1, 2. Dubu ena geiti vairanai, Petero bona Ioane ese dahaka hoa karana idia karaia?

 ADORAHI ai, taunimanima momo idia raka loaloa. Iesu ena hahediba taudia bona abidadama Iuda taudia be dubu helaga dekenai idia vareai noho. Kahirakahira “guriguri” negana do ia matamaia. a (Kara 2:46; 3:1) Petero bona Ioane be hutuma edia huanai bona dubu helaga ena geiti, ladana Hairai, dekenai idia raka lao. Taunimanima idia herevahereva bona idia raka lao mai noho, bona ia vara negana amo iena aena ia dika tauna be moni totona ia noinoi.​—Kara 3:2; 4:22.

² Petero bona Ioane idia raka kahirakahira neganai, unai tauna be moni totona ia noinoi. Idia ruaosi idia gini bona unai tauna be idia ia itaia. Bena Petero ia gwau: “Lau dekenai siliva bona golo be lasi, to lau dekenai ia noho gauna be oi dekenai do lau henia. Nasareta tauna Iesu Keriso ena ladanai oi lau hamaoroa, oi raka!” Mani oi laloa, Petero ese aena dika tauna ena imana ia dogoatao bona ia veria isi, bona unai tauna ena mauri lalonai nega ginigunana ia gini maoromaoro bona ia raka neganai, hutuma idia hoa dikadika! (Kara 3:6, 7) Mani unai tauna be ena aena ia itaia bona ia raka matamaia karana oi laloa. Ia roho isi bona Dirava ia hanamoa badabada!

3. Aena dika tauna bona hutuma ese dahaka harihari gauna hereadaena idia abia diba?

³ Hutuma be mai moale ida Petero bona Ioane dekenai idia heau lao, idia be Solomona ena dehe ia noho gabunai idia gini. Petero be hutuma dekenai ia vara gauna ia herevalaia, unuseniai Iesu ese guna taunimanima ia hadibaia danu. (Ioa. 10:23) Ia ese hutuma bona aena dika tauna dekenai, golo bona siliva ia hereaia harihari gauna ta ia herevalaia. Unai harihari gauna ese gorere hanamoa karana sibona ia havaraia lasi. To helalo-kerehai dalana ia kehoa, edia kara dika ia kokia, bona Iehova ese ia abia hidi tauna “mauri ia henia Gunalaia Tauna Badana,” Iesu Keriso murinai idia raka totona.​—Kara 3:15.

4. (a) Petero ia karaia hoa karana dainai, dahaka ia vara diba? (b) Dahaka henanadai rua do ita haerelaia?

 ⁴ Unai be moale bada dinana! Tau ta ena aena ia namo lou bona ia raka diba. Taunimanima tausen momo be Dirava ena hereva amo diba maorona idia abia, bona Ia ida idia raka hebou diba. (Kol. 1:9, 10) Danu, unai kara ia vara dainai, siahu taudia idia ura Keriso murinai idia raka taudia idia koua, Basileia harorolaia gaukarana idia karaia lasi totona. (Kara 1:8) Petero bona Ioane—“sikuli bada lasi bona dagi lasi taudia”—edia haroro dalana bona kara amo dahaka ita dibaia? b (Kara 4:13) Idia bona hahediba taudia ma haida ese dagedage idia haheaukalaia. Edena dala ai idia ita tohotohoa diba?

5. Petero ese hutuma ia hereva henia dalana amo dahaka ita dibaia?

⁵ Petero bona Ioane be hutuma vairanai idia gini, idia diba unai hutuma huanai idia gini taudia haida be guna Iesu hamasea totona idia hereva. (Mar. 15:8-15; Kara 3:13-15) Petero ena gari lasi karana mani oi laloa, ia be mai lalogoada ida ia gwau unai aena dika tauna be Iesu ena ladana ai idia hanamoa. Petero ese hereva momokani ia hunia lasi. Ia hahedinaraia goevagoeva, Keriso ena mase dainai idia be mai edia kerere. To Petero ese unai taudia ia inai henidia lasi, badina ‘idia diba lasi dainai, unai bamona idia karaia.’ (Kara 3:17) Ena tadikaka bamona ia hereva henidia, bona Basileia sivarai namona ia herevalaia. Bema idia helalo-kerehai bona Keriso idia abidadama henia, Iehova ese idia dekenai “goada matamata” do ia henia. (Kara 3:19) Unai hegeregerena, namona be mai goada bona gari lasi ida Dirava ena hahemaoro dinana ita harorolaia. To danu namo lasi ita kara auka eiava ita hahemaoro henidia. To, Petero bamona, inai lalohadai ita abia be namo, Basileia sivarai namona dainai nega ta idia be tadikaka ai do idia lao.

6. Edena dala ai Petero bona Ioane ese manau karana idia hahedinaraia?

⁶ Aposetolo taudia be manau taudia. Idia gwau lasi idia karaia hoa karana be edia siahu amo idia karaia. Petero be hutuma dekenai ia gwau: “Dahaka dainai ai umui raraia noho, hegeregere ai sibona emai siahu amo eiava Dirava ai badinaia dainai inai tauna ai hanamoa?” (Kara 3:12) Petero bona aposetolo taudia ma haida idia diba, Dirava ena siahu dainai haroro gaukara ai gau namodia idia hagugurua diba. Unai dainai, hanamoa ibounai be Iehova bona Iesu dekenai idia henia.

7, 8. (a) Dahaka harihari gauna be taunimanima dekenai ita henia diba? (b) Hari, “gau ibounai hanamoa lou” ena peroveta herevana be edena dala ai ia guguru?

⁷ Namona be Basileia harorolaia gaukarana lalonai, manau karana ita hahedinaraia. Hari inai negai, Dirava ena lauma helaga amo Keristani taudia ia hasiahua lasi hoa karadia idia karaia totona. To, taunimanima ita durua diba Dirava bona Keriso idia abidadama henia, bona Petero ese ia herevalaia harihari gauna—Iehova ese edia dika ia gwauatao bona goada matamata—idia abia totona.  Lagani ta ta ai, taunimanima tausen momo be unai harihari gauna idia abia dae bona Keriso ena bapatiso hahediba taudia ai idia lao.

⁸ Momokani, ita be Petero ese ia herevalaia “gau ibounai hanamoa lou” negana lalonai ita noho. Bona “Dirava ese gunaguna peroveta taudia helagadia edia uduna amo ia gwauraia” herevana hagugurua totona, lagani 1914 ai guba dekenai Basileia ia haginia. (Kara 3:21; Sal. 110:1-3; Dan. 4:16, 17) Unai murinai, Keriso ese tanobada ai tomadiho momokani haginia lou gaukarana ia gunalaia. Unai dainai, taunimanima milioni momo be Iehova ena orea lalonai idia vareai, iena Basileia ena lohia henunai idia noho totona. Edia kara gunadia idia kokia bona ‘kara matamata idia atoa. Unai kara be Dirava ena ura hegeregerena ia vara.’ (Efe. 4:22-24) Aena dika tauna be Dirava ena siahu amo ia namo lou bamona, inai gaukara danu be taunimanima edia siahu amo idia karaia lasi, to Dirava ena lauma amo idia hagugurua. Petero bamona, namona be mai gari lasi ida Dirava ena Hereva ita gaukaralaia namonamo ma haida ita hadibaia totona. Sibona iseda goada dekenai lasi, to Dirava ena siahu amo ita ese taunimanima ita durua Keriso ena hahediba taudia ai idia lao totona.

9-11. (a) Petero bona Ioane edia hereva dainai, Iuda gunalaia taudia be dahaka idia karaia? (b) Aposetolo taudia edia lalona idia hadaia, dahaka idia karaia totona?

⁹ Petero ena hereva bona aena dika tauna ena aena ia namo dainai ia roho isi bona mai moale ida ia boiboi karana ese regerege bada ia havaraia. Unai dainai dubu helaga ena kapten—dubu naria totona idia abia hidi tauna unai—bona dubu biagudia be ia vara gauna itaia totona idia heau lao. Reana idia be Sadukea taudia, kohu bona politikol siahuna idia dogoatao taudia, danu Roma taudia ida idia gaukara hebou maino idia karaia totona. Bona idia be Farisea taudia ese idia laloa bada taravatudia idia dadaraia, bona toreisi lou herevana idia abia dae lasi. c Idia badu dikadika, badina Petero bona Ioane be mai gari lasi ida dubu helaga lalonai, Iesu ena toreisi lou sivaraina idia harorolaia!

¹⁰ Unai dagedage taudia be mai badu ida Petero bona Ioane be dibura rumana ai idia atodia, bona murina dinana ai Iuda ena kota badana dekenai idia hakaua lao. Unai lohia taudia idia laloa, Petero bona Ioane be “sikuli bada lasi bona dagi lasi taudia” dainai, idia be maoro lasi dubu helaga lalonai idia hadibaia totona. Idia be unai negai ia noho tomadiho sikuli badana ta dekenai idia lao lasi. To, mai lalogoada ida idia hereva dainai, kota karaia taudia idia hoa. Dahaka dainai Petero bona Ioane be unai bamona idia hereva diba? Badina ta be, “idia be guna Iesu idia bamoa taudia.” (Kara 4:13) Edia Biaguna be mai siahu ida idia ia hadibaia, unai taravatu hadibaia taudia bamona lasi.​—Mat. 7:28, 29.

¹¹ Kota ese aposetolo taudia ia oda henia do idia haroro lasi totona. Unai negai, kota ese ia gwauraia oda herevana be mai ena siahu. Wiki haida gunanai, unai kota ia Iesu “ia mase be maoro.” (Mat. 26:59-66) To, Petero bona Ioane idia gari  lasi. Idia be unai kohu momo bona sikuli bada taudia edia vairanai idia gini, bona mai hemataurai bona gari lasi ida idia gwau: “Bema umui laloa Dirava vairanai umui ai kamonai henia to Dirava ai kamonai henia lasi be maoro, unai be umui sibona. To ai be ai itaia bona kamonai gaudia herevalaia karana do ai hadokoa lasi.”​—Kara 4:19, 20.

12. Dahaka ese ita do ia durua gari lasi bona lalogoada karana ita habadaia totona?

¹² Unai bamona gari lasi karana do oi hahedinaraia, a? Emu gabu ai idia noho kohu momo taudia, sikuli bada taudia, o dagi bada taudia oi haroro henia neganai, emu hemami be edena bamona? Oi abia dae gaudia dainai, emu ruma bese taudia, sikuli o gaukara turadia ese oi idia kirikirilaia be edena bamona? Oi gari, a? Bema oibe, unai hemami oi hanaia diba. Iesu be tanobada ai ia noho neganai, aposetolo taudia ia hadibaia, bema idia abia dae gaudia be haida ese idia henanadailaia, mai lalogoada bona hemataurai ida idia hereva be namo. (Mat. 10:11-18) Iesu ia toreisi lou murinai, ena hahediba taudia dekenai ia gwauhamata idia ida do ia noho “ela bona inai nega oromana ena dokona.” (Mat. 28:20) Iesu ena hakaua henunai, “hesiai tauna mai ena kamonai bona mai ena aonega” ese ita abia dae gaudia herevalaia dalana ia hadibaia. (Mat. 24:45-47; 1 Pet. 3:15) Kongrigeisen heboudia ai, Keristani Haroro Bona Mauri Dalana Hebouna, Baibel pablikeisen, hegeregere jw.org websait ai, “Baibel Henanadai Edia Haere” amo ita ia hadibaia. Unai heduru daladia oi gaukaralaia namonamo noho, a? Bema oibe, emu gari lasi bona lalogoada karana do ia bada ia lao. Bona aposetolo taudia bamona, gau ta ese oi do ia koua lasi, oi dibaia hereva momokanidia oi herevalaia totona.

13, 14. Dagedage ita davaria neganai, dahaka ita karaia be namo, bona dahaka dainai?

¹³ Petero bona Ioane idia ruhaia murinai, idia be maoromaoro kongrigeisen ida idia hedavari lou. Bona lalotamona ai “Dirava idia guriguri henia,” unai amo mai gari lasi ida do idia haroro noho. (Kara 4:24) Petero ia diba momokani Dirava ena ura ita karaia neganai, sibona iseda goada dekenai ita tabekau lasi. Wiki haida sibona gunanai, Petero be mai goada ida Iesu ia hamaoroa: “Ena be oi dekenai ia  vara gauna dainai idia ibounai do idia moru, to lau be do lau moru diba lasi!” To Iesu ia peroveta bamona, karaharaga Petero be taunimanima ia gari henia bena ia gwau, ena turana bona hadibaia tauna ia diba lasi. Petero be ena kerere amo diba ia abia.​—Mat. 26:33, 34, 69-75.

¹⁴ Bema oi ura mai lalogoada ida Keriso herevalaia ena hahegani oi badinaia, kara ma haida danu oi karaia be namo. Bema dagedage karana amo emu abidadama idia ura hadikaia eiava haroro gaukara idia koua, Petero bona Ioane edia haheitalai oi badinaia. Goada totona Iehova oi guriguri henia. Bona kongrigeisen ena heduru oi tahua. Elda bona lo taudia ma haida dekenai oi dekenai idia vara metau oi herevalaia. Ma haida edia guriguri be mai ena siahu, oi ia durua diba oi gini goada totona.​—Efe. 6:18; Iam. 5:16.

15. Nega sisina lalonai haroro gaukara idia karaia lasi taudia be dahaka dainai idia lalomanoka lasi be namo?

¹⁵ Bema guna haida ese oi idia koua dainai oi haroro lasi, oi lalomanoka lasi. Laloatao, Iesu ia mase murinai, aposetolo taudia ibounai ese haroro gaukara idia hadokoa, to gabeai idia karaia lou. (Mat. 26:56; 28:10, 16-20) Namo lasi guna oi karaia kerere dainai oi lalomanoka, to oi dekenai ia vara gauna oi gaukaralaia ma haida oi hagoadaia totona be namo, ani?

16, 17. Ierusalema ai, Keriso murinai idia raka taudia edia guriguri amo dahaka ita dibaia?

¹⁶ Siahu taudia ese ita idia dagedage henia neganai, dahaka gaudia totona ita guriguri be namo? Mani laloa, hahediba taudia be Iehova idia noia lasi hisihisi amo idia ia ruhaia totona. To idia ese Iesu ena hereva idia laloatao, ia gwau: “Bema lau idia dagedage henia, umui danu do idia dagedage henia.” (Ioa. 15:20) Unai dainai, abidadama hahediba taudia ese Iehova idia noia, edia inai taudia edia hagaria herevadia ia “kamonai” totona. (Kara 4:29) Hahediba taudia idia laloparara, Baibel ena peroveta herevana dainai dagedage idia davaria. Iesu ese idia dekenai ia hadibaia guriguri hegeregerena, idia diba Dirava ena ‘ura be tanobada dekenai ia vara be namo,’ herevana tanobada ena lohia taudia be dahaka idia karaia.​—Mat. 6:9, 10.

¹⁷ Hahediba taudia be Dirava ena ura idia karaia totona, Iehova idia guriguri henia, idia gwau: “Emu hesiai taudia oi durua, mai gari lasi ida emu hereva idia harorolaia totona.”  Iehova ese dahaka haere ia henia? “Idia haboua rumana ia mareremarere, bona idia ibounai be lauma helaga amo idia honu bona mai gari lasi ida Dirava ena hereva idia harorolaia.” (Kara 4:29-31) Dirava ena ura be gau ta ese ia koua diba lasi. (Isa. 55:11) Herevana dala be lasi, o iseda inai taudia be mai edia siahu bada, to bema Dirava ita guriguri henia, ita diba momokani ia ese ita dekenai goada do ia henia, mai gari lasi ida iena hereva ita gwauraia noho totona.

18. Ierusalema kongrigeisen ai idia noho taudia idia heduru heheni totona, dahaka idia karaia?

¹⁸ Ierusalema kongrigeisen matamatana ai idia noho taudia edia namba be 5,000 mai kahana amo ia bada daekau. d Ena be hahediba taudia edia mauri daladia be idauidau, to idia ibounai “edia kudouna ai idia lalotamona.” (Kara 4:32; 1 Kor. 1:10) Hahediba taudia be Iehova ese edia hekwarahi hanamoa totona idia guriguri sibona lasi. To, ta ta edia abidadama idia hagoadaia, bona tauanina dalanai idia heduru heheni danu. (1 Ioa. 3:16-18) Hegeregere, hahediba tauna Iosepa, aposetolo taudia ese idia gwauraia Banaba, be ena tano ia hoihoilaia bona moni ibounai ia henia, daudau tanodia amo idia mai taudia ia durua, unai amo Ierusalema ai do idia noho bona edia abidadama matamata dekenai diba ma haida idia abia.

19. Dahaka dainai Iehova ese Anania bona Sapira ia hamasea?

¹⁹ Anania bona Sapira ese edia tano idia hoihoilaia danu, bona edia heduru monina idia henia. Toana be moni ibounai idia henia, to “hehuni ai moni haida [idia] dogoatao.” (Kara 5:2) Iehova ese inai headava tau bona hahine ia hamasea, moni maragina idia henia dainai lasi, to edia henia karana be badina maorona ida lasi bona idia koikoi. Idia be ‘taunimanima idia koia lasi, to Dirava idia koia.’ (Kara 5:4) Anania bona Sapira be Iesu ese ia gwauraia dika koikoi taudia bamona, idia be taunimanima edia hanamoa sibona idia tahua, to Dirava ena lasi.​—Mat. 6:1-3.

20. Iehova dekenai henia karana amo dahaka ita dibaia?

²⁰ Hari, Witnes taudia milioni momo ese guna Ierusalema ai idia noho Keristani ginigunadia bamona idia kara, kontribiusen idia henia, unai amo tanobada hegegemadai haroro gaukarana idia durua. Ta ese idia ia doria lasi edia nega eiava moni idia henia inai gaukara durua totona. Momokani, Iehova ia ura lasi mai lalohisihisi ida eiava ta ese ita ia doria dainai Ia ita hesiai henia. (2 Kor. 9:7) Iehova be ita henia moni ena bada ia laloa lasi, to ita henia ena badina ia laloa bada. (Mar. 12:41-44) Ita ura lasi Anania bona Sapira bamona ita kara, Dirava ita hesiai henia lalonai sibona iseda namo ita laloa bada o taunimanima amo hanamoa ita tahua. To, Petero, Ioane bona Banaba bamona, hanaihanai Iehova ita hesiai henia badina, Ia bona iseda dekena taudia ita lalokau henia.​—Mat. 22:37-40.