1, 2. (a) Paulo bona ena bamodia ese Efeso ai dahaka dika idia davaria? (b) Bona inai karoa ai dahaka do ita herevalaia?

 EFESO ena dala ibounai dekenai regerege be bada, hutuma idia boiboi badabada bona idia heau lao. Bona idia ibounai be gabu tamona ai idia haboua bona heiriheiri bada idia havaraia! Aposetolo Paulo ida idia gaukara hebou taudia rua idia dogoatao bona idia veria lao. Dala badana ai stoa momo idia noho, bona unuseni idia noho taudia ese unai hutuma idia bamoa bona taoni ena steidiam badana lalonai idia vareai. Unai steidiam ai taunimanima 25,000 idia helai diba. Taunimanima momo be unai regerege ena badina idia diba lasi, to sivarai sisina idia kamonai, haida ese edia dubu helaga bona hahine dirava, Diana, idia gwauraia dika. Unai dainai, idia boiboi badabada loulou, idia gwau: “Efeso taudia edia dirava hahinena Diana be hereadae!”​—Kara 19:34.

² Satani ese unai taudia ia gaukaralaia, Dirava ena Basileia ena sivarai namona harorolaia gaukarana koua totona. Oibe, Satani ese dagedage karana sibona ia gaukaralaia lasi. Inai karoa lalonai, ita ese Satani ia gaukaralaia tarapu haida do ita herevalaia—unai gaudia ese Keristani taudia ginigunadia edia gaukara bona lalotamona ia hadikaia. To do ita itaia, ia karaia gaudia ibounai lalonai ia kwalimu lasi, badina “Iehova ena siahu dainai ena hereva be ia bada ia lao bona ia goada.” (Kara 19:20) Dahaka dainai unai Keristani taudia idia kwalimu? Badina Iehova ese ia durudia, ita danu be unai badina dainai ita kwalimu. Oibe, unai kwalimu be iseda lasi, to Iehova ena. To, Keristani taudia ginigunadia bamona, iseda kahana ita karaia be namo. Iehova ena lauma ena heduru amo kara namodia do ita manadalaia, bona unai ese ita do ia durua eda hesiai gaukara ita karaia namonamo totona. Mani Apolo ena haheitalai ita laloa.

3, 4. Akwila bona Prisikila idia itaia Apolo be dahaka ia diba lasi, bona dahaka idia karaia?

³ Paulo ena misinari laolao ihatoina ai, Efeso dekenai ia lao noho  lalonai, Iuda tauna ladana Apolo be unai taoni dekenai ia ginidae. Ia be Aigupito ena taoni Alesandria amo. Ia be mai ena kara namodia haida. Oibe, ia be hereva namonamo tauna bona “Toretore Helagadia ia diba momo.” Ma danu, “lauma helaga ena siahu amo ia honu.” Bona mai gari lasi ida sinagoga lalonai Iuda taudia vairanai ia haroro.​—Kara 18:24, 25.

⁴ Akwila bona Prisikila ese Apolo ena hereva idia kamonai. Oibe, Apolo ese “mai maoromaoro ida Iesu ena sivarai” ia hadibaia neganai, idia moale bada. Iesu ia herevalaia dalana be maoro. To, unai Keristani tau bona hahine idia itaia, Apolo be mai anina bada gauna ta ia diba lasi. Ia be “Ioane ena bapatiso sibona ia diba.” Akwila bona Prisikila be palai ruma turia taudia, to Apolo ena hereva namonamo karana o edukeisen bada ese idia ia koua lasi, ia idia durua totona. To, “edia ruma dekenai ia idia hakaua lao bona Dirava ena dala be ia dekenai idia hadibaia namonamo.” (Kara 18:25, 26) Unai diba bada tauna be dahaka ia karaia? Apolo be Keristani tauna ese ia hahedinaraia mai anina bada karana ta ia hahedinaraia—ia manau.

5, 6. Dahaka dainai Iehova ese Apolo ia gaukaralaia, bona ena haheitalai amo dahaka ita dibaia?

⁵ Apolo ese Akwila bona Prisikila edia heduru ia abia dae dainai, Iehova ena hesiai tauna namona ta ai ia lao. Akaia dekenai ia lao bona unuseniai abidadama taudia ia “durua bada.” Bona ena be unai gabu ai idia noho Iuda taudia idia abia dae lasi Iesu be idia perovetalaia Mesiana, to idia dekenai haroro namona ia henia. Luka ia gwau: “Mai ura bada ida taunimanima vairanai ia hahedinaraia goevagoeva, Iuda taudia be idia kerere bona Toretore Helagadia amo ia hahedinaraia, Iesu be Keriso.” (Kara 18:27, 28) Oibe, Apolo be kongrigeisen durua tauna namona ai ia lao! Unai dainai “Iehova ena hereva” ia goada ia lao. Apolo ena haheitalai amo dahaka ita dibaia?

⁶ Keristani taudia ese manau karana idia hahedinaraia be gau badana. Ita ibounai ta ta be Dirava amo kara idauidau ita abia, ita haida ita vara neganai gau haida dekenai ita be mai eda diba, eiava mauri lalonai idia vara gaudia amo diba ita abia. Ena be ita be mai eda diba, to gau badana be manau karana ita hahedinaraia. Bema lasi, dika ita davaria diba. Oibe, eda kara namodia dainai, ita hekokoroku diba. (1 Kor. 4:7; Iam. 4:6) Bema ita manau momokani, do ita laloa ma haida ese ita idia hereaia. (Fili. 2:3) Eiava, ma haida ese eda kara idia hamaoromaoroa o gau haida dekenai ita idia hadibaia neganai, edia hereva do ita dadaraia lasi. Bona bema ita laloparara, iseda lalohadai be lauma helaga ena hakaua dalana amo ia idau, vadaeni eda lalohadai ita haidaua be namo. Ita ese manau karana ita hahedinaraia noho neganai, Iehova bona ena Natuna ese ita do idia gaukaralaia.​—Luka 1:51, 52.

7. Paulo bona Apolo ese edena dala ai manau karana dekenai haheitalai namona idia hahedinaraia?

⁷ Manau karana ese inai heheni karana ia koua danu. Mani oi laloa, Satani ia ura Keristani taudia ginigunadia ia hapararaia. Bema Apolo bona aposetolo Paulo idia inai heheni, bona reana kongrigeisen taudia edia lalonamo abia  totona idia kara helulu bona Satani ese unai ia itaia, reana do ia moale bada! Oibe, unai ia vara diba. Badina Korinto ai, Keristani taudia haida idia gwau, “lau be Paulo ena,” bona ma haida idia gwau, “lau be Apolo ena.” Paulo bona Apolo ese kongrigeisen idia hagoadaia idia parara totona, a? Lasi! Badina Paulo be mai manau ida Apolo ena gaukara ia durua, bona ia dekenai gaukara ma haida ia henia. Apolo ese Paulo ena hakaua dalana ia badinaia. (1 Kor. 1:10-12; 3:6, 9; Tito 3:12, 13) Mai manau ida idia gaukara hebou karana be haheitalai namona!

8. Paulo be edena dala amo Efeso dekenai ia giroa lou, bona dahaka dainai?

⁸ Paulo ia gwauhamata Efeso dekenai do ia giroa lou, bona ena hereva ia badinaia. a (Kara 18:20, 21) To, ia giroa lou dalana mani ita itaia. Karoa gunanai ia ita herevalaia neganai, ia be Antioka ai ia noho, unai be Suria dekenai. Efeso ai ia lao totona, Seleukia dekenai do ia lao guna, bena unuseniai bouti amo Efeso dekenai do ia lao. To, ia be “gunika gabudia dekenai ia hanaia lao.” Tahua gaukarana ta amo idia davaria, Kara 18:23 bona Kara 19:1 ese Paulo ia lao gabudia haida ia herevalaia, bona unai gabudia edia daudau be kilomita 1,600 bamona! Dahaka dainai Paulo ia ura unai laolao aukana ia karaia? Badina ia ura “hahediba taudia ibounai ia hagoadaia.” (Kara 18:23) Ena misinari laolao ihatoina ai gaukara bada ia karaia, ena laolao ginigunadia rua bamona, to ia diba unai be mai anina bada. Sekit naria taudia bona edia adavadia be unai bamona idia karaia danu. Sibona dadaraia lalokauna idia hahedinaraia dainai, idia ita tanikiu henidia, ani?

9. Dahaka dainai hahediba taudia haida idia bapatiso lou be namo, bona edia haheitalai amo dahaka ita dibaia?

⁹ Paulo be Efeso ai ia ginidae neganai, tatau ibounai 12 bamona bona Ioane Bapatiso ia hedavari henia. Idia be Ioane ese ia karaia bapatisona idia abia taudia, to unai bapatiso abia karana be ia ore vadaeni. Ma danu, idia be lauma helaga idia diba sisina. To Paulo ese idia dekenai Iesu ena ladanai bapatiso abia karana ena anina ia gwauraia hedinarai, bona Apolo bamona, idia manau bona idia ura diba ma haida idia abia. Iesu ena ladanai idia bapatiso murinai, lauma helaga idia abia bona gado idauidau ai idia hereva bona idia peroveta. Unai ese ia hahedinaraia, Iehova ena tiokratik oreana ena heau dalana badinaia karana ese hahenamo momo ia mailaia.​—Kara 19:1-7.

10. Dahaka dainai Paulo be sinagoga amo sikuli rumana dekenai ia lao, bona edena dala ai unai haheitalai ese haroro gaukara ai ita ia durua?

¹⁰ Dirava ena orea ia tubu dalana ma ta mani ita laloa. Paulo be mai gari lasi ida hua toi lalonai sinagoga ai ia haroro. Ena be “lalona veria dalanai Dirava ena Basileia ia herevalaia,” to haida idia ura lasi idia kamonai bona ena inai taudia ai idia lao. Paulo be “Lohiabada ena dala idia gwauraia dika” taudia dekenai  ena nega ia haorea lasi, to dala ia karaia, Turano ena sikuli rumana ai hereva ia henia totona. (Kara 19:8, 9) Idia ura hereva momokani lalonai idia goada idia lao taudia ese sinagoga idia rakatania bona sikuli rumana dekenai idia lao. Paulo bamona, bema ita itaia ruma tauna ia ura lasi kamonai eiava ia ura ia hepapahuahu sibona, vadaeni eda herevahereva ita hadokoa be namo. Badina mamoe bamona taudia momo idia noho, idia ura eda hagoadaia sivaraina idia kamonai!

11, 12. (a) Paulo ena gaukara goada bona haroro daladia haidaua karana dekenai, dahaka haheitalai namona ia hahedinaraia? (b) Edena dala ai Iehova ena Witnes taudia ese edia haroro gaukara ai, Paulo ena haheitalai idia tohotohoa?

¹¹ Paulo be reana dina ta ta ai unai sikuli gabunai ia haroro, 11:00 a.m. ela bona 4:00 p.m. bamona. (Kara 19:9) Ia be regerege lasi horadia ai ia hadibaia, to unai bamona negadiai dina ena siahu be bada, bona taunimanima be gaukara amo idia laga-ani bona idia aniani. Bema Paulo be lagani rua lalonai unai bamona sediual ia badinaia, reana ia ese hadibaia karana dekenai hora 3,000 mai kahana ia haorea diba. b Iehova ena hereva ia tubu bona ia kwalimu noho ena badina ma ta be inai: Paulo ia gaukara goada bona taunimanima edia noho dalana hegeregerena ena haroro daladia ia haidaua. Unai amo unuseniai idia noho taudia ia durua namonamo diba. Unai dainai, dahaka ia vara? “Asia provinsi dekenai idia noho Iuda bona Grik taudia ibounai ese Lohiabada ena hereva idia kamonai.” (Kara 19:10) Oibe, Paulo ese sivarai namona ia harorolaia guguru!

¹² Hari inai negai, Iehova ena Witnes taudia idia gaukara goada bona edia haroro daladia idia haidaua danu. Ita hekwarahi gabu bona nega idauidau ai taunimanima ita davaria totona. Ita be dala ai, maketi bona motuka atoa gabudiai ita haroro.  Bona telefon eiava revareva amo taunimanima ita haroro henia danu. Bona ruma-ta-ruma-ta gaukara ai, ita hekwarahi taunimanima be edia ruma ai idia noho negadiai ita davaria totona.

13, 14. (a) Iehova ese Paulo ia durua dahaka ia karaia totona? (b) Sikeva ena natudia memero be dahaka kerere idia karaia, bona edena dala ai Kerisendom taudia be unai bamona idia karaia?

¹³ Luka ia hahedinaraia, unai nega lalonai Iehova ena heduru amo, Paulo ese ena hesiai gaukara lalonai “siahu kara badadia” ia karaia. Paulo ena dabua bona muko danu be gorere taudia dekenai idia abia lao, bona unai ese edia gorere ia hanamoa. Lauma dikadia danu be unai dala amo idia lulua. c (Kara 19:11, 12) Unai kara ese Satani ena orea taudia ia halusia, to haida ese unai idia moalelaia lasi.

¹⁴ “Iuda taudia haida be vaia idia loaloa bona taunimanima amo demoni idia lulua,” idia ura Paulo bamona hoa karadia idia karaia. Idia ese Iesu bona Paulo edia ladana idia gaukaralaia toho, demoni idia lulua totona. Luka ese unai taudia haida ia gwauraia, Sikeva ena natuna memero 7—hahelaga besena amo—be unai bamona. Demoni be idia dekenai ia gwau: “Lau be Iesu bona Paulo lau diba, to umui be daika?” Bena lauma dikana ese ia biagua tauna be dagedage animal ta bamona idia latanai ia roho kau, ia heatu henidia, bona kopina kavakava idia heau siri, mai bero ida. (Kara 19:13-16) ‘Iehova ena hereva’ be ia goada unai. Badina Dirava ese Paulo dekenai ia henia siahuna bona tomadiho koikoi idia goadalaia taudia edia siahu ena idau ia hedinarai. Hari taunimanima milioni momo idia laloa Iesu ena ladana idia gwauraia, eiava sibona idia gwauraia “Keristani” be hegeregere, to unai be lalohadai kererena. Badina Iesu ia gwau, ena Tamana ena ura idia karaia taudia sibona ese vaira nega ena helaro korikorina do idia abia.​—Mat. 7:21-23.

15. Meamea karadia bona gaudia dekenai, edena dala ai Efeso taudia edia haheitalai ita tohotohoa diba?

¹⁵ Sikeva ena natudia edia hemarai sivaraina dainai, taunimanima momo be Dirava idia gari henia, bona unai ese momo ia durua abidadama taudia ai idia lao bona edia meamea karadia idia rakatania. Efeso taudia be meamea karadia  momo idia karaia. Gabu momo ai unai kara ia bada, bona sibona gimaia totona ageva idia gaukaralaia, bona meamea herevadia be buka ai idia torea. Efeso taudia ese edia meamea bukadia be taunimanima vairanai idia gabua, ena be moni tausen momo idia halusia unai buka idia hoia totona. d Luka ia gwau: “Danu Iehova ena siahu dainai ena hereva be ia bada ia lao bona ia goada.” (Kara 19:17-20) Oibe, hereva momokani be hereva koikoi bona demoni karadia amo ia kwalimu! Unai abidadama taudia be ita totona haheitalai namona idia hahedinaraia. Ita danu be meamea karadia momo idia karaia tanobadana lalonai ita noho. Bema ita dekenai meamea gauna ta ia noho, Efeso taudia bamona, maoromaoro unai gaudia ita negea be namo! Namona be unai bamona kara dika rohorohodia ita dadaraia momokani, herevana dahaka ia vara.

16, 17. (a) Efeso ai Demetrio ese heiriheiri ia havaraia dalana mani oi herevalaia. (b) Edena dala ai Efeso taudia ese tomadiho goadalaia karana idia hahedinaraia?

¹⁶ Luka ese Satani ena dala ta ia herevalaia neganai, ia gwau “Lohiabada ena dala dainai heiriheiri bada ia vara.” Luka ese unai ia herevalaia neganai, hereva haida ia atoa kau lasi. e (Kara 19:23) Siliva gaudia ia karaia tauna, Demetrio, ese heiriheiri ia havaraia. Ma haida edia lalona veria totona, ia hamaorodia kaivakuku hoihoilaia karana amo moni momo idia abia. To ia gwau Paulo ese ia harorolaia herevana dainai, edia bisinesi ena moni do idia halusia, badina Keristani taudia be kaivakuku idia tomadiho henia lasi. Bona ia diba idia be bese laloa bada taudia, unai dainai unai ia gaukaralaia bona ia hamaorodia edia dirava hahinena, Diana, bona edia ladana bada dubuna be “anina lasi.”​—Kara 19:24-27.  

¹⁷ Demetrio ena hereva amo ia ura gauna ia hagugurua. Siliva gaudia idia karaia taudia idia boiboi matamaia idia gwau, “Efeso taudia edia dirava hahinena Diana be hereadae!” Unai dainai taoni taudia idia daradara bada, bona inai karoa ena matamanai ita herevalaia gauna ia vara. f Paulo be sibona ena ura ia dadaraia tauna, badina ia ura steidiam lalonai ia raka vareai bona hutuma ia hereva henidia, to hahediba taudia idia ura lasi ia be dika ia davaria. Alesandria tauna ta be hutuma vairanai ia gini bona hereva ta ia gwauraia toho. Ia be Iuda tauna dainai, reana ia ura Iuda taudia bona Keristani taudia edia idau ia  herevalaia. To reana hutuma ese ena hereva idia laloa bada lasi. Idia itaia ia be Iuda tauna neganai, ena hereva koua totona, hora rua lalonai inai hereva “Efeso taudia edia dirava hahinena Diana be hereadae!” idia boiboilaia. Unai nega amo ema bona hari, tomadiho goadalaia karana be ia idau lasi. Unai kara dainai taunimanima ese laloa maoromaoro karana idia hahedinaraia lasi.​—Kara 19:28-34.  

18, 19. (a) Taoni naria tauna ese edena dala ai Efeso taudia edia heiriheiri ia hadokoa? (b) Dagi bada taudia ese edena dala ai Iehova ena taunimanima idia gimaia, to unai ia vara totona, dahaka ita karaia be namo?

¹⁸ Dokonai, taoni naria tauna ese hutuma edia heiriheiri karana ia hadokoa. Inai dagi bada tauna be laloa namonamo tauna, ia ese hutuma ia hamaoroa Keristani taudia ese edia dubu bona hahine diravana do idia hadikaia lasi, bona Paulo bona ena bamodia ese Diana ena dubu idia gwauraia dika lasi, bona dala maorona ia noho unai bamona gaudia idia hamaoromaoroa totona. Bona idia ia hamaoroa idia karaia karana be kerere bona Roma ena taravatu henunai panisi do idia abia, reana unai hereva dainai idia regerege lasi. Unai murinai, ia hamaorodia edia gabu ta ta dekenai do idia lao. Ena be idia badu, to ena hereva namodia dainai, edia badu ia ore.​—Kara 19:35-41.

¹⁹ Unai be nega ginigunana lasi, dagi bada tauna mai ena lalohadai namona ese Iesu ena murinai idia raka taudia ia gimaia, gabeai danu unai bamona do ia vara. Oibe, aposetolo Ioane be matahanai ta lalonai ia itaia, dina gabedia lalonai, inai tanobada ena orea goadadia—tanobada ese ia laulau unai—be Iesu ena murinai idia raka taudia idia dagedage henia karana do idia koua. (Apok. 12:15, 16) Bona unai ia vara momokani. Kota momo lalodiai, laloa namonamo diadi taudia ese Iehova ena Witnes taudia dekenai maoro idia henia edia hebou idia karaia bona ma haida dekenai sivarai namona idia gwauraia totona. Oibe, ita kwalimu totona, iseda kara be mai anina bada. Toana be Paulo ena kara namo dainai, Efeso ena gavamani ofesa haida ese ia idia matauraia, unai dainai dala idia karaia dika ia davaria lasi totona. (Kara 19:31) Namona be ita davaria taudia be mai momokani bona hemataurai ida ita kara henia, unai amo ita do idia lalonamo henia. Oibe, ita diba lasi iseda kara ese dahaka namo do ia havaraia.

20. (a) Aposetolo edia negai bona hari iseda negai, Iehova ena hereva ia tubu bona ia kwalimu karana be edena bamona oi laloa? (b) Iehova ena kwalimu karadia dainai, emu lalona oi hadaia dahaka oi karaia totona?

²⁰ Aposetolo edia negai, “Iehova ena hereva . . . be ia bada ia lao bona ia goada” dalana ita lalohadailaia karana ese ita ia hamoalea, ani? Unai hegeregerena, hari ita kwalimu badina Iehova ese ita ia durua, unai ita itaia dainai ita moale. Gau haida ita karaia diba Iehova ena orea ita durua ia kwalimu totona, a? Vadaeni, namona be ita herevalaia taudia edia haheitalai ita tohotohoa. Bona namona be oi manau, Iehova ena orea ida oi gaukara hebou, oi gaukara goada, meamea bona babalau karadia oi dadaraia, bona kara momokani bona hemataurai oi hahedinaraia noho, unai amo haroro namona oi henia diba.