1-4. Dahaka dainai Paulo be Ierusalema dekenai ia lao, bona unuseniai dahaka do ia davaria?

 PAULO bona Luka be Mileto idia rakatania neganai, tadikaka idia lalohisihisi bada. Oibe, idia ese Efeso elda taudia idia rakatania be auka, badina idia lalokau henidia bada! Unai misinari tadikaka rua be bouti ena patapata ai idia gini. Edia baege lalonai edia laolao dekenai do idia gaukaralaia gaudia idia udaia. Danu, Iudea ai idia noho ogogami tadikaka totona idia haboua monina idia dogoatao, bona idia ura bada unai moni be idia dekenai idia henia.

² Lai sisina ese bouti ena palai ia abia isi, bona bouti be wofu ia rakatania. Idia rua bona edia laolao turadia seven idia itaia edia tadikaka be kone dekenai idia gini, mai lalohisihisi ida. (Kara 20:4, 14, 15) Paulo bona ena bamodia ese edia turadia dekenai edia imana idia davedavea ela bona idia itadia lou lasi.

³ Lagani toi bamona lalonai, Paulo be Efeso elda taudia ida ia gaukara hebou. To lauma helaga ese ia hakaua dainai, Ierusalema dekenai do ia lao. Ia diba unuseniai hisihisi momo do ia davaria. Matamanai, ia ese Efeso elda taudia ia hamaoroa: “Lauma helaga ena hakaua hegeregerena Ierusalema dekenai lau lao, ena be unuseniai lau dekenai do ia vara gauna lau diba lasi. To siti ta ta dekenai lau lao neganai, lauma helaga ese lau ia hadibaia loulou, ia gwau dibura dekenai lau do idia atoa bona hisihisi momo do lau davaria.” (Kara 20:22, 23) Ena be Paulo be dika do ia davaria, to “lauma helaga ena hakaua hegeregerena” ia ura Ierusalema dekenai ia lao. Paulo be ena mauri ia laloa bada, to Dirava ena ura ia atoa guna.

⁴ Oi danu be unai bamona oi mamia, a? Iehova dekenai ita gwauhamata neganai, ita hahedinaraia Iena ura be iseda mauri lalonai do ita atoa guna. Aposetolo Paulo ena haheitalai namona ita laloa karana amo, namo ita abia diba.

5. Paulo bona ena bamodia be edena dala amo Turo dekenai idia lao?

⁵ Paulo bona ena bamodia idia guia bouti be ia “heau maoromaoro.” Anina be, lai ena toa hegeregerena ai bouti ia heau ela bona unai dina tamona  ai Kos dekenai ia ginidae. (Kara 21:1) Toana be unai hanuaboi ai bouti be Kos dekenai ia noho, bena murina dinana ai Roda bona Patara dekenai ia lao. Patara be Asia Minor ena saut kone kahanai ia noho hanuana, unuseniai Paulo bona ena bamodia be kago udaia bouti badana dekenai idia guia, bena maoromaoro Poinikia ena hanua, Turo, dekenai idia lao. Idia lao noho lalonai, “Kupro motumotu” idia heau hanaia, unai be edia “lauri kahanai.” (Kara 21:3) Dahaka dainai Kara bukana ia torea tauna, Luka, ese Kupro motumotu idia hanaia herevana ia gwauraia?

6. (a) Dahaka dainai Paulo ese Kupro motumotu ia itaia neganai, unai ese ia ia hagoadaia? (b) Iehova ese ita ia hanamoa bona durua dalana ita laloa karana amo, dahaka namo ita davaria?

⁶ Reana Paulo ese idia dekenai unai motumotu ai guna ia davaria sivaraidia ia herevalaia. Lagani nain gunanai ena misinari laolao ginigunana ai, Paulo, Banaba, bona Ioane Mareko ese meamea tauna, Eluma, idia davaria bona edia haroro gaukara dainai ia moale lasi. (Kara 13:4-12) Paulo ese unai motumotu ia itaia bona unuseniai ia vara gauna ia laloa karana ese reana ia ia hagoadaia, gabeai do idia vara gaudia ia haheaukalaia totona. Dirava ese ita ia hanamoa bona ita ia durua hahetoho ita haheaukalaia dalana ita laloa karana amo, goada ita davaria.  Bona unai ese ita ia durua Davida bamona ita laloa, ia gwau: “Kara maoromaoro tauna ese ia davaria hisihisi be momo, to idia ibounai amo Iehova ese ia hamauria.”​—Sal. 34:19.

7. Paulo bona ena bamodia be Turo ai idia ginidae neganai, dahaka idia karaia?

⁷ Paulo ia laloparara, Keristani hebamo karana be mai anina bada bona ia ura dikadika abidadama tamona taudia huanai ia noho. Turo dekenai idia ginidae neganai, Luka ia gwau, “hahediba taudia ai tahua bona ai davaridia.” (Kara 21:4) Paulo bona ena bamodia idia diba, Turo ai Keristani taudia idia noho dainai, idia tahudia bona reana idia ida idia noho. Iehova ita tomadiho henia ena hahenamo badana ta be inai: Herevana edeseni ita lao, to eda tadikaka ita davaria bona ita idia welkam henia. Dirava idia lalokau henia bona tomadiho momokani idia badinaia taudia edia turadia be tanobada hegegemadai idia noho.

8. Kara 21:4 ena anina be dahaka?

⁸ Luka ese Turo ai idia noho dina seven ia herevalaia neganai, toana be ia torea herevana ta ese matamanai daradara ia havaraia diba, ia gwau: “Lauma helaga ena heduru amo [Turo ai idia noho tadikaka] idia dibaia gaudia dainai, Paulo idia hamaoroa loulou Ierusalema dekenai do ia lao lasi.” (Kara 21:4) Iehova be ena lalona ia haidaua, a? Ia ese Paulo ia hadibaia Ierusalema dekenai do ia lao lasi, a? Lasi. Lauma helaga ese ia hahedinaraia, Ierusalema ai dagedage do ia davaria, to namo lasi unai ese ia koua unuseni ia lao totona. Toana be lauma helaga ena siahu amo, Turo ai idia noho tadikaka idia gwau, Paulo be Ierusalema ai dika do ia davaria. Oibe, Paulo idia laloa bada bona idia noia Ierusalema dekenai do ia lao lasi. Unai dainai ita laloparara, idia ura Paulo idia gimaia dainai, ia idia koua. To, Paulo be ena lalona ia hadaia Iehova ena ura ia karaia, unai dainai Ierusalema dekenai ia lao.​—Kara 21:12.

9, 10. (a) Paulo be Turo tadikaka edia lalohekwarahi herevadia ia kamonai neganai, dahaka ia laloa lou? (b) Tanobada taudia momo edia lalohadai badana be dahaka, bona edia lalohadai be Iesu ena hereva ida ia hegeregere, a?

⁹ Paulo be tadikaka edia lalohekwarahi herevadia ia kamonai neganai, reana Iesu dekenai ia vara gauna ia laloa lou. Iesu be ena hahediba taudia ia hamaoroa Ierusalema dekenai do ia lao, hisihisi momo do ia davaria bona do idia hamasea, unai dainai ena hahediba taudia ese idia koua. Petero be Iesu ia hebogahisi henia dainai, ia gwau: “Lohiabada e, oi sibona oi hebogahisi henia. Oi dekenai unai do ia vara lasi.” Iesu ia haere: “Satani e, egu murinai oi lao! Oi be hahekwakwanaia gauna lau dekenai, badina emu lalohadai be Dirava ena lalohadai lasi, to taunimanima edia.” (Mat. 16:21-23) Iesu be ena lalona ia hadaia, Dirava ese ia dekenai ia henia gaukarana ia karaia totona. Paulo danu be unai bamona ia laloa. Aposetolo Petero bamona, Turo ai idia noho tadikaka idia ura Paulo idia durua, to idia laloparara lasi unai be Dirava ena ura.

¹⁰ Hari, tanobada taudia momo idia ura auka lasi dalana idia abia hidi. Oibe, auka lasi tomadiho dalana idia tahua bona idia ura unai bamona tomadiho  lalonai taravatu momo idia noho lasi. To, Iesu ena laloa dalana be idau. Ena hahediba taudia ia hamaoroa: “Bema ta ia ura egu murinai ia raka, sibona ena ura ia dadaraia be namo bona ena hisihisi auna do ia huaia bona egu murinai do ia raka noho.” (Mat. 16:24) Iesu murinai ita raka be aonega karana bona dala maorona, to unai be mai ena hekwarahi.

11. Edena dala ai, Turo dekenai idia noho hahediba taudia ese Paulo idia durua bona lalokau henia?

¹¹ Nega ia ginidae Paulo, Luka bona edia bamodia idia lao totona. Baibel ia hahedinaraia, unai negai Turo tadikaka idia lalohisihisi bada. Unai amo ita itaia, Turo tadikaka ese Paulo bona ena bamodia idia lalokau henidia bona edia hesiai gaukara lalonai idia durudia bada. Tatau, hahine, bona natudia be Paulo bona ena bamodia ida kone dekenai idia lao. Idia ibounai idia tui diho bona idia guriguri hebou, bena idia bamahuta henidia. Unai murinai, Paulo, Luka, bona edia bamodia be bouti ma ta dekenai idia guia bona Tolemaia dekenai idia lao, unuseniai tadikaka idia davaria bona idia danu dina ta idia noho.​—Kara 21:5-7.

12, 13. (a) Edena dala ai, Filipo be mai abidadama ida lagani momo lalonai Iehova ia hesiai henia? (b) Keristani tamadia dekenai, edena dala ai Filipo be haheitalai namona?

¹² Gabeai, Luka ia gwau, Paulo bona ena bamodia be Kaisarea dekenai idia lao. Unuseniai, idia be ‘evanelia tauna Filipo ena ruma dekenai idia lao.’ a (Kara 21:8) Filipo idia itaia neganai, idia moale bada. Lagani 20 haida gunanai, Ierusalema ai aposetolo taudia ese Filipo idia abia hidi, Keristani kongrigeisen matamatana dekenai aniani hariharilaia gaukara ia naria totona. Filipo be nega daudau lalonai, evanelia gaukarana ia karaia. Laloatao, hahediba taudia be dagedage karana dainai, gabu idauidau dekenai idia lao neganai, Filipo be Samaria dekenai ia lao bona haroro gaukara ia karaia matamaia. Gabeai, ia ese Etiopia tauna, Eunuko, ia haroro henia bona ia bapatisoa. (Kara 6:2-6; 8:4-13, 26-38) Momokani, Filipo be mai abidadama ida lagani momo lalonai Iehova ia hesiai henia!

¹³ Filipo ena ura hesiai gaukara karaia totona be ia haboioa lasi. Kaisarea dekenai ia noho lalonai, ia be ena haroro gaukara dekenai ia bisi bada, unai dainai Luka ese ia gwauraia “evanelia tauna.” Danu ita diba ena natuna kekeni foa be idia peroveta, unai ese ia hahedinaraia idia be edia tamana ena haheitalai idia  tohotohoa. b (Kara 21:9) Filipo ia hekwarahi ena ruma bese edia hetura karana Iehova ida ia hagoadaia totona. Hari Keristani tamadia ese Filipo ena haheitalai idia tohotohoa, idia ese haroro gaukara idia atoa guna bona edia natudia idia durua evanelia gaukarana idia laloa bada totona.

14. Paulo ese ena tadikaka ia vadivadi henidia karana amo dahaka ia vara? Bona hari, dala ia noho unai bamona ita karaia totona, a?

¹⁴ Paulo be gabu ta ta dekenai ia lao neganai, tadikaka ia tahudia bona idia ida ia noho. Oibe, tadikaka be mai edia ura ida Paulo bona ena bamodia dekenai heabidae karana idia hahedinaraia. Unai bamona vadivadi karana amo ta ta ‘idia hagoadaia.’ (Roma 1:11, 12) Hari inai negai, dala ia noho unai bamona ita karaia totona. Hari danu, ena be emu ruma toana be ia namo lasi, to sekit naria tauna bona ena adavana oi abia dae neganai, hahenamo momo do oi abia.​—Roma 12:13.

15, 16. Agabo ese dahaka sivarai ia mailaia, bona idia kamonai taudia edia hemami be edena bamona?

¹⁵ Paulo be Filipo ida ia noho lalonai, vadivadi tauna ma ta, Agabo, ia ginidae. Filipo ena ruma ai idia hebou taudia idia diba Agabo be peroveta tauna; ia ese Klaudia ena lohia negana ai ia vara hitolo bada ia perovetalaia. (Kara 11:27, 28) Reana idia laloa: ‘Dahaka dainai Agabo ia mai? Dahaka sivarai ia mailaia?’ Idia itaia noho lalonai, ia ese Paulo ena beleta ia abia—ia be dabua latana ta bamona bona ia lalonai moni bona gau ma haida idia udaia. Agabo be unai beleta amo ena aena bona imana ia kwatua, bena ia hereva. Ia gwauraia herevana be mai anina bada, ia gwau: “Ierusalema ai, Iuda taudia ese inai beleta ena biaguna be inai bamona do idia kwatua, bona idau bese taudia edia imana dekenai do idia atoa.’”​—Kara 21:11.

¹⁶ Unai peroveta herevana ese ia hamomokania, Paulo be Ierusalema dekenai do ia lao. Danu ia hahedinaraia, Iuda taudia do ia haroro henia karana amo dala do ia kehoa ia be  “idau bese taudia edia imana dekenai do idia atoa.” Unai peroveta hereva idia kamonai taudia idia lalohisihisi bada. Luka ia gwau: “Unai ai kamonai neganai, ai bona unuseniai idia noho ese Paulo ai noia Ierusalema dekenai do ia daekau lasi. Bena Paulo ia haere: ‘Dahaka dainai umui taitai bona egu kudouna umui hamanokaia? Lau hegaegae vadaeni lau do idia kwatua sibona lasi, to danu, Lohiabada Iesu ena ladana dainai Ierusalema ai do lau mase.’”​—Kara 21:12, 13.

17, 18. Paulo be edena dala ai ia hahedinaraia ia ura momokani Dirava ia hesiai henia, bona tadikaka be dahaka idia karaia?

¹⁷ Ia vara gauna mani oi laloa. Luka bona tadikaka haida ese Paulo idia noia Ierusalema dekenai do ia lao lasi. Haida idia taitai bona ia totona hebogahisi bada idia hahedinaraia dainai, Paulo ia gwau idia ese ‘iena kudouna idia hamanokaia’ eiava Baibel haida ese unai Grik herevana idia hahanaia, idia ese “[iena] kudouna idia makohia.” To ena lalona ia hadaia vadaeni do ia lao, guna Turo tadikaka ia hedavari henia neganai, herevana idia taitai bona idia noia do ia lao lasi, to ena lalona ia haidaua lasi. Ierusalema dekenai do ia lao ena badina be idia dekenai ia herevalaia. Momokani, Paulo be lalogoada bona gari lasi karana ia hahedinaraia! Iesu bamona, Paulo be ena lalona ia hadaia Ierusalema dekenai do ia lao. (Heb. 12:2) Paulo be dala ia tahua lasi ena abidadama dainai do idia hamasea, to ia laloa Keriso Iesu murinai ia raka tauna ta bamona do ia mase be hahenamo badana.

¹⁸ Tadikaka be edena bamona idia kara? Mai hemataurai ida idia kara. Baibel ia gwau: “Paulo ena lalona ai haidaua diba lasi neganai, ia ai koua lasi bona ai gwau: ‘Iehova ena ura ia vara be namo.’” (Kara 21:14) Ena be tadikaka haida ese Paulo idia koua Ierusalema dekenai do ia lao lasi, to ia idia doria lasi edia lalohadai ia badinaia totona. Paulo ia herevalaia gaudia idia kamonai bona idia abia dae, badina idia laloparara unai be Iehova ena ura, ena be idia badinaia totona be auka. Paulo ia abia hidi mauri dalana ese gabeai ia dekenai mase ia mailaia. Bema Paulo idia lalokau henia taudia ese ena lalona idia hamanokaia lasi, reana do ia auka lasi unai laolao ia karaia totona.

19. Paulo dekenai ia vara gauna amo, dahaka mai anina bada gauna ita dibaia?

¹⁹ Paulo dekenai ia vara gauna amo ita dibaia mai anina bada gauna be inai: Dirava hesiai henia totona sibona edia ura idia dadaraia taudia edia lalona ita haidaua lasi. Unai hereva be noho daladia idauidau ai ita badinaia danu, mauri bona mase idia havaraia daladia sibona dekenai lasi. Hegeregere, Keristani tama sina momo dekenai ia auka, edia natudia be ruma idia rakatania bona Iehova hesiai henia totona gabu daudau idia lao, to namona be natudia edia lalona idia hamanokaia lasi. England ai ia noho taihu, Phyllis, ena natuna kekeni tamona be Africa ai misinari gaukara totona ia lao neganai, ia be sibona ena hemami ia gwauraia. Ia gwau: “Unai be lalohisihisi negana. Lau kamonai ia be gabu daudau do ia lao neganai, unai lau abia dae be auka. Egu natuna totona lau moale, to lau lalohisihisi danu. Unai lau gurigurilaia loulou. To unai be iena disisen, bona ia lau koua lasi. Badina hanaihanai ia lau hadibaia, Basileia gaudia ia atoa guna totona! Ia be lagani 30 lalonai idau tano ai hesiai gaukara ia karaia, bona ena abidadama karana dainai dina ibounai Iehova lau tanikiu henia.” Sibona edia ura idia dadaraia tadikaka taihu ita hagoadaia be kara namo hereana!

20, 21. Edena dala ai Paulo ia hahedinaraia ia ura ena tadikaka ida ia noho, bona dahaka dainai unai bamona ia karaia?

²⁰ Dala idia karaia dainai Paulo be ena laolao ia hadokoa lasi, tadikaka haida ese ia idia bamoa, unai amo idia hahedinaraia mai edia kudouna ibounai ida Paulo idia durua. Ierusalema dekenai idia lao noho lalonai, Paulo bona ena bamodia edia laga-ani gabudia ta ta dekenai, edia tadikaka taihu idia tahua. Turo dekenai hahediba taudia haida idia davaria bona idia ida dina seven idia noho. Tolemaia dekenai, edia tadikaka taihu idia hedavari henia bona idia ida dina tamona idia noho. Kaisarea dekenai, idia be Filipo ena ruma dekenai dina haida idia noho. Gabeai, Kaisarea amo hahediba taudia haida ese Paulo bona ena bamodia be Ierusalema dekenai idia hakaua lao, bona unuseniai hahediba tauna ta, Nasona, ena ruma dekenai idia lao. Dokonai, Ierusalema dekenai idia ginidae neganai, Luka ia gwau, “tadikaka ese mai moale ida ai idia abia dae.”​—Kara 21:17.

²¹ Ia hedinarai goevagoeva, Paulo ia ura abidadama tamona taudia ida ia noho hebou. Aposetolo Paulo be ena tadikaka bona taihu amo goada ia abia bamona, hari eda tadikaka taihu ese ita idia hagoadaia danu. Oibe, unai ese Paulo ia hagoadaia bada, unai dainai Ierusalema ai ia do idia dagedage henia bona hamasea taudia dekenai ia gari lasi.