LAGATOI murimurinai idia noho taudia ese edia kara idia haidaua lasi. Idia do abia dae lasi Abata do ia mai. Reana idia kiri badabada. To nega sisina murinai edia kiri idia hadokoa.

Karaharaga medu ia diho matamaia. Guba amo ia diho badabada, ranu be baketi amo oi bubua bamona. Noa ena hereva be momokani! To hari nega be lasi tau ta be lagatoi lalonai ia vareai totona. Iehova ese iduara ia koua auka vadaeni.

Nega sisina murinai ranu ese tano palaka ia koua. Ranu be sinavai badadia bamona ia aru lao. Au bona nadi badadia ia kokidia bona regerege bada ia karaia. Taunimanima be idia gari. Ororo dekenai idia heau daekau. Madi, bema Noa ena hereva idia kamonai henia bona iduara ia do kehoa neganai lagatoi lalonai idia vareai, idia mauri diba! To hari ia leiti vadaeni.

Ranu be ia daekau noho. Dina 40 bona hanuaboi 40 lalonai ranu be guba amo ia diho. Ororo badinai ia daekau, ela bona ororo badadia ia koua momokani. Dirava ena hereva hegeregerena, lagatoi murimurinai idia noho taudia bona animal ibounai idia mase. To lagatoi lalonai idia noho taudia ibounai idia mauri.

Noa bona ena natudia ese lagatoi idia karaia namo herea. Ranu ese ia abia isi, bena ranu kopina latanai ia hure. Bena dina ta, medu ia ore murinai dina ia hedinarai. Unai be hoa bada herea gauna! Davara ese tano ibounai ia koua to lagatoi sibona be davara latanai ia hure.

Tatau badadia be idia noho lasi. Taunimanima idia hahisia lou diba lasi. Idia ibounai idia mase, edia sinadia bona taunimanima dikadia ibounai danu. To edia tamadia dekenai dahaka ia vara?

Unai tatau badadia edia tamadia be ita taunimanima bamona lasi. Idia be aneru bona guba amo idia diho mai tanobada dekenai taunimanima bamona idia noho totona. Unai dainai Abata ia mai neganai idia be tanobada taudia danu idia mase lasi. Idia karaia tauanina idia rakatania bona guba dekenai idia giroa lou aneru bamona. To idia be Dirava ena aneru oreana lalonai idia vareai lou diba lasi. Unai dainai idia be Satani ena aneru ai idia lao. Baibel ese idia ia gwauraia demoni.

Dirava ese lai ia siaia bona abata ena ranu ia diho matamaia. Hua faiv murinai lagatoi be ororo ta latanai ia helai. Dina momo idia ore murinai, lagatoi lalonai idia noho taudia ese ororo haida idia itaia diba. Ranu be ia diho lao noho.

Bena Noa ese manu koremana ta ladana galo ia siaia lao. Nega sisina ia roho loaloa bena ia giroa, badina helai gabu namona ta ia davaria lasi. Unai bamona ia karaia loulou, bona ia giroa negadia ta ta ai lagatoi latanai ia laga-ani.

To Noa ia ura diba, bema ranu be tano amo ia diho vadaeni, unai dainai pune ta ma ia siaia lao. To pune danu ia giroa badina noho gabuna ta ia davaria lasi. Nega iharuana Noa ese ia siaia lao, bona olive rau ta be iena uduna dekenai ia abia mai. Unai amo Noa ia diba ranu be ia diho vadaeni. Nega ihatoina Noa ese pune ia siaia lao neganai gabu kaukauna ta ia davaria.

Dirava ese Noa ia hereva henia. Ia gwau: ‘Lagatoi dekena amo oi diho. Emu ruma bese ibounai bona animal danu oi abidia raka-lasi.’ Lagani ta mai kahana idia be lagatoi lalonai idia noho. Unai dainai ita diba murimuri dekenai idia raka-lasi bona idia mauri dainai idia ibounai idia moale bada!