1, 2. Banaba bona Saulo be edena bamona gabudia dekenai do idia lao, bona edena dala ai edia gaukara ese Kara 1:8 ena hereva ia hagugurua?

 ANTIOKA kongrigeisen dekenai inai be moale bada negana. Unuseniai idia noho peroveta taudia bona hadibaia taudia ibounai huanai, lauma helaga ese Banaba bona Saulo ia abia hidi, gabu daudau dekenai sivarai namona idia harorolaia totona. a (Kara 13:1, 2) Guna, tadikaka goadadia haida be unai bamona gabudia dekenai idia siaia. Unai dainai, Keristani tomadihona be unai gabudia dekenai ia noho vadaeni. (Kara 8:14; 11:22) To Banaba, Saulo, bona idia do ia durua tauna, Ioane Mareko, be sivarai namona idia kamonai lasi gabudia dekenai do idia siaia.

² Lagani 14 gunanai, Iesu be ena murinai idia raka taudia dekenai ia gwau: “Ierusalema, Iudea ibounai, Samaria, bona tanobada ena daudau momokani gabudia dekenai lau do umui gwauraia hedinarai.” (Kara 1:8) Banaba bona Saulo idia abia hidi misinari gaukara do idia karaia, unai amo Iesu ena peroveta herevadia idia hagugurua! b

3. Aposetolo taudia edia negai, dahaka dainai loaloa daudaudia be mai ena hekwarahi?

³ Hari, motuka bona peleini idia noho dainai, taunimanima be hora ta o rua sibona lalonai, gabu daudau dekenai idia lao diba. Aposetolo taudia edia negai, unai bamona gaudia idia noho lasi. Unai dainai, momo be aena amo ororo gabudia dekenai idia raka. Dina ta ena raka be kilomita 30 bamona, bona unai dainai ta ia hesiku bada diba! c Ena be Banaba bona Saulo idia ura bada edia gaukara idia hamatamaia, to idia laloparara, ia be mai ena hekwarahi bada bona sibona edia ura idia dadaraia be namo.​—Mat. 16:24.

4. (a) Banaba bona Saulo edia abia hidi be edena dala ai ia vara, bona unai kara dainai tadikaka be dahaka idia karaia? (b) Edena dala ai, tiokratik gaukara idauidau idia abia taudia ita durua?

 ⁴ To, dahaka dainai lauma helaga ese Banaba bona Saulo ia abia hidi “gaukara idia karaia totona”? (Kara 13:2) Baibel ese unai ena badina ia gwauraia lasi. To ita diba gauna be, lauma helaga ese unai tatau ia abia hidi. Baibel ia gwau lasi, Antioka peroveta taudia bona hadibaia taudia ese unai disisen idia dadaraia. Banaba bona Saulo edia Keristani tadikakadia be idia dekenai idia mama lasi, to “idia aniani lasi bona idia guriguri murinai, edia imana be Banaba bona Saulo latanai idia atoa bena idia siaidia lao.” (Kara 13:3) Namona be ita ese tiokratik gaukara idauidau bona kongrigeisen naria totona idia abia hidi tatau ita durudia. Unai maduna idia abia dainai idia dekenai ita mama lasi, to ‘edia gaukara dainai, idia do ita lalokau henia bona do ita lalodia bada.’​—1 Tes. 5:13.

5. Banaba bona Saulo edia haroro gaukara Kupro motumotu ai, mani oi herevalaia.

⁵ Banaba bona Saulo be Seleukia dekenai idia raka lao, ia be Antioka kahirakahira ia noho bouti atoa gabuna, bena unuseniai bouti ta amo Kupro motumotu dekenai idia lao, ena daudau be 160 kilomita bamona. d Banaba be Kupro tauna dainai, ia ura dikadika unuseni idia noho taudia dekenai sivarai namona ia harorolaia.  Kupro motumotu ena ist kahanai ia noho hanuana, Salami dekenai idia ginidae neganai, maoromaoro “Iuda taudia edia sinagoga lalodiai Dirava ena hereva idia harorolaia matamaia.” e (Kara 13:5) Banaba bona Saulo be Kupro ena hanua idauidau dekenai idia haroro, bona hanua badadia lalonai idia haroro danu. Herevana edena dala amo idia lao, to 160 kilomita bamona idia raka!

6, 7. (a) Seregio Paulo be daika, bona dahaka dainai Bari-iesu ese ia koua sivarai namona ia kamonaia lasi totona? (b) Saulo be Bari-iesu dekenai dahaka ia karaia?

⁶ Aposetolo taudia edia negai, Kupro hanua be tomadiho koikoi amo ia honu. Banaba bona Saulo be Kupro motumotu ena west kahanai ia noho hanuana, Papo dekenai idia ginidae neganai, tau ta idia itaia. Iena ladana be “Bari-iesu. Ia be meamea tauna bona peroveta koikoi tauna.” Bona “ia be gavana Seregio Paulo ida ia noho. Seregio Paulo be aonega tauna ta.” f Aposetolo edia negai, Roma taudia momo—“aonega tauna” Seregio Paulo danu—be disisen badadia idia do karaia lasi neganai, nega momo meamea tauna eiava hisiu stadilaia tauna ena heduru idia tahua. Seregio Paulo ese Basileia sivaraina ia moalelaia dainai, “ia ura bada Dirava ena hereva ia kamonai.” To Bari-iesu be unai ia moalelaia lasi, iena ladana ma ta be Eluma, anina be “Meamea Tauna.”​—Kara 13:6-8.

⁷ Bari-iesu be Basileia sivaraina ia dadaraia. Ia be Seregio Paulo ena sisiba henia tauna, bona ena dagi badana haboioa lasi totona, “gavana ia koua toho Lohiabada ia abidadama henia lasi totona.” (Kara 13:8) To Saulo ia ura lasi unai meamea tauna ese Seregio Paulo ena ura ia koua. Unai dainai, dahaka ia karaia? Baibel ia gwau: “Saulo, ena ladana ma ta be Paulo, be lauma helaga amo ia honu bona [Bari-iesu] ia raraia auka, bona ia gwau: “Koikoi bona dika idauidau karaia tauna e, oi be Diabolo ena natuna, bona kara maoromaoro oi inai henia. Iehova ena dala maorodia hagagevaia karana be edena negai do oi hadokoa? Itaia! Iehova  ena imana be oi latanai, bona oi be do oi matakepulu, nega sisina lalonai dina ena diari do oi itaia lasi.” Bena maoromaoro ia mamia ena matana be kwalahu ese ia koua bamona bona ia dibura. Vadaeni ia lao bona taunimanima ia tahua imana amo ia idia hakaua totona.” g Unai hoa karana dainai dahaka ia vara? “Gavana be unai ia itaia neganai, ia be abidadama tauna ai ia lao, badina Iehova ena hadibaia hereva dekenai ia hoa.”​—Kara 13:9-12.

8. Hari, edena dala ai Paulo ena gari lasi karana ita tohotohoa diba?

⁸ Paulo be Bari-iesu dekenai ia gari lasi. Unai hegeregerena, ita idia inai henia taudia ese kamonai taudia edia abidadama idia ura hamanokaia neganai, ita gari lasi bona hereva momokani ita gimaia. Oibe, ita ura ‘hanaihanai mai gado namo ida ita hereva, damena ita atoa bamona.’ (Kol. 4:6) To danu, ita ese kamonai taudia do ita durua Iehova idia dibaia totona, herevana unai ese haida ia habadua. Eiava Bari-iesu bamona, tomadiho koikoi ia ura ‘Iehova ena dala maorodia ia hagagevaia,’ to namona be mai gari lasi ida ena kerere ita gwauraia hedinarai. (Kara 13:10) Paulo bamona, namona be mai gari lasi ida hereva momokani be kudou-maoro taudia dekenai ita gwauraia hedinarai. Ena be Dirava ese hoa dalanai ita do ia durua lasi, to ita diba momokani, Iehova ese ena lauma helaga do ia gaukaralaia, kudou-maoro taudia be hereva momokani dekenai ia veria mai totona.​—Ioa. 6:44.

9. Hari, kongrigeisen idia hakaua taudia dekenai, Paulo bona Banaba ese dahaka haheitalai namona idia hahedinaraia?

⁹ Paulo bona tatau haida be Papo idia rakatania bona Perega dekenai idia lao, ia be Asia Minor ena kone kahanai ia noho, ena daudau be kilomita 250 bamona. Kara 13:13 ese “Paulo bona ena bamodia” ia herevalaia. Unai amo ita itaia, Paulo be ia ida idia loaloa taudia ia gunalaia. Baibel ia gwau lasi Banaba be Paulo dekenai ia mama. To, inai tatau rua idia gaukara hebou Dirava ena ura idia hagugurua  totona. Hari, namona be kongrigeisen idia hakaua taudia ese Paulo bona Banaba edia haheitalai namona idia tohotohoa. Namo lasi Keristani taudia ese dagi idia laloa bada, to namona be Iesu ena hereva idia laloa, ia gwau: “Umui ibounai be tadikaka.” Bona ma ia gwau: “Sibona ia abia isi tauna be Dirava ese do ia hamanaua, to sibona ia hamanaua tauna be Ia ese do ia abia isi.”​—Mat. 23:8, 12.

10. Perega amo Pisidia ena Antioka dekenai lao be mai ena hekwarahi, a? Mani oi gwauraia.

¹⁰ Perega dekenai idia ginidae neganai, Ioane Mareko be Paulo bona Banaba ia rakatanidia bona Ierusalema dekenai ia giroa lou. Idia ia rakatania ena badina be Baibel ese ia herevalaia lasi. To Paulo bona Banaba be edia gaukara idia hadokoa lasi, Perega amo Pisidia ena Antioka dekenai idia lao, unai taoni be Galatia ena provinsi ai ia noho. Inai laolao be mai ena hekwarahi bada, badina Antioka be kilomita 1,100 bamona davara ataiai ia noho. Bona unai be ororo gabudia dainai dala be ia dika, bona nega momo henaohenao taudia be unuseniai idia loaloa. Ma danu, unai nega lalonai Paulo be ia gorere. h

11, 12. Pisidia Antioka ai, Paulo be sinagoga lalonai ia hereva neganai, edena dala ai ena kamonai taudia edia lalona ia veria?

¹¹ Pisidia ena Antioka dekenai, Paulo bona Banaba be Sabati negana ai sinagoga dekenai idia lao. Baibel ia gwau: “Taravatu bona Peroveta Taudia edia hereva idia duahia murinai, sinagoga ena ofesa taudia ese hereva idia siaia, idia gwau: “Tadikaka e, bema umui ura taunimanima umui hagoadaia, umui hereva diba.’” (Kara 13:15) Paulo ia toreisi bona ia hereva.

¹² Paulo be hutuma ia hereva henia matamaia, ia gwau: “Israela taudia bona Dirava gari henia taudia ma haida e.” (Kara 13:16) Paulo ena hereva idia kamonai  taudia be Iuda bona Iuda tomadihona idia abia dae taudia. Unai taudia ese Iesu ena gaukara Dirava ena ura hagugurua karana dekenai idia diba lasi, unai dainai Paulo ese edena dala ai edia lalona ia veria? Ginigunana be, Paulo ese Iuda bese edia histori ia herevalaia. Ia gwau, “Idia be idau taudia bamona Aigupito ai idia noho neganai, [Iehova] ese idia ia durua” bona ia ruhadia murinai, lagani 40 lalonai “taunimanima lasi gabuna ai edia kara ia haheaukalaia.” Danu, Paulo be Israela taudia ese Gwauhamata Tanona idia abia bona Iehova ese “edia tano be iseda sene taudia dekenai ahuna bamona ia henia” dalana ia herevalaia. (Kara 13:17-19) Vaia Sabati dinana ai Baibel ena siri haida idia duahia, bona haida idia gwau, reana Paulo be unai siri ia herevalaia. Bema unai be momokani, vadaeni unai haheitalai amo ita itaia, Paulo be ‘gau ibounai ia karaia vadaeni taunimanima idauidau ia durua totona.’​—1 Kor. 9:22.

13. Edena dala ai iseda kamonai taudia edia lalona ita veria diba?

¹³ Namona be ita haroro henia taudia edia lalona ita veria danu. Hegeregere, ta ena tomadiho ita diba neganai, unai ese ita do ia durua unai tauna ia laloa bada herevadia ita abia hidi totona. Danu, unai tauna ia diba Baibel siridia ita herevalaia. Namona be sibona ena Baibel amo siri ia duahia. Dala ita tahua kamonai taudia edia lalona ita veria totona.

14. (a) Edena dala ai Paulo ese Iesu ena sivarai namona ia gwauraia matamaia, bona ena kamonai taudia dekenai dahaka sisiba ia henia? (b) Hutuma be Paulo ena hereva dainai dahaka idia karaia?

¹⁴ Unai murinai, Paulo ese Israela ena king taudia, idia amo “hamauria tauna, Iesu” ia mai dalana ia herevalaia. Oibe, Ioane Bapatiso ese Iesu ena dala ia hegaegaelaia. Bena Paulo ese Iesu idia hamasea bona ia toreisi lou dalana ia gwauraia. (Kara 13:20-37) Paulo ia gwau: “Namona be umui diba, unai tauna amo Dirava ese emui kara dika ia gwauatao, hari ai ese umui dekenai unai ai harorolaia. . . . To inai tauna ena mase dainai, Dirava ese abidadama taudia ibounai do ia gwauraia kara maoromaoro taudia.” Paulo be ena kamonai taudia dekenai inai sisiba ia henia: “Umui naria namonamo, dika Peroveta Taudia ese idia gwauraia gaudia be umui dekenai idia vara. ‘Hevaseha hereva umui gwauraia taudia e, inai umui itaia bona do umui hoa, bena umui boio ore, badina lau ese emui nega ai gaukara ta lau karaia, ena be ta ese umui dekenai unai gaukara ia gwauraia hedinarai namonamo, to do umui abia dae lasi.’” Paulo ena hereva ese kamonai taudia ia hamoalea. Baibel ia gwau: “Taunimanima ese idia noidia, murina Sabati ai unai gaudia do idia herevalaia lou.” Ma danu, sinagoga ena hebou ia ore murinai, “Iuda taudia, bona Iuda tomadihona idia abia dae taudia momo be Paulo bona Banaba murinai idia lao.”​—Kara 13:38-43.

15. Paulo ena hereva dainai, murina Sabati ai dahaka ia vara?

¹⁵ Murina Sabati ai, “kahirakahira siti taudia ibounai” idia hebou, Paulo ena hereva idia kamonai totona. Unai ese abidadama lasi Iuda taudia ia habadua, bona “idia mama dikadika bona hadikaia herevadia amo Paulo ena hereva idia  hakoikoia.” To ia bona Banaba be mai gari lasi ida idia dekenai idia gwau: “Dirava ena hereva be umui dekenai ai gwauraia guna be namo. To unai hereva umui dadaraia bona umui laloa umui hegeregere lasi mauri hanaihanai umui abia totona, unai dainai idau bese taudia dekenai do ai lao. Badina Iehova ese ai dekenai inai hahegani ia henia: ‘Lau ese oi lau abia hidi bese idauidau edia diari ai do oi lao, unai amo taunimanima lau hamauria dalana be tanobada ibounai dekenai do oi harorolaia.’”​—Kara 13:44-47; Isa. 49:6.

16. Paulo bona Banaba edia hereva dainai, abidadama lasi Iuda taudia be dahaka idia karaia? Bona idia rua be edena bamona idia kara?

¹⁶ Unai hereva idia kamonai Idau Bese taudia idia moale, bona “mauri hanaihanai idia ura kudou-maoro taudia ibounai be abidadama taudia ai idia lao.” (Kara 13:48) Iehova ena hereva be unai tano ena gabu idauidau dekenai ia lao. To abidadama lasi Iuda taudia be unai bamona lasi. Paulo bona Banaba ese idia hamaorodia, ena be Dirava ena hereva idia kamonai guna, to Mesia idia dadaraia dainai, Dirava ese do ia hahemaoro henidia. Iuda taudia ese siti ena ladana bada hahinedia bona tau badadia edia lalona idia veria, “Paulo bona Banaba idia dagedage henia bona siti murimurinai idia negedia.” To, dahaka idia karaia? “Edia aena amo kahu idia kokia, bena Ikonio dekenai idia lao.” Unai dainai, Pisidia ena Antioka ai, Keristani tomadihona ia doko, a? Lasi momokani! Unuseni idia noho hahediba taudia be “idia moale bada bona lauma helaga amo idia honu.”​—Kara 13:50-52.

17-19. Paulo bona Banaba edia haheitalai namona be edena dala idauidau ai ita tohotohoa diba, bona unai ese edena bamona iseda moale ia habadaia?

¹⁷ Unai abidadama taudia ese dagedage idia haheaukalaia karana amo, mai anina bada gauna ta ita dibaia. Ena be tanobada ena ladana bada taudia ese ita idia koua sivarai namona ita gwauraia lasi, to ita haroro noho be namo. Danu, Antioka taudia be unai sivarai idia dadaraia neganai, Paulo bona Banaba be “aena amo kahu idia kokia,” anina be idia dekenai idia badu lasi, to do idia davaria dika be sibodia edia kerere. Paulo bona Banaba idia laloparara, taunimanima ese idia dekenai idia gwauraia hereva idia koua diba lasi. To unai kara dainai haroro gaukara idia hadokoa lasi. Idia haroro noho ela bona Ikonio dekenai idia ginidae!

¹⁸ Antioka ai idia noho hahediba taudia be edena bamona? Momokani, unai gabu ai haida ese idia dagedage henia. Ena be taunimanima ese sivarai namona idia abia dae dainai idia moale, to unai sibona lasi, idia be Iesu ena hereva dainai idia moale, ia gwau: “Dirava ena hereva idia kamonai bona badinaia taudia be idia moale!” (Luka 11:28) Bona Pisidia ena Antioka dekenai idia noho aposetolo taudia be unai bamona idia karaia.

¹⁹ Paulo bona Banaba bamona, namona be ita laloatao, iseda maduna be sivarai namona do ita harorolaia. Kamonai taudia ese sivarai namona do idia abia dae o lasi be idia ta ta edia abia hidi. Bema ita haroro henia taudia idia kamonai lasi, vadaeni Keristani ginigunadia amo gau ta ita dibaia. Hereva momokani ita laloa bada bona lauma helaga ena hakaua dalana ita badinaia neganai, ena be dagedage do ita davaria, to do ita moale.​—Gal. 5:18, 22.