1-3. Dahaka dainai aposetolo Paulo be Korinto dekenai ia lao, bona dahaka gaudia totona ia hekwarahi?

 LAGANI 50 C.E. ena dokonai, aposetolo Paulo be Korinto dekenai ia noho, unai be taga bada taoni bona bisinesi momo idia karaia gabuna, bona unuseniai Grik, Roma, bona Iuda taudia momo idia noho. a Paulo be gau ta hoia, hoihoilaia, eiava moni gaukara tahua totona ia lao lasi. Ia be mai anina bada gauna ta dainai Korinto dekenai ia lao—Dirava ena Basileia harorolaia totona. To, noho gabuna ta ia tahua be namo, badina ia ura lasi ma haida ia hametaua moni dalanai ia idia naria totona. Ia laloa lasi ia be Dirava ena hesiai gaukara ia karaia dainai, haida ese ia do idia naria. Dahaka do ia karaia?

² Paulo be palai turia gaukarana ia diba. Unai gaukara be mai ena hekwarahi, to sibona naria totona unai ia karaia. Unai bisi bada taoni ai moni gaukara do ia davaria, a? Noho gabuna namona ta do ia davaria, a? Ena be Paulo ese unai gaudia tahua totona ia hekwarahi, to ena gaukara badana, hesiai gaukarana unai, ia laloa bada.

³ Paulo be heduru dala haida ia davaria dainai, Korinto ai ia noho sisina, bona ena hesiai gaukara ese anina namona ia havaraia. Korinto ai Paulo ena gaukara amo dahaka ita dibaia? Bona edena dala ai unai ese ita ia durua, eda teritori ai Dirava ena Basileia ita harorolaia guguru totona?

4, 5. (a) Korinto ai, Paulo be edeseni ia noho, bona dahaka gaukara ia karaia? (b) Edena dala ai Paulo be palai turia gaukara ia dibaia?

⁴ Paulo be Korinto ai ia ginidae bona nega sisina murinai, heabidae tau bona hahine ta ia davaria—Iuda tauna Akwila bona ena adavana, Prisikila. Unai tau bona ena adavana be Korinto ai idia noho, badina Lohia tauna, Klaudio, ese oda ia henia, “Iuda taudia ibounai be Roma do idia rakatania.”  (Kara 18:1, 2) Akwila bona Prisikila ese Paulo be edia ruma ai idia abia dae bona idia gaukara hebou. Baibel ia gwau: “[Paulo] bona edia gaukara be tamona dainai, ia be edia ruma dekenai ia noho bona palai rumadia turia gaukarana idia karaia hebou.” (Kara 18:3) Paulo be Korinto ai ena hesiai gaukara ia karaia neganai, unai heabidae tau bona hahine edia ruma dekenai ia noho. Bona idia ida ia noho lalonai, reana revareva haida ia torea bona gabeai idia be Baibel ena kahana ai idia lao. b

⁵ ‘Gamaliela ese ia hadibaia’ tauna, Paulo, be edena dala ai palai turia gaukarana ia diba danu? (Kara 22:3) Aposetolo edia negai idia noho Iuda taudia ese edia natudia dekenai ima gaukaradia idia hadibaia danu, ena be unai natudia be edukeisen ma haida idia abia vadaeni. Paulo be Kilikia ena gabu ta ladana, Taso amo, bona unai gabu ai dabua ladana cilicium ia noho, unai dabua amo palai idia turia diba, bona toana be Paulo be mero matamata neganai, palai turia gaukarana ia diba. Palai turia gaukarana lalonai, dahaka idia karaia? Reana unai gaukara karaia totona, dabua aukadia idia utua bona turia, unai amo palai idia karaia diba. Herevana idia karaia daladia be idauidau, to ia be mai ena hekwarahi.

6, 7. (a) Paulo ese palai turia gaukarana be edena bamona ia laloa, bona dahaka ese ia hahedinaraia Akwila bona Prisikila be Paulo bamona idia laloa? (b) Hari Keristani taudia ese edena dala ai Paulo, Akwila, bona Prisikila edia haheitalai idia tohotohoa?

⁶ Paulo ese palai turia gaukarana be ena gaukara badana ai ia halaoa lasi. Unai gaukara ia karaia ia sibona ia durua, unai amo sivarai namona do ia harorolaia “davana lasi.” (2 Kor. 11:7) Akwila bona Prisikila ese edia gaukara be edena bamona idia  laloa? Idia be Keristani taudia dainai, Paulo bamona, moni gaukarana be edia gaukara badana ai idia halaoa lasi. Oibe, lagani 52 C.E. ai, Paulo be Korinto hanua ia rakatania neganai, Akwila bona Prisikila be edia moni gaukara idia rakatania bona Paulo ida Efeso dekenai idia lao, bona edia ruma ai kongrigeisen hebou idia karaia. (1 Kor. 16:19) Gabeai, Roma dekenai idia lao, bona unai murinai Efeso dekenai idia giroa lou. Akwila bona Prisikila be Basileia idia atoa guna bona mai edia ura ida sibona idia henia ma haida idia hesiai henia totona, unai dainai “idau bese taudia edia kongrigeisen ibounai” amo hanamoa herevadia idia abia.​—Roma 16:3-5; 2 Tim. 4:19.

⁷ Hari Keristani taudia ese Paulo, Akwila, bona Prisikila edia haheitalai idia tohotohoa. Haroro gaukara idia goadalaia taudia idia gaukara goada, unai amo ma haida ‘dekenai metau idia henia lasi.’ (1 Tes. 2:9) Ita moale badina ful-taim Basileia harorolaia taudia momo be pat-taim moni gaukara idia karaia, unai  amo edia gaukara badana ia durua diba. Akwila bona Prisikila hegeregerena, Iehova ena hesiai taudia momo be edia ruma dekenai sekit naria taudia idia abia dae. ‘Heabidae karana ena dala idia badinaia’ taudia idia diba, unai kara ese idia ia hagoadaia.​—Roma 12:13.

8, 9. Paulo ena haroro goadagoada dainai idia dagedage henia neganai, dahaka ia karaia bona edeseni ia haroro?

⁸ Paulo ia laloa ena moni gaukara ese ia do ia durua ena hesiai gaukarana ia karaia noho totona. Sila bona Timoteo be Makedonia amo idia ginidae neganai, ia totona harihari gaudia idia mailaia. (2 Kor. 11:9) Maoromaoro, Paulo ese “nega bada ia gaukaralaia Dirava ena hereva ia harorolaia totona.” (Kara 18:5) To, ena haroro goadagoada karana dainai, Iuda taudia ese idia dagedage henia bada. Idia ese Keriso ena hahemauri sivaraina idia abia dae lasi dainai, Paulo ese ena dabua ena kahu ia negea oho, bona unai Iuda taudia dekenai ia gwau: “Emui rara be umui sibona emui kwarana latanai do ia noho, unai be egu kerere lasi. Inai nega amo lau be idau bese taudia dekenai do lau lao.”​—Kara 18:6; Ese. 3:18, 19.

⁹ Vadaeni, Paulo be edeseni do ia haroro? Tau ta ladana, Titio Iusto, ia be Iuda tomadihona ia abia dae, ena ruma be sinagoga badinai ia noho, ia ese Paulo be ena ruma dekenai ia abia dae. Unai dainai Paulo be sinagoga ia rakatania bona Iusto ena ruma dekenai ia lao. (Kara 18:7) Paulo be Korinto dekenai Akwila bona Prisikila edia ruma dekenai ia noho, to Iusto ena ruma amo ia haroro.

10. Dahaka ese ia hahedinaraia, Paulo be idau bese taudia sibona ia haroro henia lasi?

¹⁰ Paulo ia gwau ia be idau bese dekenai do ia lao, anina be ia ese Iuda taudia, Iuda tomadiho idia abia dae taudia, bona Iuda kamonai taudia do ia durudia lasi, a? Lasi, Iuda taudia ia durua danu. Badina, “sinagoga ena ofesa tauna Krisipo be Lohiabada abidadama henia tauna ai ia lao, iena ruma taudia ibounai danu.” Oibe, sinagoga ai idia hebou taudia momo be Krisipo ida abidadama taudia ai idia lao, badina Baibel ia gwau: “Sivarai namona idia kamonai Korinto taudia momo be abidadama taudia ai idia lao bona idia bapatiso.” (Kara 18:8) Korinto ai, Keristani kongrigeisen matamatana be Titio Iusto ena ruma dekenai idia hebou. Bema Luka ese Kara bukana be ena sitaelo ai ia torea, anina be idia vara gaudia edia nega edia nega hegeregerena ia torea, vadaeni ita gwau diba, Paulo be ena dabua ena kahu ia kokia oho murinai, Iuda bona Iuda lasi taudia be Keristani taudia ai idia lao. Unai ese ia hahedinaraia goevagoeva, Paulo be taunimanima edia noho dalana hegeregerena ena haroro daladia ia haidaua.

11. Iehova ena Witnes taudia ese Kerisendom taudia idia haroro henia neganai, edena dala ai Paulo ena haheitalai idia tohotohoa?

¹¹ Hari tano momo dekenai, Kerisendom ena dubu be lagani momo herea idia noho vadaeni bona edia taunimanima idia biagua auka. Tanobada ena gabu haida ai, Kerisendom ena misinari taudia ese taunimanima momo be edia orea taudia ai idia halaoa. Sibona idia gwauraia Keristani taudia momo be kastom  karadia idauidau idia badinaia, Korinto ai idia noho Iuda taudia bamona. To Paulo bamona, ita Iehova ena Witnes taudia ese unai bamona taudia ita durua, Baibel dekenai edia laloparara idia habadaia totona. Ena be ita idia koua eiava edia tomadiho gunalaia taudia ese ita idia dagedage henia, to namo lasi ita lalomanoka. Badina unai bamona taudia momo huanai, haida “idia ura dikadika Dirava idia hesiai henia, to diba maoromaoro hegeregerena idia karaia lasi.” Oibe, manau taudia momo idia noho bona idia ita tahua be namo.​—Roma 10:2.

12. Edena dala ai Paulo be matahanai ta amo goada ia abia?

¹² Bema Paulo be Korinto ai ena hesiai gaukara karaia noho totona ia daradara, vadaeni Lohiabada Iesu ese hanuaboi ai matahanai ta amo ia hereva henia neganai, reana ena daradara ia ore. Iesu be ia dekenai ia gwau: “Oi gari lasi, to oi hereva noho bona emu hereva oi hadokoa lasi, badina lau be oi ida bona ta ese oi do ia botaia o haberoa lasi. Badina, inai siti ai egu taunimanima be momo.” (Kara 18:9, 10) Unai matahanai ese ia hagoadaia momokani! Lohiabada ese Paulo ia hamaoroa ia do ia gimaia bona unai taoni ai kudou-maoro taudia momo idia noho. Unai matahanai dainai, Paulo be dahaka ia karaia? Baibel ia gwau: “Ia be lagani ta bona hua 6 unuseniai ia noho bona idia dekenai Dirava ena hereva ia hadibaia.”​—Kara 18:11.

13. Paulo be kota gabuna ia lao henia lalonai, dahaka ia laloa, to dahaka dainai ia dekenai unai do ia vara lasi?

¹³ Paulo be Korinto ai lagani ta ia noho murinai, Lohiabada ena heduru ia mamia momokani. “Iuda taudia be mai lalotamona ida Paulo idia dagedage henia bona kota gabuna dekenai idia hakaua lao.” (Kara 18:12) Haida idia laloa kota gabuna ena platfom be galasi bamona nadi maragidia bulu bona kurokuro amo idia karaia, bona mai ena kaivakuku laulaudia, reana unai kota gabuna be Korinto ena maketi gabuna huanai ia noho. Unai kota gabuna ena bada ia hegeregere, hutuma momo idia noho totona. Akioleji taudia idia davaria gaudia  ese idia hahedinaraia, unai kota gabuna be sinagoga bona Iusto ena ruma amo ia daudau lasi. Paulo be kota gabuna ia lao henia lalonai, ia ese reana Stefano ena mase ia laloa lou. Haida idia gwau Stefano be ena abidadama dainai idia hamasea Keristani tauna ginigunana. Paulo, guna idia gwauraia Saulo, ese “Stefano idia hamasea karana ia abia dae.” (Kara 8:1) Paulo dekenai unai bamona do ia vara danu, a? Lasi, badina Iesu be ia dekenai ia gwauhamata: ‘Ta ese oi do ia haberoa lasi.’​—Kara 18:10.

14, 15. (a) Iuda taudia ese Paulo dekenai dahaka samania hereva koikoi idia gwauraia, bona dahaka dainai Galio ese unai kota ia koua? (b) Sositene dekenai dahaka ia vara, bona unai amo dahaka namo ia davaria?

¹⁴ Paulo be kota gabuna dekenai ia lao neganai, dahaka ia vara? Unai kota ena majistret be Akaia ena gavana, Galio, ia be Roma ena aonega tauna, Seneca ena kakana. Iuda taudia ese Paulo idia samania koikoi, idia gwau: “Inai tauna be taunimanima edia lalona ia veria noho Dirava do idia tomadiho henia totona, to taravatu hegeregerena idia karaia lasi.” (Kara 18:13) Iuda taudia idia gwau Paulo be taravatu ia utua, badina haida be Keristani taudia ai ia halaoa. To, Galio ia itaia Paulo be “kerere haida” eiava “taravatu utua karana ta ia karaia” lasi. (Kara 18:14) Galio ia ura lasi Iuda taudia edia hereva ia durua. Unai dainai, Paulo ese hereva ta ia do gwauraia lasi neganai, Galio ese unai kota ia koua! Iuda taudia idia badu dikadika. Bona Sositene, Krisipo ena gabu ia abia bona sinagoga ena ofesa ai ia lao tauna, dekenai edia badu idia hahedinaraia. Ia idia veria lao bona “kota gabuna vairanai idia dadabaia” matamaia.​—Kara 18:17.

¹⁵ Dahaka dainai Galio ese hutuma ia koua lasi Sositene idia dadabaia totona? Reana Galio ia laloa Sositene be Paulo idia dagedage henia hutuma ena gunalaia tauna dainai, ia laloa ia idia dadabaia be maoro. Herevana dahaka, to unai kara ese anina namona ia havaraia. Lagani haida murinai, Paulo be Korinto kongrigeisen dekenai ena revareva ginigunana ia torea neganai, Sositene be tadikaka ta bamona ia gwauraia. (1 Kor. 1:1, 2) Paulo ese Korinto ai idia dadabaia tauna, Sositene, ia herevalaia, a? Bema oibe, reana Sositene dekenai ia vara gauna ese ia durua Keristani tauna ai ia lao totona.

16. Lohiabada ena hereva, “oi hereva noho bona emu hereva oi hadokoa lasi, badina lau be oi ida” ese edena dala ai eda haroro gaukara ia durua?

¹⁶ Iuda taudia ese Paulo ena haroro gaukara idia dadaraia murinai, Lohiabada Iesu ese Paulo ia hagoadaia: “Oi gari lasi, to oi hereva noho bona emu hereva oi hadokoa lasi, badina lau be oi ida.” (Kara 18:9, 10) Taunimanima ese ita harorolaia herevana idia kamonai lasi neganai, Iesu ena hereva ita laloa be namo. Laloaboio lasi, Iehova ese unai bamona taudia edia kudouna ia itaia bona kudou-maoro taudia ia veria mai. (1 Sam. 16:7; Ioa. 6:44) Unai ese ita ia hagoadaia haroro gaukara lalonai ita bisi noho! Lagani ta ta ai, kamonai taudia 300,000 bamona idia bapatiso, anina be dina ta ta ai 800 bamona be bapatiso idia abia. “Bese ibounai taudia be hahediba taudia ai umui halaoa” ena oda herevana idia badinaia taudia dekenai, Iesu be inai hagoadaia herevana ia henia: “Lau be dina iboudiai umui ida do lau noho ela bona inai nega oromana ena dokona.”​—Mat. 28:19, 20.

17, 18. Paulo be Efeso dekenai ia lao noho lalonai, dahaka gaudia ia laloa lou?

¹⁷ Galio ese Paulo ena inai taudia ia kara henia dalana dainai, Korinto ai Keristani kongrigeisen be maino negana ai ia noho be ita diba lasi. To, Paulo be “dina sisina momo” ia noho murinai, ena tadikaka Korinto ai ia bamahuta henidia. Lagani 52 C.E. ai, Paulo be dala ia karaia, Kenekrea ai bouti amo Suria dekenai ia lao, ia be Korinto ena ist kahanai ia noho, ena daudau be kilomita 11 bamona. To, Kenekrea ia do rakatania lasi neganai, “ena huina ia utua kwadogi, badina Dirava dekenai gwauhamata ta ia karaia.” c (Kara 18:18) Unai murinai, Akwila bona Prisikila ida Aegean Davarana idia hanaia bona Efeso dekenai idia lao, unai be Asia Minor dekenai.

¹⁸ Paulo be Kenekrea ai bouti amo ia lao neganai, Korinto ai ia noho negadia ia laloa lou. Oibe, ia moale dikadika badina unuseniai ia karaia gaukara namodia ia laloa lou. Hua 18 unuseni ia haroro neganai, anina namodia momo idia vara. Korinto ai, kongrigeisen ginigunana ia matamaia, bona Iusto ena ruma be edia hebou gabuna ai ia lao. Abidadama taudia ai idia lao taudia be, Iusto, Krisipo mai ena ruma bese, bona ma haida. Paulo ese unai abidadama matamata taudia ia lalokau henidia, badina idia ia durua Keristani taudia ai idia lao totona. Gabeai idia ia tore henia bona ia hamaorodia idia be revareva ta bamona, bona unai revareva ena toretore be ena kudouna dekenai idia noho. Ita danu ese ma haida ita durua tomadiho momokani idia abia dae neganai, idia be iseda tura namodia ai idia lao. Unai bamona taudia ita itaia neganai, ita moale bada!​—2 Kor. 3:1-3.

19, 20. Paulo be Efeso ai ia ginidae neganai, dahaka ia karaia, bona Dirava hesiai henia totona tahua gaudia ia atoa karana amo dahaka ita dibaia?

¹⁹ Paulo be Efeso dekenai ia ginidae neganai, maoromaoro ena gaukara ia hamatamaia. Ia be “sinagoga lalonai ia vareai bona Iuda taudia ida Toretore Helagadia ia herevalaia.” (Kara 18:19) To unai nega lalonai, ia be nega sisina sibona ia noho. Ena be tadikaka ese ia idia noia nega sisina daudau ia noho, to “edia ura ia abia dae lasi.” Efeso taudia ia bamahuta henia neganai, ia gwau: “Bema Iehova ia ura, umui dekenai do lau giroa lou.” (Kara 18:20, 21) Paulo ia diba, Efeso ena gabu momo ai idia do haroro lasi. Unai dainai dala ia karaia do ia giroa lou, to Iehova ena imana dekenai unai ia rakatania. Unai haheitalai namona ita laloatao be namo, ani? Namona be dala ita karaia bona iseda hesiai gaukara lalonai tahua gaudia ita atoa. To, namona be hanaihanai Iehova ena hakaua dalana ita tahua bona unai hegeregerena ita kara.​—Iam. 4:15.

²⁰ Paulo ese Akwila bona Prisikila be Efeso dekenai ia rakatania bona bouti amo Kaisarea dekenai ia diho lao. Bena Ierusalema dekenai “ia daekau lao” bona kongrigeisen taudia ia hanamoa. (Kara 18:22) Unai murinai, Paulo be ena hanua, Suria Antioka, dekenai ia giroa lou. Ena misinari laolaona iharuana ese anina namona ia havaraia. To ena laolao ginigabena ai, dahaka ia vara?