1-3. (a) Paulo ia bamoa tau matamatana be daika, bona ia be edena bamona tauna? (b) Inai karoa lalonai dahaka do ita dibaia?

 TAONI ta ta ai dala dikadia idia raka hanaia lalonai, aposetolo Paulo be ia badinai ia raka tau matamatana ia itaia bona ena vaira nega ia lalohadailaia. Unai tau matamatana be Timoteo. Ia be mai ena goada, bona ena mauri lagani be 20 bamona. Inai be Timoteo ena nega ginigunana ena hanua ia rakatania bona gabu daudau dekenai ia lao. Adorahi kahana ia lao henia lalonai, idia be Lusitera bona Ikonio amo idia daudau vadaeni. Unai laolao lalonai dahaka do ia vara? Paulo be unai ia diba, badina unai be ena misinari laolao iharuana. Ia diba, idia ese hekwakwanai bona dika momo do idia davaria. To unai tau matamatana ia hegeregere unai gaudia ibounai ia haheaukalaia totona, a?

² Paulo ia diba momokani Timoteo be ia hegeregere ia danu ia loaloa totona, to Timoteo be ia sibona dekenai unai lalohadai ia abia lasi. Guna idia vara gaudia haida dainai, Paulo ia laloa, do ia bamoa tauna namona ta ia abia hidi be namo. Ia diba, kongrigeisen vadivadi henia bona hagoadaia be gaukara badana, unai dainai loaloa gaukarana idia karaia tadikakadia ese lalogoada bona lalotamona karana idia hahedinaraia be namo. Dahaka dainai Paulo be unai bamona ia laloa? Badina guna lalotamona lasi karana ese ia bona Banaba ia hapararaia.

³ Inai karoa lalonai, ita ese hekwakwanai hamaoromaoroa dala maorodia do ita dibaia. Danu, Paulo ese Timoteo ia abia hidi ena badina do ita dibaia, bona hari sekit naria taudia ese idia karaia mai anina bada gaukarana do ita diba namonamo.

4. Paulo ena misinari laolao iharuana lalonai, ia ura dahaka ia karaia?

⁴ Karoa 14 ai ita itaia, inai tadikaka foa—Paulo, Banaba, Iuda, bona Sila—be hakaua oreana ese kopina utua karana ia hamaoromaoroa ena  disisen be Antioka kongrigeisen dekenai idia gwauraia neganai, unai ese kongrigeisen ia hagoadaia bada. Gabeai Paulo be dahaka ia karaia? Ia ese Banaba dekenai ia lalohadailaia palani matamatana ia herevalaia, ia gwau: “Namona be ita giroa lou bona guna Iehova ena hereva ita harorolaia siti ibounai dekenai tadikaka ita vadivadi henia, bona ita itaia idia be edena bamona.” (Kara 15:36) Paulo be unai hereva ia gwauraia neganai, abidadama matamata taudia vadivadi henia kava karana ia herevalaia sibona lasi. To Kara bukana ese Paulo ena misinari laolao iharuana ena badina ia hahedinaraia goevagoeva. Ginigunana be, ia ura hakaua oreana ese ia atoa taravatudia be idia dekenai ia herevalaia lou. (Kara 16:4) Iharuana be, Paulo be loaloa naria tauna dainai, ia ura kongrigeisen ia hagoadaia bona durua, edia abidadama dekenai idia gini goada totona. (Roma 1:11, 12) Edena dala ai, Iehova ena Witnes taudia ese aposetolo taudia edia haheitalai idia tohotohoa?

5. Hari, Hakaua Oreana ese edena dala ai kongrigeisen ta ta ia hakaua bona hagoadaia?

⁵ Hari, Keriso ese Iehova ena Witnes taudia edia Hakaua Oreana ia gaukaralaia, ena kongrigeisen ia hakaua totona. Unai abidadama horoa taudia ese revareva, idia printaia bona onlain ai pablikeisen idauidau, kongrigeisen heboudia, bona dala ma haida amo, tanobada ibounai idia noho kongrigeisen dekenai hakaua bona hagoadaia hereva idia halasia. Danu, Hakaua Oreana ia hekwarahi kongrigeisen ta ta ida ia gaukara hebou namonamo totona. Unai dainai loaloa naria taudia ia gaukaralaia. Hakaua Oreana ese tanobada hegegemadai elda taudia tausen momo ia abidia hidi, sekit naria gaukarana idia karaia totona.

6, 7. Sekit naria taudia edia gaukara haida be dahaka?

⁶ Hari inai negai, loaloa naria taudia ese kongrigeisen ta ta idia vadivadi henia neganai, idia ese Baibel amo tadikaka taihu ta ta idia durua bona idia hagoadaia. Edena dala ai? Idia ese Keristani ginigunadia edia haheitalai idia tohotohoa, Paulo ia karaia bamona. Paulo ese ena gaukara hebou tadikakana ia hagoadaia, ia gwau: “Nega namodia bona nega dikadia ai, Dirava ena hereva oi harorolaia goadagoada. Mai haheauka ida bona hadibaia dala namona ai idia do oi sisiba henia, oi hereva auka henia, bona oi hagoadaia. . . . Evanelia tauna ena gaukara oi karaia.”​—2 Tim. 4:2, 5.

⁷ Unai siri ena hereva bamona, sekit naria tauna—bona ena adavana, bema ia headava—ese haroro gaukara ena kahana idauidau lalonai pablisa ia bamodia. Unai bamona sekit naria taudia be haroro goadagoada bona hadibaia taudia namodia—edia kara namodia ese kongrigeisen taudia ia durua bada. (Roma 12:11; 2 Tim. 2:15) Oibe, unai gaukara idia karaia taudia ese sibona edia ura dadaraia lalokauna idia hahedinaraia. Idia be mai ura ida ma haida idia hesiai henia, bona medu o siahu bada negadiai, eiava gabu dikadia dekenai idia loaloa. (Fili. 2:3, 4) Danu, Sekit naria taudia ese Baibel amo idia henia tok idauidau amo kongrigeisen idia hagoadaia, hadibaia, bona sisiba henia. Kongrigeisen taudia ibounai ese edia haheitalai idia laloa bona edia abidadama idia tohotohoa neganai, namo do idia davaria.​—Heb. 13:7.

8. Banaba ese Paulo ena palani ia abia dae, a?

⁸ Paulo ese “tadikaka vadivadi henia” ena palani ia gwauraia neganai, Banaba ese unai ia abia dae. (Kara 15:36) Idia ruaosi be guna idia gaukara hebou namonamo bona do idia vadivadi henia gabudia bona taudia idia diba vadaeni. (Kara 13:2–14:28) Unai dainai, toana be idia ruaosi be unai asainmen dekenai do idia gaukara hebou be lalohadai namona. To hekwakwanai ta ia vara. Kara 15:37 ia gwau: “Banaba ia ura Ioane, ena ladana ma ta be Mareko, ia abia lao.” Banaba ia hereva sibona lasi Ioane be idia danu do ia lao. To “ia ura” ena kasin, Mareko, be unai misinari laolaona dekenai idia ia bamoa.

9. Dahaka dainai Paulo ese Banaba ena lalohadai ia abia dae lasi?

⁹ Paulo ese Banaba ena lalohadai ia abia dae lasi. Dahaka dainai? Baibel ia gwau: “Paulo ia ura lasi [Mareko] be idia ida do ia lao, badina guna Pamupulia ai idia ia rakatania bona idia ida ia lao lasi gaukara ia karaia totona.” (Kara 15:38) Mareko be guna Paulo bona Banaba edia misinari laolao ginigunana lalonai ia bamodia, to idia danu ia noho lasi ela bona laolao ena dokona. (Kara 12:25; 13:13) Idia be Pamupulia dekenai idia do noho lalonai, Mareko be ena gaukara ia rakatania bona Ierusalema dekenai ia giroa lou. Oibe, idia ia rakatania ena badina be Baibel ese ia herevalaia lasi, to aposetolo Paulo ia itaia Mareko ese ena gaukara ia laloa bada lasi. Reana Paulo be ia daradara, Mareko ida do ia gaukara lou eiava lasi.

10. Dahaka dainai Paulo bona Banaba idia hepapahuahu, bona dahaka ia vara?

¹⁰ Banaba ia ura dikadika Mareko be idia do ia bamoa. To, Paulo ia ura lasi. Kara 15:39 ia gwau: “Unai neganai hepapahuahu badana ia vara, unai dainai idia parara.” Banaba be Mareko ida bouti dekenai idia guia bona ena hanua, Kupro dekenai idia giroa lou. Paulo be ena palani hegeregerena ia kara. Baibel ia gwau: “Paulo ese Sila ia abia hidi, bona tadikaka ese guriguri amo Iehova idia noia Paulo do ia naria totona, unai murinai ia lao.” (Kara 15:40) Idia ruaosi be ‘Suria bona Kilikia dekenai idia lao bona kongrigeisen taudia idia hagoadaia.’​—Kara 15:41.

11. Ita bona ita ia habadua tauna huanai parara karana ita koua totona, dahaka kara namodia ita hahedinaraia be namo?

¹¹ Unai sivarai ese ita ia hadibaia, ita be goevadae lasi taudia. Paulo bona Banaba be hakaua oreana ena gwaukau taudia. Bona Paulo be unai hakaua oreana ena memba ta danu. To unai negai, ia bona Banaba edia goevadae lasi tauanina ena ura hegeregerena idia kara. Unai hepapahuahu dainai, idia ruaosi be nega daudau idia parara, a? Ena be idia be goevadae lasi taudia, to idia manau bona Keriso ena lalohadai idia abia. Oibe, idia ruaosi ese Keristani lalotamona karana bona dika gwauatao karana idia hahedinaraia. (Efe. 4:1-3) Gabeai, Paulo bona Mareko be tiokratik gaukaradia ma haida idia karaia hebou. a—Kol. 4:10.

12. Paulo bona Banaba bamona, hari elda taudia ese edena bamona kara idia hahedinaraia be namo?

 ¹² Unai badu dikadika karana be Paulo bona Banaba edia kara lasi. Banaba be lalokau bona harihari bada tauna dainai, ena be ena ladana korikori be Iosepa, to aposetolo taudia ese ena ladana idia hatoa Banaba, anina be “Goada Henia Tauna.” (Kara 4:36) Paulo danu be hebogahisi bona kara namo tauna. (1 Tes. 2:7,  8) Hari Keristani elda taudia ibounai bona sekit naria taudia danu ese Paulo bona Banaba idia tohotohoa, bona idia hekwarahi elda ma haida bona mamoe oreana dekenai manau bona hebogahisi karana idia hahedinaraia.​—1 Pet. 5:2, 3.

13, 14. (a) Timoteo be daika, bona Paulo ese ia davaria neganai ena noho dalana be edena bamona? (b) Dahaka dainai Paulo ese Timoteo ia laloa bada? (c) Timoteo be dahaka maduna ia abia?

¹³ Paulo ena misinari laolao iharuana ai, ia be Roma ena provinsi, Galatia, dekenai ia lao, unuseniai kongrigeisen haida idia noho vadaeni. Bena “Derebe dekenai ia ginidae bena Lusitera dekenai ia lao.” Bona Baibel ia gwau: “Unuseniai hahediba tauna ta ladana Timoteo ia noho. Ia be abidadama Iuda hahinena ena natuna, to ena tamana be Grik tauna.”​—Kara 16:1. b

¹⁴ Toana be lagani 47 C.E. ai Paulo be nega ginigunana ia loaloa neganai, ia ese Timoteo ena ruma bese ia hedavari henia. Bena lagani rua o toi idia ore bona ena laolao iharuana ai, Paulo ese tau matamatana Timoteo ia laloa bada. Dahaka dainai? Badina tadikaka “idia gwau [Timoteo] be tau namona.” Ena hanua ai idia noho tadikaka ese ia idia ura henia sibona lasi, to kongrigeisen ma haida ese ena kara namodia idia herevalaia. Baibel ia hahedinaraia, Lusitera bona Ikonio—edia daudau be 30 kilomita bamona—ai idia noho tadikaka be ia dainai hereva namodia idia gwauraia. (Kara 16:2) Lauma helaga ena hahekau henunai, elda taudia ese tau matamatana, Timoteo, dekenai maduna badana idia henia—loaloa naria gaukarana lalonai Paulo bona Sila ia durua totona.​—Kara 16:3.

15, 16. Timoteo be edena dala ai ladana namona ia abia?

¹⁵ Edena dala ai Timoteo be ena matamata negana ai, ladana namona ia abia? Iena aonega, vairana toana, eiava diba dainai ladana namona ia abia, a? Nega momo taunimanima be unai bamona gaudia dainai ladana namona idia abia. Guna peroveta tauna Samuela be abia hidi ia karaia neganai, toana sibona ia itaia bena abia hidi ia karaia. To, Iehova ese ia hamaoroa: “Dirava be taunimanima ese idia itaia hegeregerena ia itaia lasi, badina taunimanima ese ta ena toana sibona idia itaia, to Iehova ese kudouna ia itaia.” (1 Sam. 16:7) Timoteo be ena aonega eiava diba dainai lasi, to ena kara namodia dainai, ena tadikaka taihu huanai ladana namona ia abia.

 ¹⁶ Lagani momo murinai, aposetolo Paulo ese Timoteo ena Keristani kara namodia ia herevalaia. Ia gwau, Timoteo be sibona ena ura dadaraia lalokauna ia hahedinaraia bona tiokratik gaukaradia ia karaia namonamo. (Fili. 2:20-22) Timoteo be “abidadama momokanina” ia hahedinaraia.​—2 Tim. 1:5.

17. Hari, matamata taudia ese edena dala ai Timoteo idia tohotohoa diba?

¹⁷ Hari, matamata taudia momo ese Timoteo ena kara idia tohotohoa bona Keristani kara namodia idia hahedinaraia. Unai dainai idia matamata neganai, Iehova bona ena taunimanima vairanai ladana namona idia abia. (Aon. 22:1; 1 Tim. 4:15) Idia ese abidadama momokanina idia hahedinaraia, bona mauri dala rua idia badinaia lasi. (Sal. 26:4) Unai dainai, matamata taudia be Timoteo bamona, kongrigeisen lalonai gaukara namodia idia karaia diba. Oibe, idia ese Iehova lalokau henia taudia ibounai do idia hagoadaia, bema sivarai namona harorolaia totona idia hegeregere, bona Iehova idia gwauhamata henia bona idia bapatiso!

18. (a) Paulo bona Timoteo be loaloa gaukarana lalonai dahaka idia moalelaia? (b) Edena dala ai kongrigeisen ese namo idia davaria?

¹⁸ Paulo bona Timoteo be lagani momo idia gaukara hebou. Idia be loaloa gaukarana idia karaia dainai, hakaua oreana ena gaukara haida idia karaia. Baibel ia gwau: “Siti idauidau dekenai idia lao neganai, Ierusalema ai idia noho aposetolo taudia bona tau badadia ese idia abia hidi taravatu be tadikaka bona taihu dekenai idia hadibaia, unai amo inai taravatu idia badinaia diba.” (Kara 16:4) Oibe, kongrigeisen ese Ierusalema ai idia noho aposetolo taudia bona tau badadia edia hakaua dalana idia badinaia. Unai dainai, “kongrigeisen taudia edia abidadama ia goada ia lao bona dina ta ta ai edia namba ia bada daekau.”​—Kara 16:5.

19, 20. Dahaka dainai Keristani taudia ese “hakaua taudia” idia kamonai henia be namo?

¹⁹ Unai hegeregerena, hari Iehova ena Witnes taudia ese “hakaua taudia” edia hakaua hereva idia badinaia dainai, hahenamo momo idia moalelaia. (Heb. 13:17) Inai tanobada ena toana ia idau noho dainai, gau badana be Keristani taudia ese “hesiai tauna mai ena kamonai bona mai ena aonega” amo ia mai hakaua daladia idia badinaia. (Mat. 24:45; 1 Kor. 7:29-31) Bema unai bamona ita karaia, unai ese ita do ia durua hereva momokani amo do ita raka siri lasi bona tanobada amo do ita gini siri.​—Iam. 1:27.

²⁰ Oibe, Paulo, Banaba, Mareko, bona Keristani taudia ginigunadia edia negai idia noho horoa taudia ma haida bamona, hari elda bona Hakaua Oreana ena memba taudia danu be goevadae lasi taudia. (Roma 5:12; Iam. 3:2) To Hakaua Oreana ese Dirava ena Hereva ia badinaia namonamo bona aposetolo taudia edia haheitalai ia tohotohoa dainai, ia hamomokania unai orea ita tabekau henia diba. (2 Tim. 1:13, 14) Unai dainai, kongrigeisen idia durua edia abidadama ai idia gini goada totona.