Basileia Harorolaia Pablisa E:

Mani oi laloa, oi be Iesu ena aposetolo tauna ta bona Olive Ororona ai oi gini. Bona Iesu be oi dekenai ia hedinarai. Guba dekenai ia do daekau lasi neganai, ia gwau: “Lauma helaga be umui latanai ia diho neganai, siahu do umui abia. Bena Ierusalema, Iudea ibounai, Samaria, bona tanobada ena daudau momokani gabudia dekenai lau do umui gwauraia hedinarai.” (Kara 1:8) Edena bamona do oi kara?

Unai gaukara badana dainai reana do oi laloa momo. Reana do oi laloa, ‘Edena dala ai ita—inai orea maragina—be “tanobada ena daudau momokani gabudia dekenai” haroro gaukara ita karaia diba?’ Iesu ia do mase lasi hanuaboina ai, ia gwauraia hadibaia herevana oi laloa lou, ia gwau: “Hesiai tauna be ena biaguna ia hereaia lasi. Bema lau idia dagedage henia, umui danu do idia dagedage henia. Bema egu hereva idia badinaia, emui hereva do idia badinaia danu. Egu ladana dainai, umui dekenai inai gaudia do idia karaia, badina lau ia siaia Tauna idia diba lasi.” (Ioa. 15:20, 21) Unai hereva oi lalodia noho lalonai, reana sibona oi nanadaia, ‘Unai bamona dagedage karana lalonai, edena dala ai haroro gaukara do lau karaia guguru diba?’

Hari inai negai, unai bamona henanadai ita lalodia danu. Ita be Iehova ena Witnes taudia dainai, “tanobada ena daudau momokani gabudia dekenai,” “bese ibounai taudia” ita haroro henia guguru be namo. (Mat. 28:19, 20) Baibel ese ia perovetalaia dagedage karana dainai, edena dala ai inai gaukara ita hagugurua diba?

Aposetolo Edia Kara bukana ese aposetolo taudia bona edia tadikaka taihu ese Iehova ena heduru amo edia gaukara idia hagugurua dalana ia herevalaia. Hari oi duahia bukana ese oi do ia durua idia vara sivaraidia oi diba namonamo totona. Bona do oi hoa, badina Dirava ena hesiai taudia ginigunadia bona hari idia noho hesiai taudia dekenai gau momo idia hegeregere. Do oi itaia, ita karaia gaukarana sibona lasi, to inai gaukara ita haheaua dalana be idia ida ia hegeregere. Unai gaudia oi lalohadailaia karana ese emu abidadama do ia hagoadaia, bona do oi diba, Iehova Dirava ese ena tanobada oreana ia hakaua noho.

Ai guriguri, oi ese Kara bukana oi diba namonamo lalonai, do oi abia dae momokani Iehova ese oi do ia durua bona ena lauma helaga ena siahu amo goada do oi abia. Unai amo, Dirava ena Basileia oi “gwauraia guguru” bona ma haida oi durua mauri ena dala dekenai idia raka totona.​—Kara 28:23; 1 Tim. 4:16.