kamonai. (2 Kor. 3:14-16) To gau badana be idia kamonai namonamo, badina unai dala amo siri be edia kwarana amo idia gwauraia diba.

⁷ Hari inai negai, ita dekenai Baibel bona Baibel idia herevalaia bukadia idia noho. Tano 240 mai kahana bona gado idauidau ai sivarai namona ita harorolaia karana amo, momo be hahediba taudia ai ita halaoa.

8, 9. (a) Lauma helaga ese Iesu ena hahediba taudia ia durua, dahaka idia karaia totona? (b) Dirava ena lauma ena heduru amo, igui hesiai tauna ese dahaka gaudia ia halasia noho?

⁸ Iesu ese ena hahediba taudia ia haganidia do idia haroro neganai, ia gwau: “Lauma helaga be umui latanai ia diho neganai, siahu do umui abia.” Dirava ena lauma ena hahekau henunai, Iesu ena murinai idia raka taudia be tanobada ibounai lalonai haroro gaukara do idia karaia. Lauma helaga ena siahu amo, Petero bona Paulo ese gorere taudia idia hanamoa, demoni idia lulua, bona mase taudia idia hatorea isi danu! To, lauma helaga amo ia mai siahuna ese mai anina bada gaukarana ma ta ia karaia. Aposetolo bona hahediba taudia ma haida ia durua, taunimanima dekenai diba maorona idia hadibaia, unai amo mauri hanaihanai idia abia diba.​—Ioa. 17:3.

⁹ Pentekoste 33 C.E. ai, Iesu ena hahediba taudia be “gado idauidau ai idia hereva matamaia, Dirava ena lauma helaga ena hakaua hegeregerena idia hereva.” Unai dainai, idia ese “Dirava ena kara badadia idia herevalaia.” (Kara 2:1-4, 11) Hari inai negai, hoa dalanai gado idauidau ai ita hereva lasi. To Dirava ena lauma amo, hesiai tauna mai ena aonega ese gado idauidau ai Baibel herevalaia bukadia ia halasia noho. Hegeregere, hua ta ta ai Gima Kohorona bona Awake! magasin edia kopi milioni momo idia printaia, bona iseda websait jw.org ese Baibel pablikeisen bona vidio idauidau be gado 1000 mai kahana ai idia halasia. Unai gaudia dainai, ita ese “Dirava ena kara badadia” be bese, iduhu, bona gado idauidau taudia dekenai ita harorolaia diba.​—Apok. 7:9.

10. Lagani 1989 amo ema bona hari, Baibel hahanaia gaukarana totona dahaka idia karaia?

 ¹⁰ Lagani 1989 ai, hesiai tauna mai ena aonega ia gaukara goada matamaia, New World Translation of the Holy Scriptures be gado momo ai ia halasia totona. Hari, unai Baibel be gado 200 mai kahana ai idia hahanaia vadaeni, bona kopi milioni momo idia printaia vadaeni, bona ma momo herea idia do printaia noho. Dirava bona ena lauma ena siahu sibona amo, unai gaukara idia karaia.

11. Witnes taudia edia Baibel herevalaia bukadia hahanaia gaukarana, mani oi herevalaia.

¹¹ Unai hahanaia gaukarana be Keristani volantia taudia tausen momo ese tano 150 mai kahana dekenai idia karaia. Unai ita hoalaia lasi, badina tanobada ibounai lalonai inai orea tamona sibona be lauma helaga ena siahu amo, Iehova Dirava, ena Mesia King, bona guba Basileiana ia “gwauraia guguru”!​—Kara 28:23.

12. Dahaka dainai Paulo bona Keristani taudia ma haida be haroro gaukara idia karaia diba?

¹² Paulo be Pisidia ena Antioka ai Iuda bona Idau Bese taudia ia haroro henia neganai, “mauri hanaihanai idia ura kudou maoro taudia ibounai be abidadama taudia ai idia lao.” (Kara 13:48) Kara bukana ena dokonai, Luka ia hahedinaraia, Paulo ese ‘Dirava ena Basileia ia harorolaia, mai gari lasi ida bona gau ta ese ia koua lasi.’ (Kara 28:31) Aposetolo Paulo be edeseniai ia haroro? Ia be Roma ai ia haroro, unai negai ia noho basileia badana unai! Ena be Iesu ena murinai idia raka taudia be tok amo eiava dala ma haida ai idia haroro, to edia gaukara ibounai lalonai lauma helaga ese ia durudia bona hakaudia.

13. Dagedage ita davaria neganai, dahaka dainai ita guriguri be namo?

¹³ Iesu ena hahediba taudia ginigunadia ese dagedage idia davaria neganai, Iehova idia noia idia dekenai goada ia henia totona. Bona dahaka ia vara? Dirava ese idia dekenai lauma helaga ia henia bona ia hasiahudia, mai gari lasi ida Iena hereva idia harorolaia totona. (Kara 4:18-31) Ita danu be Dirava ita noia ita dekenai aonega bona goada ia henia, dagedage negadiai ita haroro noho totona. (Iam. 1:2-8) Dirava ese ena lauma helaga amo ita ia hanamoa bona durua dainai, haroro gaukara ita karaia noho. Dagedage bada karana eiava gau ma ta ese iseda haroro gaukara do ia koua lasi. Dagedage ita davaria neganai, gau badana be Dirava ita noia ita dekenai lauma helaga, aonega, bona lalogoada ia henia, sivarai namona ita harorolaia totona.​—Luka 11:13.

14, 15. (a) “Stefano ena mase murinai, dagedage bada ia vara dainai,” dahaka ia vara? (b) Iseda nega ai, edena dala ai Siberia dekenai taunimanima momo be hereva momokani idia dibaia?

¹⁴ Stefano be ena inai taudia ese idia do hamasea lasi neganai, mai gari lasi ida haroro gaukara ia karaia. (Kara 6:5; 7:54-60) Unai nega ai “dagedage bada ia vara,” hahediba taudia ibounai be Iudea bona Samaria dekenai idia lao, to aposetolo taudia sibona idia lao lasi. To unai ese haroro gaukara ia koua lasi. Filipo be Samaria dekenai ia lao bona “Keriso ia harorolaia” bona anina namona ia havaraia. (Kara 8:1-8, 14, 15, 25) Danu, Baibel ia gwau: “Stefano ena mase murinai, dagedage bada ia vara dainai, momo be Poinikia, Kupro, bona Antioka dekenai idia lao, to Iuda taudia sibona dekenai idia haroro. To idia huanai tatau haida be Kupro bona Kurene  taudia, bona idia be Antioka dekenai idia mai bona Grik gado ai idia hereva taudia idia haroro henia. Idia ese Lohiabada Iesu ena sivarai namona idia harorolaia.” (Kara 11:19, 20) Unai nega ai, dagedage karana dainai aposetolo taudia idia lao gabudia dekenai, Basileia sivaraina idia laohaia.

¹⁵ Iseda nega ai, guna Soviet Union dekenai unai bamona ia vara danu. Lagani 1950 lalodiai, Iehova ena Witnes taudia tausen momo be Siberia dekenai idia siaia lao. Oibe, idia be Siberia ena gabu idauidau dekenai idia lao dainai, sivarai namona be unai tano ena gabu idauidau dekenai ia lao danu. Witnes taudia momo dekenai moni be hegeregere lasi kilomita 10,000 bamona do idia lao, sivarai namona idia harorolaia totona! To, gavamani ese dala ia kehoa unai bamona tanodia dekenai idia lao totona. Tadikaka ta ia gwau: “Gavamani ena siahu taudia ese dala idia kehoa, unai amo Siberia dekenai idia noho kudou-maoro taudia tausen momo be hereva momokani idia dibaia.”

16, 17. Kara bukana ese edena bamona ia hamomokania, Iehova ese haroro gaukara ia hanamoa?

¹⁶ Momokani, Iehova ese Keristani taudia ginigunadia ia hanamodia. Paulo bona ma haida ese uhe idia hadoa bona idia dairia, “to Dirava ese ia hatubua noho.” (1 Kor. 3:5, 6) Kara bukana ese gaukara ia tubu dalana ia hahedinaraia goevagoeva, unai ia vara badina Iehova ese haroro gaukara ia hanamoa. Hegeregere, “Dirava ena hereva be gabu ibounai dekenai ia lao, bona Ierusalema ai hahediba taudia edia namba ia bada daekau haraga.” (Kara 6:7) Haroro gaukara ia bada ia lao noho lalonai, “Iudea, Galilea, bona Samaria tanodia ibounai dekenai kongrigeisen be maino negana ai idia noho bona idia goada. Bona idia be Iehova ia gari henia dalanai idia raka, bona lauma helaga ese idia ia hagoadaia dainai, kongrigeisen ia bada ia lao.”​—Kara 9:31.

¹⁷ Suria ena Antioka ai, Iuda bona Greek gado herevalaia taudia ese gari lasi witnes taudia amo, hereva momokani idia kamonai. “Ma danu” Baibel ia gwau, “Iehova ena imana be idia ida ia noho, bona hutuma be abidadama taudia ai idia lao bona Lohiabada murinai idia raka.” (Kara 11:21) Baibel ese unai taoni ai hereva momokani ia tubu karana ia herevalaia neganai, ia gwau: “Iehova ena hereva ia tubu daekau bona gabu ibounai dekenai ia lao.” (Kara 12:24) Bona Paulo bona ma haida be Idau Bese taudia huanai sivarai namona idia harorolaia goadagoada dainai, “Iehova ena siahu dainai ena hereva be ia bada ia lao bona ia goada.”​—Kara 19:20.

18, 19. (a) Dahaka dainai ita diba “Iehova ena imana” be ita latanai ia noho? (b) Iehova ese ena taunimanima ia durua sivaraina ta gwauraia.

¹⁸ Ita diba momokani, hari iseda negai danu, “Iehova ena imana” be ita latanai ia noho. Unai dainai taunimanima momo herea be abidadama taudia ai idia lao bona ranu bapatisona amo edia gwauhamata Dirava dekenai idia hamomokania noho. Danu, Dirava ena hanamoa bona heduru sibona amo, dagedage bada ita haheaukalaia bona mai kwalimu ida iseda hesiai gaukara ita karaia, Paulo bona Keristani taudia ginigunadia idia karaia bamona. (Kara 14:19-21) Iehova Dirava be ita do ia rakatania lasi. Iena “noho hanaihanai imadia” ese hahetoho idauidau lalonai ita do ia durua. (Deu. 33:27) Inai ita laloatao be namo, Iehova ena ladana hereadaena dainai, Ia ese ena taunimanima do ia rakatania lasi.​—1 Sam. 12:22; Sal. 94:14.

 ¹⁹ Inai sivarai mani ita laloa: Tanobada Tuarina Ginigunana lalonai, tadikaka Harald Abt be sivarai namona ia harorolaia noho dainai, Nazi taudia ese Sachsenhausen dibura kamepa dekenai idia siaia lao. May 1942 ai, Pulisi taudia be ena adavana Elsa ena ruma dekenai idia lao, edia natuna kekeni maragina idia abia, bona Elsa idia dogoatao. Bona kamepa idauidau dekenai idia siaia lao. Taihu Abt ia gwau, “German ena kamepa idauidau dekenai lau noho laganidia lalonai, mai anina bada gauna ta lau dibaia. Iehova ena lauma ese oi ia durua momokani diba dagedage bada oi haheaukalaia totona! Pulisi ese lau idia do dogoatao lasi neganai, taihu ta amo lau abia revarevana lau duahia, ia gwau dagedage bada negadiai, Iehova ena lauma ese oi do ia durua, oi lalomaino totona. Lau laloa reana ena hereva be momokani lasi. To dagedage lau davaria neganai, iena hereva lau hamomokania. Oibe, unai ia vara momokani. Bema unai be oi dekenai ia do vara lasi, unai oi lalopararalaia be auka. To lau dekenai ia vara momokani.”

20. Paulo be dibura tauna bamona ruma ta ai ia noho neganai, dahaka ia karaia? Bona ena sivarai ese edena dala ai iseda tadikaka taihu haida ia durua?

²⁰ Kara bukana ena dokona ia hahedinaraia, Paulo ese “Dirava ena Basileia ia harorolaia” goadagoada. (Kara 28:31) Roma ai, ia be dibura tauna bamona ruma ta dekenai ia noho dainai, ruma-ta-ruma-ta ai ia haroro lasi. To, ia idia vadivadi henia taudia ibounai dekenai ia haroro. Hari inai negai, iseda tadikaka taihu haida be idia buruka o gorere dainai ruma idia rakatania diba lasi eiava reana idia hekure sibona. To, edia lalokau Dirava dekenai bona edia ura haroro gaukara totona be bada herea. Namona be idia totona ita guriguri bona iseda guba Tamana ita noia dala ia kehoa, unai amo Ia bona ena gwauhamata namodia idia ura diba taudia idia hedavari henia diba.

21. Dahaka dainai ita haroro goadagoada be gau badana?

²¹ Ita momo ese ruma-ta-ruma-ta gaukara bona hahediba taudia halaoa gaukarana ita karaia diba. Unai dainai, namona be ita ta ta ese gau ibounai ita karaia, “tanobada ena daudau momokani gabudia dekenai” Basileia harorolaia gaukarana ita karaia guguru totona. “Toana” idauidau ese idia hamomokania, Keriso be ia noho vadaeni bona nega ia kwadogi, unai dainai inai gaukara ita karaia be gau badana. (Mat. 24:3-14) Oibe, iseda nega ita gaukaralaia namonamo be mai anina bada. Harihari “Lohiabada ena gaukara idauidau lalonai do [ita] bisi” be namo.​—1 Kor. 15:58.

22. Iehova ena dina ita naria noho lalonai, dahaka ita karaia be namo?

²² “Iehova ena dina badana mai garina” ita naria noho lalonai, namona be eda lalona ita hadaia, mai gari lasi bona abidadama ida sivarai namona ita harorolaia noho. (Ioe. 2:31) Iseda haroro gaukara ai, taunimanima momo do ita davaria, idia be guna Berea taudia bamona, “mai edia ura bada ida Dirava ena hereva idia kamonai.” (Kara 17:10, 11) Unai dainai, namona be ita haroro noho ela bona inai hereva ita kamonai: “Oi be hesiai tauna namona, oi karaia gaukara be namo herea!” (Mat. 25:23) Hari inai negai, bema mai ura bada ida hahediba taudia halaoa gaukarana ita karaia bona Iehova ita badinaia noho, vadaeni gabeai mauri hanaihanai ita abia neganai, do ita moale bada badina Dirava ena Basileia “gwauraia guguru” gaukarana ita durua!