1-6. Iehova ena Witnes taudia be dala idauidau ai idia haroro ena ekspiriens gwauraia.

 GHANA ai, Iehova ena Witnes kekeni ta, Rebecca, ia gwau ena sikuli gabuna be ena haroro teritori bamona ia laloa. Hanaihanai ena sikuli baege lalonai Baibel buka bona magasin ia udaia. Ena laga-ani negadiai, dala ia tahua ena sikuli turadia ia haroro henia totona. Rebecca be ena klas turadia haida ida Baibel stadi ia hamatamaia.

² Madagascar motumotu be Africa ena ist kahanai ia noho, painia rua be hanaihanai dina siahu ai, gunika hanuana ta dekenai idia raka lao, ena daudau be 25 kilomita. Unuseniai kamonai taudia haida ida Baibel stadi idia karaia.

³ Paraguay bona Paraná sinavai badinai idia noho taudia haroro henia totona, Paraguay Witnes taudia bona ma tano 15 amo idia mai tadikaka taihu idia gaukara hebou, bouti ta idia karaia totona. Unai bouti ena metau be 45 ton bona taunimanima 12 idia guia diba. Unai bouti amo, Basileia harorolaia goadagoada taudia ese guna idia haroro lasi gabudia dekenai, sivarai namona idia laohaia.

⁴ Alaska ena siahu negadia ai, turist taudia be unuseni idia lao, bona Witnes taudia ese idia haroro henidia. Bouti badadia ese tano idauidau taudia be unuseni idia abia lao. Bouti atoa gabuna kahirakahira dekenai, Witnes taudia ese gado idauidau Baibel buka bona magasin momo idia hariharilaia. Danu, unai gabu ai, peleini ta be gunika gabudia dekenai ia lao, unai amo gabu haida hegeregere Aleut, Athabascan, Tsimshian, bona Klinket dekenai sivarai namona idia laohaia.

⁵ America ena gabu ta, Texas ai, Larry be buruka taudia naria rumana dekenai ia noho, bona unai be iena teritori namona. Aksiden dainai wilsea dekenai ia helai, to ma haida dekenai Basileia ena sivarai bona Baibel ena helaro—Basileia ena lohia henunai do ia raka lou—ia herevalaia.​—Isa. 35:5, 6.

⁶ Witnes taudia haida be hebouhebou totona bouti ai idia guia, bona dina toi lalonai Mandalay amo Myanmar ena not kahanai idia lao.  Sivarai namona idia ura harorolaia dainai, pasendia ibounai dekenai Baibel buka bona magasin idia hariharilaia. Unai bouti be taoni o hanua haida dekenai ia stopu negadiai, pablisa be kara haraga idia diho bona unai gabudia dekenai buka bona magasin idia hariharilaidia. Danu, bouti dekenai pasendia matamata idia guia neganai, pablisa ese unai taudia idia haroro henidia.  

7. Iehova tomadiho henia taudia be Dirava ena Basileia idia harorolaia totona, edena haroro daladia idia gaukaralaia, bona edia tahua gauna be dahaka?

⁷ Unai tadikaka bona taihu edia haheitalai bamona, tanobada hegegemadai Iehova idia tomadiho henia taudia ese ‘Dirava ena Basileia idia gwauraia guguru.’ (Kara 28:23) Ruma-ta-ruma-ta, dala ai, leta toretore bona telefon amo taunimanima idia haroro henia. Herevana basi ai idia guia, idia loaloa, eiava moni gaukara gabunai, edia laga-ani horana ai, dala idia tahua Dirava ena Basileia idia harorolaia totona. Momokani, haroro daladia be idauidau, to tahua gauna tamona be, idia davaria taudia dekenai sivarai namona idia harorolaia.​—Mat. 10:11.

8, 9. (a) Dahaka dainai Basileia harorolaia gaukarana ia bada ia lao be hoa gauna? (b) Dahaka mai anina bada henanadai ia vara, bona dahaka do ita karaia ena haere davaria totona?

⁸ Inai buka oi duahia tauna e, hari tano 235 bamona ai Basileia idia harorolaia goadagoada taudia huanai oi noho, a? Bema oibe, oi moale be namo, badina Basileia gaukarana oi durua noho! Tanobada hegegemadai idia hagugurua gaukara badana ese ia hahedinaraia, unai be hoa gauna. Ena be Iehova ena Witnes taudia dekenai koua gaudia bona hekwakwanai—gavamani ese idia taravatua bona dagedage karadia—idia davaria, to taunimanima ibounai dekenai Dirava ena Basileia idia harorolaia guguru.

⁹ To mai anina bada henanadai be inai: Dahaka dainai koua gaudia bona Satani ena dagedage karadia idauidau ese Basileia harorolaia gaukarana ia koua diba lasi? Unai haerelaia totona, Keristani taudia ginigunadia ita laloa be namo. Badina ita, Iehova ena Witnes taudia, ese guna idia hamatamaia gaukarana ita karaia noho.

10. Iesu ena mauri lalonai dahaka gaukara ia karaia, bona ia sibona ese unai gaukara do ia karaia guguru, a?

¹⁰ Keristani kongrigeisen ia Hamatamaia Tauna, Iesu Keriso, be ena mauri ibounai lalonai Dirava ena Basileia ena sivarai namona ia harorolaia. Ia gwau: “Siti ma haida dekenai Dirava ena Basileia ena sivarai namona lau harorolaia danu be namo, unai karaia totona Dirava ese lau ia siaia.” (Luka 4:43) Iesu ia diba ia hamatamaia gaukarana be ia sibona ese do ia hagugurua lasi. Ia do mase lasi neganai ia peroveta, Basileia ena sivarai namona be “bese ibounai dekenai” do idia harorolaia. (Mar. 13:10) To edena dala ai, bona daidia ese do idia karaia?

11. Iesu ese ena hahediba taudia dekenai dahaka gaukara badana ia henia, bona dahaka heduru do idia abia?

 ¹¹ Iesu ia mase bona ia toreisi lou murinai, ena hahediba taudia dekenai hahegani badana ta ia henia, ia gwau: “Unai dainai umui lao, bese ibounai taudia be hahediba taudia ai umui halaoa, bona Tamana, Natuna, bona lauma helaga ladanai idia do umui bapatisoa, bona idia umui hadibaia, umui dekenai lau henia hahegani ibounai idia badinaia totona. Bona lau be dina iboudiai umui ida do lau noho ela bona inai nega oromana ena dokona.” (Mat. 28:19, 20) Inai hereva, “umui ida do lau noho” ena anina be, haroro bona hahediba gaukarana lalonai Iesu be idia do ia durua. Badina ia peroveta ‘bese ibounai ese idia do idia inai henia.’ (Mat. 24:9) To dala ma ta ai, hahediba taudia ese heduru do idia abia. Iesu be guba dekenai ia do lao lasi neganai, ena aposetolo taudia ia hamaorodia lauma helaga ese idia dekenai goada do ia henia, “tanobada ena daudau momokani gabudia dekenai” idia haroro totona.​—Kara 1:8.

12. Dahaka mai anina bada henanadai idia vara, bona dahaka dainai edia haere ita diba be namo?

¹² Mai anina bada henanadai haida idia vara: Aposetolo taudia bona hahediba taudia ginigunadia ma haida be Iesu ena hahegani idia laloa bada, a? Ena be dagedage bada ia vara, to unai Keristani tatau bona hahine edia grup maragina ese Dirava ena Basileia ia harorolaia guguru, a? Iesu, aneru, Iehova, bona iena lauma helaga ese idia ia durua, a? Kara bukana ese unai do ia haerelaia. Haere ita diba be mai anina bada. Dahaka dainai? Iesu ia gwauhamata, haroro gaukara be do idia karaia noho “ela bona inai nega oromana ena dokona.” Unai gaukara be inai nega dokona ai ita noho Keristani taudia ibounai ese do ita karaia danu. Unai dainai, ita ura bada Kara bukana lalonai ia noho sivaraidia ita dibaia.

13, 14. (a) Daika ese Kara bukana ia torea, bona ia torea sivaraidia be edeseni amo ia abia? (b) Kara bukana ese dahaka ia sivarailaia?

¹³ Kara bukana be daika ese ia torea? Inai buka ia torea tauna ena ladana be ia noho lasi, to ena hamatamaia hereva ese ia hahedinaraia, Kara bukana ia torea tauna ese Evanelia bukana, Luka, ia torea danu. (Luka 1:1-4; Kara 1:1, 2) Unai dainai, haida idia gwau, Luka ese Kara bukana ia torea. Ia be “momo ese idia lalokau henia doketa tauna” bona sivarai tahua namonamo tauna. (Kol. 4:14) Kara bukana ese lagani 28 lalonai idia vara gaudia ia sivarailaia. Unai be lagani 33 C.E., Iesu be guba dekenai ia daekau negana amo ela bona lagani 61 C.E. ai, Paulo be Roma ai idia hadiburaia negana. Luka ese matamanai inai hereva, “idia” ia gaukaralaia, to gabeai, “ai” ia gaukaralaia, unai ese ia hamomokania ia be unai nega ai ia noho danu. (Kara 16:8-10; 20:5; 27:1) Luka be sivarai ia tahua namonamo tauna dainai, Paulo, Banaba, Filipo, bona Kara bukana ese ia gwauraia taudia ma haida amo, hereva haida ia tahua bona ia torea.

 ¹⁴ Kara bukana ese dahaka ia sivarailaia? Guna, Luka ese Evanelia bukana ia torea neganai, Iesu ena hereva bona ia karaia gaudia ia torea. To Kara bukana lalonai, ia ese Iesu murinai idia raka taudia edia hereva bona idia karaia gaudia ia torea. Kara bukana ese gaukara badana idia hagugurua taudia ia sivarailaia, ena be haida ese idia be “sikuli bada lasi bona dagi lasi taudia” bamona idia laloa. (Kara 4:13) To Luka ia torea bukana ese Keristani kongrigeisen ia matamaia bona ia tubu dalana ia sivarailaia. Bona Keristani taudia ginigunadia edia haroro daladia bona edia lalohadai unai gaukara dekenai ia herevalaia. (Kara 4:31; 5:42) Lauma helaga ena heduru amo sivarai namona ia bada ia lao karana ia herevalaia danu. (Kara 8:29, 39, 40; 13:1-3; 16:6; 18:24, 25) Kara bukana ese Dirava ena Basileia, Keriso ese ia lohiaia gauna amo Iehova ese ena ladana do ia hahelagaia, bona dagedage bada negana lalonai, Basileia sivaraina be gabu momo dekenai ia lao dalana ia herevalaia.​—Kara 8:12; 19:8; 28:30, 31.

15. Kara bukana stadilaia amo edena dala haida ai namo ita davaria diba?

¹⁵ Momokani, Kara bukana stadilaia karana ese iseda abidadama ia hagoadaia bona ita ia hamoalea bada! Keriso murinai idia raka taudia ginigunadia be mai gari lasi ida edia gaukara idia karaia, bona edia sivarai ita laloa neganai, iseda kudouna do ia hamarerea bada. Bona do ita ura iseda Keristani tadikaka taihu ginigunadia edia abidadama ita tohotohoa. Unai amo do ita hegeregere momokani, ‘ibounai be hahediba taudia ai ita halaoa’ gaukarana ita hagugurua totona. Hari oi duahia pablikeisen idia karaia badina unai ese oi do ia durua, Kara bukana oi stadilaia namonamo totona.

16. Inai buka idia karaia ena badina toi be dahaka?

¹⁶ Inai buka idia karaia ena badina badana be dahaka? Ena badina toi be inai, (1) do ita diba momokani, Iehova ese ena lauma helaga amo Basileia harorolaia bona hahediba taudia halaoa gaukarana ia durua, (2) Keriso murinai idia raka taudia edia haheitalai ita laloa karana ese iseda ura haroro gaukara dekenai do ia habadaia, bona (3)  Iehova ena orea, haroro gaukara gunalaia taudia, bona kongrigeisen naria taudia matauraia karana ita habadaia.

17, 18. Inai buka be edena dala ai idia karaia, bona sibona emu Baibel stadi karana lalonai, edena kahana ese oi do ia durua?

¹⁷ Inai buka be edena dala ai idia hegaegaelaia? Do oi itaia inai buka be kahana eit dekenai idia haria, bona Kara bukana ia sivarailaia. Inai buka edia karoa ese Kara bukana ena siri ta ta ia herevalaia lasi, to ena sivarai amo diba do ita abia, bona ita do ia durua ita dibaia gaudia be iseda mauri lalonai ita badinaia totona. Karoa ta ta be mai ena hereva kwarana, bona henunai karoa ena point badana ia noho bona unai karoa lalonai do ita herevalaia Baibel siri ia noho danu.

¹⁸ Inai buka ai idia noho kahana haida ese oi do ia durua sibona emu Baibel  stadi oi karaia namonamo totona. Laulau mai hairaidia ese Kara bukana ena sivarai idia hahedinaraia namo herea, unai amo emu lalona ai Baibel ena sivarai oi piksaia. Karoa ena maua haida ese Baibel lalonai idia noho abidadama taudia haida edia sivarai ia herevalaia, unai amo edia haheitalai ita tohotohoa. Bona maua haida be Kara bukana ese ia gwauraia gabu, idia vara gaudia, kastom bona taunimanima ma haida ia herevalaia.

19. Edena henanadai ese ita do ia durua, nega ta ta ai sibona eda kara ita tahua namonamo totona?

¹⁹ Inai buka ese oi ia durua diba sibona emu kara oi tahua namonamo totona. Ena be lagani daudau Basileia sivaraina oi harorolaia. To namona be nega oi atoa emu mauri lalonai oi atoa guna gaudia, bona Keristani hesiai gaukara oi sekea lou. (2 Kor. 13:5) Sibona oi nanadaia: ‘Egu haroro gaukara ai Dirava ena dina be kahirakahira do ia mai lalohadaina lau hahedinaraia, a? (1 Kor. 7:29-31) Mai ura bada bona goada ida sivarai namona lau harorolaia, a? (1 Tes. 1:5, 6) Haroro bona hahediba taudia halaoa gaukarana lau karaia badabada, a?’​—Kol. 3:23.

20, 21. Dahaka dainai mai karaharaga lalohadaina ida ita gaukara, bona lalona ita hadaia dahaka ita karaia totona?

²⁰ Namona be ita abia hahegani ita laloatao, iseda gaukara badana be haroro bona hahediba taudia halaoa gaukarana. Dina ta ta ia hanaia noho lalonai, ita ura unai gaukara ita karaia goadagoada. Inai nega oromana ena dokona be ia mai haraga noho. Momo be edia mauri idia haboioa diba. Ita diba lasi, kudou-maoro taudia hida be sivarai namona do idia abia dae. (Kara 13:48) To nega ia do noho lalonai, iseda maduna be unai bamona taudia ita durua.​—1 Tim. 4:16.

²¹ Gau badana be Basileia idia harorolaia goadagoada taudia ginigunadia ita tohotohoa. Namona be inai buka oi stadilaia namonamo, unai ese oi do ia durua mai ura bada bona gari lasi ida oi haroro totona. Bona namona be emu lalona oi hadaia, ‘Dirava ena Basileia oi gwauraia guguru’ totona.​—Kara 28:23.