1, 2. Daidia be Filipi amo Tesalonika dekenai idia lao, bona dahaka idia laloa noho?

 ROMA ena ensinia taudia ese dala ta idia karaia, bona unai dala be ororo huana amo ia hanaia. Unai dala ai doniki edia regerege, kariota be nadi latanai ia heau ena regerege, bona loaloa taudia idauidau hegeregere tuari taudia, hoihoi taudia, bona ima gaukara karaia taudia edia regerege. Paulo bona ena turadia, Sila bona Timoteo be 130 kilomita bamona Filipi amo Tesalonika dekenai idia lao noho. Paulo bona Sila dekenai unai be laolao aukana. Badina Filipi ai idia botadia dikadika bona idia be mai edia bero.​—Kara 16:22, 23.

² Inai tatau ese edena dala ai unai laolao daudauna idia haheaukalaia? Herevahereva karana ese idia ia durua. Bona Filipi ai ia vara ekspiriens namona idia do laloa noho, dibura naria tauna bona ena famili idia durua abidadama taudia ai idia lao. Unai ekspiriens ese idia ia hagoadaia bada, Dirava ena hereva idia harorolaia noho totona. To kone ai ia noho hanuana, Tesalonika, idia lao henia neganai, unuseniai idia noho Iuda taudia ese idia do idia kara henia dalana idia laloa noho. Filipi hanua taudia ese idia dadabadia bamona, unai hanua taudia ese unai bamona do idia kara henia, a?

3. Edena dala ai Paulo ena haheitalai ese ita ia durua mai gari lasi ida ita haroro totona?

³ Paulo ese Tesalonika Keristani taudia dekenai ia torea revarevana ai ena hemami ia gwauraia: “Badina herevana guna Filipi dekenai hisihisi bona dagedage ai davaria, to umui diba, iseda Dirava ena heduru amo mai gari lasi ida umui dekenai Dirava ena sivarai namona ai gwauraia, ena be ai idia inai henia.” (1 Tes. 2:2) Toana be Paulo ena hereva amo ia hahedinaraia, ia laloa momo Tesalonika ena taoni lalonai ia vareai totona, badina Filipi dekenai idia dadabaia. Paulo ena hemami oi laloa diba, a? Sivarai namona oi harorolaia totona be ia auka, a? Paulo be Iehova dekenai ia tabekau, ia do ia hagoadaia bona durua ia gari lasi totona. Paulo ena haheitalai oi stadilaia karana ese oi do ia durua danu.​—1 Kor. 4:16.

4. Dahaka ese ia hahedinaraia, Paulo be Tesalonika ai wiki toi sibona ia noho lasi?

⁴ Baibel ese ia hahedinaraia, Paulo be Tesalonika ai ia noho neganai, Sabati toi lalonai sinagoga ai ia haroro. Unai ena anina be, ia be wiki toi sibona unai taoni dekenai ia noho, a? Lasi. Paulo be unai taoni ai ia ginidae murinai, sinagoga dekenai ia lao negana be Baibel ese ia gwauraia lasi. Danu, Paulo ia torea revarevadia ese idia hahedinaraia, Tesalonika ai idia noho neganai, ia bona ena bamodia be sibodia idia durua totona idia gaukara. (1 Tes. 2:9; 2 Tes. 3:7, 8) Danu, unuseniai ia noho lalonai, Filipi tadikaka ese ia totona nega rua heduru gaudia idia siaia. (Fili. 4:16) Unai dainai, Tesalonika ai ia be wiki toi sibona ia noho lasi.

5. Paulo be edena dala ai taunimanima edia lalona ia veria?

⁵ Paulo be lalogoada ia abia murinai, sinagoga ai idia hebou taudia ia hereva henia. Vaia, ena kara hegeregerena, “idia ia durua Toretore Helagadia idia lalopararalaia totona, unai toretore amo ia hahedinaraia goevagoeva bona ia hamomokania, Keriso be hisihisi ia abia bena mase amo ia toreisi lou be mai anina bada. Ia gwau: ‘Inai Iesu, umui dekenai lau harorolaia tauna, be Keriso.’” (Kara 17:2, 3) Oibe, Paulo ese ena kamonai taudia edia lalona ia veria totona, ia ura ena hereva dalana amo idia ia durua, ia herevalaia gaudia idia lalohadailaia. Ia diba sinagoga dekenai idia lao taudia be Toretore Helagadia idia diba bona matauraia. To ena hereva idia lalopararalaia lasi. Unai dainai Paulo be Toretore Helagadia amo hereva edia anina ia gwauraia hedinarai bona ia hamomokania, Nasareta tauna Iesu, be gwauhamata Mesiana, o Keriso.

6. Iesu be edena dala ai Toretore Helagadia ia gaukaralaia, bona unai amo dahaka ia vara?

⁶ Paulo ese Iesu ena haheitalai ia tohotohoa, ia hadibaia herevadia be Toretore Helagadia amo ia abia. Hegeregere, ena haroro gaukara ai, Iesu ese ena murinai idia raka taudia ia hamaoroa, Toretore Helagadia ena hereva bamona, taunimanima ena Natuna be hisihisi do ia abia, do ia mase, bona do ia toreisi lou. (Mat. 16:21) Ia toreisi lou murinai, ena hahediba taudia dekenai ia hedinarai. Unai dala amo ia hahedinaraia, ia be hereva momokani ia gwauraia. To, Iesu ese hamomokania hereva ma haida ia gwauraia danu. Ena hahediba taudia dekenai inai ia herevalaia, ia gwau: “Mose bona Peroveta Taudia ibounai be ia totona Toretore Helagadia lalonai idia torea herevadia edia anina ia gwauraia hedinarai.” Unai amo dahaka ia vara? Hahediba taudia idia gwau: “Dala ai ita ia hereva henia bona Toretore Helagadia edia anina ia gwauraia hedinarai neganai, iseda kudouna ia hamarerea momokani, ani?”​—Luka 24:13, 27, 32.

7. Dahaka dainai iseda hadibaia herevadia be Baibel amo ita hahedinaraia be mai anina bada?

⁷ Dirava ena Hereva be mai ena siahu. (Heb. 4:12) Iesu, Paulo, bona aposetolo taudia ma haida idia karaia bamona, hari Keristani taudia edia hahediba lalonai Baibel idia gaukaralaia be namo. Ita danu ese taunimanima dekenai Baibel ena anina ita gwauraia hedinarai, bona ita hadibaia gaudia hamomokania totona, Baibel ita kehoa bona idia ida ita duahia. Badina ita gwauraia sivaraina be  iseda lasi. Baibel ita gaukaralaia momo amo, taunimanima ita durua bona idia diba ita be sibona eda lalohadai ita gwauraia lasi, to Dirava ena hahediba herevadia ita harorolaia. Danu, gau badana be ita laloatao, ita harorolaia herevadia be Dirava ena Hereva amo. Baibel ita abidadama henia momokani. Unai oi diba karana ese oi ia hagoadaia, Paulo bamona, mai gari lasi ida sivarai namona oi harorolaia totona, ani?

8-10. (a) Tesalonika ai idia noho taudia ese sivarai namona idia kamonai, a? (b) Dahaka dainai Iuda taudia haida be Paulo dekenai idia mama? (c) Paulo idia inai henia Iuda taudia be dahaka idia karaia?

⁸ Paulo be Iesu ena hereva ia momokani dalana ia mamia vadaeni, Iesu ia gwau: “Hesiai tauna be ena biaguna ia hereaia lasi. Bema lau idia dagedage henia, umui danu do idia dagedage henia. Bema egu hereva idia badinaia, emui hereva do idia badinaia danu.” (Ioa. 15:20) Tesalonika ai, haida idia ura Paulo ena hereva idia kamonai, to haida idia ura lasi. Luka ese haroro herevana idia kamonai taudia ia herevalaia neganai, ia gwau: “Idia haida be abidadama taudia ai idia lao bena Paulo bona Sila idia bamoa. Bona Dirava idia tomadiho henia Grik taudia hutuma, bona dagi bada hahine momo be unai bamona idia karaia danu.” (Kara 17:4) Oibe, unai hahediba taudia matamatadia idia moale, badina heduru idia abia Toretore Helagadia idia lalopararalaia totona.

⁹ Haida ese Paulo ena haroro herevana idia moalelaia bona laloa bada, to haida idia badu. Tesalonika ai idia noho Iuda taudia haida be Paulo dekenai idia mama, badina “Grik taudia hutuma” ia durua. Unai Iuda taudia idia ura Grik Idau Bese taudia ese Iuda tomadihona idia abia dae, unai dainai idia dekenai Heberu Revarevadia idia hadibaia bona idia laloa unai taudia be idia sibona ese do idia biagua. Sinagoga ai, Paulo ena hahediba herevadia amo Grik taudia edia lalona ia haidaua, unai amo Iuda tomadihona idia badinaia lasi! Unai dainai Iuda taudia idia badu dikadika.

¹⁰ Luka ese unai murinai ia vara gauna ia herevalaia: “Iuda taudia be idia mama bona maketi gabuna dekenai idia loa kava tatau dikadia haida idia haboua bona siti lalonai heiriheiri bada idia havaraia. Mai dagedage ida Iasoni ena ruma lalonai idia vareai, bona idia ura Paulo bona Sila be idia haboua hutuma dekenai idia veria lao. To idia ruaosi idia davaria lasi neganai, Iasoni bona tadikaka ma haida be siti biagudia dekenai idia veria lao bona idia boiboi: ‘Gabu ibounai dekenai kerere idia havaraia tatau be hari iniseniai idia noho danu, bona Iasoni ese iena ruma dekenai idia ia abia dae. Unai tatau ibounai be Kaisara ena oda herevana idia badinaia lasi, idia gwau king ma ta ia noho, unai be Iesu.’” (Kara 17:5-7) Hutuma edia kara dainai Paulo bona ena bamodia be dahaka do idia karaia?

11. Paulo bona ena bamodia dekenai dahaka samania herevadia idia gwauraia, bona edia inai taudia be dahaka taravatu idia laloa? (Futnout itaia.)

¹¹ Bema hutuma ese kara ta idia karaia hebou, unai ese dika bada ia havaraia.  Hegeregere ia aru goada sinavai ta bamona, edia badu idia biagua diba lasi. Iuda taudia be unai dala idia gaukaralaia, Paulo bona Sila be edia taoni amo idia lulua totona. Bena Iuda taudia be hanua lalonai “heiriheiri bada idia havaraia” murinai, idia ura lohia taudia edia lalona idia veria edia samani hereva idia abia dae totona. Edia samania hereva ginigunana lalonai idia gwau, Paulo bona ena bamodia ese “gabu ibounai dekenai kerere idia havaraia,” ena be Paulo bona ena bamodia be Tesalonika ai unai bamona idia karaia lasi! To idia gwauraia samani hereva iharuana be hereva metauna. Idia gwau, unai misinari taudia ese King ma ta, Iesu, idia harorolaia, unai dainai idia ese pavapava ena taravatu idia utua. a

12. Dahaka ese ia hahedinaraia, Tesalonika Keristani taudia dekenai idia gwauraia samania herevadia ese dika bada do ia havaraia?

¹² Laloatao, tomadiho gunalaia taudia danu ese Iesu dekenai unai bamona samania herevadia idia gwauraia. Pilato dekenai idia gwau: “Ai davaria inai tauna ese emai bese taudia ia hakaua kerere, . . . bona ia sibona ia gwauraia, ia be Keriso, king ta.” (Luka 23:2) Pilato ia gari, ia laloa pavapava do ia gwau ia be gavamani gwau-edeede henia karana ia abia dae, unai dainai hutuma dekenai Iesu ia henia, idia hamasea totona. Unai hegeregerena, Tesalonika ai idia noho Keristani taudia dekenai idia gwauraia samani herevadia dainai, dika bada idia davaria diba. Buka ta ia gwau: “Idia davaria dika ita gwauraia hedinarai be auka, badina ‘bema ta ese unai Pavapava ia atoa taravatuna ia utua, vadaeni nega momo idia hamasea.’” To unai dagedage taudia be do idia kwalimu, a?

13, 14. (a) Dahaka dainai dagedage oreana ia kwalimu lasi? (b) Edena dala ai Paulo be Keriso ena hereva ia badinaia, bona edena bamona ena haheitalai ita tohotohoa?

¹³ Unai dagedage oreana ese Tesalonika ai haroro gaukara idia koua lasi. Dahaka dainai? Badina Paulo bona Sila idia davaria diba lasi. Danu, taoni biagudia be idia diba lasi bema unai samani herevadia be momokani eiava lasi. Iasoni bona tadikaka ma haida ese taoni biagudia dekenai “doria moni” idia henia murinai, idia ruhadia. (Kara 17:8, 9) Iesu ena sisiba herevana be “umui naria namonamo, gaigai bamona, bona pune bamona do umui manau.” Paulo be mai aonega ida unai sisiba ia badinaia, unai amo haroro gaukara ia karaia noho. (Mat. 10:16) Ia hedinarai goevagoeva, Paulo be mai gari lasi ida ia kara, to ia aonega. Hari, Keristani taudia ese edena dala ai ena haheitalai idia tohotohoa diba?

¹⁴ Hari inai negai, Kerisendom ena gunalaia taudia ese nega momo hutuma edia lalona idia veria, Iehova ena Witnes taudia idia dagedage henia totona. Idia ese gavamani dekenai Witnes taudia idia samania koikoi, idia gwau Witnes taudia be gavamani gwau-edeede henia taudia. Keristani taudia ginigunadia edia negai idia noho dagedage taudia bamona, hari negai taunimanima be  ita idia mama henia dainai, ita idia dagedage henia. Herevana dahaka, to Keristani taudia momokanidia be kerere idia tahua lasi. Bona ita ura lasi badu bona laloa namonamo lasi taudia ida ita hepapahuahu, to maino dalanai iseda gaukara ita karaia, bona reana edia badu ia ore murinai, ita giroa lou.

15. Berea taudia ese sivarai namona idia kamonai neganai, edena bamona idia kara?

¹⁵ Paulo bona Sila ese dika idia davaria lasi totona, Berea dekenai idia siaia lao, ena daudau be 65 kilomita bamona. Unuseni idia ginidae neganai, Paulo be sinagoga dekenai ia lao bona idia hebou taudia ia haroro henia. Ia moale badina kamonai taudia ia davaria! Luka ia gwau, Berea dekenai idia noho Iuda taudia be “laloa namonamo taudia, Tesalonika taudia bamona lasi, badina mai edia ura bada ida Dirava ena hereva idia kamonai. Bona dina ta ta ai Toretore Helagadia idia tahua namonamo, badina idia ura diba bema idia kamonai herevadia be momokani eiava lasi.” (Kara 17:10, 11) Unai hereva amo Paulo ese Tesalonika ai hereva momokani idia abia dae taudia ia laloa maragi, a? Lasi. Gabeai Paulo ese idia ia tore henia: “Ai ese hanaihanai Dirava ai tanikiu henia, badina ai amo Dirava ena hereva umui kamonai neganai, umui abia dae, ia be taunimanima edia hereva lasi, to Dirava ena hereva, bona unai hereva be umui abidadama taudia lalonai ia gaukara noho.” (1 Tes. 2:13) To, dahaka dainai Berea ai idia noho Iuda taudia be laloa namonamo taudia?

16. Dahaka dainai Baibel ia gwau Berea taudia be “laloa namonamo taudia”?

¹⁶ Ena be Berea taudia idia kamonai hereva be matamata, to idia daradara eiava  idia maumau lasi, bona unai hereva idia abia dae kava lasi. Matamanai, Paulo ena hereva idia kamonai namonamo. Idia laloparara totona, Paulo ese siri haida ia gaukaralaia, bona idia ese Toretore Helagadia idia kehoa bona unai idia hamomokania. Danu, Sabati negana sibona lasi, to nega ibounai Dirava ena Hereva idia stadilaia namonamo. Bona “mai edia ura bada ida” unai idia karaia, Toretore Helagadia amo unai hadibaia hereva matamatadia idia tahua namonamo totona. Oibe, idia manau bona edia mauri idia haidaua bona “idia momo be abidadama taudia ai idia lao.” (Kara 17:12) Unai dainai, Luka ia gwau idia be “laloa namonamo” taudia!

17. Dahaka dainai Berea taudia be haheitalai namona? Bona abidadama taudia ai idia lao murinai, edena dala ai edia haheitalai ita badinaia noho?

¹⁷ Berea taudia idia laloa lasi idia ese sivarai namona idia abia dae dalana be Baibel ai do ia noho, bona unai be haheitalai namona ema bona hari. Idia ese Paulo ia herevalaia gaudia hegeregerena idia kara bona Iehova Dirava ena ura idia badinaia danu. Unai hegeregerena, taunimanima ita hagoadaia Baibel idia tahua namonamo totona, unai amo edia abidadama be Dirava ena Hereva dekenai do ia goada. To, abidadama taudia ai ita lao murinai, iseda laloa namonamo karana ia doko, a? Lasi, to gau badana be mai eda ura ida Iehova amo diba ita tahua bona ena hadibaia herevadia ita badinaia noho. Unai dala amo, Iehova ese ita do ia durua eda kara ita haidaua bona iena ura hegeregerena ai ita do ia hakaua. (Isa. 64:8) Vadaeni, iseda guba Tamana ese ita do ia gaukaralaia noho bona Ia do ita hamoalea bada.

18, 19. (a) Dahaka dainai Paulo ese Berea ia rakatania, to edena dala ai haheauka karana ia hahedinaraia bona unai ita tohotohoa be namo? (b) Paulo be daidia dekenai do ia haroro, bona edeseniai?

¹⁸ Paulo be Berea ai ia noho daudau lasi. Baibel ia gwau: “Tesalonika ai idia noho Iuda taudia idia kamonai, Berea dekenai danu Paulo be Dirava ena hereva ia harorolaia neganai, unuseniai idia mai bona, hutuma idia hauraia bona heiriheiri idia havaraia. Vadaeni maoromaoro tadikaka ese Paulo be kone kahanai idia siaia lao, to Sila bona Timoteo be Berea ai idia noho. Haida ese Paulo idia hakaua lao ela bona Atena dekenai, bena Paulo ese ia hamaorodia Sila bona Timoteo be ia dekenai do idia mai haraga, vadaeni ia idia rakatania.” (Kara 17:13-15) Oibe, sivarai namona idia inai henia taudia ese edia dagedage karana idia hadokoa lasi! Tesalonika amo Paulo idia lulua sibona lasi, to Berea dekenai idia lao bona heiriheiri idia havaraia toho, to idia kwalimu lasi. Paulo ia diba ena teritori be momo herea, unai dainai gabu ma ta dekenai ia lao haroro totona. Hari danu, haroro gaukara ita goadalaia be namo, unai amo eda inai taudia ese eda gaukara do idia koua lasi!

¹⁹ Paulo be Tesalonika bona Berea ai idia noho Iuda taudia dekenai sivarai namona ia harorolaia guguru dainai, ia itaia, gari lasi karana bona Toretore Helagadia herevalaia namonamo karana be mai anina bada. Ita danu be unai bamona ita karaia be namo. To unai murinai Paulo be Atena dekenai do ia lao, unuseniai Idau Bese taudia do ia haroro henidia. Unai taoni taudia ese ia do idia abia dae, a? Karoa gabena ai, unai do ita itaia.