1-3. (a) Edena dala ai Paulo bona ena bamodia ese lauma helaga ena hakaua dalana idia badinaia? (b) Dahaka gaudia do ita herevalaia?

 HAHINE haida be Makedonia ena taoni, Filipi, idia rakatania. Daudau lasi, Gangites sinavai maragina dekenai idia ginidae. Vaia idia karaia bamona, unai sinavai ena badinai idia helai bona Israela ena Dirava idia guriguri henia. Iehova ese idia ia itaia.​—2 Siv. 16:9; Sal. 65:2.

² Unai negai danu, tatau haida be Galatia ena saut kahanai ia noho taoni, Lusitera, idia rakatania, ia be 800 kilomita bamona Filipi ena ist kahana amo. Dina haida murinai, idia be Roma ena dala badana dekenai idia ginidae, unai dala be Asia tano ia lao henia, unuseniai taunimanima momo idia noho. Inai tatau—Paulo, Sila, bona Timoteo—be unai dala amo Efeso bona taoni ma haida dekenai idia lao, badina unuseniai idia noho taudia tausen momo ese Keriso ena sivarai idia kamonai be namo. To, edia laolao idia do hamatamaia lasi neganai, lauma helaga ese idia ia koua, to idia ia koua dalana be Baibel ese ia gwauraia lasi. Oibe, idia ia koua Asia dekenai do idia haroro lasi. Dahaka dainai? Dirava ena lauma ena heduru dainai, Iesu ia ura Paulo bona ena bamodia ia hakaudia lao Asia Minor, Aegean Davarana, bona Gangites sinavai dekenai idia haroro totona.

³ Unai laolao lalonai, Iesu ese Paulo bona ena bamodia be Makedonia dekenai ia hakaua lao karana amo, mai anina bada gaudia haida ita dibaia. Unai dainai Paulo be lagani 49 C.E. ai ena misinari laolao iharuana ia hamatamaia neganai, idia vara gaudia mani ita herevalaia.

4, 5. (a) Bitunia kahirakahira ai, Paulo bona ena bamodia dekenai dahaka ia vara? (b) Hahediba taudia be dahaka disisen idia karaia, bona dahaka namo ia vara?

⁴ Lauma helaga ese Paulo bona ena bamodia ia koua dainai Asia dekenai idia lao lasi, to not kahanai idia lao, Bitunia ena taoni ai idia haroro totona. To unuseni idia lao totona, idia be reana dina haida lalonai Perigia bona Galatia ena dala dikana amo do idia raka. To, Bitunia kahirakahira idia ginidae neganai, Iesu ese lauma helaga ia gaukaralaia lou idia ia koua totona. (Kara 16:6, 7) Unai negai, unai tatau be reana idia daradara. Idia diba  dahaka do idia harorolaia bona edena dala ai do idia harorolaia, to haroro gabuna idia diba lasi. Oibe, idia ura Asia dekenai idia lao bona idia haroro, to unai dala ia kehoa lasi. Bena idia ura Bitunia dekenai idia lao, to unai dala danu ia kehoa lasi. To, Paulo ia hesiku lasi ela bona dala ia kehoa ia haroro totona. Vadaeni idia be disisen ta idia karaia, to toana be unai be disisen maorona lasi. Idia be west kahana amo 550 kilomita bamona idia raka lao, bona taoni ta ta idia hanaia ela bona Troa dekenai idia ginidae, unai be Makedonia ia lao henia dalana. (Kara 16:8) Unuseniai, nega ihatoina Paulo ia haroro, bona kamonai taudia momo ia davaria.

⁵ Evanelia bukana torea tauna, Luka, be Troa dekenai Paulo bona ena turadia ia bamoa, bona idia vara gaudia ia herevalaia, ia gwau: “Hanuaboi ai Paulo ia matahanai, ia itaia Makedonia tauna ta be unuseniai ia gini, Paulo ia noia, ia gwau: ‘Makedonia dekenai oi mai bona ai oi durua.’ Unai matahanai ia itaia murinai, dala ai karaia Makedonia dekenai ai lao totona, badina ai abia dae Dirava ese ai ia boiria idia dekenai sivarai namona do ai harorolaia.” a (Kara 16:9, 10) Dokonai, Paulo ia diba edeseniai do idia haroro. Paulo ia moale dikadika badina ena laolao lalonai ia hesiku lasi! Maoromaoro, inai tatau foa be bouti amo Makedonia dekenai idia lao.

6, 7. (a) Paulo ena laolao lalonai idia vara gaudia amo dahaka ita dibaia? (b) Paulo ena haheitalai ese edena dala ai ita ia hagoadaia?

⁶ Unai sivarai amo dahaka ita dibaia? Mani inai ita laloa: Paulo be Asia dekenai ia lao murinai, Dirava ena lauma ese ia koua, bona Bitunia dekenai ia lao murinai, Iesu ese ia koua, bona Troa ai ia ginidae murinai, Iesu ese ia hamaoroa Makedonia  dekenai do ia lao. Hari inai negai, kongrigeisen ena Kwarana, Iesu, ese ita be unai bamona ia hakaua danu. (Kol. 1:18) Hegeregere, ita be reana painia gaukara eiava Basileia pablisa be momo lasi gabudia dekenai lao karana ita lalohadailaia. To, iseda tahua gauna hagugurua totona kara haida ita karaia murinai, Iesu ese Dirava ena lauma amo ita do ia hakaua. Dahaka dainai? Inai haheitalai oi laloa: Taria tauna ese motuka be lauri eiava idiba kahanai ia taria lao diba, bema motuka ia heau noho. Unai hegeregerena, bema ita hekwarahi kara haida ita karaia, vadaeni Iesu ese ita do ia hakaua eda haroro gaukara ita habadaia totona.

⁷ To bema iseda hekwarahi ese anina ia havaraia lasi, unai be edena bamona? Do ita hesiku, bona ita laloa Dirava ena lauma ese ita ia hakaua lasi, a? Lasi. Laloatao, Paulo be metau gaudia momo ia davaria danu. To, ia gaukara goada ela bona dala ia kehoa kamonai taudia ia davaria totona. Ita diba momokani, bema ita hekwarahi “gaukara ena iduara badana” dekenai ita vareai totona, hahenamo do ita abia danu.​—1 Kor. 16:9.

8. (a) Filipi taoni mani oi herevalaia. (b) Paulo ese “guriguri gabuna ta” dekenai ia haroro karana amo, dahaka namo ia vara?

⁸ Paulo bona ena bamodia be Makedonia distrik dekenai idia ginidae murinai, Filipi dekenai idia lao, unuseniai Roma taudia momo idia noho. Filipi ai idia noho gaudia momo be Roma ai idia noho danu, unai dainai tuari amo idia doko Roma taudia dekenai, Filipi be Roma hanua bamona. Filipi hanua ena geiti murimurinai, sinavai maragina ta badinai, unai misinari taudia ese “guriguri gabuna ta” idia davaria. b Sabati dinana ai, unuseni idia lao bona hahine haida idia davaria, Dirava tomadiho henia totona idia hebou. Misinari taudia idia helai bona unai hahine idia hereva henidia. Hahine ta ladana, Lidia, ese idia “ia kamonai henia noho. Vadaeni Iehova ese ena lalona ia kehoa.” Lidia be misinari taudia amo ia kamonai gaudia ese ena kudouna ia hamarerea bada dainai, ia bona ena ruma bese idia bapatiso. Bena Lidia ese Paulo bona ena bamodia ia abia dae bona ena ruma dekenai idia noho. c—Kara 16:13-15.

9. Hari inai negai, momo be edena dala ai Paulo ena haheitalai idia tohotohoa, bona dahaka hahenamo idia davaria?

⁹ Mani Lidia ena bapatiso amo ia vara moalena oi laloa! Paulo ia moale dikadika badina “Makedonia dekenai” ia lao ena boiboi herevana ia abia dae bona Iehova ese ia bona ena bamodia ia gaukaralaia, Dirava gari henia hahinedia edia guriguri ia haerelaia totona! Hari inai negai, tadikaka bona taihu momo—matamata, buruka, singul bona headava taudia—be Basileia pablisa momo lasi gabudia dekenai idia lao. Oibe, idia davaria metau idauidau dainai idia lalohisihisi momokani lasi, to idia moale badina idia ese Lidia—Baibel ena hereva momokani ia abia dae hahinena—bamona taudia momo idia davaria. Pablisa momo lasi teritori dekenai oi lao totona, gau haida oi haidaua diba, a? Hahenamo momo do oi  davaria. Hegeregere, mauri lagani 20 tadikaka ta, Aaron, mani oi laloa. Ia be Central America dekenai ia lao. Ia ese tano ma haida dekenai hesiai gaukara idia karaia taudia momo ia laloa neganai, ia gwau: “Idau tano ai hesiai gaukara lau karaia karana ese lau ia durua Iehova ena orea lalonai lau gini goada bona Ia kahirakahira lau noho totona. Haroro gaukara lau moalelaia bada—egu Baibel stadi ibounai be eit!”

10. Edena dala ai demoni ese Paulo bona ena bamodia edia haroro gaukara ia koua?

¹⁰ Guna Filipi hanua ai momo be Satani ena ura idia badinaia, to sivarai namona ia tubu matamaia neganai, Satani ia badu. Unai dainai, haida ese dala idia tahua Paulo bona ena bamodia edia haroro gaukara idia koua totona! Idia be guriguri gabuna idia lao henia noho lalonai, demoni ese ia biagua hesiai kekeni ta—peroveta herevadia amo ena biagudia totona moni ia abia kekenina—be idia ia badinaia noho, bona ia boiboi: “Inai tatau be Ataiai Momokani Diravana ena hesiai taudia bona umui dekenai hahemauri dalana idia harorolaia noho.” Demoni ese unai kekeni ia gaukaralaia unai bamona ia hereva totona, unai amo taunimanima do idia laloa iena hereva bona Paulo ena hahediba herevadia be Dirava ena amo. Bena taunimanima ese Keriso murinai idia raka taudia korikoridia edia hereva do idia kamonai henia lasi. To Paulo ese unai kekeni amo demoni ia lulua neganai, kekeni ia boiboi lou lasi.​—Kara 16:16-18.

11. Paulo ese kekeni amo demoni ia lulua murinai, Paulo bona Sila dekenai dahaka ia vara?

¹¹ Unai hesiai kekenina ena biagudia idia itaia edia moni abia dalana be lasi neganai, idia badu dikadika. Idia ese Paulo bona Sila idia veria lao maketi gabunai, unuseniai majistret taudia—Roma ena ofesa unai—idia noho. Unai taudia ese hahemaoro taudia idia noia, idia gwau: ‘Inai Iuda taudia ese idia harorolaia kastom karadia ai abia dae eiava badinaia be maoro lasi, badina ai be Roma taudia.’ Edia hereva dainai, “[maketi gabunai] hutuma idia toreisi bona mai badu ida [Paulo bona Sila] idia hereva henidia,” bona majistret taudia ese “oda idia henia au amo idia dadabadia totona.” Unai murinai, Paulo bona Sila be dibura rumana dekenai idia veridia lao. Bona dibura naria tauna ese dibura ruma ena lalona momokani daiutuna ai ia atodia bona edia aena be au metaudia rua huanai ia koudia. (Kara 16:19-24) Dibura naria tauna ese iduara ia koua neganai, idia ruaosi be gau ta idia itaia diba lasi. To, idia vara gaudia ibounai be Iehova ese ia itaia.​—Sal. 139:12.

12. (a) Keriso ena hahediba taudia ese dagedage karana be edena bamona idia laloa, bona dahaka dainai? (b) Satani bona ena taunimanima ese edena bamona dagedage karadia idia gaukaralaia noho?

¹² Lagani haida gunanai, Iesu ese ena murinai idia raka taudia ia hamaoroa: “Umui . . . do idia dagedage henia.” (Ioa. 15:20) Unai dainai, Paulo bona ena bamodia be Makedonia idia lao neganai, idia hegaegae dagedage idia davaria totona. Bena unai ia vara neganai, idia laloparara unai be Iehova ena amo lasi, to Satani ena badu idia dekenai ia hahedinaraia. Hari inai negai, Satani ena taunimanima  danu be unai bamona dala ai ita idia dagedage henia, guna Filipi hanua ai idia karaia bamona. Sikuli bona gaukara gabudiai, koikoi taudia ese ita idia gwauraia dika bona dagedage henia. Tano haida ai, tomadiho gunalaia taudia haida be kota dekenai ita idia samania koikoi, idia gwau: ‘Witnes taudia ese idia hahedibalaia herevadia ai abia dae bona badinaia be maoro lasi.’ Gabu haida ai, iseda tadikaka taihu idia dadabaia bona dibura ruma ai idia atodia. To, idia vara gaudia ibounai be Iehova ese ia itaia.​—1 Pet. 3:12.

13. Dahaka dainai dibura naria tauna ia henanadai, “Dahaka lau karaia be namo hahemauri lau abia totona”?

¹³ Nega ia hanaia lalonai, Paulo bona Sila edia lalona bona tauanina ena hisihisi idia ore idia lao. Bena hanuaboi momokani ai, edia hemami ia namo lou dainai, “idia guriguri bona Dirava hanamoa anedia idia abia.” Bena karaharaga, tano mareremarere ese dibura ruma ia hamarerea! Dibura naria tauna ia noga bona ia itaia dibura ruma ena iduara ia kehoa, bona ia gari badina ia laloa dibura taudia idia heau vadaeni. Ia diba bema idia heau mauri, vadaeni ia do idia panisia, unai dainai “ena tuari kaia ia abia bona ia ura sibona ia alaia mase.” To Paulo ia boiboi badabada: “Oi sibona oi alaia lasi, ai ibounai ai noho!” Dibura naria tauna ia henanadai: “Tau badadia e, dahaka lau karaia be namo hahemauri lau abia totona?” Paulo bona Sila ese ia idia hamauria diba lasi, to Iesu sibona ese do ia hamauria. Unai dainai idia haere henia, idia gwau: “Lohiabada Iesu oi abidadama henia, bena oi . . . be hahemauri do umui abia.”​—Kara 16:25-31.

14. (a) Edena dala ai Paulo bona Sila ese dibura naria tauna idia durua? (b) Paulo bona Sila be mai moale ida dagedage idia haheaukalaia dainai, dahaka hahenamo idia davaria?

¹⁴ Dibura naria tauna be mai kudouna ibounai ida ia henanadai, a? Oibe, Paulo ia diba unai tauna be mai momokani ida ia henanadai. Ia be Idau Bese tauna, bona Baibel ia diba namonamo lasi. Keristani tauna ai ia lao totona, Baibel ena hereva momokanidia ia dibaia bona abia dae guna be namo. Unai dainai Paulo bona Sila ese nega idia atoa, ia dekenai “Iehova ena hereva” idia gwauraia totona. Paulo bona Sila be unai tauna dekenai Baibel ena hereva idia hadibaia karana idia laloa bada dainai, reana edia hisihisi ibounai idia laloaboio. To, dibura naria tauna ese edia doruna dekenai bero ia itaia, bona unai bero ia hagoevadia. Bena ia bona ena ruma bese be “maoromaoro bapatiso idia abia.” Paulo bona Sila be mai moale ida dagedage karana idia haheaukalaia dainai, hahenamo idia davaria!​—Kara 16:32-34.

15. (a) Hari Witnes taudia momo ese edena dala ai Paulo bona Sila edia haheitalai idia tohotohoa? (b) Dahaka dainai iseda teritori ai idia noho taudia ita vadivadi henia loulou?

¹⁵ Paulo bona Sila bamona, hari Witnes taudia momo be edia abidadama dainai dibura ruma ai idia atodia, to sivarai namona idia harorolaia noho dainai anina namona ia vara. Hegeregere, tano ta dekenai iseda gaukara idia koua, to hari unuseni idia noho Witnes taudia 40 pesen bamona be guna dibura ruma ai idia noho lalonai Iehova idia dibaia! (Isa. 54:17) Mani oi laloa, dibura naria tauna be tano mareremarere ia vara murinai heduru ia tahua. Unai hegeregerena, haida  be Basileia ena sivarai namona idia ura lasi kamonai, to reana edia mauri lalonai dika badana ta idia davaria murinai, edia kara idia haidaua. Iseda teritori ai idia noho taudia ita vadivadi henia loulou, unai amo heduru idia ura neganai, ita durudia diba.

16. Paulo bona Sila idia dadabadia bona murina dinana ai, dahaka ia vara?

¹⁶ Paulo bona Sila idia dadabaia bona murina dinana ai, majistret ese oda idia henia do idia ruhadia totona. To Paulo ia gwau: “Taunimanima vairanai ai idia dadabaia bona dibura ruma lalonai ai idia atoa, ena be kota vairanai ai gini lasi, bona ai be Roma taudia. Bona hari idia ura hehuni dalanai ai idia ruhaia, a? Lasi momokani! Namona be idia sibodia idia mai bona ai idia hakaua raka-lasi.” Gabeai, majistret taudia idia laloparara Paulo bona Sila be Roma taudia neganai, idia “gari dikadika,” badina idia ese Paulo bona Sila edia maoro idia hadikaia. d Bena dahaka ia vara? Guna idia ruaosi be hutuma vairanai idia botadia, to hari majistret taudia be hutuma vairanai edia sori herevana do idia gwauraia. Idia ese Paulo bona Sila idia noia Filipi hanua idia rakatania totona. Idia rua ese unai noinoi herevana idia abia dae, to unai gabu idia do rakatania lasi neganai, unuseni idia noho hahediba taudia matamatadia idia hagoadadia. Bena unai murinai, unai gabu idia rakatania.

17. Hahediba taudia matamatadia ese Paulo bona Sila edia haheauka karana amo, dahaka idia dibaia?

¹⁷ Bema matamanai majistret idia diba Paulo bona Sila be Roma taudia, reana do idia dadabadia lasi. (Kara 22:25, 26) To majistret dekenai unai idia gwauraia lasi, unai amo idia ura Filipi ai idia noho hahediba taudia matamatadia do idia diba, idia be Keriso dainai hisihisi idia abia. Unai ese Roma ena sitisen ai idia lao lasi hahediba taudia edia abidadama ia hagoadaia, ani? Roma taudia edia taravatu dainai, do idia dadabadia. Unai dainai, Paulo bona Sila ese hisihisi idia haheaukalaia karana amo, hahediba taudia matamatadia idia itaia, Keriso murinai idia raka taudia be dagedage lalonai idia gini goada diba. Ma danu, Paulo bona Sila idia hahedinaraia idia be Roma taudia, unai amo idia ura majistret do idia diba, idia ruaosi dekenai idia karaia karana be kerere. Bona unai ese dala ia kehoa, majistret taudia ese tadikaka do idia hahisia lasi bona taravatu ia noho dainai, unai ese idia do ia gimaia.

18. (a) Hari inai negai, Keristani elda taudia ese edena dala ai Paulo ena haheitalai idia tohotohoa? (b) Edena dala ai ‘kota vairanai sivarai namona ita hamomokania bona ena maoro ita gwauraia hedinarai’ diba?

¹⁸ Hari, Keristani kongrigeisen lalonai elda taudia danu ese haheitalai namona idia hahedinaraia. Elda taudia idia ura edia tadikaka ese idia karaia gaudia be idia danu ese idia karaia be namo. Unai hegeregerena, Paulo bamona iseda maoro gaukaralaia dalana bona negana ita laloa namonamo, unai amo taravatu  hegeregerena ita do idia panisia lasi. Bema mai dalana, iseda hanua ena kota, nesenel kota, eiava intanesinol kota dekenai apil ita karaia, unai amo maoro idia henia eda tomadiho ita karaia noho totona. Iseda tahua gauna be ita ura lasi gavamani ena gaukara ita durua, to ita ura ‘kota vairanai sivarai namona ita hamomokania bona ena maoro ita gwauraia hedinarai.’ Paulo be Filipi ai idia hadiburaia bena lagani 10 murinai, unai gabu ai ia noho kongrigeisen dekenai unai hereva ia torea. (Fili. 1:7) Herevana kota be dahaka do ia karaia, to Paulo bona ena bamodia bamona, mai ura bada ida Dirava ena lauma ese ita ia hakaua dalana hegeregerena, ‘sivarai namona ita harorolaia.’​—Kara 16:10.